Aua Le Masii Ese
Saunia e Elaine S. Dalton
Peresitene Aoao o Tamaitai Talavou
Ia tutumau. Ia mausali. Tutu atu mo le upumoni ma le amiotonu. Tutu atu e fai ma molimau. Ia avea o se tagavai i le lalolagi. Ia tutu i nofoaga paia.
O le po nei a o ou tu i se nofoaga paia i lenei pulelaa ma i luma o perofeta, tagatavaai, ma talifaaaliga ma afafine tautupu o le Atua. O se taimi ofoofogia lenei le i ai i le lalolagi ma le avea ai o se tamaitai talavou. O outou o afafine filifilia o lo tatou Tama i le Lagi. Ou te faamoemoe o loo outou lagonaina lo outou faasinomaga, ma le pele o outou i lo tatou Tama i le Lagi. E alofa o Ia ia te outou uma taitoatasi, ma ou te alofa foi ia te outou.
I luga o le kesi i lo’u ofisa, o loo i ai se kopi o le atavane apamemea o se tamaitai talavou e igoa ia Kristina. O le atavane tele na muai taina, o loo tu i luga o se paega i Copenhagen, Tenimaka, e faasaga agai i le sami agai atu i Siona. O lana faaiuga e auai i le Ekalesia ma tuua lona aiga e le i faigofie, ma e mafai ona e vaaia le agi malosi mai o matagi e faafesagai ma ia. O loo tu mausali o ia, ma faia se mea faigata tele ae ua ia iloa e sa’o. Na tuu e e na tupuga mai ia te ia lena atavane i luga o lena paega e avea o se saafiafiga ia Kristina, mo lana faaiuga i lena aso, e matua taua e faavavau mo augatupulaga.
Ia te au, o le atavane lenei o Kristina e faatusa ia te outou taitoatasi. E faapei o Kristina, o loo outou tutu i le faatausiusiuga o le anoano o faaiuga taua ma le faiga o filifiliga i aso taitasi, o nisi o na faaiuga e faigata, o le a le gata ina faatulaga ai lou lumanai ae faapea foi le taunuuga o augatupulaga. O loo outou feagai foi ma matagi malolosi o tetee, mafatiaga, uunaiga a taaga, ma le faaleagaina o le ola mama. Ae o lena lava tou te tutu mausali ma ola i le talalelei a’o feagai ai ma nei afa matautia i lo tatou lalolagi. E faapei o Kristina, o loo taitaia outou e le Agaga Paia. O loo outou faia faaiuga sa’o. Tou te lotonuu ma o outou o ni tamaalii.
E leai se fautuaga e sili atu ua ou mafaufau i ai mai lo tatou Tama Faalelagi alofa nai lo Lana apoapoaiga mo outou taitoatasi ia “outou tutu … i nofoaga paia, ma aua le masi’i ese.”1 O loo faapea mai o Ia: “Ia tutumau. Ia mausali.2 Tutu atu mo le upumoni ma le amiotonu.3 Tutu atu e fai ma molimau.4 Ia avea o se tagavai i le lalolagi. Ia tutu i nofoaga paia. Ma o lea la o la’u savali ia te outou taitoatasi e faigofie lava—“Ia mausali.”
Muamua, ia mausali i le filifilia o le mea tonu. I nei aso e gata ai, e leai se faaiuga e faatauvaa. O filifiliga o loo outou faia i le taimi nei, e matua taua lava. O le faitalia, po o le tomai e filifili ai, o se tasi lea o meaalofa silisili a le Atua i Ana fanau. O se vaega lea o le fuafuaga o le fiafia lea na tatou filifili e puipuia i lo tatou muai olaga. Ia outou ola i o outou olaga i se tulaga e mafai ai ona outou faalogologo i le Agaga Paia ma o le a Ia fesoasoani ai ia te outou e faia faaiuga sa’o. O le a Ia “ta’u mai ia te outou mea uma e tatau ona outou faia.”5
I ni nai vaiaso talu ai sa ou toe foi ai i la’u aoga maualuga tuai mo le taimi muamua talu mai le tele o tausaga. Sa ou asiasi i se konafesi faalesiteki sa faia ai i le faletele o le aoga. A o ou savali atu i le faapaologa, sa amata ona saputu mai i lo’u mafaufau mea e manatua. Sa pei lava o le taimi a’o ou i ai i le a’oga maualuga o se teine talavou—e le mautonu, lē mautu o a’u lava, o o’u lava mafaufauga, ma o lea, sa ou manao ai ia faafetaui lelei a’u i ai. Sa ou alu i le faletele. Sa toe saputu mai ni manatua i lo’u mafaufau. Sa ou iloa lelei vaega uma o lena faletele. Na o le tasi lava le mea na suia—o a’u.
