Na auina mai e le Tama Faalelagi se Faamanatu

Carol Whitaker

Oregon, ISA

Ina ua tuanai le 11 tausaga o tauivi ma le gasegase o le mafaufau (dementia), na maliu ai lo’u toalua. Mo au, o lona maliu sa faanoanoa toe fiafia foi. Sa fai au ma ana tausimai, uo, ma le pele ia te ia, ma e ui ina sa ou fiafia ua le toe mafatia o ia, ua ou matua misia lava o ia. Na ou manatu sa ou malamalama e uiga i le lotomomomo, ae o le faanoanoa ma le lagona o le leiloa ua tuua au i le ala sa ou le mautinoa o le a ou oo i ai.

Ona o lou faanoanoa ma le maofa, ua oo mai ai lagona leaga i lou olaga. Sa ou lagona le le amanaiaina o au, le aoga, ma ua le iloa e aiga, uo, ma tagata o le uarota. Sa ou nopiai i le le fiafia ma lagona le matau’a i isi.

I se tasi Aso Sa, sa ou nofo ai i tua o le falesa. Sa ou vaai i se uso faiuo ma le tautalatala o feiloai ma isi tagata o le uarota. Sa agaalofa ma lima foai i tagata uma lava.

“Ae peitai,” sa ou manatu ifo, “sa ia le fesili lava poo faapefea mai au, sa ia le faamafanafana mai ia te au, sa ia le faamaonia le faigata o le maliu o lou toalua ia te au!”

Sa faaauau pea nei mafaufauga leaga a o amata le pese o le faamanatuga. Sa ou lagona e le tatau ona ou tagofia le faamanatuuga a o i ai nei lagona matau’a i lou loto.

“E ao ona e saili mo se fesoasoani ina ia aveesea ai nei lagona nei!” Sa ou mafaufau ai.

Sa ou tatalo ina ia tafiesea le pogisa. Sa le tatau ona tuuaia lenei uso i lou matau’a itiiti lava. Sa ou tatalo mo se faamagaloga ma se fesoasoani e aveesea ai lou loto matau’a. E oo i le taimi ua tu mai ai le tiakono i ou luma ma le fata o le faamanatuga, sa ou lagona e mafai ona ou tagofia le faamanatuga. I le taualumaga o le vaiaso na sosoo ai, sa ou tatalo pea mo se taitaiga.

I le Aso Sa na sosoo ai, sa ou savali atu i le potu o i luma ma iloa atu le fafine sa ou taulai i ai i le vaiaso ua tuanai.

“Oi, Carol!” sa ia fai mai ai. “Sa ou mafaufau pea lava ia te oe! E na ona ou mafaufau i le faigata o mea sa faafeagai ma oe. Sa fai oe ma tausi gasegase a lou toalua mo se taimi umi. O se suiga faigata lenei mo oe. O a mai oe?

Sa ma talanoa mo ni nai minute, ma sa ia fusi mai ia te au i se auala matagofie lava. Sa ou le maugagana. Sa ou nofo ifo i lou nofoa masani i le falesa ma le ataata lapoa lava. I le taimi lava lena, sa ou faafetai ai i lo’u Tama oi le Lagi. Ua ia auina mai i lenei uso lelei se faamanatu ina ia fai mai upu sa ou manao e faalogo i ai. E mai lena taimi, sa ou lagona ai o le Tama Faalelagi e manatu mai ia te au. Ua ia aumai ia te au le malosi e feagai ai ma le “tulaga fou” ua amatalia i lou olaga.