“Le Alii e, Ua Ou Faatuatua”
Saunia e Elder Jeffrey R. Holland
O Le Korama a Aposetolo e Toasefululua
Ia faailoa ma le faamaoni au fesili ma ou popolega, ae ia tapili muamua motumotu o lou faatuatua, aua e mafai mea uma e i latou e talitonu.
Sa i ai se taimi na maliu atu ai Iesu i se vaega o matuai finau lava ma Ona soo. Ina ua fesili le Faaola i le mafuaaga o lenei finauga, na tulai ane ai le tamā o se tamaitiiti ma’i ma faapea mai na sau o ia i soo o Iesu mo se faamanuiaga o lona atalii, ae sa le mafai ona latou faia. A o lilivau nifo o le tamaitiiti, ma sau le piapia i lona gutu, ma taafili i le palapala i o latou luma, sa talosaga atu le tamā ia Iesu atonu i si toe malosi o le faanaunauga ogaoga i lona leo:
“Ai se mea e te mafaia,” na ia fai atu ai, “ia e alofa mai ia te i matou, ma ia e fesoasoani mai ia te i matou.
“Ona fetalai atu lea o Iesu ia te ia, Afai ua e mafaia ona faatuatua, e mafaia mea uma lava i le faatuatua.
“Ona alaga loa lea o le tamā o le tama, ua fai mai ma le tagi, Le Alii e, ua ou faatuatua; ia e fesoasoani i lo’u le faatuatua.”1
O le uluai talitonuga o lenei tagata, i lana lava ta’utinoga, e faatapulaa. Ae e i ai lona naunautaiga faanatinati, mautinoa mo si ona atalii e toatasi. Ua ta’u mai ai ia i tatou ua lava lena e amata ai. “E tusa pe ua le mafai ona e faia se isi lava mea nai lo le fia talitonu,” ua folafola mai ai Alema, “ia tuu lea manao e galue i totonu ia te oe; seia oo lava ina ia e talitonu ai.”2 Ma le leai lava o se isi faamoemoe o totoe, na folafola atu ai e lenei tama le faatuatua o ia te ia ma aioi atu ai i le Faaola o le lalolagi, “Ai se meae te mafaia, ia e alofa mai ia te i matou, ma ia e fesoasoani mai ia te i matou.”3 O le faigata ia ona ou faitau i na upu e aunoa ma lo’u tagi. O le soanauna pelulale matou ua manino lava lona faaaogaina ma le loto i ai. O le uiga o le tala a le tamā, “O lo matou aiga atoa o loo aioi atu. E le o muta lava o matou faigata, ma ua matou le lavāvā. Ua pa’u atu le ma atalii i totonu o le vai. Ua pa’u atu o ia i totonu o le afi. O loo faaauau pea ona i ai o ia i tulaga lamatia, ma ua faaauau ai pea ona matou matata’u. Ua matou leiloa po o le a se isi mea e fai. Pe mafai ona e fesoasoani mai ia i matou? Matou te faafetai i soo se mea—sina fasi faamanuiaga, tau lava o sina aloiafi o le faamoemoe, sina masi’i ese itiiti o le avega o loo tauaveina e le tina o lenei tamaitiiti i aso uma o lona olaga.”
“Ai se meae te mafaia” lea na tautala ai le tamā na toe foi atu ia te ia, “Afai ua e mafaia ona faatuatua,” lea na fetalai ai le Matai.4
“Alaga loa,” o loo fai mai ai le mau—e lei faatelegese pe le mautinoa pe masalosalo ae ua “alaga loa”—ua alaga atu loa le tamā e faailoa atu lona tiga o se matua, “Le Alii e, ua ou faatuatua; ia e fesoasoani mai i lo’u le faatuatua.” I le tali atu i se faatuatua fou o la lava ua i ai sina vaega, na faamalolo ai e Iesu le tamaitiiti, toetoe lava ina a faatu moni mai o ia mai le oti e pei ona faamatalaina ai e Mareko le mea na tupu.5
I le mafaufau ai i lenei tala faatusi paia faamomoiloto, ou te fia tautala tuusao atu i tupulaga talavou a le Ekalesia—e talavou i tausaga o le matua po o le talavou i le auai i le ekalesia po o le talavou foi i tausaga o le faatuatua. Po o le a lava, ua tatau ona aofia ai toetoe o i tatou uma lava.