O le aso lena, sa ou maua ai le avanoa e tu atu ai i luga o le tulaga e pei ona sa ou faia i le tele o taimi a’o i ai i le aoga maualuga o se tasi o taitai o tamaiti aoga. Sa ou vaai foi i nisi o la’u vasega i le aofia—o nisi sa matou tafafao faamasani! Ae o le taimi la lenei, nai lo le taitaia o se potopotoga a le a’oga, sa ou mauaina le avanoa—iina i le faletele o la’u aoga maualuga—e “tu atu ai o se molimau”6 ma tuuina atu la’u molimau i lo tatou Faaola o Iesu Keriso.
Tamaitai talavou, ia mautinoa o a outou sootaga ma isi ia oo atu i le 40 tausaga mai le asō, o le a e le maasiasi lava. E leai lava se āuga o uunaiga a taaga a tupulaga, taliaina, po le lauiloa. O lau uunaiga i alii talavou o le a fesoasoani ai ia i latou e tumau le agavaa mo le mana o le perisitua, feagaiga o le malumalu ma faia se misiona. A o ai foi na te iloa? Fasefulu tausaga mai le asō, atonu o le a i ai se tasi o i latou e savali atu ia te oe, iina i le faletele o lau a’oga maualuga ma faafetai atu ia te oe i lou fesoasoani ia i latou ia tumau le agavaa e faataunuu ai o latou tiute faale-perisitua e faia ai se misiona mamalu. A o ai foi na te iloa? Atonu e te mauaina se tusi mai se tasi o faletua o na alii talavou, e faafetai atu ai ia te oe mo lau uunaiga i lona toalua ma lo latou aiga i le lumanai, i taimi a o e a’oga i le aoga maualuga. E taua au filifiliga. O au filifiliga i le taimi nei e le gata ina aafia ai oe, ae e aafia ai foi isi. E faavavau lo latou taua. Ia mausali!
Lua, ia mausali i lou naunau ma lau tautinoga e tumau i le amiomama ma ia mama a’i’ai mai faiga feusuai. Talisapaia le mama. O lou lava mama a’ia’i o se tasi o sosia aupito sili o le mana. Ina ua e sau i le lalolagi sa tuuina atu ia te oe le meaalofa taua o se tino. O lou tino o se meafaigaluega o lou mafaufau ma o se meaalofa paia e te faaaogaina ai lou faitalia. O se meaalofa lenei e le’i mauaina e Satani, ma o lea ua ia faatonutonuina ai ana osofaiga uma lava i lou tino. E manao ia te oe e te inoino i ai, faaaoga sese, ma faatautala lou tino. O le le tauagafau, ponokalafi, ola le mama, taina o pe’a ma tatui, faaaoga sese o fualaau faasaina, ma vaisu o ituaiga uma, o taumafaiga uma ia e faoa ai lenei meaalofa taua, ma faia ia faigata mo oe ona e faaaogaina lou faitalia. Na fesili Paulo: “Tou te le iloa ea o outou o le malumalu o le Atua, ma e nofo le Agaga o le Atua i totonu ia te outou?”7
O lou tino o se malumalu. Aisea? Aua ua i ai le malosi e nofo ai e le gata i lou agaga e faavavau, ae faapena foi i agaga e faavavau o isi o le a o mai i le lalolagi, o se vaega o lou aiga e faavavau. Na aoao mai e Elder Dallin H. Oaks, “O le mana e foafoa ai le olaga faitino o [se] mana faaeaina.”8 O lau matafaioi o se matafaioi faaeaina. Ua tuuina atu e le Atua ia te oe se faatuatuaga paia! O loo outou sauniuni e avea ma tina i le lumanai o tupulaga o le a oo mai. Ia tausisia lo outou mama ma le agavaa ma ia puipuia le mea ua “sili ona pele ma taua i lo mea uma”—o lou mama ma le ola mama.9 I le avea ai ma afafine filifilia o le Tama Faalelagi, o Lana fautuaga poto ia te oe lava ia o le “savali i o’u luma i ala o le amiomama.” Na fesili Paulo, “Tou te le iloa ea o outou o le malumalu o le Atua, ma o loo mau le Agaga i totonu ia te outou?”10
