O Lau Malaga Matagofie i le Aiga

Aperila 2013

2:3

O Lau Malaga Matagofie i le Aiga

Saunia e Peresitene Dieter F. Uchtdorf

Fesoasoani Lua i le Au Peresitene Sili

A e faaaogaina ma le fiafia le faafanua na saunia e lou Tama alofa mo lau malaga, o le a taitai atu ai oe i nofoaga paia ma o le a e tulai mai ai i lou gafatia faalelagi.

Ua faamamaluina i tatou i lenei afiafi i le susū mai o Peresitene Thomas S. Monson, lo tatou perofeta pele. Peresitene, o loo matou tatalo pea mo oe.

Ou tuafafine pele, faafetai atu mo le musika ma le afioga tulei. Sa musuia lava ma talafeagai mo le Eseta, le vaitau paia o loo tatou faamanatuina i lenei vaiaso.

O se fiafiaga lo tatou mafuta ai ma outou tuafafine talavou pele, faatasi ai ma o outou tina ma taitai lelei. E susulu o outou agaga ma laufofoga fiafia. E moni e silafia outou e le Alii ma o loo silasila mai ma le alofa mai le lagi ia te outou.

Na ou ola a’e i Zwickau, lea na avea muamua ma Siamani Sasae. Pe a ma le 11 o’u tausaga, sa faateleina suesuega o lo’u tama e tetee i upufai, ma sa lagona e o’u matua e na o le pau le faaiuga e sili ona saogalemu mo lo matou aiga, o le sosola lea i Siamani Sisifo. Sa tonu ai o le fuafuaga e aupito saogalemu o le eseese lea o taimi matou te tuua ai, ma ui atu i ni auala eseese agai i Sisifo, ae tuua a matou meatotino uma.

Talu ai le matua lamatia tele o lo’u tama, o lea sa ia alu ai i le malaga aupito vave, e ui atu i Perelini. O o’u uso matutua na agai i matu, ma sa sue lava le auala o le tagata ia i sisifo. O lo’u tuafafine—o lē atonu e tai pei o le matutua o le toatele o outou o iinei i le aso—faatasi ai ma Helga Fassmann, lona faiaoga i Tamaitai Talavou, ma nisi sa ō i le nofoaafi na ui atu i Siamani Sisifo. Sa latou totogiina se leoleo faitotoa e tatala se tasi o faitotoa mo i latou, ma ina ua sopoia e le nofoaafi le tuaoi o Siamani Sisifo, sa latou tulioso i lalo mai le nofoaafi i le saolotoga. Oka so’u faamemelo i lo’u tuafafine i lona lototoa.

O au o le uii, ma sa tonu ai i lo’u tina e ma te savavali e sopoia atumauga o loo va a’i atunuu e lua. Ou te manatua sa ia teuina se ma meaai e faapei o la ma te o i se savaliga sopo po o se tafaoga i atumauga.

Sa ma o i se nofoaafi i le mamao sa ma mafaia, ona ma savavali ai lea mo le tele o itula, seia latalata atu i le tuaoi o Siamani Sisifo. Sa matua maopoopo le vaavaaiga o tuaoi, ae sa i ai se ma faafanua ma sa ma iloaina se taimi ma se nofoaga o le a saogalemu e kolosi ai. Sa mafai ona ou lagonaina le popole o lo’u tina. Sa ia matua matauina ma le toto’a le eria ina ia vaai po o tuliloa mai i ma’ua. O laa taitasi, sa foliga mai ua faasolo ina vaivai ona vae ma ona tulivae. Sa ou fesoasoani ia te ia i le amoina o lana taga mamafa sa tumu i meaai, o pepa taua, ma ata o le aiga a o ma fe’a’ei i luga o le mauga mulimuli. E moni lava, sa manatu o ia, ua ma pasia le tuaoi i le taimi lenei. Ina ua ia lagonaina ua saogalemu, sa ma nonofo ifo loa i lalo ma amata ona ‘ai le ma meaai. Mo le taimi muamua i lena aso, ou te talitonu, sa sa’o lelei lana manava.

