Faafeiloai atu mai Mekisiko!

O a’u o Margo. Ma o a’u o Paolo. Ma te faimalaga i atunuu eseese i masina taitasi e aoao e uiga i fanau a le Atua i le lalolagi aoao. Auai faatasi ma i ma’ua a o ma asiasi i Mekisiko.

O Mekisiko e i Amerika i Matu. E silia ma le 120 miliona ona tagata. E tusa ma le 1.5 miliona o i latou o tagata o le Ekalesia.

O le gagana autu a Mekisiko o le Sipaniolo. O le Tusi a Mamona lea i le gagana Sipaniolo. E te iloa? I le faa Sipaniolo, o le uiga o le igoa o le perofeta o Alema o le agaga.

E matuai taua lava aiga i tagata o Mekisiko. E masani i aiga ona faatasitasi mo aso malolo ma maua le fiafia. O nei tamaiti o loo taina se peniata ua tumu i fualaau aina ma lole!

E te iloa o le sukalati na uluai fausia mai Mekisiko? O le sukalati o se tasi o vaega o se taumafa e taua o le mole poblano. O lenei sosi e aofia ai foi pepa, nati, fualaau aina, ma mea faamanogi meaai Manaia!

E te fiafia i le soka? O le taaloga sili lea ona fiafia iai Mekisiko!

E 13 malumalu i Mekisiko. O ata nei o malumalu matagofie i le Aai o Mekisiko ma Tijuana.

Faafeiloai mai i nisi o a ma’ua uo mai Mekisiko!

“I se tasi aso sa iai sou faafitauli tele lava, ma sa ou lagonaina lava le faanoanoa. Sa ou alu i le lotu ma faalogo i molimau e uiga ia Iesu. Sa ou lagonaina le Agaga Paia, ma sa ou maua ai le fiafia. Ou te iloa sa fesoasoani mai le Tama Faalelagi ia ou lagona le fiafia.” Abby D., 7 tausaga, Puebla, Mekisiko

“Ou te iloa o nei aso e fetalai mai le Tama Faalelagi i le perofeta e pei foi ona Ia faia i taimi ua mavae. Afai ou te faalogo ma mulimuli i le perofeta, o le a faamanuiaina au, ma o le a fesoasoani ia te au e avea atili e faapei o Iesu Keriso.” Benjamin D., 9 tausaga, Puebla, Mekisiko

Faafetai mo le asiasiga i Mekisiko ma i ma’ua. Feiloai i se isi taimi!