“O La’u Galuega ma Lo’u Mamalu Lenei”

Saunia e Elder M. Russell Ballard

O Le Korama a Aposetolo e Toasefululua

Ua foai fua mai e le Atua Lona mana ia i latou e taliaina ma faamamaluina Lana perisitua, lea e taitai atu ai i faamanuiaga folafolaina o le tino ola pea ma le ola e faavavau.

Peresitene Packer, ua matou tulimatai atu uma i le lomiga lona 98 o lena solo matagofie. Oka se matagofie o le aoaoga na ia tuu mai ia i tatou.

I ni nai vaiaso talu ai, i se po malulu ma le pogisa o le taumalulu, sa ma matamata ai ma lo’u toalua o Barbara ma le maofa i le lagi. Sa foliga mai na tulaga ese le susulu ma le matagofie o le faitau miliona o fetu. Ona ou liliu atu lea i le Penina Tautele ma toe faitau ma le maofa le fetalaiga a le Alii le Atua ia Mose: “Ma e le mafaitaulia lalolagi ua Ou foafoaina; ma sa Ou foafoaina foi i latou mo lo’u lava faamoemoe; ma o lo’u Atalii, o lē o la’u Toatasi na Fanaua, na Ou foafoaina ai i latou” (Mose 1:33).

I o tatou aso ua faamautu mai ai e le mea vaai mamao a Hubble i le vanimonimo le taua o mea na vaai ai Mose. Fai mai saienitisi i Hubble, o le Vanimonimo o loo i ai le Malosiaga o le La, lea e avea ai le la ma lo tatou lalolagi na o sona vaega itiiti, ua fuafuaina e na o le tasi i le silia ma le 200 piliona vanimonimo faapenei o loo i ai. Mo au, e faigata ona malamalama i ai, e faigata ona mafaufau i ai, ona e matua tetelē lava ma anoanoai foafoaga a le Atua.

Uso e ma tuafafine, o le mana lea sa foafoa ai ma o loo foafoa ai lagi ma le lalolagi o le perisitua lea. O tatou o tagata o le Ekalesia ua iloaina o le puna o lenei mana o le perisitua lea a le Atua Silisiliese ma Lona Alo, o Iesu Keriso. E le gata o le mana o le perisitua sa foafoaina ai lagi ma le lalolagi, ae o le mana lava lea na faaaogaina e le Faaola i Lana misiona i la le tino e faatino ai vavega, e faamanuia ai ma faamalolo ē mamai, e faaola ai e na oti, ma, i le avea ai ma Alo e Toatasi na Fanaua a lo tatou Tama, na onosaia ai tiga lematatalia i Ketesemane ma Kalevario—o lea na faataunuuina ai tulafono o le faamasinotonu i le alofa mutimutivale ma le sauniaina o le Togiola le i’u ma faatoilalo ai le oti faaletino e ala i le Toetu.

O ki ia o lenei pule o le perisitua ma le mana o loo i ai, ia na Ia tuuina atu ia Peteru, Iakopo, ma Ioane faatasi ai ma isi o Ana Aposetolo e faamanuia ai isi ma fusifusia ai i le lagi mea e fusifusia i le lalolagi.

O le mana o le perisitua o se meaalofa paia ma le taua a le Atua. E ese mai i le pule o le perisitua, o le pule lea e galue ai i le suafa o le Atua. O lea pule po o le faauuga e tuuina atu e ala i le faaee atu o lima. O le mana o le perisitua e na o le pau le taimi e oo mai ai pe a faatinoina e i latou e agavaa ma galulue e tusa ma le finagalo o le Atua. E pei ona folafola mai e Peresitene Spencer W. Kimball, “Ua tuuina mai e le Alii ia i tatou uma lava, o e e umiaina le perisitua, se vaega o lana pule, ae faatoa mafai ona tatou faaaogaina mana o le lagi i tulaga o lo tatou amiotonu patino” (“Boys Need Heroes Close By,” Ensign, May 1976, 45).

I taimi o aso ofoofogia o le Toefuataiga ma le toe faatuina o le Ekalesia a Iesu Keriso i le lalolagi i nei aso, na o mai ai Ioane le Papatiso; Peteru, Iakopo, ma Ioane; Mose; Elaia; ma Elia i le lalolagi ma toefuatai mai ki uma o le pule o le perisitua e auala mai ia Iosefa Samita mo le galuega a le Atua i nei aso e gata ai.

