O Se Faavae Mautinoa

Saunia e Epikopo Dean M. Davies

Fesoasoani Lua i le Au Epikopo Pulefaamalumalu

Sei o tatou taliaina le valaau a le Faaola ina ia o mai ia te Ia. Sei o tatou fausia o tatou olaga i luga o se faavae saogalemu ma le mautinoa.

I le aso 17 o Oketopa, 1989, ao agai atu lau taavale i le fale mai le galuega, sa ou agai atu i se moli o le auala i le magaala o Market ma Beale Streets i San Francisco, Kalefonia. I lena lava taimi sa ou lagona ai le lulu o le taavale ma manatu ai, “Atonu ua pa lau pau.” A o lulu ai pea le taavale, sa ou iloaina atu se pasi o tu latalata mai i lau taavale ma sa ou manatu ai loa, “O le pasi le la na pa i lau taavale!” Ona toe lulu ma toe lulu ai pea lea o le taavale, sa ou manatu faapea, “Masalo e fa au pau ua pa pa!” Peitai e lei pa pa ni pau po o le pasi—ae o se mafuie malosi! A o tu lau taavale i moli mumu, sa i ai ni galugalu i le auala e pei o ni galu o le sami o loo tafe mai i le Market Street. I ou luma atu sa i ai se fale maualuga lava ma sa lue mai i le isi itu i le isi itu, ma sa touulu mai i lalo ia piliki o se isi fale tuai i lou itu agavale ao faaauau pea ona lulu le fogaeleele.

O le mafuie o Loma Prieta na taia ai le Eria o San Francisco Bay i le itula e 5:04 i le afiafi o lena aso ma tuua ai le toatele o tagata e tusa ma le 12,000 ua leai ni fale.

Na tuga mafatiaga na faia e le mafuie i le Eria o San Francisco Bay, o nofoaga e lei mautu i San Francisco ma Oakland na tele se aafiaga. I San Francisco, o le Itu o Marina o se laueleele lea na tanuina mai ni palu o oneone, palapala, lapisi, ma o isi mea na aofia ai le tele o le pasene o vai mai le laueleele. O nisi o palapala o ni lapisi na tatiai i le San Francisco Bay ina ua maea le mafuie i San Francisco i le 1906.”¹

Pe tusa o le 1915, na fausia ai ia fale mautotogi i le laueleele lea na tanuina. O le mafuie i le 1989, o palapala ua palu faatasi ma le vai, oneone, ma lapisi ua liua e pei o se faaputuga o vaivai, na mafua ai le pauu o fale. E lei fausia fale i luga o se faavae mautinoa.

O le mafuie i Loma Prieta na aafia ai le tele o soifua, na ou aafia ai foi. O le mafaufau la i mea na tutupu i lena vaitaimi ua toe faamautu ai i lou mafaufau ma lou loto faapea, o le mafai ona tatalia ma le manuia o afa, mafuie, ma mala o le olaga, e tatau ona tatou fausia lea i luga o se faavae mautinoa.

Na tuuina atu e le perofeta sa Nifae o Helamana se faamalamalamaga uigaese i le taua o le fausiaina o o tatou olaga i luga o se faavae mautinoa, e pei o Iesu Keriso: “Ma o lenei, ou atalii e, ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou” (Helamana 5:12).

I le atinaeina o malumalu faanei ona po, o se taulaiga mataalia ua tuuina atu lea i le mamanuina, fausiaina, ma le faaaogaina o mea e fausia ai. E faia se suesuega atoatoa o le laueleele ma le nofoaga lea o le a fausia ai le malumalu. E fuafuaina foi ia suesuega o matagi, timu, ma suiga i le tau mo le eria ina ia mafai ona tatalia e malumalu ua uma ona fausia ia le gata i afa ma tau masani o le eria, ae ua mamanuina foi ma faatulagaina le malumalu e tatalia ia mafuie, asiosio, lologa, ma isi mala faalenatura e ono oso faafuasei mai. I le tele o malumalu, ua eliina faamaualalalo ia pou uamea i le eleele e taula ai le faavae o le malumalu.

