O Le Usiusitai i Tulafono o le Saolotoga Lea

Saunia e Elder L. Tom Perry

O Le Korama a Aposetolo e Toasefululua

Ua maua e alii ma tamaitai o latou faitalia o se meaalofa mai le Atua, ae o lo latou saolotoga ma, o se taunuuga, o lo latou fiafia e faavavau e maua mai i le usiusitai i Ana tulafono.

Sa ou mauaina se meaalofa faapitoa i le Kerisimasi talu ai sa faapea ona aumaia ai ma le tele o mea e manatua. Sa aumai mai le tama teine a lo’u tuafafine. Sa i ai faatasi [le tusi] ma ni mea sa ou tuua i le fale tuai o le matou aiga ina ua ou siitia ese ina ua uma ona ou faaipoipo. O le meaalofa o si tamai tusi enaena lenei ua ou taulimaina. O se tusi sa tuuina mai i fitafita o le AAG o e sa ulufale atu i vaegaau i le taimi o le Taua Lona II a le Lalolagi. Sa ou manatu a’u lava o le tusi, o se meaalofa mai ia Peresitene Heber J. Grant ma ona fesoasoani o J. Reuben Clark Jr. ma David O. McKay.

I le pito i luma o le tusi, sa tusia ai e nei perofeta e toatolu a le Atua: “O mea e tutupu i auaunaga i vaegaau e le faatagaina ai lo matou fesootai patino atu ia te outou i taimi uma, pe tuusa’o pe e ala foi i se tasi e fai ma sui. O le isi a matou auala lelei e sosoo ai o le tuu atu i o outou lima ni na vaega o faaaliga i onaponei ma faamalamalamaga o mataupu faavae o le Talalelei lea o le a aumaia ia te outou, po o fea lava tou te i ai, le faamoemoe ma le faatuatua faafouina, faapea foi ma le toamalie, faamafanafanaga, ma le toafilemu o le agaga.”¹

O le asō ua tatou oo ai i se isi taua. E le o se taua ma ni auupega o le taua. Ae o se taua o mafaufauga, upu, ma faatinoga. O se taua ma le agasala, ma ua sili atu nai lo o se isi lava taimi, lo tatou manaomia o le faamanatu mai o poloaiga. O le faalelalolagi ua avea ma faiga masani, ma o le tele o ona talitonuga ma faiga ua matuai feteenai tonu lava ma mea sa faataunuuina e le Alii lava Ia mo le manuia o Ana fanau.

I totonu o lenei tamaitusi enaena, e sosoo mai lava ma le tusi mai le Au Peresitene Sili, o loo i ai se “Folasaga Amata i Alii i le Vaegaau,” e faaautuina “O Le Usiusitai i le Tulafono O Le Saolotoga Lea.” O le faamatalaga o loo faia ai se faatusatusaga i le va o tulafono a le militeli, lea e “mo le manuia o i latou uma o e o loo i le auaunaga,” ma le tulafono faalelagi.

O loo faamatala mai, “I le atulaulau foi, lea e taitai ai le Atua, e i ai tulafono—tulafono aoao … faavavau—faatasi ma ni faamanuiaga faapitoa ma ni faasalaga e le masuia.”

O upu faaiu o le faamatalaga e taulai atu i le usiusitai i tulafono a le Atua: “Afai e te manao e te toe foi mai i e pele ia te oe ma lou ulu e ea i luga, … afai e te manao ia avea oe ma se tamalii ma ola fiafia—ia usitai i tulafono a le Atua. O le faia o lena mea, e mafai ona e faateleina ai na saolotoga taua lea o loo e tauivi e faasaosao, o le isi saolotoga lea e faalagolago tele i ai isi, saoloto mai le agasala; aua e moni ‘o le usiusitai i le tulafono o le saolotoga lea.’”²

Aisea na fetaui lelei ai ia te au i lena taimi le fuaitau “o le usiusitai i tulafono o le saolotoga lea”? Aisea ua fetaui lelei ai ia i tatou i le taimi nei?

