Faamanuiaga o le Ola Tutoatasi
Mai se Molimau o le Sefuluai e oo atu i le Feagaiga o le Malumalu
E mo Ted ma Carol Hyatt, o le tulaga faaleagaga o le polokalama o le ola tutoatasi a le Ekalesia ua maua ai se suiga e faavavau i o laua olaga.
O le a le galo lava ia Carol Hyatt le aso na fesili atu ai lana epikopo ia te ia e na te faatulagaina le vasega o le ola tutoatasi i mea tautupe patino. O ia ma lona toalua o Ted, faatoa toe foi mai i le Ekalesia ina ua tuanai le toesea i le 42 tausaga, ma e matamuli o ia.
Na iloa e Carol lana epikopo o Todd A. Josi, a o tamaitiiti o ia. I le sefulu tausaga ua tuanai, sa auai o ia i lana vasega o le Aoga Sa.
“O lea ua avea ma Epikopo,” sa ia tausao atu ia te ia ina ua toe foi mai o ia ma Ted i le lotu, “Ou te le manao e fai sa’u lauga. Ua ou le fia faia se tofiga. Ua na ona ou manao e sau i le lotu.”
Ae ina ua tuanai le lua tausaga, sa i ai Epikopo Josi i le fale o Hyatt ma talanoa e uiga i le Auaunaga o le Ola Tutoatasi a le Ekalesia—o se mea sa lei faalogo lava i ai Sister Hyatt. Ina ua maea ona faailoa atu, na talosaga i ai le epikopo na te faatulagaina le 12 vaiaso o le vasega o mataupu faavae o le tausia lelei o mea tautupe. Ona ia tuuina atu lea o se kopi o le tusi taulima o Tupe Patino mo le Ola-Tutoatasi.
“Ou te le iloa pe aisea na ou tali atu ioe,” na manatua ai e Sister Hyatt. “E taufaamatau ia te au ona i ai ma tagata ou te le iloa—ma mafaufau ou te i ai iina mo le tasi le po i le vaiaso mo le 12 vaiaso ma tagata o le Ekalesia ua mautinoa ua sili atu lo latou aoaoina lelei atu i le talalelei na i lo au. Ou te le iloa pe mafai lava ona ou fesoasoani ia i latou.”
“Na Taia Malosi ai Au”
Sa le i tei Epikopo Josi na talia e Sister Hyatt le valaauga e ui i lona tau faatuatuai. Na ia fai mai i le taimi o le fonotaga a le komiti o le ola-tutoatasi a le siteki i Forest Grove, Oregon, ISA, i sina taimi ae le i amataina, “Na oo mai i lou mafaufau e manaomia e Sister Hyatt le faamanuiaga o le faatulagaina o le vaega o mea tautupe patino. Na Taia Malosi ai Au.”
Sa faamoemoe Epikopo Josi o le faatulagaina o le vasega, o le a lofituina ai e Sister Hyatt se faafitauli tele o loo taofia ai lona alualu i luma faaleagaga: totogiina o le sefuluai. “A o ou alu atu i le fale i lena afiafi,” na ia fai mai ai, “Sa ia te au se lagona malosi faaleagaga e faapea a o taulimaina e Sister Hyatt lenei vasega, o le a i ai ia te ia se malamalamaaga i le taua o le totogiina o le sefuluai.”
I le lagona popo’e ma le le saunia, na amata e Sister Hyatt ona faatulaga lana vasega ia Oketopa 2017. A o ia taitaiina talanoaga a le vasega i le faatulagaina lelei o tupe, fausia ma le tumau ai i le paketi, saunia mo taimi faigata, foia o aitalafu, taulimaina o faafitauli, ma teu tupe mo le lumanai, sa to’a lelei Sister Hyatt i le faatulagaina ae sa le fiafia i lana faataitaiga patino.
A o ia faitau le tusi taulima e saunia ai mo lana vasega lona tolu, na ia aoao ai o le auala e aoao atu ai le “ola-tutoatasi mo le tausia o mea tautupe” e aofia ai le totogiina o le sefuluai ma taulaga.1 Sa ia aoao foi o le mataupu faavae o lena auala e aoao atu ai o le salamo ma le usiusitai.2
“I le faagasologa o se tasi o lesona mulimuli mai, sa ou tautino atu ai i tagata uma e faapea ai lava na o au le tagata i le vasega atoa e le o totogiina le sefuluai,” na ia manatua ai. O lena tautinoga na faaosofia ai le lagolago mai a le 13 o tagata o lana vasega ma talanoaga ma molimau e uiga i faamanuiaga o le tulafono o le sefuluai.
“Sa ou le iloa pe aisea sa ou faaletonu muamua ai e uiga i le sefuluai, ae sa ou iloa le manaomia ona ou faamaoni i le mauaina o se molimau i ai,” ua fai mai ai Sister Hyatt. “A o ou faalogologo i timaiga mai lau vaega, ma mai lo’u toalua, na faapea mai le Agaga, ‘E mafai ona e faia o lea!’ Sa ou maua lena faaopoopoga i lou faatuatua sa ou manaomia, ma e sa ou iloa o le a mafai ona avea au ma tagata faatulaga sili pe afai ou te faia mea sa ou faiatu i lau vasega e fai.”
O Pupuni o le Lagi
Ina ua tuanai ni nai aso ina ua maea lana vasega 11, sa oo atu Sister Hyatt ia Epikopo Josi i le lotu, uu lona lima, ma faiatu ia te ia ua saunia o ia e ola ai i le tulafono o le sefuluai. “Sa fiafia lava o ia,” ua ia fai mai ai.
O Brother Hyatt, o le sa auai i le vasega a lona toalua, sa fiafia foi. A o ia totogi lana lava sefuluai i le faagasologa o le tausaga ua tuanai, sa masani ona ia uunaia Sister Hyatt e ala i le faamanatu atu ia te ia o faamanuiaga ua ia moomia. “E le mafai ona ta o i le malumalu sei vagana ua totogi lau sefuluai,” e fai mai ai o ia.
I le aso 26 o Me, 2018, na tatala mai ai pupuni o le lagi ma liligi mai faamanuiaga i luga o Ted ma Carol Hyatt sa le i mafaufauina e i laua i ni masina a o le i amataina le vasega a Sister Hyatt. I lena aso, o le aso a o lumanai le faamanatuga o le 58 tausaga o lo la aiga, sa laua osia feagaiga ma sa faamauina i le Malumalu i Portland Oregon.
Sa faamatalaina e Hyatt lena lagona o “se aso matagofie ma se faamanuiaga maoae” o le a laua faafetai ai pea lava pea. Ua faaopoopo atu Sister Hyatt o le a ia faafetai pea lava pea mo se toalua sa uunaia o ia, o se epikopo musuia, ma se vasega o tagata, o e ua ia lagona, sa fesoasoani ia te ia e sili atu nai lo lana fesoasoani mo i latou. Ina ia faaalia lo latou alolofa ma le lagolago, toetoe lava o tagata uma o lana vasega sa auai i le la faamauga.
“E tele mea e maua e tagata mai le polokalama o le ola-tutoatasi a le Ekalesia, aemaise o le itu faaleagaga,” ua fai mai ai Sister Hyatt. “O le itu faaleagaga ua avea ai ma aoga tele. Mo lou toalua ma au, ua maua ai se suiga e faavavau.”