Ae o le taimi lena na ma faatoa iloa atu ai le faailoga o le tuaoi. O la lava ma te mamao ese mai ai! E sese le itu o le tuaoi lea ma te tafafao ai. O lea lava ma te i ai i Siamani Sasae!

Sa mafai lava ona tutu mai ni leoleo tuaoi i lena taimi!

Sa toe teu faanatinati ma le popole e lo’u tina le ma meaai, ma sa ma faatopetope agai atu i le mauga i le vave sa ma mafaia. O le taimi la lenei, ma te le’i tutu lava seia oo ina ua ma mautinoa ua ma taunuu i le isi itu o le tuaoi.

E ui lava na eseese auala na ui ai tagata taitoatasi o lo matou aiga ma sa feagai foi ma faigata eseese uma i le ala, ae na iu lava ina matou saogalemu uma. Sa iu ina toefaatasia o se aiga. Se aso ina a matagofie o lena aso!

Tala o Malaga

O le tala sa faatoa ou faamatalaina atu, o se aafiaga ou te manatu ai o se malaga e taua tele. Ua mafai nei ona ou toe tilotilo i tua ma iloa ai le tele o “malaga” faapena o le olaga sa ou ui ai. E le o malaga uma sa aofia ai se sopoia o atumauga po o ni tuaoi faaupufai; o nisi e matele i le faatoilaloina o tofotofoga po o le tuputupu ae faaleagaga. Ae, o ni malaga uma lava. Ou te talitonu o olaga uma, o se faaputuga o “tala o malaga” taitasi.

Ou te talitonu ua outou iloa o tu ma aga faaleaganuu taitasi ua tamaoaiga i tala o malaga. Mo se faataitaiga, atonu ua outou masani i le malaga a Dorothy ma lana taifau, o Toto, i le The Wizard of Oz. Na tafia ia Dorothy ma Toto i se asiosio ma tuua ai i le Nuu o Oz. O iina, na maua ai e Dorothy se auala sima-lanusamasama iloga o loo makaina ai le ala mo se malaga na iu ina taitai atu ai o ia i lona aiga.

E i ai foi Ebenezer Scrooge o le tala a Charles Dickens, o lana malaga na aveina atu ai e lē mai se nofoaga i sea nofoaga, ae mai lea taimi i lea taimi. O se malaga i totonu o lona lava loto, ma na fesoasoani e malamalama ai o ia ma iloa pe aisea na avea ai o ia ma tagata na oo i ai, ma le mea semanu e oo ia te ia pe a na faaauau ai pea i lona ala faaloloto po o le manatu faapito ma le lē lotofaafetai.¹

O se tasi o talafatu lautogia maoae e fa o talatusi faa-Saina o le Malaga i Sisifo. Na tusia i le seneturi e 16, o loo faamatala matagofie ai le tala i se mea na tupu ma le malaga a se faifeau, o lē na malaga agai atu i le malamalama, faatasi ai ma le fesoasoani a ni tagata agalelei se toafa.

Ma le Bilbo Baggins, si alii laitiiti faalēamanaia ma e sili lava ia te ia le nofo i le fale e ‘ai lana supo. Ae ina ua tuitui atu lona faitotoa, sa ia manao e mulimuli atu i nofoaga na te lei iloaina muamua ma sa ia agai atu ai i le lalolagi, faatasi ma se taulaitu ma se vaega o sa’a e faatino se misiona matautia ae e matua taua lava.²

O Se Tala Faaleatulaulau

Pe tatou te le fiafia ea i nei tala o malaga aua e mafai ai ona tatou vaai ia i tatou lava i tagata o loo malaga? E mafai ona fesoasoani a latou mea e manuia ma mea foi latou te toilalo ai, e sue ai o tatou lava ala i le olaga. O le vitio lea sa tatou matamata ai i ni nai minute ua tea o loo tau mai ai foi se tala matagofie o se malaga. Atonu e faamanatu mai ai foi ia i tatou se malaga e tatau ona tatou masani uma ai—se malaga e tofu i tatou uma ma se vaega taua e faia ai.

