O Upu Tatou Te Tautatala Ai
Saunia e Rosemary M. Wixom
Peresitene Aoao o le Peraimeri
O le auala tatou te talanoa atu ai i a tatou fanau ma upu tatou te faaaogaina e mafai ona uunaia ai ma musuia ai i latou ma faamalolosia ai o latou faatuatua.
Na iloaina talu ai nei e se tamā talavou le maliu o lona faiaoga uiga ese o le vasega lua. I lona manatuaina ai o ia, sa ia tusia ai: “Mai lagona uma ma aafiaga ou te manatuaina, o le lagona e sili ona ou mafaufau i ai o le ‘mafanafana.’ Atonu sa ia aoaoina au i le sipela, o le kalama, ma le numera, ae o le mea e sili ona taua sa ia aoaoina ai au o le fiafia i le avea ai ma se tamaitiiti. I totonu o lona potuaoga, sa leai se afaina o le sese o le sipelaina o se upu i lea taimi ma lea taimi; ‘Ta galulue i ai’, o lana tala lea. Sa leai se afaina o le masaa o ni mea pe masae pe valivalia foi; ‘Tatou galulue e faaleleia ma faamama,’ o lana tali mai lea. E leai se afaina o le taumafai, o le luiina o i tatou lava, o le moemiti, ma e leai se afaina o le fiafia i mea e le taua lea na o tamaiti lava e fiafia i ai.”
O se tasi o aafiaga sili e mauaina e se tagata i lenei lalolagi o le uunaia lea o se tamaitiiti. O talitonuga ma le faatauaina o le tagata lava ia e vave ona foafoaina i olaga o tamaiti. Soo se tagata lava o loo lagonaina mai lou leo ua i ai le mana e faateleina ai le talitonuga o se tamaitiiti ia te ia lava ma faateleina lona faatuatua i le Tama Faalelagi ma Iesu Keriso e ala i upu latou te tautatala ai.
I le Helamana, mataupu e 5 tatou te faitau ai, “Ma o lenei, ou atalii e, ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae.”1
O upu nei a Helamana na aoao ai ona atalii. Ma tatou te faaauau pea ona faitauina: “Ma sa laua manatua ana upu; ma … na laua o atu ai … e aoao atu le afioga a le Atua i totonu o tagata uma.”2
E ui lava na sauaina ma lafoina ia atalii o Helamana i le falepuipui, ae e lei aveesea mai lava ia i laua na upu sa la faalogo i ai. Na puipuia ma siosiomia i laua e se afi faaniutu. Ona oo mai ai lea o se siufofoga, ua fetalai mai i e na faapagotaina i laua:
“Ia outou salamo ia, ia outou salamo ia, ma aua tou te toe saili e faaumatia au auauna. …
“… Sa le o se leo o le faititili, pe o se leo foi o se vavao tele, ae faauta, o se siufofoga filemu o le fimalie atoatoa, sa peiseai o se musumusu, ma sa ati e oo atu i totonu lava o le agaga.”3
E mafai ona tatou aoao mai lena siufofoga faalelagi. Sa lei leotele, otegia, pe faamaasiasiina; sa avea o se siufofoga filemu o le fimalie atoatoa, na aumaia se faatonuga mausali, faapea ma se faamoemoe.
O le auala tatou te talanoa atu ai i a tatou fanau ma upu tatou te faaaogaina e mafai ona uunaia ai ma musuia ai i latou ma faamalolosia ai o latou faatuatua ina ia tumau ai i le ala e toe foi atu ai i le Tama Faalelagi. Ua latou o mai saunia i lenei lalolagi e faalogologo.
