O le Aso Fanau Taufaaofoo Ingrid
O lenei tala na tupu i Mekisiko. Sue i le itulau e U8 e aoao atili ai e uiga i lena atunuu!
“O mai ia Keriso, ma taofimau i meaalofa lelei uma” (Moronae 10:30).
“Estas son las mañanitas …”
O le leo o le pesepesega a Mama na fafagu ai i luga Ingrid. Sa tatala ona mata ma iloa atu Mama o loo sau i lona potu. E masani ona peseina e Mama lana pese aso fanau faapitoa i lona aso fanau.
“Manuia le Aso Fanau!” Na fai atu ai Mama. “Sei tatou sauni mo lau pati.”
Na mafai e Ingrid ona sogi le manogi o se keke sukalati o tao i le ogaumu. “Ou te mate poo a meaalofa o le a ou maua!” sa ia mafaufau ai. Sa ia ae ese mai le moega ma autilo atu i fafo o le faamalama. Sa faatumulia le laau o le jacaranda i fafo i fugalaau viole.
Na fesoasoani Ingrid e tulei le sofa i le potu o Mama ma ua tele ai le avanoa i le potu malolo. Sa ia fesoasoani e teuteu le keke ma tui moligao e fitu i ona luga. Toeitiiti ae oo mai le taimi mo le pati!
Na o mai uo a Ingrid mai le aoga ma le Peraimeri. Sa latou taaalo ni taaloga ma ai le keke. Ona oo mai lea o le vaega e sili ona fiafia iai Ingrid - meaalofa! Sa maua sana tusi fou, o se taika faatumu i vavae, ma se taulima matagofie.
Ina ua o ese uma tagata, sa fusi e Ingrid lona tina. “Faafetai lava, Mama. O se aso fanau silisili ona manaia lena!”
“E le i faapea ua uma,” na fai mai ai Mama. “E i ai la’u mea faapitoa e ofo ai mo oe.” Na ia tuuina atu ia Ingrid se fasipepa. Na faapea mai, “O le taimi e moe ai!”
“O se faailoga,” na fai mai ai Mama. ‘E tatau ona e sailia le isi e sosoo ai.”
Sa faavave atu Ingrid i le potumoe. Sa ia maua ai le isi fasiepa i lalo o lona aluga. Na faapea mai, “Aso o tagamea.”
Sa tamoe atu Ingrid i le umukuka ma tatala le masini tamea. O le isi faailoga!
Sa maua e Ingrid isi faailoga i tua o le TV, i totonu o lana tusi e fiafia iai, ma i lalo o le fala o le faletaele. O le faailoga mulimuli na taitaiina atu ai o ia i lana kapoti. I luga o le fatatusi sa iai se pusa ua uma ona afifi. E le au iai Ingrid, o lea sa tuu ifo ai i lalo e Mama.
Na sasae ese e Ingrid le pepa ma sii i luga le tapuni. I totonu o le pusa sa iai se ie paepae ua gaugau ma le kopi lapoa o le Tusi a Mamona.
“O le tausaga lea, o le a e papatiso ai,” na fai mai ai Mama. “O se meaalofa faapitoa lenei e fesoasoani e te saunia ai.” Sa tago atu Mama i le ie paepae. “O le ie lea o le a ou faaaogaina e fai ai lou ofu papatiso. Ma lenei”—sa ia sii ae i luga le Tusi a Mamona—“e mo oe e faitau ai.”
Sa vaai a’e Ingrid ia Mama. “Ou te le i faitauina lava le Tusi a Mamona.”
“Ou te iloa e mafai ona e faia.” Sa tatala e Mama le tusi. “Vaai. E lapopoa atu mataitusi. Sa ou mafaufau faapea o le a faigofie ai.”
Sa toe tapuni e Mama le tusi ma tuuina atu ia Ingrid. Sa faasolo e Ingrid ona tamatamailima i luga o le faavaa lamolemole.
“E taua lou saili mo oe lava pe moni le Tusi a Mamona,” sa fai mai ai Mama. “Ou te folafola atu pe afai e te faitau ma tatalo ma lou loto atoa, o le a fesoasoani le Tama Faalelagi ia te oe e iloa ai.”
I lena po sa faitau ai e Ingrid le mataupu muamua o le Tusi a Mamona. E le faigata tele e pei ona sa ia manatu ai. Sa fiafia o ia e faitauina tusitusiga paia.
Sa ia toe faitau lana Tusi a Mamona i le aso na sosoo ai. Ma le isi aso. Sa ia faitauina i aso uma. Ina ua tuanai ni nai vaiaso, sa ia manatu e le manao e faatali seia oo i le faaiuga o le tusi ona tatalo ai lea.
Sa tootuli ifo Ingrid i tafatafa o lona moega. Sa tatalo atu ma lona loto atoa ma augani atu i le Tama Faalelagi e fesoasoani mai ia te ia ina ia iloa e moni le Tusi a Mamona. Ona ia faatali lea. Sa ia manatu o le a ia lagona se leo, ae sa leai. Ae peitai, o se lagona fiafia na tupu ae i lona loto. Sa ia iloa na faafofogaina e le Tama Faalelagi lana tatalo.
Toeitiiti o le tausaga ua mavae, ae ua uma ona faitauina e Ingrid le Tusi a Mamona. Na ia iloa poo le a lava le mea o le a ia maua mo lona aso fanau lona valu, o le Tusi a Mamona o le avea pea ma meaalofa silisili lava. ●