Fesoasoani ia i Latou i le aluga o la Latou Faigamalaga

O nisi tagata o ē tauivi ma fesili e uiga i lo latou faatuatua e vave ona foia o latou atugaluga ma agai i luma. Mo le toatele, o le tauiviga e alu ai le taimi. O lou alofa, faamalosiauga, ma le naunautai e malaga faatasi e mafai ona fesoasoani ia i latou e maua ai le faamoemoe.

Faaauau pea ona ola i le talalelei a o e fesoasoani i lau uo po o se tasi e pele i la latou malaga. O ou auala eseese e mafai ona felavasa’i ma fesoasoani e te tumau ai i fesootaiga nai lo o le taitaieseina o oe. ‟O a tatou faigamalaga i le olaga e taitoatasi,” na aoao mai ai Elder Gerrit W. Gong, ‟ae e mafai ona tatou toe foi i le Atua lo tatou Tama ma Lona Alo Pele e ala i le faatuatua i le Atua, o le tasi i le isi, ma i tatou lava.”¹ O nisi nei o mataupu faavae mo le lagolagoina ma le faamalosiauina o isi:

Ia avea ma se punavai saogalemu mo talanoaga. Pe a aumai e se uo po o se tagata o le aiga a latou fesili ia te oe, atonu latou te le o sailia se tasi e foia se faafitauli ae o se tasi e pele e naunau e savali i o latou autafa i la latou malaga. Ia tigaalofa. Faailoa atu ia i latou o le a faaauau pea ona e popole mo i latou e tusa lava po o a o latou atugaluga ma filifiliga.
Fesoasoani ia i latou e saili tali. O se tasi o auala e fesoasoani ai atonu o le faasoa atu lea o mataupu faavae o loo talanoaina i le vaega o le “Sailiga o Tali i Au Fesili” o lenei punaoa. Fesoasoani i lau uo po o le tagata o le aiga e sue anomea ua lolomiina e le Ekalesia i fesili masani, ma ia naunau e talanoa e uiga i nei punaoa faatasi ma i latou. Fautuaina i latou e faia ni vaaiga faamaoni i fesili faigata o se vaega tutotonu o a latou suesuega. Pe a uunaia ai e le Agaga, faamanatu atu ia i latou ni mau aoga ma fautuaina i latou e faaauau pea ona tatalo.
Ia avea ma se faataitaiga faa-Keriso O se tasi o auala sili e faasoa atu ai le talalelei o le faaali atu lea o le alofa faa-Keriso ma ia ola i se olaga o le amiolelei. A o e tumau faamaoni ma tausia au feagaiga, ua e faaalia le olioli o le ola ai i le talalelei ia i latou o loo e fesoasoani i ai. Atonu latou te filifili e le faalogo i au fautuaga po o lau molimau, ae o le a faatosinaina i latou i lau faataitaiga o le alofa moni ma le faamaoni.
Fausia i luga o ni tulaga e laugatasia ai. E mafai ona e faatumauina le malosi o la outou sootaga e ala i le fausiaina i luga o talitonuga ma mea tou te fiafia faatasi i ai. Aloese mai le avea o a latou fesili ma taulaiga o a outou fegalegaleaiga uma. Ona o ō latou tauiviga ma nisi o mea e le faapea ai ua latou teenaina mea uma. Faaauau pea le faaaluina o le taimi ma i latou e fiafia ai i gaoioiga na e faasoa atu i le taimi ua tuanai. I le faagasologa, atonu e te iloaina ni mea fou e suesue ma faasoa faatasi.
Saili ni auala e fai faatasi ai mea lelei. Valaaulia lau uo po o se tagata o le aiga e faatasi ma oe a o e faatinoina mataupu faavae o le talalelei o loo aumaia ia te oe le olioli. E mafai ona e fai atu ia i latou e auauna atu i isi faatasi ma oe, auai i se gaoioiga faagaeetia, po o le faamalolosia faatasi o lou nuu. E te lua mananao uma lava e faaleleia le lalolagi o loo siomia ai oulua, e tusa lava po o a a la’ua fesili o le faatuatua.
Ia iloa e ono umi se taimi o lenei mea. A i ai se tasi e latalata mai ia i tatou e i ai ni atugaluga po o ni fesili e uiga i lo latou faatuatuaga, atonu tatou te faamoemoe o le a vave ona foia lea mea i se finauga faatauanau po o se molimau mai le loto. Manatua e le o taimi uma e maua ai se vaifofo vave i ni atugaluga po o ni fesili faaleagaga. Ia saunia e agai i se malaga umi ma i latou. Tuu atu ia i latou le taimi ma le avanoa e tuputupu a’e ai. Ia iloa o le auala latou te faailoa atu ai lo latou faatuatua e ono foliga ese ia te oe nai lo o le mea sa i ai i le taimi ua tuanai, ma e le afaina lena mea.

Mau autu: Isaia 35:3–4; Kalatia 6:2; 1 Peteru 3:15; Mosaea 18:9; Mataupu Faavae ma Feagaiga 11:21