Faapei o tagata e mamanuina ma fausiaina o lo tatou vaitaimi, ua saunia ai e lo tatou Tama o i le Lagi alofa ma agalelei ma Lona Alo ni fuafuaga, meafaigaluega, ma isi punaoa tatou te faaaogaina ina ia mafai ai ona tatou fausiaina ma faamalolosia o tatou olaga ia mautinoa ma le maluelue. O fuafuaga o le ata o le faaolataga ma le fuafuaga tele o le fiafia. Ua faataatitia mai ia i tatou e le fuafuaga se ata manino ma se malamalamaaga o le amataga ma le taunuuga, ma laasaga taua, e aofia ai sauniga, lea e manaomia mo fanau uma a le Tama ina ia mafai ai ona toe foi atu i Lona afioaga ma nonofo faatasi ai ma Ia e faavavau.

O le faatuatua, salamo, papatisoga, le meaalofa o le Agaga Paia, ma le tumau seia oo i le iuga o ni vaega ia o le “ata” o le olaga. Latou te fesoasoani e foafoaina ia poloka faufale talafeagai lea o le a taulaina o tatou olaga i le Togiola a Keriso. O nei mea o le a mamanuina ma faatulagaina le fausaga o le olaga o se tagata. Ma, faapei foi ona i ai i le malumalu ia “tulaga e manaomia” lea e tuuina atu ai ni faatonuga auiliili i le ala e fausia ai ma tuufaatasia ai ia vaega taua, o le tatalo foi, faitauina o tusitusiga paia, ai ma inu i le faamanatuga, ma le mauaina o sauniga taua o le perisitua o le a avea lea ma “tulaga e manaomia” e fesoasoani e tuufaatasia ma noatia faatasi ai le fausaga o le olaga.

E taua le faapaleniina o le faaaogaina o nei tulaga manaomia. Mo se faataitaiga, i le faagasologa o le faiga o le sima, ia sao lelei le aofaiga o le oneone, palapala, sima, ma le vai e faaaoga ina ia maua ai le malosi sili atu. O le le sao o le aofaiga pe o le misi foi o nisi o vaega o nei elemene o le a vaivai ai le sima ma ua le mafai ai ona faatino lona tiute taua.

E tutusa lava foi, pe afai tatou te le saunia e faapaleni ma le talafeagai o tatou olaga e pei o le tatalo faaletagata lava ia i aso uma ma le fiafia i tusitusiga paia, faamalolosia i vaiaso taitasi i le aai ma feinu i le faamanatuga, ma le auai soo i sauniga faaleperisitua e pei o sauniga o le malumalu, o le a lamatia ai i tatou i le vaivai i lo tatou fausaga malosi faaleagaga.

Na taua e Paulo, i se tusi i le au paia i Efeso, lea e mafai ona tatou faatatauina i le manaomia o se atinaega faapaleni ma le tuufaatasia o o tatou tagata ma agaga: “Ua faatatauina ia te ia le fale atoa, o loo alu ae, ina ia fai ma malumalu paia i le Alii” (Efeso 2:21).

O le tatalo o se tasi lea o muai mataupu faavae ma e sili ona taua o lo tatou faatuatuaga ma fausaga. O le tatalo ua mafai ai ona tatou faaali atu lo tatou agaga faafetai, alofa, ma le naunautaiga i le Atua. O le tatalo ua mafai ai foi ona tuuina atu o tatou manaoga ia te Ia ma maua ai le malosi e faaogatasi ai o tatou olaga i Ana aoaoga. O le tatalo o le ala lea e mafai ona tatou mulimuli i ai e sailia ai Lana uunaiga i o tatou olaga, e pei o faaaliga.

Na aoao mai e Alema: “Filifili faatasi ma le Alii i au mea uma e fai ma o le a ia taitai oe mo le lelei; ioe, pe a e taoto i lalo i le po, taoto i lalo i le Alii, ina ia mafai ona leoleo mai o ia i ou luga a’o e moe; ma a e ala mai i le taeao, ia tuu lou loto ia tumu i le faafetai i le Atua; ma afai e te faia nei mea, o le a sii ae oe i luga o le aso gataaga” (Alema 37:37).

O le faasoaina atu o o tatou manatu, lagona, ma manaoga i le Atua e ala i le tatalo faamaoni ma le naunautai e tatau ona avea lea ma se vaega taua ma masani ia i tatou e pei o le manava ma le aai.

O le suesue i tusitusiga paia i aso taitasi o le a faamalosia ai lo tatou faatuatua ma fausaga. Faapei ona tatou manaomiaina ia meaai e fafaga ai o tatou tino faaletino, o le a faatumulia foi ma faamalolosia o tatou agaga e ala i le taumamafa i afioga a Keriso e pei ona aofia ai i tusitusiga a perofeta. Na aoao mai Nifae, “Ia taumamafa fiafia i afioga a Keriso; aua faauta, o afioga a Keriso o le a ta’u mai ai ia te outou mea uma e tatau ona outou faia” (2 Nifae 32:3).