Ua auala mai i nei ki, i lenei pule, ma i lenei mana ua faatulaga ai le Ekalesia a Iesu Keriso i aso nei, faatasi ai ma Keriso i le faauluuluga o loo Ia taitaia Lana perofeta soifua, o Thomas S. Monson, ma lagolagosua i ai Aposetolo na valaauina ma faauuina tatau.

I le fuafuaga sili a lo tatou Tama Faalelagi e maua ai le mana o le perisitua, ua i ai i alii le tiutetauave tupito e taitai ai le perisitua, ae e le o i latou o le perisitua. E eseese matafaioi ae tutusa lava le taua ua i ai i alii ma tamaitai. E pei lava ona le mafai i se tamaitai ona fanauina se tamaitiiti e aunoa ma se alii, e faapena foi, e le mafai i se alii ona faaaogaina atoa le mana o le perisitua e faavae ai se aiga e faavavau e aunoa ma se tamaitai. I se isi faaupuga, i se vaaiga e faavavau, o le mana foafoa atoa ai ma le mana o le perisitua e faaaogaina uma e se tane ma se ava. Ma i le avea ai ma se tane ma se ava, e tatau lava i se alii ma se tamaitai ona taumafai e mulimuli i lo tatou Tama Faalelagi. O uiga mama faaKerisiano o le alofa, lotomaualalo, ma le onosai e tatau lava ona avea ma o la taulaiga a o la saili atu i faamanuiaga o le perisitua i o la olaga ma lo la aiga.

E taua tele mo i tatou le malamalama ua uma ona saunia e le Tama Faalelagi se auala mo Ona atalii ma Ona afafine uma e maua ai faamanuiaga ma faamalosia ai e le mana o le perisitua. E totonugalemu i le fuafuaga a le Atua mo Ana fanau agaga Lana lava Ia tautinoga: “O la’u galuega ma lo’u mamalu lenei—ia aumaia le tino ola pea ma le ola faavavau o le tagata” (Mose 1:39).

I le faaaliga na tuuina atu i le Perofeta o Iosefa Samita i le vaega 81 o le Mataupu Faavae ma Feagaiga, o loo faamalamalama mai ai e le Alii le mana o le perisitua e ao ona faaaogaina e “fesoasoani i e vaivai, sii i luga lima ua tautau i lalo, ma faamalosi tulivae ua vaivai” (fuaiupu e 5).

“Ma o le faia o [ia] mea o le a e faia ai mea lelei silisili atu mo ou uso a tagata, ma o le a e uunai lautele ai le mamalu o ia o le o lou Alii” (MF&F 81:4).

A o tatou mafaufau i ni ata o le fesoasoani atu i e vaivai, sii i luga lima ua tautau i lalo, ma faamalosi tulivae ua vaivai, ou te manatua ai se teineitiiti lelei e fitu tausaga na ia faaali atu i lona tama matua se tamai laau o le tamato na ia amata toto mai se fatu, o se vaega o ana galuega faatino i le vasega lua i le aoga.

Sa ia faamalamalama atu i ai e mai se tamai fatu itiiti e tupu mai ai se laau telē. Ma afai e tausi faalelei le laau, o le a ola ma tele ni tamato e fua mai ai ma tofu ai fua taitasi ma ni fatu se tele.

Sa ia fai mai, “Ma afai e totoina uma na fatu ma toe tupu mai ai nisi tamato se tele, ma totoina foi na fatu uma, i ni nai vaitau o le a e mauaina le faitau miliona o tamato.”

O le upu “Uma” sa ia ta’ua ma le maofa, “mai se fatu itiiti e tasi.”

Ona ia fai mai lea, “Ae toeitiiti lava a ou tapeina la’u laau. Sa ou tuua i totonu o se potu pogisa ma galo ai ona fui i le vai. Ina ua ou manatuaina le laau, sa mamae ma foliga a mate. Sa ou tagi ona na ou mafaufau i na tamato uma e faitau miliona o le a le ola lava.”

Sa fiafia o ia e faamatala atu i lona tama matua le “vavega” na tupu.

Sa ia faamalamalama atu, “Sa fai mai Mama atonu e le o mate le laau. Atonu na o le pau le mea o ia manaomia ua na o se vai ma sina malamalama e toe ola ai.