O le mea muamua e matau i lenei tala o le taimi e feagai ai ma luitau o le faatuatua, sa faamautu muamua e le tamā lona malosi ma o iina na ia faailoa atu ai le mea e gata ai. O lana uluai tautinoga lava o lona ioeina e aunoa ma se faatuai: “Le Alii e, ua ou faatuatua.” Ou te fia fai atu ia i latou uma o ē moomoo ia tele atu se faatuatua, ia manatua lenei tagata! I taimi o le atuatuvale po o le le mautonu po o taimi e fesouaiina ai, tausisi i le faatuatua lena ua ia te oe, tusa lava pe itiiti lena faatuatua. I le tuputupu ae e tatau ia i tatou uma ona iloa i le olaga faitino, o le a i ai se mea e tupu ia i tatou uma lava, i le itu faaleagaga e foliga tutusa i le mafatiaga o lenei tamaitiiti po o le faanaunauga ogaoga o lenei tamā. A alia’e mai na taimi ma oo mai faafitauli, ma a le vave ona maua se vaifofo, ia taofi mau i mea ua uma ona outou iloa ma tutu malolosi seia oo mai se isi malamalama. O i tonu lava, i lenei vavega patino, lea na fetalai ai Iesu, “Afai e tusa lo outou faatuatua ma le fua o le sinapi, e fai atu outou i lenei mauga, Alu atu ia oe i le la mea; ona alu atu ai lea; e leai foi se mea tou te le mafaia.”6 O le tele o lou faatuatua po o le maualuga o lou malamalama e le o le mea lea e taua—o lou faamaoni a’ia’i e te faatinoina e tusa ai ma lou faatuatua ma le upumoni ua uma ona e iloa.
Lona lua o mea e matau e fai sina ese mai le mea muamua. A oo mai faafitauli ma tulai mai ni fesili, aua nei amataina lau sailiga mo le faatuatua i lou faapea pe o le a le tele e te lē o maua, ma e amata ai i lou “le faatuatua.” E tusa lava lena mea ma le taumafai e utu se pīpī mai lona gutu! Sei ou faamanino atu le itu lea: Ou te le o faapea atu e te faafoliga ua ia te oe le faatuatua e lē o i ai. O lea ou te fai atu ia e faamaoni i le faatuatua lena ua ia te oe. O nisi taimi tatou te faia ai e faapei o se tautinoga ma le faamaoni o le le mautonu, o se faailoga maualuga lea o le lototoa lelei nai lo se tautinoga faamaoni o le faatuatua. E leai! Ioe, o le tagata le faatuatua, e matua utiuti lava ona faamoemoega i ana amio nai lo le tagata faatuatua. O le mea lea ia tatou manatua uma ai le savali manino o lenei tala faatusi paia: Ia e faamaoni e uiga i ou le mautonu e te manaomia; ua tumu le olaga i le le mautonu i lea mataupu ma lea mataupu. Ae afai e te manao ma mananao lou aiga ina ia faamaloloina, aua nei faatagaina na fesili e taofia ai le faatuatua mai le faia o ana vavega.
E le gata i lea, e tele atu lo outou faatuatua nai lo mea ua outou mafaufauina ona o le mea lea ua ta’ua e le Tusi a Mamona “o le tetele o faamaoniga.”7 “Tou te iloa foi i latou i o latou fua,” na fetalai ai Iesu,8 ma o fua o le ola ai i le talalelei, ua faaalia i olaga o le Au Paia o Aso e Gata Ai i soo se mea. E pei ona fai atu o Peteru ma Ioane i le au Faresaio, ou te fai atu foi ia te outou, “E le mafai ona ma lē tautala i mea ua ma vaai i ai ma faalogo i ai” ma o mea ua tatou vaai ma faalogo i ai “o se vavega iloga ua faia” i olaga o le fia miliona o tagata o lenei Ekalesia. E le mafai ona faafitia lena mea.9
Uso e ma tuafafine, o se galuega paia lenei o loo faagasolo faatasi ai ma le anoanoai o faamanuiaga o loo vaaia i soo se itu, o le mea lea faamolemole aua nei soona popole pe afai e tulai mai faafitauli e ao ona suesue, malamalama i ai, ma foia. O le a tulai mai lava. I lenei Ekalesia, o le mea ua tatou iloa o le a sili atu ona taua i taimi uma nai lo mea tatou te le o iloa. Ma ia manatua, i lenei lalolagi, e ao lava ona savavali tagata uma i le faatuatua.
O le mea lea ia agalelei ona o vaivaiga faaletagata—o ou vaivaiga faapea foi vaivaiga o i latou tou te galulue faatasi i se Ekalesia o loo taitaia e alii ma tamaitai e galulue fua. Vagana ai i le tulaga o Lona Alo Pele e Toatasi e atoatoa, na o tagata lē atoatoa lava sa galue ai le Atua. Ai lava se faigata tele ia te Ia, ae na Ia taulimaina lava. E tatau foi la ia i tatou. A e vaai foi la i ni lē atoatoa, ia manatua o le tapulaa e le o i ai i le paia o lenei galuega. E pei ona fautuaina ai e se tasi tusitala faamanuiaina: a oo ina liligi mai le atoaga e le i’u, a i ai se mea e maumau, e le o se lape o le suauu ae ona o ipu papa’u ua le mafai ona ofi uma ai.10 O na ipu papa’u e aofia ai oe ma au, o le mea lea ia onosai ma agalelei ma lotofaamagalo.