Atonu ona ua ia i tatou se malamalama na faaalia mai e uiga i le talaaga o lo tatou muai olaga. Ua tatou iloa ina ua folasia mai e le Atua le Tama e Faavavau Lana fuafuaga ia i tatou i le amataga o taimi, sa manao Satani e sui le fuafuaga. Na fai mai o ia o le a ia faaola tagata uma. O le a leai se tagata e toatasi e se ese, ma sa talitonu lava Satani e mafai ona ia faataunuuina lana fautuaga. Peitai sa i ai se tau le talafeagai—o le faatamaiaina o le faitalia o le tagata, lea sa, ma o se meaalofa na tuuina mai e le Atua (tagai i le Mose 4:1–3). E faatatau i lenei meaalofa na saunoa ai Peresitene Harold B. Lee, “E sosoo atu i le ola lava ia, o le filifiliga saoloto o le meaalofa sili a le Atua i tagata.”³ O lea la, sa le o se mea faatauvaa ia Satani le lafoaia o le faitalia o le tagata. O le mea moni, sa oo ina avea ma faafitauli autu lea na mafua ai ona tupu le Taua i le Lagi. O le manumalo i le Taua i le Lagi sa o se manumalo mo le faitalia o le tagata.

Ae peitai, sa le gata ai iina faiga a Satani. O lana fuafuaga faaleoleo—o le fuafuaga lea sa ia faaaogaina talu mai le taimi o Atamu ma Eva—o le faaoso o alii ma tamaitai, ia faamaonia moni lea tatou te le agavaa mo le meaalofa ua tuuina mai e le Atua o le faitalia. E tele mafuaaga e fai ai e Satani mea o loo ia faia. Atonu o le mafuaaga aupito malosi lava o le faamoemoega o le tauimasui, ae e manao foi o ia ia faanoanoa alii ma tamaitai e pei o lona lava foi faanoanoa. E leai se tasi o tatau e tatau ona manatu faatauvaa i le matuai naunau o Satani ia manuia. O lana tiute i le fuafuaga paia a le Atua o le faatupuina “o le faafeagai o mea uma” (2 Nifae 2:11) ma su’e lo tatou faitalia. O filifiliga taitasi e te faia ma ou faia o se suega o lo tatou faitalia—pe tatou te filifili e usiusitai pe le usiusitai i poloaiga a le Atua, o se filifiliga moni lea i le va o le “saolotoga ma le ola e faavavau” ma le “faatagataotauaina ma le oti.”

O lenei aoaoga faavae taua ua manino le aoaoina mai i le 2 Nifae, le mataupu lona lua: “O le mea lea, ua saoloto tagata e tusa ma la le tino; ma ua tuuina mai ia te i latou mea uma e tatau aim o le tagata. Ma ua latou saoloto e filifili le saolotoga ma le ola e faavavau, e ala i le Puluvaga sili o tagata uma, pe filifili le faatagataotauaina ma le oti, e tusa ma le faatagataotauaina ma le manao le tiapolo; ona ua saili o ia ia pagatia tagata uma e pei o ia lava” (2 Nifae 2:27).

I le tele o itu, o taimi uma lava na tau ai lenei lalolagi. Ou te talitonu ina ua auina mai e le Au Peresitene Sili la’u tamaitusi enaena, sa sili atu lo latou popole i se taua e sili atu le faigata nai lo o le Taua Lona II a le lalolagi. Ou te talitonu foi sa latou faamoemoe o le a avea le tusi ma talipupuni o le faatuatua e faasagatau atu ia Satani ma ana au i lenei taua faigata atu—o le taua e tetee atu i le agasala—ma avea o se faamanatu ia te a’u ia ou ola i poloaiga a le Atua.