O le mama o le ki auro lea i le malumalu. O lea la, o le lona tolu, ia mausali i le agavaa e osia ma tausia feagaiga paia. O le feagaiga e te osia i le papatisoga o le a noatia ai oe i le ala o le mama ma le fiafia a o e faafouina i vaiaso taitasi e ala i le taumafa i le faamanatuga. A e tausia lau feagaiga o le papatisoga, o le a ese ou foliga, ese le faiga o ou laei, ma ese foi au aga mai le lalolagi. O le tausia o lenei feagaiga o le a mafai ai ona taialaina oe e le Agaga Paia. Tutu i nofoaga paia, ma aua lava tou te faalatalata atu i na siosiomaga o musika, ala o faasalalauga, po o asosi e ono afua ai ona e le maua le mafutaga ma le Agaga Paia.11 Ma a outou tausia a outou feagiaga, o le a tumau lo outou agavaa ma saunia e ulu atu i malumalu paia o le Alii.
O le mea mulimuli, ia mausali i lou taliaina o le Togiola a le Faaola. O le Togiola e mo oe ma au. O se mana e mafai ai ma togiolaina ai. Afai e te le o lagonaina le agavaa e tu i nofoaga paia, aua e te tauaveina lenei avega o le agasala mo se isi aso. O le olaga lenei, tatou te faia uma lava ni mea sese. Ia e iloa e alofa tele le Faaola ia te oe na Ia faia ai ia e mafai ona suia ma salamo pe afai ua e faia se mea sese. E le manao Satani e te mafaufau faapea e mafai ona e sui.12 O le a taumafai o ia e faatalitonu oe ua e le toe aoga. O se pepelo lava lena mea. E mafai ona e toe foi mai. E mafai ona e salamo. E mafai ona e mama a’ia’i ma paia ona o le Togiola e le i’u a le Faaola.
Se’i ou faaiu atu i se tasi o tala valevalealofa aupito sili ona ou fiafia i ai. Atonu e te fesili, “O le a se faiā a se tala valevalealofa ma le tutu i nofoaga paia?” O se tala lea i se tamaitai talavou e igoa ia Repeka.13
I le faamatalaga o lenei tala, na poloaiina e Aperaamo lana auauna e sue mai se tamaitai talavou agavaa e fai ma ava a lona atalii o Isaako. E tatau o sē e agavaa mo se faaipoipoga i le feagaiga—amiomama ma mama a’ia’i, ma agavaa. O lea na ia auina atu ai lana auauna i se malaga umi ma le matautia i se nuu e igoa o Arana. O loo manino lava le mafuaaga na alu ai o ia iina—e manaomia e tane paia ni fafine paia e lagolagoina ma fesoasoani ia i latou. Ina ua latalata atu le auauna i le aai o Arana, sa tu o ia i se vaieli e faainu ana kamela ma sa ia tatalo ia taitaiina o ia i le tamaitai talavou sa’o, ma ia ona iloaina o ia e ala i le ofoina mai o se vai mo ia ma ana kamela e 10. Ia, sa ou tietie i se kamela, ma ua ou iloa ai—e inu vai tele ia kamela!
