O Se Folafolaga e Taumafai
E alaala le tusitala i Iuta, ISA.
“Ina ia papatisoina e pei o Iesu … o se mea ou te manao e fai” (Tusipese a Tamaiti, 104).
Na goto malie ifo le la a o tietie Tatsuki i lana uila i le fale. E fiafia o ia e vili faavavevave ifo i le mauga laitiiti i tafatafa o lona aiga, ae manaomia lona toe foi ae a o le i pogisa.
A o taofiofi lana uila ina ia tu, na ia iloa atu lana faiaoga o le Peraimeri, Sister Yamada, o savali atu i lona fale mau totogi.
“Talofa Tatsuki,” na faapea atu ai Sister Yamada ma le ataata. “Ua ou sau e talanoa i lou papatisoga.”
Ua amata ona toe foi mai le aiga o Tatsuki i le lotu. E fiafia i le iai faatasi ma ana uo i le Peraimeri, ma ua matua fiafia lava e papatisoina! Na o atu faatasi Sister Yamada ma Tatsuki i le eleveita ma faatasi ai ma lona tina i le fale mau totogi.
‘Tatsuki, ou te fiafia tele ua e filifili e mulimuli ia Iesu Keriso e ala i le papatisoga,” na fai mai ai Sister Yamada. “Pe a papatisoina i tatou, tatou te osia feagaiga ma le Tama Faalelagi. E te iloa o le a le feagaiga?”
Sa leiloa e Tatsuki o le a fesili mai Sister Yamada ia te ia. Sa amata ona ia lagona se popole laitiiti. Ae sa ataata faamalosiau lona tina.
“Folafolaga?” sa ia fesili matamuli ai.
“E sa’o lena!” Sa faapea mai Sister Yamada. “Ua folafola mai e le Tama Faalelagi tatou te maua pea le Agaga Paia ma i tatou. E te iloa le mea na tatou folafola atu i le Tama Faalelagi?”
Na lulu le ulu o Tatsuki. “Ou te le iloa.”
“O le a ou tuuina atu se faailo--o folafolaga o lo o i tatalo tatou te faalogo iai a o le i tagofia le faamanatuga,” na fai mai ai Sister Yamada. “Ua tatou folafola atu i le Tama Faalelagi tatou te loto ina ia ave i o tatou luga le suafa o Iesu Keriso ma manatua pea o Ia ma tausi i Ana poloaiga. E te iloa le uiga e ave i o tatou luga le suafa o Iesu?”
Na lulu le ulu o Tatsuki. Na fesoasoani Tina ia te ia. “O lona uiga ua tatou fiafia e faapea atu o i tatou o tagata o Le Ekalesia a Iesu Keriso o le Au Paia o Aso e Gata Ai,” na ia fai mai ai. “O lona uiga o le a tatou faia mea e fai e le Faaola pe ana fai o iinei o Ia.”
“O a ituaiga o mea e faia e Iesu?” Sa fesili ai Tatsuki.
“E agalelei Iesu i tagata. O le a fesoasoani o Ia i tagata o e faanoanoa pe mamai,” na faapea mai ai Sister Yamada. “Ma e aoaoina e Ia tagata i le auala e mulimuli ai i poloaiga.”
Sa iai ia Tatsuki se lagona le mautonu i lona loto. Na amata ona ia faanounou ma faapea mai, “Ou te le manatu e mafai ona ou papatiso.”
“Aisea?” O le fesili lea a tina.
“E tele naua folafolaga! Ou te le manatu e mafai ona ou faapei o Iesu i aso uma!.”
Sa fusi e tina ia Tatsuki. “Manatua ina ua e fesoasoani ia Yuna ona ua tagi o ia ananafi?”
Sa luelue le ulu o Tatsuki. Sa faanoanoa lona tuafafine, o lea sa faia ai e ia ni foliga malie ma taaalo ma ia seia toe fiafia o ia.
“Ma manatua ina ua e fesoasoani i ou tausoga e faasoa ma faalelei o le tasi i le isi i le vaiaso ua tea? Ina ua e faia o lena, sa e mulimuli ia Iesu.”
Sa leiloa e Tatsuki le uiga o le mulimuli ia Iesu. Sa amata ona ia lagona fiafia laitiiti. Na te mafai ona faia mea na!
Na faapea mai Sister Yamada, “Ma pe a tatou faia se mea sese, e mafai ona tatou salamo. O lona uiga e mafai ona tatou faapea matou te faamalie atu ma toe taumafai e faaleleia. Pe a tatou salamo, e faamagalo e le Tama Faalelagi i tatou. E tatau ona tatou taumafai pea!”
Na le toe lagona popole Tatsuki. Sa ia lagona le fiafia.
“Ou te manao ina ia papatisoina au!” na ia fai mai ai.
Sa ataata Tina ma Sister Yamada. Na tuuina atu e Sister Yamada ia Tatsuki se Tusi a Mamona ma lona igoa o lo o tusia ai. Sa lagona e Tatsuki le fiafia e mafai ona ia taumafai i aso taitasi. O lenei ua le mafai ona faatali e papatiso! ●