O se faataitaiga o se tamaitiiti na faalogologo na tupu i se faleoloa e faatau ai ie. Na faatumulia le faleoloa i tagata faatau ae ua tetei tagata i le iloaina o loo i ai se tina popole ua leiloa lana tama tama laitiiti. I le taimi muamua, sa ia valaauina lona igoa. “Connor,” o lana valaau lea ma savali faatopetope i totonu o le faleoloa. Ao faagasolo pea le taimi, sa amata ona leotele lona leo ma ua i ai le popole. Na vave ona faailoa atu i leoleo o le faleoloa ma sa aofia uma ia tagata sa i le faleoloa i le sailiga o le tamaitiiti. Na mavae se taimi umi peitai e lei manuia le sailiga. Na matauina le popole tele o le tina o Connor ma sa ia tauvalaau i taimi uma lona igoa.
Sa i ai se tasi o tagata, ina ua uma ona faia sana tatalo le leoa, sa ia mafaufau e masalo ua fefe o ia i le faalogo mai i le tauvalaau leotele o lona igoa e lona tina. Sa ia tau atu lenei mea i se isi tamaitai na aofia foi i le sailiga, ma sa la faia faatopetope se fuafuaga. Sa la savavali i va o laulau o ie ma fai soo atu ma le lemu ia upu nei, “Connor, afai o e faalogo mai i lou leo, fai mai, ‘O au lenei.’” A o la savavali lemu agai i le pito i tua o le faleoloa ma toe fai atu lea fuaiupu, na mautinoa lava, sa la faalogoina se leo fefe ma le filemu o fai mai, “O au lenei.” Sa lafi Connor i le va o taaiga ie i lalo o se laulau. O se leo o le filemu ma le toafimalie atoatoa lea na uunaia Connor ina ia tali mai.
Tatalo ina ia Silafia Manaoga o se Tamaitiiti
Ina ia talanoa atu i le loto o se tamaitiiti, e tatau ona tatou iloaina manaoga o se tamaitiiti. Afai tatou te tatalo ina ia iloa na manaoga, o upu tonu lava ia o loo tatou tautatala ai o le a i ai le mana e aapa atu ai i o latou loto. O le a faalauteleina o tatou taumafaiga pe a tatou sailia le taitaiga a le Agaga Paia. Na fetalai mai le Alii:
“Tautala atu mafaufauga o le a Ou tuu i o oulua loto, …
“Aua o le a tuu atu ia te oulua i le itula tonu lava, ioe, i le minute tonu lava, mea e te lua fai atu ai.”4
Aluese mai ma Faalogo atu ma le Alofa
Ae paga lea, o le tele o faatosinaga o lenei lalolagi ua taofia ai le tele o fanau mai le faalogo atu i upu faamalosiau lea e mafai ona mamanuina ai o latou vaaiga ia i latou lava.
O Dr. Neal Halfon, o se fomai tipitipi e taitaiina le Nofoaga Autu a le UCLA mo Tamaiti, Aiga, ma Alalafaga Malolosi, e faasino i le “matua e faia ni mea lelei ae ua le amanaia ai le fanau.” O se tasi o faataitaiga e aofia ai se pepe e 18 masina le matua ma ona matua:
“‘Sa foliga fiafia lava le la tama, e ulavale ma sa manino lava le fiafia i le mauaina o se taimi e aai pizza ai ma ona matua. … I le faaiuga o le taumafataga, sa tu i luga Tina e fai ana feau, ae ua tuu atu le tausiga i le Tama.’
“Sa amata … e Tama ona faitau ana tesi mai le telefoni ao taumafai le tamaitiiti e faagauai mai o ia e ala i le tau’ai solo o fasi pizza. Sa tuuese e Tama le telefoni, ae faasaga atu i le tamaitiiti ma la taaalo. E ui i lea, e lei leva ae sui i le matamata ma lona atalii i se ata vitio i lana telefoni, seia toe foi mai lona toalua.
