Ia e Onosai ia te Oe Lava ma Isi.

Sa i ai i uluai Au Paia se vaaiga vavalalata o Iosefa Samita ma le Toefuataiga. Sa latou molimauina vavega—faaliliuga, faamalologa, ma faaaliga vaaia. Sa latou vaai foi i luitau, mea sese, ma toilalo. Sa latou aoao e mulimuli i le perofeta ma le ‟onosai ma le faatuatua.”¹

Na aoao mai Elder Jeffrey R. Holland, “Ia agalelei e tusa ai ma vaivaiga faaletagata—o ou lava vaivaiga faapea foi vaivaiga o i latou o loo tou auauna faatasi i se Ekalesia o loo ta’ita’ia e ni tagata galulue fua, o ni alii ma ni tamaitai faaletino. Vagana ai i le tulaga o Lona Alo Pele e Toatasi e atoatoa, ua na o tagata lē atoatoa lava sa valaauina e le Atua e faia [Lana] galuega. Sa talosagaina i tatou e Elder Holland ia ‟onosai ma agalelei ma loto faamagalo” le tasi i le isi.² O se tasi o faataitaiga o le onosai o le gafatia lea e tuuina atu ai lo tatou gaua’i lelei i se mea mo se vaitaimi umi a o aloese ai mai le lē fiafia ma le ita. E manaomia ai le lotomaualalo, agalelei, ma le loto malamalama. Tatou te tuputupu a’e i le faatuatua a o tatou faatinoina le onosai i o tatou uso ma tuafafine ma i tatou lava. Mafaufau i mataupu faavae nei:

Ia onosai ia te oe lava. E mafai ona fenumia’i pe lē fiafia foi pe a e iloaina se mea e uiga i le Ekalesia po o lona talafaasolopito e feteena’i ma mea sa e malamalama muamua i ai. Faataga se taimi mo oe lava e vaai manino atili ai i se faafitauli ma amata ona malamalama i ni faamatalaga fou. Faaauau pea ona suesue ma tatalo. Atonu e umi se taimi ae e te le’i lagonaina ua e toe foi i luga o se eleele mautu. O i latou ua vaai i lenei faagasologa e mafai ona molimau atu ua faalolotoina ai lo latou liua i le talalelei.
Ia onosai i tagata o le Ekalesia. E leai se tagata o le Ekalesia e atoatoa. Ua faatumulia a tatou uarota ma paranesi i tagata talitonu faamaoni o ē e masani ona lē ola e tusa ai ma tulaga faatonuina aupito maualuluga o le talalelei. O faafitauli lava ia e tasi tatou te maua i le lalolagi—o le failoga tagata, manatu faapito, vaivaiga o le ola mama, ma isi—o loo maua i le Au Paia o Aso e Gata Ai. A o tatou tapuai ma auauna atu faatasi, o le a tatou molimauina mea sese ma toilalo o le tasi ma le isi. E tatau ona tatou faatagaina se avanoa mo le alofa tunoa o le Atua a o taumafai isi e faaleleia, e pei lava ona tatou manaomia lo latou onosai i a tatou taumafaiga faatuatua lelei.
Ia onosai ia i latou o e mananao e fesoasoani. O i latou o loo tauivi ma fesili po o le lē mautonu e masani ona liliu atu i tagata o le aiga, uo, po o taitai i le lotoifale mo se fesoasoani. I le tele o tulaga, o nei sootaga e ofoina atu le faamafanafanaga ma le lagolago. Ae paga lea, o nisi taimi o le tagata tatou te liliu atu i ai ua tetee mai pe masalosalo pe lē faaalia foi sona tigaalofa. E mafai ona faigata ona onosai i isi pe a tatou i ai i se taimi o faalavelave. Ae latou te manaomia lo tatou onosai e pei lava ona tatou manaomia lo latou onosai.
Ia onosai i taitai o le Ekalesia. O taitai o le Ekalesia ua valaauina e taitaia lenei galuega o ni tagata faamaoni ae e lē atoatoa. Na matauina e Elder Dieter F. Uchtdorf e faapea ‟e i ai taimi e faia ai e tagata po o taitai o le Ekalesia ni mea sese.”³ Sa moni lenei mea i le taimi ua tuanai ma o loo moni pea i le taimi nei. Atonu e fai mai e se taitai o le Ekalesia se tala e faaopoopo ai lou lē fiafia po o le lagona o le faaesea. Atonu latou te le faaalia maia le agaalofa po o le malamalama e te manaomia. O le faaalia o le onosai i taitai e le faapea ua tatou taliaina ai amioga faasolitulafono po o amioga faasauā. Ae e tatau ona tatou tuuina atu le lagolago, alofa, ma le onosai i le toatele o taitai o le Ekalesia a o latou galulue punoua’i ai ma le lē atoatoa mo Siona.
“Ia onosai i le taimi a le Alii.” A i ai ni a tatou fesili e uiga i le Ekalesia, e masani ona tatou aapa atu mo se tali vave. Atonu tatou te manatu o le a fesoasoani le faitau o mea uma e mafai ona tatou maua e uiga i se faafitauli e tusa lava po o le a le punavai. Pe atonu foi tatou te manatu o se tatalo po o se feiloaiga ma se taitai o le Ekalesia o le a vave ona foia ai o tatou lagona. Ae o le mauaina o le filemu e masani lava o se faagasologa e umi atu. O le lē fetaui i le va o o tatou faamoemoega ma lo tatou tulaga moni i le taimi nei e mafai ona tiga. E pei o Nifae, e mafai ona tatou maua le mafanafana i le iloaina ‟e alofa [le Atua] i ana fanau” e ui lava ina tatou ‟le iloa le uiga o mea uma.”⁴

O mau autu: Roma 5:3–4; Alema 7:23; Mataupu Faavae ma Feagaiga 21:5