O lenei tala na amata i se taimi ua leva lava a o lei taitai ona amata taamilo le lalolagi i lona alāli’o, a o lei taitai ona amata o’o atu le aasa o le la i le vanimonimo malulu, a o lei taitai ona nofoia e ao ma le timu ma meaola tetele ma ninii lo tatou paneta. I le amataga o lenei tala, sa outou nonofo ai i se nofoaga mamao lava.

Tatou te le iloa ni auiliiliga se tele e uiga i le olaga i lena siosiomaga i le muai olaga, ae e i ai ni nai mea ua tatou iloa. Sa faaalia mai e lo tatou Tama Faalelagi pe o ai o Ia, pe o ai i tatou, ma pe o ai foi e mafai ona avea ai i tatou.

I lena muai esetete, sa outou iloa ai ma le matua mautinoa o loo i ai se Atua aua na outou vaai ma faalogo ia te Ia. Sa outou iloaina Iesu Keriso, o lē o le a avea ma Tamai Mamoe a le Atua. Sa outou faatuatua ia te Ia. Ma sa outou iloaina o lo outou taunuuga e lē o le nonofo ai i le saogalemu o lo outou aiga i le muai olaga. E ui ina sa outou fiafia i lena siosiomaga faavavau, ae sa outou iloaina e manaomia ona outou tuuvaa i se faigamalaga. O le a outou tuua le afioaga o lo outou Tama, ma ui mai i se ufimata o le lotogalo, maua se tino faitino, ma aoao ma o’o i mea e faamoemoe o le a fesoasoani tou te tuputupu ae ai ina ia avea atili e faapei o le Tama i le Lagi ma toe foi atu ai i Lona afioaga.

I lena nofoaga paia, e siosiomia e i latou sa outou iloaina ma alolofa i ai, atonu o le fesili sa outou mafaufau i ai o le “Mata o le a ou toe foi saogalemu mai i lo’u aiga faalelagi?”

Sa matuai tele naua mea semanu e le mafai ona faafoeina. O le a faigata le olaga faitino i nisi taimi, tumu i pioga o le auala e le iloa: o ma’i, loto nutimomoia, faalavelave, ma feeseeseaiga.

A aunoa ma se manatua o lou olaga sa i ai—a aunoa ma le manatuaina sa e nofo faatasi ma lou Tama i le Lagi—mata e te matauina Lona siufofoga i le pisapisao ma mea faalavelave o le olaga faitino?

O le malaga o i luma e foliga mai e matua umi tele ma lē mautinoa—e matua tumu i mea matautia.

O le a le faigofie. Ae na outou iloa lava o le a aoga taumafaiga uma.

O lea, sa e tu i le amataga o lau malaga i le faavavau, ma sagisagi atu ma le fiafia e le magagana ma le faamoemoe—ae ou te manatu, e faatasi ai foi ma sina popole ma le mata’u.

I le faaiuga, sa e iloaina e faamaoni le Atua—o Lona agalelei o le a manumalo. Sa e i ai i fonotaga maoae faalelagi ma sa e iloa ai o le a saunia e lou Faaola ma le Togiola, o Iesu Keriso, se ala mo oe e faamama ai mai agasala ma laveai mai le oti faaletino. Sa e faatuatua, a oo i le iuga, o le a e olioli ma sii ae lou leo faatasi ma ‘au o le lagi ma vivii faamanu atu i Lona suafa paia.

Ma o lea la, sa e manava ai i totonu …

Ma se laa telē i luma …

Ma o lea la ua e i ai iinei!

