Fautuaga e 10 mo le Aoaoina o le Salamo

O le salamo o nisi o taimi e foliga e taufaafefe pe fenumiai i tamaiti ma le autalavou. O nisi nei o motugaafa mo le aoaoina atu o le salamo i se auala alofa ma le faamalosiau.

Ia Faafaigofie. E mafai ona e aoao atu lau fanau e faapea “pe a tatou agasala, ua tatou liliuese mai le Atua,” ae pe a “tatou salamo, ua tatou toe liliu atu i le Atua.”¹ E mafai ona tatou toe foi atu i le Atua e ala i le iloa o mea sese, faia mea saʻo, ma taumafai malosi e fai ia sili atu.
Taulai atu i mea lelei. Po o le a lava, o le salamo e masani ona lelei.”² E le o se faasalaga mo se amioga leaga, o le avanoa e toe taumafai ai ma faalatalata atu i le Atua. Fautuaina lau fanau e mafaufau i mea o lo o sao ona latou faia ma le auala latou te faia atili ai mea faapena.
Faamamafa atu le aso uma. O le salamo e mo agasala laiti e faapei foi o agasala lapopoa. O le salamo i aso uma o lona uiga o le faasaoga faifaipea, e faapei o se vaa o loo tutumau i lona alavaa. Fesoasoani i lau fanau ia iloa auala laiti e mafai ai ona latou alualu i luma i aso taitasi.
Ia iai se avanoa mo measese. Fesoasoani i lau fanau e malamalama o measese e mafai o se vaega o le aoaoina. Tuu ia i latou le avanoa e feagai ai ma taunuuga o a latou filifiliga ma fesoasoani ina ia latou faavasega le ala e toe faia ai le mea tonu. Aoao i latou e liliu atu i le Atua mo se fesoasoani.
Avea ma se faataitaiga. Faailoa atu pe afai e te faia mea sese. Ia lava le loto maualalo e faatoese ai i ma luma o lau fanau. Ia latou vaai o lo o e taumafai e faaleleia tulaga, ma faasoa atu lau molimau i le ala na fesoasoani ai le Faaola e suia oe.
Faapatino ona faia. A o e aoao atu lau fanau i mataupu faavae o le salamo,³ ia mautinoa o le faagasologa o le salamo o le a le tutusa mo tagata taitasi i taimi uma. E le o se faasologa o ni pusa e faasao pe a maea ona fai, o se faasologa faifaipea o le soifuaga. E faatatau i le manaoga o o tatou loto ma le auala tatou te taumafai ai e faaogatusa i tatou lava ma le Faaola. E mafai ona tatou iloa ua tatou salamo faamaoni pe a tatou lagonaina le filemu, olioli, ma le faamagaloga.
Vaai Mamao. E faigofie ona lagona le faavaivai pe a e toe faia filifiliga leaga i le tele o taimi. Aoao atu lau fanau afai lava latou te salamo pea, o le a faamagaloina pea lava i latou e le Atua (tagai Moronae 6:8). Faamatala atu o le taumafai o le mea e sili ona taua. E auala mai i lo tatou taumafai ma tuuese le tagata o le agasala (tagai Mosaea 3:19) ina ia avea atili ai i tatou e faapei o le Atua.
Faatusatusa i le va o le lagona tausalaina ma le maasiasi. “O le tiga e tusa i le Atua” e tupu ai le salamo (tagai 2 Koronito 7:9–10). Ae afai e lagona e lau fanau le le agavaa po o le leai o se faamoemoe e ui ina ua uma ona salamo, o le maasiasi o le a fai ma mafuaaga⁴ “Faamanatu ia i latou e alofa pea lava pea le Tama Faalelagi ia i latou ma pe a tatou salamo, o le a faaitiitia lo tatou agavaa, ae le faaitiitia ai lava lo tatou taua!”⁵ Pe a talafeagai ai, fuafua e talanoa ma lau epikopo po o se faufautua faapolofesa.
Malamalama i le Togiola a le Faaola. Aoao atu lau fanau o Iesu Keriso sa togiola e le na o a tatou agasala ae mo o tatou puapuaga uma (tagai Alema 7:11–12). Faamautinoa atu i lau fanau “e le o tuuaia i latou ona o amioga faataumaoi a isi.”⁶ O tagata e afaina i sauaga e mama atoatoa; fesoasoani ia latou liliu atu i le Faaola mo le filemu ma le faamalologa.
Ia tepataulai e le aunoa i le Faaola. Aoao atu lau fanau e malamalama le Faaola i mea o lo o latou atugalu ai ma e mafai ona fesoasoai ia latou foia ai. Molimau atu ia te Ia e le aunoa i lou aiga. Uunai lau fanau e tatalo, auauna atu, suesue i tusitusiga paia, ma faia isi mea e fesoasoani ia i latou e iloa atili ai o Ia ina ia latou saili pea Lana fesoasoani e lofituina ai o latou vaivaiga. ◼