O le auala e tasi tatou te faia ai se tatou lava iloiloga ma faatusatusa i tatou i augatupulaga na muamua atu, e ala lea i se tasi o tulaga faatauaina aupito leva e iloaina e tagata—o Tulafono e Sefulu. Mo le toatele o le lalolagi malamalama, ae maise lava i le lalolagi sa Iuta ma le faaKerisiano, o Tulafono e Sefulu ua avea ma tuaoi aupito taliaina ma leva i le va o le lelei ma le leaga.

I la’u faamasinoga, e fa tulafono o Tulafono e Sefulu ua sili atu ona tausia lelei i aso nei nai lo se isi lava taimi. I le avea ai ma se agamasani, ua tatou inoino ai ma tausalaina le fasioti tagata, gaoi, pepelo, ma o loo tatou talitonu pea i le matafaioi a le fanau i o latou matua.

Ae i le avea ai o se faapotopotoga lautele, ua fai ma a tatou masani le le amanaia o isi tulafono e ono:

Afai o ni faailoga le faamuamua o mea o le lalolagi, ua mautinoa le i ai o “isi atua” ua tatou faamuamua i lo o le Atua moni.
Ua tatou faia tupua o tagata lauiloa, o sitali o le olaga, o tamaoaiga, ma ioe, o nisi taimi o tupua ua ta po o mea faitino.
Tatou te faaaoga le suafa o le Atua i ituaiga uma o gagana faatufanua, e aofia ai a tatou faaumuumu ma a tatou palalauvale.
Tatou te faaaoga le aso Sapati mo a tatou taaloga faitaulia, o tatou gaoioiga faafiafia sili ona taua, a tatou faatauga sili ona mamafa, ma o le mea moni o mea uma lava vagana ai tapuaiga.
Tatou te faia mafutaga faalefeusuaiga i fafo atu o le faaipoipoga o ni mea faatafaoga ma faataaloga.
Ma o le manao ua avea ma se mea ua taatele i le olaga. (Tagai i le Esoto 20:3–17.)

Ua le aunoa ona lapatai mai perofeta mai tisipenisione uma e faatatau i le solia o tulafono e lua o tulafono e sili ona taua—o tulafono e faatatau i le fasioti tagata ma le mulilua. Ua ou vaaia se faavae tutusa mo nei poloaiga taua e lua—o le talitonuga e faapea o le ola lava ia o le aia a le Atua ma o o tatou tino faaletino, o malumalu o le ola i le olaga nei, e tatau ona foafoaina i totonu o tulaga ua faatulagaina e le Atua. O le suia e le tagata i ana lava tulafono o tulafono a le Atua e uiga i le foafoaina ma le aveesea o le ola, o le faataitaiga aupito matautia lea, o matematega ma le loloto o le agasala.

O aafiaga sili lava o nei amioga ua tuuitiitia le taua e faatatau i le paia o le faaipoipoga o taunuuga ia i aiga—o le malolosi o aiga ua faiifo i se saoasaoa taufaamatau. Ma o lenei faiifo ua mafua ai le salalau atu o le faaleagaina i le lalolagi. Ua ou vaai i le mafuaaga ma le aafiaga tonu lava. A tatou lafoai le tuuto ma le faamaoni a’ia’i i a tatou paaga faaipoipo, ua tatou aveesea le kelū e taofiofia faatasi lo tatou lalolagi.

O se auala aoga e mafaufau ai i poloaiga o le, o ni fautuaga alofa ia mai se Tama Faalelagi poto, ma ua silafia mea uma. O Lana sini o lo tatou fiafia e faavavau, ma o Ana poloaiga o faafanua ia ua Ia tuuina mai ina ia tatou toe foi atu ai ia te Ia, ma ona pau lea o le auala o le a tatou fiafia ai e faavavau. O le a le taua o le aiga ma le auaiga i lo tatou fiafia e faavavau? I le itulau e 141 o la’u tamaitusi enaena o loo faapea mai, “E moni o le tatou lagi e sili teisi atu nai lo o se faatusa o o tatou aiga e oo atu i le faavavau.”⁴