“Ma sa sa’o o ia. Sa ou fuiina le laau i sina vai ma tuu i le faamalama mo se malamalama. Ma e te iloa le mea na tupu?” sa ia fesili ai. “Sa toe ola, ma o lea o le a tupu mai ai le faitau miliona o tamato!

O lana tamai laau o le tamato, sa tumu i le gafatia ae sa faavaivaiina ma mamae mai le tuulafoaiina e lei mafaufauina, sa faamalosia ma toefaaolaina e ala i se auaunaga faigofie a le vai ma le malamalama sa faia e lima agaalofa ma le popole o se teineitiiti laitiiti.

Uso e ma tuafafine, i le avea ai ma fanau agaga moni a lo tatou Tama Faalelagi agaalofa—ua i ai ia i tatou le gafatia faalelagi e le faatapulaaina. Ae afai tatou te le faaeteete, e mafai lava ona avea i tatou ma tamato ua mamae. E mafai ona tatou see ese mai aoaoga faavae moni ma le talalelei a Keriso ma oo ai ina matelaina faaleagaga ma mamae ai, ona ua tatou aveesea i tatou lava mai le malamalama faalelagi ma le vai ola o le alofa e faavavau o le Faaola ma le mana o le perisitua.

O i latou e umiaina le perisitua ma toilalo e tauivi pea e faamamalu i ai e ala i le auauna atu i aiga ma isi o le a pei lava o i latou e le mauaina faamanuiaga o loo i ai i le mana o le perisitua ma o le a mautinoa lava le mamae faaleagaga, ona ua aveesea mai ia i latou lava ia meaai faaleagaga taua, o le malamalama, ma le mana o le Atua i o latou olaga—e pei lava o le laau o le tamato e tumu i le gafatia ae na tuulafoaiina ma mamae ai.

O le mana lava lea e tasi o le perisitua na foafoa ai lalolagi, vanimonimo, ma le atulaulau e mafai ma e tatau lava ona avea o se vaega o o tatou olaga e fesoasoani atu ai, faamalosia, ma faamanuia ai o tatou aiga, a tatou uo, ma o tatou tuaoi—i se isi faaupuga, o le faia lea o mea o le a faia e le Faaola pe ana faapea o loo Ia auauna ia i tatou i le taimi nei.

Ma o le faamoemoega autu lava o lenei mana o le perisitua, ia faamanuia, faapaia, ma faamama ai i tatou ina ia mafai ona tatou mau faatasi ma o tatou aiga i le afioaga a o tatou matua faalelagi, ua fusia faatasi i faamauga o le perisitua, ma auai i le galuega ofoofogia a le Atua ma Iesu Keriso i le faalauteleina pea e faavavau o lo Lamalamalama ma le mamalu.

I lea faamoemoega, i ni nai masina talu ai sa ou maua ai le avanoa e auai ai i le pueina o se ata e faatatau i aoaoga mo taitai i le lalolagi atoa e ta’ua o le Faamalolosia o le Aiga ma le Ekalesia e ala i le Perisitua.

Ua faaliliuina lenei DVD fou faaleaoaoga i gagana e 66. O loo aoao mai ai le auala e mafai ai e le mana o le perisitua ona faamanuiaina, faamalosia, ma toe faafouina ai o tatou olaga, o olaga o o tatou aiga, ma olaga o tagata uma o le Ekalesia.

Ua faaali mai ai ia i tatou uma—o alii, tamaitai, tamaiti; faaipoipo, o e ua maliliu taitoalua, pe nofofua; po o le a lava o tatou tulaga—le auala e mafai ai ona avea i tatou ma ē mauaina faamanuiaga o le perisitua. E tele ni vaega e tai 8 i le 12 minute le uumi o loo faamalamalama mai ai ki, pule, ma le mana o le perisitua ma le auala e faamalosia ai tagata taitoatasi, aiga, ma le Ekalesia.

O se tasi o ata faapitoa sa pueina i le tamai fale paionia o le tina o le tina matua o lo’u tina, o Mary Fielding Smith. O ia o le ava a Ailama lea na maliu, le uso matua o le Perofeta o Iosefa. I le avea ai ma se matua nofofua, ma auala mai i le malosi o lona faatuatua i le perisitua, na ia valaauina ai lena mana ma faalagolago i ai e tausi ai ma faamanuiaina ai lana fanau i le alofa ma le malamalama o le talalelei. O aso nei o loo faafetaia ai e lana fanau e faitauafe o taitai faamaoni ma tagata o le Ekalesia o ia i lona faatuatua, lototele, ma faataitaiga.

