O Le Faatomuaga

A o le’i taitai ona tootuli Iosefa Samita e tatalo i le Vao Paia, sa ia faataatiaina le faavae mo lona tuputupu a’e faaleagaga. Sa ia faaaluina le tele o masina e auai ai i sauniga tapua’i, faitauina o le Tusi Paia, ma auai i tatalo faaleaiga. Sa ia talanoa i tagata o lona aiga, e aofia ai nisi o e sa masalosalo i tapuaiga faatulagaina. Sa tatau ona galue Iosefa e saili tali i ana fesili. Mulimuli ane, sa tali mai le Atua i le tatalo a Iosefa. Ae sa le’i taliina i le Uluai Faaaliga fesili uma a Iosefa. Mo Iosefa, o le sailia o tali o se sailiga i le olaga atoa.

O le asō, o faamatalaga e uiga i le talafaasolopito O Le Ekalesia a Iesu Keriso o le Au Paia o Aso e Gata Ai ua sili atu ona maua gofie nai lo o se isi lava taimi muamua. E mafai ona avea lenei mea ma se faamanuiaga sili, ae e le faigofie i taimi uma ona iloa po o a punāvai e faatuatuaina. Ma o nisi o mea tatou te iloaina e ono tulai mai ai ni fesili faigata. Na saunoa foi Elder Dieter F. Uchtdorf e faapea: “E ono lagona e nisi le matamuli po o le lē agavaa ona o loo i ai ni a latou fesili sailiili e uiga i le talalelei, ae e le tatau ona latou manatu faapena. Na ia aoao mai, ‟O le faia o fesili e le o se faailoga o le vaivai; ae o se teuteuala mo le tuputupu a’e.”¹ O tusiga i lenei punaoa o loo ofoina atu ai ni fautuaga e mafai ona fesoasoani ia te oe e maua ai le filemu a o e sailia tali i au fesili.