Na o Polokalama Faakomepiuta

E Lē o Lava Ni Itula i le Aso? O Le Auala Lenei e Faaaoga Lelei ai Lou Taimi

Saunia e Heather J. Johnson

O le faatuina o sini e mafai ona fuafua lelei ai o tatou olaga.

E Lē o Lava Ni Itula i le Aso? O Le Auala Lenei e Faaaoga Lelei ai Lou Taimi

A tatou fuafuaina o tatou olaga ma faaaoga tatau o tatou taimi, o le a faamanuiaina ma faalauteleina i tatou e le Alii ina ia auauna lelei atili atu i Lona malo. O le faaaogaina o mataupu faavae nei* e mafai ona fesoasoani ia i tatou ia maua se olaga manuia ma saunia ai i tatou mo le faaeaga.

Vaevae au sini i ni vaega e sili atu ona mafai ona puleaina.

Faatasi ai ma sini autu uma tatou te faatutuina, e mafai ona tatou vaevaeina i ni ituaiga o sini se tolu. Ona mafai lea ona tatou fuafuaina poo a galuega o aso taitasi tatou te manaomia ona faataunuu ina ia ausia ai a tatou sini.

1. Sini mo se taimi umi. O sini autu ma sini taua nei. Mo se faataitaiga e mafai ona tatou faatuina se sini e pei o le “ia maua se matātā faalegaluega lea e mafai ona ou saunia mo a’u lava ma i latou ou te tausia.”

2. Sini lata mai. O sini ia e sili ona auiliili lea e taitai atu oe e ausia lau sini mo se taimi umi, e pei o le “maua o se tikeri o le kolisi.”

3. Sini pupuu. O sini nei e mafai ona e faamaeaina i se taimi puupuu. O le faataunuuina o au sini pupuu o le a sili ona e latalata atu ai i le faamaeaina o au sini lata mai ma sini mo se taimi umi. O se faataitaiga o sini pupuu atonu o le “e le toe misi se vasega i lenei semesa.”

4. Galuega o aso taitasi. O mea tatou te faia i aso taitasi e tatau ona taitai atu ai i tatou i le ausiaina o au sini. O se galuega o aso uma atonu o le “faamaeaina o meaaoga o le vasega e faagata taeao.”

Faatu ni sini i ni vaega se tele.

O le faataitaiga ua tuuina atu i luga e mafai ona faaaogaina e faatu ai ni sini i vaega uma o lou olaga. Elder Robert D. Hales (1932–2017) o le Korama a Aposetolo e Toasefululua na fautua mai ia i tatou ina ia taulai atu i vaega nei e fa:

• Atinaega faaleagaga

• Atinaega faaletino

• Atinaega o le aotauina, faaletagata lava ia, ma faalematātā

• Tagatanuu ma le atinaega o agafesootai.¹

Ao tatou faatutuina ni sini i nei vaega, e ao ona tatou teulotoina le fautuaga lenei mai ia Peresitene M. Russel Ballard, le Sui Peresitene o le Korama a Aposetolo e Toasefululua, i o tatou mafaufau: “Ia faatu ni sini pupuu e mafai ona e ausia. Faatu ni sini e paleni—e le tele naua e le itiiti foi ma e le maualuluga tele pe maualalalo tele foi. Tusi i lalo au sini e te mafaia ma galue i ai e tusa ai ma lo latou taua. Tatalo mo le taitaiga faalelagi i le faatuina o au sini.”²

O le a avea atili i tatou e faapei o Keriso.

A tatou faatutuina ni sini amiotonu ma puleaina lelei o tatou taimi e ausia ai, tatou te avea atili e faapei o Iesu Keriso. Elder Neal A. Maxwell (1926–2004) o le Korama a Aposetolo e Sefululua na saunoa mai, “Ou te faafetai ia [Keriso] mo lana pule ofoofogia o taimi, mo le le faaaogaina sese o se taimi e aofia ai taimi e mafaufau loloto ai. E oo lava i ana sekone na ia faaalia lana tausiga.”³

Faamatalaga

• Fetuunai mai le O Le Talalelei ma le Olaga Tupuolaola (2017), Tusi Lesona a Tamaiti Aoga ma Faiaoga, “Vaega 3: “Faatuina o Sini ma le Puleaina o le Taimi.”

• Tagai Robert D. Hales, “Faataunuuina o Lo Tatou Tiute i le Atua,” Liahona, Nov. 2001, 39.

• M. Russell Ballard, “Tausia o Lou Olaga ia Paleni,” Liahona, Setema, 2012, 14.

• Neal A. Maxwell, “Jesus of Nazareth, Savior and King,” Ensign, May 1976, 27.

O Heather J. Johnson o se tusitala ma se faatonu. E fiafia o ia e faasee i luga o le vai ma alu i sailiiliga i le taumalulu i luga o mauga. E fiafia o ia e faitau tusitusiga faa-Peretania, ma na te fautuaina le faaaogaina o le “y’all” i talanoaga i aso uma.

Suesue Atili

Siaki ifo isi a matou tusiga autu e uiga i le pe faapefea ona faia se eseesega i le avea ai ma se talavou matua i le vaega o talavou matutua i le Liahona o Fepuari 2019.