O lenei aoaoga faaletaitaiga ua maua nei i luga o le initoneti i le LDS.org mo tagata uma e maimoa ma faaaafia ai (wwlt.lds.org). E mafai ona e maimoa tuusao i ai mai le LDS.org, pe mafai foi ona e sii maia i lau komepiuta, smartphone, po o le tablet.

Ua talosagaina e le Au Peresitene Sili ia “au peresitene o siteki ma au epikopo ina ia tuuto atu se fonotaga se tasi pe sili atu o aufono a le siteki po o le uarota e maimoa ai i le DVD [atoa]. E tatau i aufono a le siteki ma uarota ona talanoaina pe faapefea ona faatino aoaoga ua tuuina mai ai” (Tusi a le Au Peresitene Sili, 1 Fep., 2013).

O le a musuia ma uunaia e le anotusi ia tagata i korama a le perisitua, Aualofa, Aoga Sa, Tamaitai Talavou, Alii Talavou (aemaise i latou o loo sauniuni mo ni misiona), faapea ai ma fonotaga a le Peraimeri, po o ni faatasiga tuufaatasi o le Aso Sa lona lima. Ona mafai lea e tagata o le aufono ona uunaia tagata taitoatasi ma matua e faaaoga lenei aoaoga i o latou aiga. Uso e ma tuafafine, o lenei aoaoga faaletaitaiga e mo tagata uma lava o le Ekalesia. Matua, ia iloilo, fefaasoaai, ma talanoaina mea tou te aoaoina ma lagonaina faatasi ma a outou fanau, ma tuu atu ia i latou e matamata ma faia lea mea e tasi ma outou ina ia mafai ona faamalosia o outou aiga e ala i le perisitua.

Na fetalai Iesu:

“Afai e fia inu se tasi, ina sau ia ia te au e inu ai” (Ioane 7:37).

“A o se inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau” (Ioane 4:14).

“O a’u nei o le malamalama o le lalolagi: o lē mulimuli mai ia te au … e ia te ia le malamalama o le ola” (Ioane 8:12).

Afai e i ai se tasi o outou e lagonaina ua faaitiitia lou faatuatua po o lau molimau o le fuafuaga a le Tama Faalelagi nai lo le mea e tatau ona i ai, ia e liliu atoa atu nei loa i le Faaola. Tuu atu i Lona malamalama ma Lana vai ola e faia mo oe ma lou aiga le mea na faia e sina vai ma sina malamalama i le toe faaolaina o le laau o le tamato sa mamae.

O lenei, sa ou amata i le ofoofogia ma le maofa o foafoaga a le Atua e ala i le mana o le perisitua. Ou te tu iinei ma tau mafaufau, e pei ona ou manatu e faapena foi le toatele o outou, pe mata e mafai ona malamalama atoatoa i le mana o le Atua e aoao ai ma faamanuiaina ai i tatou. E matuai maoae lava, mamalu tele, ma matua mamana lava.

Sa saunoa mai Iosefa Samita, “O le Perisitua o se mataupu faavae e faavavau, ma sa i ai lava i le Atua mai le faavavau, ma o le a i ai pea e faavavau, e aunoa ma le amataga o aso po o le iuga o tausaga” (Aoaoga a Peresitene o le Ekalesia: Iosefa Samita [2007], 110).

Ua foai fua mai e le Atua Lona mana ia i latou e taliaina ma faamamaluina Lana perisitua, lea e taitai atu ai i faamanuiaga folafolaina o le tino ola pea ma le ola e faavavau.

Ou te molimau atu o le galuega a Iesu Keriso e faataunuuina e ala i le perisitua. O le mana lava lea na foafoaina ai e lo tatou Tama Faalelagi ma Lona Alo Pele lenei lalolagi ma amata ai le fuafuaga sili o le fiafia mo lo tatou manuia. Tau ina ia tatou atamamai ma saili atu i le faamalolosia o o tatou lava olaga, o olaga o o tatou aiga, ma le Ekalesia a Iesu Keriso o le Au Paia o Aso e Gata Ai e ala i le mana o le perisitua a le Atua o la’u tatalo faamaualalo lea, i le suafa o Iesu Keriso, amene.