Matauga mulimuli: a oo mai le le mautonu po o faigata, aua e te fefe e fesili mo se fesoasoani. Afai tatou te mananao i le fesoasoani ma le lotomaualalo ma le faamaoni e pei ona sa faia ai e lenei tamā, e mafai ona tatou maua. O le fasifuaitau i tusitusiga paia e pei o le “faamoemoega tonu,” tulimatai ma le “faamoemoe atoa o le loto,” ma lē faia se pepelo ma se faa’ole’ole i luma o le Atua.”11 Ou te molimau atu i le tali atu i ai i lena ituaiga o augani, o le a auina mai e le Atua le fesoasoani mai i itu uma e lua o le veli e faamalolosia ai lo tatou talitonuga.
Sa ou fai atu ou te talanoa lava i le autalavou. O lea e fai. Na fai mai talu ai nei ma sina faalotolotolua se tamaitiiti e 14 tausaga, “Brother Holland, e le o mafai ona ou fai atu ua ou iloa e moni le Ekalesia, ae ou te talitonu e moni.” Sa ou matua opoina lena tamaitiiti. Sa ou fai atu i ai ma le lagona naunautai mai lo’u loto, o le talitonu o se upu taua, o se taga e sili atu ona taua, ma e le tatau ai ona faatoese i le “na ona talitonu.” Sa ou fai atu ia te ia o Keriso lava Ia na fetalai, “Aua e te mata’u, tau lava ina e talitonu,”12 o se fasifuaitau na tauaveina e le alii talavou o Gordon B. Hinckley i le galuega faamisiona.13 Sa ou faamatala i lenei tamaitiiti, o le talitonu o le laasaga muamua lava lea i le talitonuga maumaututu, ma o mataupu faavae patino o lo tatou faatuatua autasi e amata uma lava i le fasifuaitau, “Matou te talitonu.”14 Ma sa ou ta’u atu foi ia te ia lo’u mitamita tele mo ia ona o le faamaoni o lana tauiviga ia iloa e moni le ekalesia.
Ia, faatasi ai ma le toeitiiti atoa le 60 tausaga o ou ola ma aoao talu mai ona 14 tausaga lo’u matua sa na ona talitonu, ou te tautino atu ai nisi o mea ua ou iloa nei. Ua ou iloa o le Atua i taimi uma ma i itu uma ma i tulaga uma o lo tatou Tama i le Lagi e alofa ma lotofaamagalo. Ua ou iloa o Iesu o Lona alo atoatoa e toatasi, o lē sa ofoina mai ma le alofa lona soifua e ala i le finagalo o le Tama ma le Alo mo le togiolaina o i tatou uma, o ē le atoatoa. Ua ou iloa na toetu o Ia mai lena maliu ia toe soifua ai, ma e talu ai ua Ia toetu, o lea o le a toetutu ai foi i tatou. Ua ou iloa o Iosefa Samita, o le foi na tautino mai e le atoatoa,15 o le meafaigaluega filifilia i aao o le Atua e toefuatai mai le talalelei e faavavau i le lalolagi. Ou te iloa foi o le faia o lena mea—aemaise o le faaliliuina o le Tusi a Mamona—ua ia aoaoina atili ai au i le alofa o le Atua, i le paia o Keriso, ma i le mana o le perisitua nai lo se isi lava perofeta ua ou faitau i ai, iloaina, pe faalogo i ai i se olaga atoa o la’u sailiga. Ou te iloa o Peresitene Thomas S. Monson, o lē o loo tuuto ma le laufofoga fiafia ao lata ina faailoga le 50 tausaga talu ona faauuina o ia e avea ma se Aposetolo, o lē ua agatonu ona suitulaga i le valaauga faaperofeta i le taimi nei. Ua tatou toe vaaia foi lena tiutetauave i ona luga i lenei konafesi. Ua ou iloa o isi tamalii e toa 14 ua outou lagolagoina o ni perofeta, tagatavaai, ma talifaaaliga, ua latou lagolagoina o ia i o latou aao, faatasi ai ma o latou loto, ma latou lava ki faaaposetolo.
Ou te tautino atu nei mea ia te outou faatasi ai ma le talitonuga na ta’ua e Peteru o le “upu o le valoaga e sili lona mausali.”16 O le mea sa avea o se fatu itiiti o le talitonu mo au, ua tupu ma avea ma laau o le ola, afai la o tofotofoina lou faatuatua i lenei taimi po o soo se taimi o le olaga, ou te valaaulia oe e te faalagolago mai i lo’u faatuatua. Ou te iloa o lenei galuega o le upumoni lava a le Atua, ma ou te iloa ua na o se tulaga lamatia pe afai tatou te faatagaina le le mautonu po o tiapolo e taitaiese i tatou mai lona ala. Tumau i le faamoemoe. Tumau i le malaga. Ia faailoa ma le faamaoni au fesili ma ou popolega ae ia tapili muamua motumotu o lou faatuatua, aua e mafai mea uma e i latou e talitonu. I le suafa o Iesu Keriso, amene.