Ua outou, taitasi, ma tuuvaa atu i lau lava malaga matagofie e toe foi ai i lou aiga faalelagi!

O Lau Faafanua

O lea la ua e i ai nei i le lalolagi, e ono atamai lou fesili ifo ia te oe lava pe o faapefea lau malaga. Pe o e i ai i le ala sa’o? Pe o avea ea oe ma le tagata lea na mamanuina oe ia e i ai ma manao ia avea ai? Pe o e faia ea filifiliga o le a fesoasoani ia te oe e toe foi atu ai i lou Tama i le Lagi?

Na te lei auina mai oe i lenei malaga e tau ina e fealualuai solo e lē tapasaina. E finagalo o Ia ia e toe foi atu ia te Ia. Ua Ia tuuina atu ia te oe ni matua alolofa ma taitai faamaoni o le Ekalesia, ma se faafanua o loo faamatala atu ai le siosiomaga ma faailoa atu ai tulaga matautia; e ta’u atu ia te oe e le faafanua le mea e mafai ona maua ai le filemu ma le fiafia ma o le a fesoasoani ia te oe e faataatia le alafua e te toe foi atu ai i le aiga.

Ia o fea la e te maua ai lenei faafanua?

I tusitusiga paia.
I upu a perofeta ma aposetolo.
Ma e ala mai i faaaliga patino mai le Agaga Paia.

O le faafanua lenei o le talalelei, o le tala e lelei, ma o le auala fiafia lea o se soo o Keriso. O poloaiga ma le faataitaiga ua tuuina mai e lo tatou Faufautua ma le Faiaoga, o lē e silafia le ala aua o Ia lava o le ala.³

Ioe, o le na ona i ai o se faafanua e matua leai lava se aoga sei vagana ua e suesue i ai—vagana ua e faaaogaina e faafoe ai lau malaga i le olaga. Ou te valaaulia oe ia e faia o se faamuamua maualuga le suesueina ma faaaoga le afioga a le Atua. Tatala lou loto i le Agaga Paia ina ia mafai ona Ia taitaia oe i lau malaga i le olaga.

E tumu lau faafanua i feau faamalosiau ma faatonuga mai le Tama Faalelagi ma Lona Alo o Iesu Keriso. O le aso, ou te fia faasoa atu ia te outou ni savali se tolu o le a fesoasoani ia manuia ai lau malaga e toe foi atu i lou aiga faalelagi.

O le savali muamua: “Aua tou te fefefe, aua o A’u le Alii ua Ou faatasi ma outou.”⁴

Ua le na o oe i lenei malaga. Ua silafia oe e lou Tama Faalelagi. Tusa lava pe leai se tasi e lagonaina oe, Na te faafofogaina oe. A e fiafia i le amiotonu, e fiafia o Ia faatasi ma oe. A e feagai ma tofotofoga, e mafatia o Ia faatasi ma oe.

O le naunau mai o le Tama Faalelagi ia te oe, e le faalagolago i lou mauoa po o le aulelei po o le maloloina po o lou atamai. E le silasila mai o Ia ia te oe faapei o le vaai a le lalolagi; e silasila mai o Ia i lou tagata moni. E silasila o Ia i lou loto.⁵ Ma e alofa o Ia ia te oe⁶ aua o oe o Lona afafine.

Tuafafine pele, saili atu ia te Ia ma le faamaoni a’ia’i, ona e maua lea o Ia.⁷

Ou te folafola atu ia te outou, e le o tuulafoaiina outou.

Taimi nei, tilotilo nei loa lava i tagata o loo siomia ai oe. O nisi atonu o ou taitai, uo, po o tagata o le aiga. O isi atonu e te lei feiloai lava i ai muamua. Ae ui o lea, o tagata uma lava o siomia ai oe—i lenei sauniga po o se isi lava nofoaga i soo se taimi—sa totoa i le muai olaga. O lena tagata foliga lē amanaia ma faatauvaa—o loo nofo i ou tafatafa atonu o se tasi lena o tagata maoae sa e alofa ma faananau i ai i le lalolagi o agaga. Atonu foi sa avea oe lava ia ma se tagata faataitai?

