Fafaga Lou Lava Faatuatua

O le fesoasoani e siitia le avega a se isi tagata e manaomia ai se taumafaiga ma e mafai ona tata’ia i tatou i ni auala e le’i mafaufauina. Ia mautinoa e te tausia faaleagaga oe lava ia ma ia e mauaa i le talalelei toefuataiina a Iesu Keriso. I se faalavelave faafuasei, sa faatonuina ai le pasese i luga o se vaalele e faamau muamua a latou lava tali-fofoga o le okesene ona fesoasoani atu ai lea i isi. E faapena foi, e faato’ā mafai ona tatou siitia isi pe afai tatou te taula’i atu i le galuega taua o le fafagaina o lo tatou lava faatuatua ma le molimau.

O mataupu faavae nei e mafai ona fesoasoani ia te oe e faamalosia ai lou faatuatua a o auauna atu i isi:

Manatua mea ua e talitonu i ai ma ou aafiaga. Manatunatu i taimi na e lagonaina ai le faatosinaga a le Agaga Paia? Manatua taimi na e maua ai le filemu, olioli, alofa, ma le manino. Mafaufau i se taimi na e lagonaina ai le fetalai mai o le Atua ia te oe i ni auala patino e faamautu ai lou faatuatua. O ou aafiaga faaleagaga ua tuanai e mafai ona avea o se punavai o le malosi ma le puipuiga mai le masalosalo ma le fefe.
Faaauau pea ona atiina a’e lau molimau. E taua le faia pea o mea na fesoasoani ia te oe e fausia ai lau molimau i le talalelei. O nei mea e mafai ona aofia ai le faitauina o tusitusiga paia, tatalo, aai ma feinu i le faamanatuga, tapuai i le malumalu, ma le auauna atu i isi. O nei faiga faigofie e mafai ona fesoasoani ia te oe e lagona ai le uunaiga a le Agaga ma tumau faamaoni ai.
Aapa atu i isi. Afai e lagona le mamafa o le avega o le auauna atu i se uo po o se tagata o le aiga, ia manatua e le o tuua na o oe. E mafai ona e aapa atu i tagata faatuatuaina o le aiga, uo, taitai o le Ekalesia, po o tagata tomai faapitoa. O lo latou loto malamalama, tatalo, ma tomai faapitoa e mafai ona fesoasoani ia te oe e manatua ai le tele o le alofa o le Atua ia te oe. E mafai foi ona latou lagolagoina oe a o e sailia tali i au lava fesili.
Faavae ni tuaoi maloloina. E ui e tatau ona tatou taumafai e faalogo ma lagolago atu i isi i a latou fesili po o atugaluga, e tatau foi ona tatou iloaina o tatou lava manaoga ma tapulaa. E taua foi ou lagona ma faalogona. Atonu e te lagonaina le fefe, lē fiafia, ma le faavauvau i le taimi o lenei faagasologa. Afai e te lagona le lofituina tele i se talanoaga, faailoa atu ou lagona ma faatulaga se isi taimi e toe talanoa ai. Atonu e manao sē e pele ia te oe e avea a latou fesili ma mataupu autu o talanoaga uma pe talanoa i se mataupu i se auala e faalumaina ai oe po o lou faatuatuaga. E pei lava ona manaomia ona e faaaloalo i le faigamalaga a isi, e manaomia foi ona latou faaaloalo i lau malaga. E le manaomia ona e lagona le faatauvaa po o le lē atamai pe afai e te taunuu i se faaiuga e ese mai nai lo se isi tagata.
Ia lelei atu ona e malamalama. E le manaomia ona avea oe ma se tagata tomai faapitoa i se faafitauli ina ia avea ai oe ma se tagata lagolago lelei. Ae e mafai ona matuā lelei le aoaoina e uiga i se autu e le o ia te oe se faatatauga. Tulimata’i se suesuega mafaufauina lelei o le aoaoga faavae ma le talafaasolopito o le Ekalesia. Ia faamasani atili i fesili masani. Aoao po o a tala a taitai o le Ekalesia ma tagata tomai faapitoa faamaoni e uiga i nei autu. I lenei faagasologa, atonu ua mafai ona e aoao, lē aoao, ma toe aoao i le tele o mea.
Ia faamasani i mataupu faavae mo le sailia o tali. Suesue ma faatino ia mataupu faavae o loo talanoaina i le vaega o le ‟Sailia o Tali i Au Fesili” o lenei punaoa.

Mau autu: Luka 22:31–32; 1 Nifae 15:8–11; Iakopo 4:6; Alema 32:41–43; Mataupu Faavae ma Feagaiga 6:14