I le Kenese ua tatou faitau ai sa le gata ina alu Repeka i lalo o le vaieli e utu a’e ai vai, ae sa “faataalise”14 o ia—pe faatopetope ina ia faataunuuina lenei galuega. Ona tuu atu lea e le auauna o asoa ma taulima auro ia Repeka ma fesili pe maua se avanoa i le fale o lona tama sei nofo ai o ia. Ou te talitonu na fesoasoani ia asoa ma taulima auro! Fai mai le mau, “Ona momo’e lea o le teine ma ta’u atu mea uma i le aiga o lona tina.”15 Masalo o Repeka o se tagata tamoe!
Na faamatala e le auauna i le aiga o Repeka le mafuaaga o lenei malaga umi ma sa ioe Repeka e avea ma ava a Isaako. Sa manao le auauna e la te o ma Repeka i le aso na sosoo ai, ae peitai na talosagaina e lona aiga latou te toe nonofo ma ia i se isi 10 aso. Ona latou fesili atu lea ia Repeka po o le a le mea e manao e fai, ma o lana tali o le “O le a ma o.”16 Pe tali foliga lena tali i le tali a le toafia afe e tali mautinoa atu “O le a ou alu, ma faia”17 ina ua fofogaina mai e le perofeta, o Peresitene Thomas S. Monson, le avanoa mo nei alii talavou ma tamaitai talavou e faamisiona ai i le matutua ua tuutuu i lalo?
I le aoaoga la ma le faaiuga o lenei tala valevalealofa. Sa saunia ma agavaa Repeka e osia ma tausia feagaiga paia ma ia avea o se ava a Isaako i le feagaiga. Sa lei taufaatalitali o ia sei saunia. A o lei malaga ese o ia mai lona aiga, sa tuuina atu ia te ia se faamanuiaga ma ua ou ootia lava i upu, aua sa folafola atu ia te ia o le a avea o ia “ma tina o afe e mano.”18 Ae o le vaega aupito sili o lenei tala valevalealofa o le taimi ina ua faatoa vaai lava Repeka ia Isaako ma faapena foi ia [Isaako] ia. E le o ta’ua maia lenei mea i le Tusi Paia, ae ou te manatu o le alofa i le tepa muamua! Aua “o le amiomama e fiafia i le mama; [ma] o le malamalama e pipii i le malamalama.”19 Ina ua alu atu Isaako e faafetaiai i le kariota, sa “alu ifo [Repeka] i le kamela.”20 Ona fai mai lea, “Ma sa alofa o ia ia te ia.”21 O i lea ou te ofo ai!
O le tutu ai o Repeka ma Kristina i nofoaga paia e lei faigofie. O le mausali e le faigofie. Sa agi malosi le matagi, sa mamafa le vai mai le vaieli, ma o le tuua foi o aiga ma olaga ua masani ai, e mautinoa lava sa lei faigofie. Ae sa la faia ni filifiliga sa’o. Sa taialaina i la’ua e le Agaga Paia. Sa amiomama i la’ua; ma sa saunia i la’ua lava e osia ma tausia feagaiga paia. Na tupuga mai le Faaola i le gafa o Repeka. Pe na ia iloaina i lena taimi o le a tupu lenei mea? E leai! Pe taua a outou filifiliga i le taimi nei? Ioe!
Tamaitai talavou, o loo faalagolago mai augatupulaga i filifiliga tou te faia, o lo outou mama a’ia’i, ma o outou olaga agavaa. Ia outou mausali. E tele so outou taunuuga o loo lupe. O lo outou taimi lenei! Ou te talitonu faamaoni o se tamaitai talavou amiomama e toatasi, e taitaia e le Agaga, e mafai ona suia le lalolagi!
Ou te molimau atu o loo soifua le Faaola! O le a faatasi o Ia ma outou. O Ia o le a outou mafaia ai. Ma i taimi faigata,“[o le a] si’o faataamilo outou e [Ana] agelu, e sapasapai outou i luga.”22 I le suafa o Iesu Keriso, amene.