“Ua ou faavaivai soo pea i faaosoosoga lava e tasi. E mafai faapefea ona ou see ese mai na agasala?”

Ata pue o se tama mai le Getty Images

“E tusa lava foi pe tatou te faia ma le mautinoa le agasala pe feagai soo foi ma le toilalo ma le le fiafia, ae o le taimi lava tatou te filifili ai e toe taumafai, o le a mafai ona fesoasoani mai le Togiola o Keriso ia i tatou.”

“… A tatou taumafai, tutumau, ma fesoasoani i isi ia faia lea lava mea e tasi, o i tatou la o le Au Paia moni o Aso e Gata Ai. A tatou suia, o le a tatou iloaina e popole tele le Atua po o ai i tatou ma po o a ituaiga tagata e avea ai i tatou, nai lo tagata sa tatou i ai i le tuanai.

Elder Dale G. Renlund o le Korama a Aposetolo e Toasefululua, “Le Au Paia o Aso e Gata Ai ia Taumafai Pea,” konafesi aoao Aperila 2015.

Aloese mai le Punavai o Faaosoosoga

Afai o lau telefoni o lo o fai ma au vaisu, taumafai e aveesea lena pe fatapulaa e ou matua lona faaaogaina. Pe afai o au uo o i latou o faaosoosoina oe, saili ni uo lelei ma taumafai ina ia siosiomia e tagata lelei o e e fesoasoani ia te oe e lagonaina pea le Agaga. Afai e iai le Agaga ma oe ma ua siosiomia oe e uo lelei, o le a faigofie ona tetee i faaosoosoga. E oo mai i tagata uma faaosoosoga, ae pe a tatou tetee pea iai, o le a lelei i tatou.

Kolten B., 17 tausaga, Alberta, Kanata

Tatalo Pea lava Pea

O au o se tagata liliu mai, ma e sa malosi faaosoosoga mo au aua na ese au aganuu mai le Ekalesia. Mai lea mea itiiti i lea mea itiiti, sa amata ona ou malamalama o le fesootaiga ma lou Tama Faalelagi sa faamalosia ai au ma faafaigofie ai ona ou lofituina mea uma lava.

Pamela S., 19 tausaga, Llanquihue Province, Chile

Pulea Ou Manatu

O o tatou manatu o le faitotoa lea i a tatou faatinoga. Faaosoosoga, e faapei o le fati o se pese e te manatua, e mafai ona ati mai i o tatou mafaufau. Afai e oo mai i o outou mafaufau, taumafai e aloese mai nei manatu e ala lea i le aoaoina o oe lava i le ala e faatino ma mafaufau ai. O lo o ia te oe le mana e fai ai!

Taynara S., 19 tausaga, São Paulo, Pasila

Ia Maua le Lagolago mai i Isi

Faatasi pea lava pea ma se tasi e te alofa iai, e pei o lou aiga ma uo felataai, e tutusa o latou tulaga faatonuina ma oe. Atonu e fesoasoani lenei ia te oe e aloese ai mai faaosoosoga. Faaaafia oe lava i gaoioiga i le aiga ma le Ekalesia. Aua nei lagona le fiafia; e faaloaloa mai pea le aao o le Alii ia i latou o iai le agaga e salamo ai.

Elder Tucay, 20 tausaga, Misiona a Ghana Cape Coast

E Maua le Faamafanafanaga e ala i le Tatalo

O se mea ou te fautuaina e fai o le tatalo. Ou te iloa o tali e le oo mai faavave, ae o le mafanafana e mafai pea lava pea. E mafai foi ona e maua le faamafanafanaga i le aveesea o lou mafaufau mai le mea o lo o faalavefau ia te oe ma mafaufau i se mea e te maua ai le fiafia. Poo le a lava le ala e te maua ai le faamafanafanaga, ou te iloa e mafai ona e maua e ala ia Iesu Keriso.

Anna P., 12 tausaga, Iuta, ISA

O tali ua faamoemoe e mo le fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

O Le A Sou Manatu?

“E faapefea ona ou fiafia i le lotu pe afai o iai ni faafitauli ma tagata o lo o iai?”

Auina mai lau tali ma, afai e manaomia, o se ata manino lelei a o le’i oo i le aso 15 o Mati 2019, i le liahona.lds.org (oomi le “Submit an Article or Feedback”).

E ono iloiloina tali mo le uumi po o le manino.