E ui o le faitauina o tusitusiga paia e lelei, ae e le lava le na o le faitauina e pue mai ai le tulaga atoatoa ma le loloto o aoaoga a le Faaola. O le suesue, mafaufau loloto, ma faaaoga ia afioga a Keriso e pei ona aoao mai i tusitusiga paia, o le a aumai ai le poto ma le malamalama e sili atu nai lo le malamalama faaletagata o ia i tatou. O le a faamalosia ai e lenei mea lo tatou naunautaiga ma saunia ai tulaga faaleagaga ina ia faia le mea sili tatou te mafaia i tulaga uma.

O se tasi o laasaga sili ona taua e mafai ona tatou faia e faamalosia ai o tatou olaga ma tumau ai ma le mausali i le faavae o le Faaola o le ai lea ma inu ma le agavaa i le faamanatuga i vaiaso taitasi. O le sauniga o le faamanatuga e maua ai e tagata uma o le Ekalesia le avanoa e muai mafaufau ai i lona olaga, e mafaufau ai i faatinoga po o ni mea e lei faatinoina e ono manaomia ai le salamo mai ai, ona ai lea ma inu i le falaoa ma le vai o ni faatusa paia o le tino ma le toto o Iesu Keriso, o se molimau o Lona Togiola. Afai tatou te fetagofi atu ma le faamaoni ma le faamaulalo, ua tatou faafouina ia feagaiga e faavavau, ua faamamaina ma faapaiaina, ma o le a tatou maua le folafolaga o le a faatasi Lona Agaga ma i tatou, i taimi uma. O le Agaga e faapei o se ituaiga o sima, o se sootaga mau e le gata i le faamamaina ae o le a tatou manatuaina ai foi mea uma ma molimau ai pea lava pea ia Iesu Keriso. O le ai ma inu ma le agavaa i le faamanatuga o le a faamalolosia ai o tatou fesootaiga patino ma le maa o le faavae, o Iesu Keriso lea.

I lana talaiga na aoao atu ai le Faaola ma le alofa ma le manino ia aoaoga faavae, mataupu faavae, ma galuega e manaomia o le a faasaoina ai o tatou ola ma faamalolosia ai o tatou tagata. I le faaiuga o le Lauga i luga o le Mauga, na Ia fetalai ai:

“O lea, o soo se tasi e faalogo i au upu nei ma faia e ia, ou te faatusaina o ia i se tagata poto, o le na atiae lona fale i luga o se papa—

“Ma sa to mai uaga, ma oo mai lologa, ma agi mai matagi, ma taia lena fale; ma sa lei pau lava, ona sa faavaeina i luga o se papa.

“Ma o i latou uma o e faalogo i au upu nei ma le faia e ia, e faatusaina o ia i se tagata valea, o le na atiae lona fale i luga o le oneone—

“Ma sa to mai uaga, ma oo mai lologa, ma agi mai matagi, ma taia lena fale; ma sa pau, ma sa pau tele lava” (3 Nifae 14:24–27; tagai foi Mataio 7:24–27).

Uso e ma tuafafine, e leai lava se tasi o i tatou o le a fausiaina ma le iloa o tatou fale, nofoaga o galuega, po o fale paia o tapuaiga i luga o se oneone, po o lapisi, po o le le leai o ni fuafuaga ma ni meafaufale talafeagai. Sei o tatou taliaina le valaau a le Faaola ina ia o mai ia te Ia. Sei o tatou fausia o tatou olaga i luga o se faavae saogalemu ma le mautinoa.

Ou te molimau atu ma le agaga maualalo o le taulaina o o tatou olaga ia Iesu Keriso ma Lana Togiola ma o le mulimuli ma le faaeteete i Ana fuafuaga mo lo tatou fiafia, e aofia ai le tatalo i aso uma, suesue i tusitusiga paia i aso uma, ma le aai ma feinu i le faamanatuga i vaiaso uma, o le a faamalolosia ai i tatou, o le a tatou lagonaina ai le tuputupu ae moni patino ma se liua tumau, o le a tatou saunia lelei ai ina ia tatalia ma le manuia ia afa ma mala o lenei olaga, o le a tatou tofo i le fiafia ua folafola mai, ma o le a tatou mauaina se faamautinoaga ua fausia o tatou olaga i luga o se faavae mautinoa—o se faavae o le a le pa’ū lava. I le suafa o Iesu Keriso, amene.