O Le Faaiuga Fesuisuiai
E alala le tusitala i Ilinoi, ISA.
“The Still Small Voice” (Children’s Songbook, 106).
Toeitiiti ona maea lea o le faatauga a Lea ma Tina. Ona alu lea o Tina e vaavaai i ni ofu.
“O le a ou alu i le na o ni nai minute,” o le tala lea a Tina.
Sa mapuea Lea. A faapea mai Tina “e na o ni nai minute,” o nisi o taimi o lona uiga e 20!
Sa maua e Lea se fata o meataalo i tafatafa ane. Sa ia sue i itulau o se tusi valiata ma popo se polo i ni nai taimi. Ma e na vave ae le manaia lena mea.
Ona ia to ae lea o se mea iila ma lapotopoto O se yo-yo! E tali tutusa lava foliga ma lea na aumai e Oskar i le aoga i le vaiaso na tea nei. I le taimi o le malologa sa ia faaali i tagata uma ana togafiti manaia. O togafiti e iai o latou igoa e pei o le “Faasavali le Maile” ma “Faataamilo i le Lalolagi.” Na fesili iai Lea pe mafai ona sei ona faataitai, ae sa musu Oskar e tuu iai.
Sa faasee ifo e Lea le lio o le manoa i luga o lona tamatamailima. Sa ia faamamulu le yo-yo ma pau ona toso lea o le manoa e pei ona ia vaai ai o fai e Osaka. Na tau le yo-yo i le fola ma le tatagi. Sa ia toe taumafai. Ina ua maea ni nai taumafaiga, sa ia mafai ai loa ona ia tuuina ane le yo-yo i lona lima! Ana faapea e mafai ona ia vave faavasegaina lena mea, atonu e mafai ona ia aoao ona fai togafiti uma sa faia e Oskar.
O lena na vaai ane ai loa Lea i le tau. Sa ia faanonou. Sa le faapena le tele o lana tupe teu i lana fagu i le fale!
“Toeitiiti lava ona uma lea, Lea,” na valaau ane ai Tina.
Sa mapuea Lea. Toetoe ina a ia toe tuu atu le yo-yo ina ua oo ane se manatu i lona mafaufau. E le tele tele le yoy-yo. E mafai ona nana i totonu o lana taga ma tuu ai! Sa le tilotilo mai le faatauoloa. O le a le iloa lava e se isi. E na te tausia lea e faavavau ma aoao ai e fai ni togafiti fou. Ma o le a manatu tamaiti i le aoga e lelei tele o ia.
A o tilotilo ifo Lea i le yo-yo i lona lima, sa ia lagona le matuitui ma le popo’e. Sa afugia ona lima. Sa ia uumau i le yo-yo. O le a lenei lagona leaga? Na manao o ia ina ia aluese.
Ona ia manatua lea o se mea na tau ane e lona Tama ia te ia a o le i papatisoina o ia.
“A uma ona papatisoina oe, o le a e maua le meaalofa o le Agaga Paia,” sa fai mai ai Tama. “E fesoasoani le Agaga Paia ia tatou faia filifiliga lelei. E talanoa mai o ia ia i tatou i se leo filemu, ma itiiti.”
“O le a ia talanoa mai ia te au?” Na fesili ai Lea.
“E le faapena,” na fai mai ai Tama. “Atonu e faapei o se manatu e oo mai i lou mafaufau. Po o se lagona e oo mai i lou loto.”
“O le a le ituaiga lagona?”
“E eseese mo tagata taitasi,” sa fai mai ai Tama. “Ae masani ai lava, afai e te faia se mea lelei, o le a fesoasoani le Agaga Paia e te lagonaina ai le malu ma le toafilemu. Afai o iai se mea faigata, o le a Ia lapataia mai oe. Ma afai e te manao e fai se mea sese, o le a aluese le Agaga Paia, ma o le a e lagonaina le le mautonu ma le faanoanoa.
Sa tilotilo ifo Lea i le yo-yo. Sa ia matuai manao lava iai. Ae sa ia iloa sa tau atu e le Agaga Paia ia te ia o le gaoi e sese.
Sa toe tuu e Lea le yo-yo i luga o le fata. I le taimi lava na ia faia ai, sa ia lagona le toafilemu ma le mafanafana. Sa ia toe savali atu ia Tina.
“Ua maea au,” o le tala lea a Tina. “Ua e sauni e foi atu?”
Sa ataata Lea. “Ioe.”
A o la tuua le faleoloa, sa lagona e Lea le mama ma le fiafia e pei o se la pupula. Atonu o le a manaia le yo-yo mo sina taimi. Ae o le mulimuli i le Agaga Paia o se mea sa ia manao e faia pea lava pea. ●