O se tasi e mafai ona e mautinoaina: o tagata uma e te vaai i ai–tusa lava po o le a le lanu, tapuaiga, talitonuga faaupufai, ituaiga tino, po o foliga—e aiga. O le tamaitai talavou lena e te tilotilo i ai, o le Tama Faalelagi lava e tasi e pei o oe, ma sa ia tuua Lona afioaga agaalofa e faapei foi ona sa e faia, sa naunau e sau i lenei lalolagi ma ola ai ina ia mafai foi ona toe foi atu ia te Ia i se aso.

Peitai, e ono lagonaina e ia le tuuatoatasi, e faapei foi o oe i nisi taimi. Atonu e i ai foi nisi taimi e galo ai ia te ia le faamoemoega o lana malaga. Faamolemole faamanatu atu ia te ia, e ala i au upu ma au amioga, e le o tuulafoaiina o ia. Ua tatou i ai iinei e fesoasoani ia te ia.

E mafai ona faigata le olaga, ma e mafai foi ona faamaaaina ai loto e oo ai lava ina foliga mai ua le mafai ona aapa atu i nisi tagata. O nisi atonu e tumu i le ita. O isi atonu e aamu ma faatauemu ia i latou o ē talitonu i se Atua alofa. Peitai, mafaufau i le mea lenei: e ui latou te le manatuaina, ae sa i ai foi le taimi na latou mananao ai e toe foi atu i lo latou Tama i le Lagi.

E le o sou tiutetauave le faaliliu mai o se tagata. O le galuega lena a le Agaga Paia. O lau galuega o le faasoa atu o ou talitonuga ma ia aua le fefe. Ia avea oe o se uo i tagata uma, ae aua lava nei fetuutuunaia ou tulaga faatonuina. Ia e faamaoni i ou talitonuga maumaututu ma le faatuatua. Ia e tu ma le lototoa, aua o oe o se afafine o le Atua, ma o loo oulua tutu faatasi ma Ia!

O le savali lona lua: “Ia outou fealofani, e faapei ona ou alofa atu ia te outou.”⁸

Pe i ai ea se taimi na e mafaufau ai po o le a le gagana na tatou tautatala uma ai a o tatou nonofo ai i le afioaga o le Atua? E malosi lava lo’u masalosalo o le faa-Siamani, e ui lava ou te lagona e leai se isi o mautinoaina. Ae ou te iloa i lo tatou muai olaga, sa tatou muai aoaoina ai, mai le Tamā o o tatou agaga, se gagana sa laugatasia uma ai—o se gagana e i ai le mana e faatoilalo ai papupuni faalelagona, faaletino, ma le faaleagaga.

O lena gagana o le alofa mama o Iesu Keriso.

O le gagana e aupito sili ona mamana i le lalolagi.

O le alofa o Keriso e le o se alofa e faatagāfai. E le o se alofa e molimoli mai i se kata faamanuia. E le o le ituaiga alofa lea e faaviivii mai i musika ma ata tifaga e fiafia i ai tagata.

O lenei alofa e aumaia ai suiga moni o le amio. E mafai ona faatoilalo ai le inoino ma foia ai le lotomatau’a. E mafai ona faamaloloina ai le faatuaupua ma tineia ai le afi mumu o le lototiga.

Sa tatou mauaina a tatou “uluai lesona”⁹ i lenei gagana o le alofa a o avea i tatou o ni agaga i le afioaga o le Atua, ma iinei i le lalolagi ua tatou maua ai avanoa e faatino ai ma atili mauupu ai. E mafai ona e iloaina pe o e aoaoina lenei gagana o le alofa e ala i le iloiloina o mea o loo faaosofia ai ou mafaufauga ma au mea e fai.

