Taimi e Auauna Atu Ai

Saunia e Liz Stitt

E alala le tusitala i Iuta, ISA.

I le avea ai o se autalavou matutua, masalo ua tele naua o tatou taimi “totoe” tatou te le mafai ona tau atu. O fautuaga nei e ono i le auala e mafai ai ona faalautele lou lio o aafiaga e ala i le auaunaga.

I ni nai tausaga ua tea, sa ou galue ma faauma se polokalama i afiafi ina ia maua ai lou faailoga o le Master i le pulega o mea faapisinisi. Ina ua maea la’u MBA, sa ou manao e faaaoga lena taimi o “totoe” mo se mea aoga.

O se fautuaga mai se polofesa faatuatuaina sa faigofie ma manino—ou te manaomia le saili o avanoa e auauna atu ai. E ui ina sa ia iloa ou tiute o le Ekalesia, sa ia fautuaina ou te saili i tua atu o lau lio masani o aafiaga.

Sa ou amata se sailiga ma le tatalo ina ia iloa ai poo a ou tomai ma taleni moomia ma po o fea e sili ona ou aoga ai. Na le pine ae taitaiina atu au i le ofisa tutotonu o le nuu o loo manaomia tagata faufautua mo la latou polokalama mo le autalavou. Sa amata ona ou fautuaina se teine talavou o lona aiga na o ese mai Somalia o nisi ua faamalosia ese ona o sauaga. I vaiaso taitasi ma te faataitai ai tomai o le faitauga o tusi, tusitusiga, ma le matematika. Ae i tua atu o lena, sa ma atiinaaeina se faigauo ma aoao ai e uiga i aganuu a le tasi ma le isi ma faamoemoega mo le lumanai. Ina ua siitia o ia, sa tofi mai se tasi teine talavou ia te au. O lona aiga na sosola ese mai Myanmar, ma sa ia fai mai na ola ae i se tolauapiga o tagata sosolaese i Thailand. E faatasi ai ma le suesuega, sa ma talanoa foi i luitau o le olaga ma le auala e tali atu i ai.

Sa ou maua le tele o nisi avanoa e faaaoga ai lou tomai i auala eseese ma auauna atu ai i le nuu.

O le toatele o i matou talavou matutua e fesuisuiai o matou manaoga i le faaaogaina o o matou taimi e fua i feoaiga, faauuga, po o le suiga o galuega, ma isi mea. E masani ona matou lagona le pa’i mai o le Agaga o o matou tausaga talavou nofofua e le o se “taaloga faatalitali.” Matou te manaomia le atiinaaeina atili o faamoemoega ma uiga.

Masalo e tele atu ni o tatou taimi “totoe“ ae le mafai ona faailoa atu, o lea o le faaalu o se minute e vaai pe faapefea ona tatou faaaoga lena taimi e siitia ae ai isi o le a avea ma faamanuiaga i nisi faapea foi ma i tatou. I le taunuuga, o le auauna atu i isi o le auala lea e faaalia ai lo tatou alofa mo le Atua ma tausia a tatou feagaiga ma tuuina atu i tatou uma lava ia te Ia.

O lo o mulimuli mai nisi o fautuaga e faalautele ai lou lio o aafiaga:

Iloilo lou taimi. Faaaoga se tamaitusi po o se tusi o fuafuaga e faamaumau ai le auala e faaalu ai lou taimi. O i ai ni ou itula o totoe e le i fuafuaina po o taimi faaalu le aoga? Po ua e faatigaina lava ia te oe? E tutusa le taua o le malamalama i le mea o i ai ou taimi totoe e faapei o le malamalama i le mea e manaomia ai ona faaitiitia le taimi. Filifili po o le a le mea e sili ona taua ma fuafua taimi e auauna atu ai.
Iloilo ou tomai. Mafaufau i mea e te manao e fai po ua e lagona e tatau ona fai. Manatu i auala e mafai ona e faaaogaina ai au taleni ma tomai e faamanuia ai isi.
Tatalo. Ole atu mo le taitaiga faalelagi ina ia taitaiina i le mea o lo o manaomia ai oe. Na saunoa Elder Jeffrey R. Holland o Le Korama a Aposetolo e Toasefululua, “Ou te iloa o le Atua … o le a fesoasoani ia te outou ma taitaiina outou i galuega alofa faalesoo pe afai o outou mananao ma le lotofuatiaifo ma tatalo ma saili mo ni auala e tausi ai se poloaiga ua Ia tuuina mai pea lava pea ia i tatou” (“E le o i tatou uma ea o ni Tagata Aisi?” Liahona, Nov. 2014, 41).
Aluese mai lou nofoaga mafanafana. I le galuega faufautua, sa ou le lagona le atoatoa e galue ai ma le autalavou po o le aoao atu o mataupu uma. Ae o nisi o taimi o lau galuega autu o le tuuina atu o le faamalosiau ma le uunaiga. E le faapea e tatau ona tatou fetaui atoatoa ina ia fai ai se eseesega. O le tele o taimi, o lo tatou aafiaga sili lava o le i ai iina, faalogo, ma atiae se fesootaiga faaumiumi o le faatuatuaina ma le tutumau.
Fai se taumafaiga faifaipea. E toatele faalapotopotoga po o tagata e manaomia le taumafaiga a volenitia faifaipea ma mo aso uma—o se mea e sili atu nai lo le na o se poloketi pe na ona i ai pe a talafeagai.
Ia onosai. O nisi o taimi ou te mafaufau ai, “Ou te le iloa pe mafai ona ou faia pea lenei mea. E matuai le lava lava. Pe o ou faia ea se mea aoga?“ Ae pe a amata ona ou fesoasoani, ua suia loa lou loto. E seasea ona ou aluese mai se avanoa e auauna atu ai e aunoa ma le lagona lelei ma uunaia ai e toe foi mai. Ae ui i lea, afai o le avanoa e faigata tele, vaavaai i isi avanoa pe fesiligia sina taimi “malolo“ mai le volenitia ina ia e tuuina atu ai le mea manaomia.