Auaunaga i Auala Laiti

Saunia e Katie Embley

Mekasini a le Ekalesia

O nisi taimi ua na o se mea laitiiti e mafai ona faia ai se eseesega tele.

“O a mai oe?”

Ou te mautinoa sa fesiligia e le tamaloa o loo tu i tua o le masini ta faatau ni tagata se toasefululua i lena aso. O se tamai pamu penisini laitiiti, ma sa ou taumafai e faatopetope ma faatau se fagu vai ma toe alu i le taavale. Ae o lenei fesili masani—i le taimi lea—na ese lava. Sa leai sona iloaina o lou manaomia tele ona ou faalogo atu i na upu faigofie.

Sa leai sona iloaina sa ou afea totonu o lenei pamu penisini aua sa le mafai ona ou iloa atu le auala i o’u loimata.

Sa leai sona iloaina o le tele o le tiga sa ou oo i ai po o le faigata tele mo au ia maua le malosi e sau ai i totonu.

Sa leai sona iloaina o lou tiga tele ina ua le amanaiaina e tagata uma i le pamu penisini le tilotilo sao mai ia te a’u ma o’u foliga ua susū i loimata.

“O a mai oe?” sa ia fesili mai ia te a’u, ma le popole moni i ona mata ma lona leo. Sa ou taumafai e faailoa atu se ataata faafetai ao ou taumafai e taofi ou loimata ua faaputuputu i ou mata—o loimata ia o loimata o le faafetai.

“Lea ou te OK,” sa ou tali atu ma le faamaoni. Ona o lea ua i ai se tagata sa lava lona agalelei na te iloaina ai au ma lo’u tauiviga, sa ou lagona le OK.

Taua Tele

O le talanoaina e uiga i le auaunaga e mafai ona lofituina. Ou te faalogo i tala fiafia o poloketi o fesoasoani agaalofa i le lalolagi atoa ma tala e uiga i tagata sa tuuto atu o latou olaga i ni faamoemoega taua. Ma e ui lava ina ou faafetai mo o latou osigataulaga, o na tala e masani ona i ai faatasi ma se lagona o le tausalaina. Ou te iloa le taua tele o le auauna atu. Ma e sili atu i lo lena—ua ou iloaina lou fiafia tele pe a ou auauna atu i isi. Aisea la ou te le faia sooa ai?

E masani lava ona ou lotovaivai i le mafaufau ai i mea uma e mafai ona ou faia, ma e masani ona galo ia te au mea ou te faia. Sa saunoa Jean B. Bingham, le Peresitene Aoao o le Aualofa, e uiga i aafiaga loloto o galuega faigofie o le auauna atu. Sa ia faamatala mai o Iesu Keriso o se faataitaiga atoatoa o le auaunaga i ala sa Ia “ataata, talanoa, faalogo, faaavanoa se taimi, faamalosi, aoao, fafaga, ma faamagalo.” (“Auaunaga e pei ona Faia E le Faaola,” Liahona, Me 2018,104).

Ao ou mafaufau i auaunaga taua ua ou maua, e tele ina ou manatua nao mea laiti: Mauaina o se tusiga faagaeetia mai lau uo ma te potu faatasi, sa ia iloa sa ou mauaina se aso faigata. Poo lou uso sa ia valaaulia au ma te o e tamomoe, e aunoa ma le iloaina sa ou matua manaomia se tasi e talanoa i ai. Poo lou epikopo na ia ave au ma talanoa mai aua sa ia manatu sa ou le fiafia. Po o le ma fetaui ma se uo ua leva e le gata i lona manatua o lou igoa ae sa popole moni e tu ma fesili mai poo a mai lou olaga. Sa auauna mai nei tagata i lo latou matauina o au ma faaali mai lo latou alolofa. Sa matua faia ai se eseesega.

Ina ua ou manatua na galuega iti ae o ni auaunaga anoa, ou te manatua o au foi e mafai ona faia se eseesega i se olaga o se tasi. Ma e le gata ina ou mafaia—o loo o’u faia. I lea mea itiiti i lea mea itiiti, e tasi le aso i le taimi.

Atonu o le a i ai se aso e avea ai au ma se vaega tele o le poloketi o galuega alofa lea e faataga ai au e auauna atu i tagata uma o le lalolagi atoa. Ae mo le taimi nei, nai lo le lagona o le tausalaina mo le le mafai ona matauina o tagata uma, ua ou filifili e matau se tasi. O le a e leiloa lava le aafiaga e mafai ona e maua e ala i le auauna atu i ni auala laiti.