Ou te manatua pea agasala ua ou salamo ai, ma ou te lagona le tausalaina. Aisea e le mafai ai ona galo aʻu agasala?

Ketesemane, Ata na tusia e Michael Malm

O le Togiola a Iesu Keriso ua alagatatau ai le faamagaloga pe afai tatou te salamo. O le salamo moni e aofia ai le lotomaulalo, tautau atu, lafoai i agasala, ma le tautinoga e tausi i poloaiga.

Ua fetalai mai le Alii, “Faauta, o le ua salamo i ana agasala e faamagaloina o ia, ma o au le Alii, ou te le toe manatua lava” (MF&F 58:42). Ae faapefea pe afai o lo tatou manatua pea o a tatou agasala ua faamalumalu mai pea ia i tatou? Na aoao mai e Elder Dieter F. Uchtdorf o le Korama a Aposetolo e Toasefululua: “E lei folafola mai e le Atua e faapea tatou te le toe manatua a tatou agasala. O le manatuaina o le a fesoasoani ia i tatou e aloese mai ai i le toe faia o mea sese lava na. Peitai, afai tatou te tumau i le moni ma le faamaoni, o le a oo ina faaitiitia le manatuaina o a tatou agasala i le gasologa o le taimi. O lenei mea o le a avea ma se vaega manaomia o le faagasologa o le faamalologa ma le faapaiaga” (“Vaega Tonu o le Toe Foi Saogalemu,” Liahona, Me 2007, 101).

Pe afai tatou te salamo ma le faamaoni ma taulai atu e mulimuli i le Faaola, o le a fai le Agaga Paia ma o tatou soa ma o le a avea i tatou ma e alolofa ma auauna atu i isi. O le tui o le maasiasi o le a suia e le faafetai ma le faamoemoe. Ma o le a tatou viia le Atua mo lona agalelei, alofa, ma le alofa mutimutivale.