O Se Tagata o Le Au Paia o Aso e Gata Ai o loo Taumafai Pea

Saunia e Elder Dale G. Renlund

O Le Korama a Aposetolo e Toasefululua

Mai se saunoaga i le konafesi aoao ia Aperila 2015.

I Lona alofa mutimutivale, ua folafola mai e le Atua le faamagaloga pe a tatou salamo ma liliu ese ma le amio leaga—o lea tulaga o le a le ta’uta’ua mai ai a tatou agasala ia i tatou. Mo i tatou, ona o le Togiola a Keriso ma lo tatou salamo, e mafai ai ona tatou tepa atu i a tatou amioga o le tuanai ma faapea, “Sa ou faapena, ae ou te le o toe faapena.” Ae o lena tagata amioleaga i le tuanai ua le o toe avea ai au.”

Sa aoao mai Peresitene Thomas S. Monson [1927–2018], “O se tasi o meaalofa aupito silisili a le Atua mo i tatou o le olioli lea o le taumafai pea lava pea, aua e le manaomia ona faamuta i se toilalo.”¹ E tusa lava foi pe tatou te faia ma le mautinoa le agasala pe feagai soo foi ma le toilalo ma le le fiafia, ae o le taimi lava tatou te filifili ai e toe taumafai, o le a mafai ona fesoasoani mai le Togiola a Keriso ia i tatou. Ma e ao ona tatou manatuaina e le o le Agaga Paia lena e tau maia ia i tatou ua matua tatou leaga lava ma ua sili ai loa ona tatou faavaivai.

O le finagalo o le Atua ina ia taumafai pea le Au Paia o Aso e Gata Ai ua oo atu foi i tala atu o le faatoilaloina o le agasala. Pe o tatou mafatia ona o faafitauli o mafutaga, luitau faaletamaoaiga, po o faamai po o se taunuuga o agasala a nisi tagata, e mafai lava e le Togiola le i’u a le Faaola ona faamaloloina—ma e masalo aemaise lava—i latou ua mafatia fua. E malamalama atoatoa o Ia i le mafatia ma le le pona ona o se taunuuga o le solitulafono a le isi tagata. E pei ona sa valoia, o le Faaola o le a “fufusi i e loto momomo, … faafiafia i e faanoanoa; … foaiina atu … le matagofie e sui a’i le lefulefu, o le uu o le olioli e sui a’i le faanoanoa, ma le ofu e fai a’i viiga e sui a’i le loto faavaivai.” (Isaia 61:1–3; tagai foi Luka 4:16–21). Po o le a lava le tulaga e i ai, faatasi ai ma Lana fesoasoani, ua faamoemoeina e le Atua le Au Paia o Aso e Gata Ai ina ia taumafai pea.

O la’u valaaulia ia i tatou uma ia iloilo o tatou olaga, salamo, ma taumafai pea. Afai tatou te le taumafai, ua na o i tatou lava la o aso e gata ai agasala; afai tatou te le tutumau, o i tatou o aso e gata ai faamaamulu; ma afai tatou te le faatagaina isi e taumafai, ua nao i tatou o ni aso e gata ai faagutugutulua. Ae a tatou taumafai, tutumau, ma fesoasoani i isi ia faia lea lava mea e tasi, o i tatou la o le Au Paia moni o Aso e Gata Ai. A tatou suia, o le a tatou iloaina e popole tele le Atua po o ai i tatou ma po o a ituaiga tagata e avea ai i tatou, nai lo tagata sa tatou i ai i le tuanai.