“Sa matau e [Dr.] Halfon se mouese atu o le malamalama o i totonu o le tamaitiiti, ma le tuuitiitia o le fesootaiga i le va o matua ma le tamaitiiti.”5
O le tali i a tatou tatalo e uiga i le auala e fetaiai ai ma manaoga o a tatou fanau, atonu ia faatele se taimi e aluese ai mai mea faatekinolosi. E mouese atu ia taimi taua o avanoa e fegalegaleai ai ma talatalanoa ai ma a tatou fanau pe a tatou pisi i mea faasalavei. Ae a pe a filifili se taimi i aso taitasi e aluese mai ai i mea faatekinolosi ae fesootai atu i le tasi ma le isi? Na o le tape lava o mea uma. A e faia lea mea, o le a foliga filemu lou fale i le taimi muamua; atonu foi o le a e leiloaina po o le a se mea e fai po o se tala e fai atu. A o e tuuina atu atoa lou mafaufau i lau fanau, o le a amatalia se talanoaga ma o le a e fiafia e faalogologo atu i isi.
Tusi atu e Faatauanau a Tatou Fanau
E mafai foi ona tatou uunaia a tatou fanau e ala i upu tatou te tusi atu ia i latou. Na tusia e Nifae, “Ona ua matou galulue maelega e tusia nei mea, e faatauanau atu ai ia matou fanau … ia talitonu ia Keriso, ma ia faalelei ma le Atua.”6
Na faasoa mai e Peresitene Thomas S. Monson se aafiaga e uiga ia Jay Hess, o se avevaalele lea na fanaina i lalo i Viatename Matu i le vaitau o le 1960. “E lua tausaga e le o iloa e lona aiga pe ua maliu o ia pe o soifua foi. Sa iu ina faatagaina o ia e i latou na faapagotaina o ia, e tusi i lona aiga, ae ia i lalo ifo o le 25 upu lana feau.” Na fesili atu Peresitene Monson: “Mata o le a se mea e te fai atu ai ma ou fai atu ai i o tatou aiga pe a na faapea o tatou i ai i lena lava tulaga—ua silia ma le lua tausaga e le o fevaaia’i, ma e le mailoa foi pe toe fevaaia’i? O le manao ina ia tau atu i lona aiga se mea e mafai ai ona latou iloa o se feau mai ia te ia, ma le manao foi ina ia tuu atu ia i latou se fautuaga taua, na tusia ai e Uso Hess [ia upu nei]: ‘O mea nei e taua: faaipoipoga i le malumalu, misiona, kolisi. Fetuleni atu i luma, faatutu ni sini, tusi talafaasolopito, tapue taifaalua ata i le tausaga.’”7
O a ni upu o le a e tusia i lau fanau pe afai e 25 upu pe itiiti ifo foi?
O le tamā talavou lea na taua muamua, lea na tusi e uiga i mea na te manatuaina e uiga i lona faiaoga o le vasega lua, o loo tausia nei se pepe teine aulelei. Ua ia lagonaina se faatuatuaina faalelagi ua tuuina atu ia te ia. A oo ina matua o ia, o le a sona lumanai? O le a sana tala e fai atu o le a goto ifo i totonu o lona loto? O a upu o le a uunaia ai o ia, siitia ai, ma fesoasoani ia te ia ina ia tumau ai i le ala? Mata o le a se eseesega o le a i ai pe a ia faaaluina se taimi e musumusu atu ai, “O oe o se afafine o le Atua”? Mata o le a ia manatuaina i se aso le fai soo atu e lona tama o upu ia, “Ou te fiafia i mea uma lava e uiga ia te oe”?
Pe le o le mea ea lena na fetalai mai ai lo tatou Tama Faalelagi i Lona Alo faapea foi ma i tatou uma ina ua Ia fetalai mai, “O Lou Atalii pele lena” ona faaopoopo mai lea, “ua ou fiafia lava ia te ia”?8
Tau ina ia atagia mai i upu o loo tatou tautatala ai ma tusiina i a tatou fanau le alofa o lo tatou Tama Faalelagi mo Lona Alo o Iesu Keriso, faapea ma i tatou. Ia tatou tutu ma faalogologo atu, aua o le tamaitiiti ua sili atu ona mafai ona talanoa mai i mea e sili ona maoae ma ofoofogia. Ou te fai atu nei upu i le suafa o Iesu Keriso, amene.