A oo ina taulai atu ou mafaufauga faavae pe faapefea ona aoga mea ia te oe, e ono manatu faapito ma papa’u mea o loo faaosofia ai oe. E le o le gagana lena e te manao e aoao.

Ae a oo ina taulai atu ou manatu faavae ma amioga i le auauna atu i le Atua ma isi—pe a e manao moni lava e faamanuia ma sii a’e i latou o loo vagaia oe—ona mafai lea ona aoga le mana o le alofa mama o Keriso i lou loto ma le olaga. O le gagana lena e te manao e aoao.

A oo ina e mauupu i lenei gagana ma faaaoga i au fegalegaleaiga ma isi, o le a latou matauina se mea o ia te oe e ono fāgua ai i latou i se lagona ua leva ona natia e saili atu mo le ala sa’o i le malaga toe foi i lo latou aiga faalelagi. O le mea moni, o le gagana o le alofa o la latou gagana faalenuu moni lena.

O lenei uunaiga loloto ma le mausali, o se gagana e oo ifo i le taele o le loto. O se gagana o le malamalama, o se gagana o le auaunaga, o se gagana e siitia ma olioli ai ma faamafanafana ai.

Aoao e faaaoga le gagana laugatasia o le alofa o Keriso.

Ma o le savali lona tolu: “Ia olioli.”¹⁰

O nisi taimi e le lava ai lo tatou onosai i le mea ua tatou i ai i la tatou malaga, e sa’o? Afai ua 12 ou tausaga, atonu e te moomoo ia e 14. A 14, atonu e te moomoo ia e 18. A 18 foi, o nisi taimi atonu e te moomoo maimau e pe ana e toe 12 ina ia mafai ona toe amata atoa.

O le a i ai lava i taimi uma mea e faitio ai—o mea e foliga mai e le o sa’o lava. E mafai ona e faaaluina ou aso e faanoanoa ai, tuulafoaiina, lē malamalama ai, pe lē manaomia foi. Peitai e le o le malaga lena sa e faamoemoe i ai, ma e le o le malaga foi lena sa auina mai oe e le Tama Faalelagi e te faia. Manatua, o oe moni lava o se afafine o le Atua!

O le iloa ai o lenei mea, ou te valaaulia ai outou ia savavali ma le mautinoa ma le fiafia. Ioe, e i ai patupatu ma ala’alo e oo lava i ni mea e lamatia ai. Ae aua nei taulai atu i na mea. Vaavaai mo le fiafia ua saunia e lou Tama i le Lagi mo oe i laasaga uma o lau malaga. O le fiafia o le taunuuga lea, ae o le ala foi lena. “O le filemu i le lalolagi, ma le ola e faavavau i le lalolagi a sau” o mea ia ua Ia folafola mai.¹¹ O le mea lena na Ia poloaiina ai i tatou “ia olioli.”

A e faaaogaina ma le fiafia le faafanua na saunia e lou Tama alofa mo lau malaga, o le a e tulai mai i lou gafatia faalelagi. O le a tuputupu ae ma avea ma afafine o le Atua lea sa e moemiti ia avea ai oe.

Tuafafine pele, tamaitai talavou pele o le Ekalesia, uo talavou pele, i le avea ai o se Aposetolo a le Alii, ou te tuuina atu ai ia te outou se faamanuiaga ia e maua lou ala i lenei malaga toe foi i le aiga, ma o le a avea oe o se musumusuga i ē o loo outou faimalaga. O la’u folafolaga foi ma la’u tatalo a e faamamaluina ma ola faamaoni i feagaiga, o mataupu faavae, ma tulaga faatauaina o le talalelei a Iesu Keriso, i le faaiuga o lau malaga, o le a i ai iina lou Tama Faalelagi. O le a Ia opoina oe, ma o le a iloaina ai loa lava ua e taunuu saogalemu i le aiga. I le suafa o Iesu Keriso, amene.