O le aoaoga faavae o le auaiga ma le aiga sa toe faamamafa lata mai nei i le manino tele ma le malosi i le “O Le Aiga: O Se Folafolaga i le Lalolagi.” O loo tautino mai ai le natura paia o aiga ona faamalamalama mai lea ma le sootaga i le tapuai i le malumalu. O loo folafola mai foi i le folafolaga le tulafono ua faavae ai le fiafia e faavavau o aiga, o lena mea, “O mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le ava, e tatau ona faaaogaina ai.”⁵

Ua faaali mai e le Atua i Ana perofeta e faapea, o loo i ai mataupu faavae o amioga lelei. O le agasala o le a avea pea ma agasala. O le le usiusitai i poloaiga a le Alii o le a aveesea ai e le aunoa i tatou mai Ana faamanuiaga. O le lalolagi e fesuisuiai soo ma tele ona suiga, ae o le Atua, Ana poloaiga, ma faamanuiaga folafolaina e le suia lava. E tumau ma e le masuia. Ua maua e alii ma tamaitai o latou faitalia o se meaalofa mai le Atua, ae o lo latou saolotoga ma, o se taunuuga, o lo latou fiafia e faavavau e maua mai i le usiusitai i Ana tulafono. E pei ona fautuaina e Alema lona atalii faalogogata o Korianetona, “E le’i avea lava le amioleaga ma fiafia” (Alema 41:10).

I lenei vaitaimi o le Toefuataiga o le atoatoaga o le talalelei, ua toe faaali mai ai e le Alii ia i tatou ia faamanuiaga sa folafola mai mo i tatou ona o le usiusitai i Ana poloaiga.

I le Mataupu Faavae ma Feagaiga 130 tatou te faitauina:

“E i ai se tulafono, na folafola le maaveesea i le lagi i luma atu o le faavaega o le lalolagi lenei ua faavae ai i luga faamanuiaga uma—

“Ma a tatou maua se faamanuaiga mai le Atua, e maua i le usiusitai i lena tulafono ua faavae ai i luga” (MF&F 130:20–21).

E mautinoa lava e leai se isi aoaoga faavae ua sili atu le malosi o le faailoaina mai i tusitusiga paia nai lo poloaiga lemasuia a le Alii ma lo latou sootaga i lo tatou fiafia ma le manuia o ni tagata taitotasi, o ni aiga, ma o se lalolagi. O loo i ai mataupu faavae o amioga lelei. O le le usiusitai i poloaiga a le Alii o le a aveesea ai i taimi uma i tatou mai Ana faamanuiaga. E le mafai ona suia nei mea.

I se lalolagi ua faaletonu ai le tapasa o amioga lelei, e le taitai ai ona faavaivai le talalelei a Iesu Keriso ma e faapena foi i ona siteki ma uarota, ona aiga, po o ona tagata taitoatasi. E le tatau ona tatou ilo ma fili po o le fea poloaiga ua tatou manatu e taua ona tausia, ae ia talia poloaiga uma a le Atua. E tatau ona tatou tutu mausali ma tutumau, ma ia talitonu atoatoa i le tumau o le Alii ma talitonu atoatoa i Ana folafolaga.

Talosia ia avea pea i tatou ma malamalama i luga o le mauga, o se faataitaiga i le tausiga o poloaiga ia e le’i suia lava ma o le a le suia lava. E pei foi ona faamalosiauina e lenei tamaitusi fitafita o le AAG ia tutu mausali lelei i taimi o taua, talosia ia tatou, i lenei taua i aso e gata ai, avea ma se faataitaiga i le lalolagi atoa ae faapitoa lava i fanau a le Atua, o e o loo sailia faamanuiaga a le Alii. Ou te molimau atu ai i nei mea i le suafa o Iesu Keriso, amene.