2:3

“Aua le Masalosalo, ae Ia Talitonu.”

Elder Dale G. Renlund

O Le Korama a Aposetolo e Toasefululua

Faatasi ai ma Sister Ruth L. Renlund

Faasalalauga Faasatelite mo Seminare ma Inisitituti o Mataupu Faalelotu 12 Iuni, 2018 i le Maota Autu mo Konafesi

Elder Dale G. Renlund: Matou te faafetai ua tatou mafuta. Matou te faafetai tele mo mea uma o loo outou faia a o outou aoao atu ma lagolagoina seminare ma inisitituti i le lalolagi atoa. A o outou faia na ea, ia manatua pea le fiafia o le Alii i la outou auaunaga. O Ia o se vaega o lau vasega; o loo faatasi o Ia ma outou, o loo “muamua atu i o outou luma,” o “le a i ai o [Ia] i lo outou lima taumatau ma lo outou agavale,” ma o le a i ai Lona “Agaga i o outou loto,” ma “si’o faataamilo outou e Ana agelu e sapasapai outou i luga.”¹

Ou te faafetai atu ia te outou e fai ma sui o le Alii ma Lana Ekalesia mo lo outou faatuatua ma le faamaoni. Faafetai atu mo le taliaina o o outou tiutetauave. Faafetai atu mo lo outou fesoasoani i fanau a le Tama Faalelagi ia toe foi atu ia te Ia. Faafetai mo le valaauliaina o Ana fanau e o mai ia Keriso.

Sister Ruth L. Renlund: Faafetai atu i lenei aufaipese matagofie sa saofaga i le Agaga o le Sauniga. Ma ou te mautinoa ua faagaeetia uma i tatou i saunoaga matagofie a Brother Chad H Webb ma Elder Kim B. Clark. Tatou te faafetai foi ia i laua mo a la faataitaiga o le avea ai ma soo. Ua ma fiafia lava ua maua le avanoa e talatalanoa ai ma outou i le aso e uiga i le faatuatua ma le masalosalo, o se autu tou te talanoa soo foi i ai.

Elder Renlund: Manatu faapea ua sa’e se vaa sa outou i ai a o folau i le moana sausau. O loo fai lou ofu faaola ma ua tele itula o e aau agai i le mea sa e talitonu o se apitaogalu aupito lata ane, ae e le o mafai ona e iloa tonu. Ua matuai leai se vai i lou tino, ma o lea o taimi uma e amata ai ona e aau, e te niniva ai. O lau fuafaatatau sili, pe toe 30 kilomita pe 18 maila le mamao agai i le apitaogalu. Ua e popole mo lou ola. I se mea mamao ua e faalogo atu [i le pa’o] o sina afivaa itiiti. Ua foliga mai o loo sau agai ia te oe le leo; ua faateleina lou faamoemoe mo se laveai. A o e autilo atu, ua e vaaia se vaa fagota ua latalata mai.

Sister Renlund: “Oi, se faafetai,” e te manatu, ua iloa mai oe e le kapeteni! Ua tu le vaa, ua fesoasoani mai se faifaiva agalelei, ua gapatia i le tau e ava’e oe i luga o le vaa. Ua e tolotolo atu ma le lotofaafetai i se nofoa i le vaa, ma manavanava loloa ma mapuea. Ua avatu e le faifaiva ia te oe se fagupa’u vai ma ni nai masi malo. Ua maua i le vai ma masi malo meaai e tatau ai mo oe e toe malosi ai. Ua e matua toafilemu ma fiafia. Ua e agai atu i lou aiga.

A o amata ona e toe malosi ma ua amata foi ona maua lagona lelei atu, ua amata ona e gauai atu i ni mea e te lei matauina muamua. O le vai mai le fagupa’u ua fai si mafu ma e le o le mea lea sa e manao ai—Orchy po o le Tara. Ma o meaai sa e manao moni i ai o se fasipovi ua matuai kuka faamanogi sosoo atu ai ma se pai sukalati. Ua e matauina foi ua toeaina le faifaiva agalelei, e masaesae ona seevae ma se ofuvae kaki lanumoana. O le taliafu i lona pulou e pisipisia, ma e foliga mai e leaga lana faalogo.

Elder Renlund: Ua e matauina foi ua matuai tuai lava le vaa ma e maomoomo le itu taumatau o le taumua. O se vaega o le vali ua manutinuti, tuai, ma mafoefoe. Ua matauina foi a aveese e le faifaiva lona lima mai le foeuli, ona fuli lea o le vaa i le taumatau. Ua amata ona e popole o le a le mafai e lenei vaa ma lenei kapeteni ona avatu le laveai e te manaomia. Ua e fesili i le toeaina faifaiva e uiga i maomoomo ma le foeuli. Ua ia fai mai e lei popole tele lava o ia i na mea aua sa ia uliina lava le vaa pe a alu e fagota ma foi mai, i le alavaa lava lea e tasi, i lea aso ma lea aso mo le fiasefulu o tausaga. Sa aveina lava o ia ma le saogalemu ma le faatuatuaina e le vaa i mea sa ia manao e alu i ai.

Ua e maofa! E mafai faapefea ona ia le popole i maomoomo ma le foeuli? Ma aisea na le mafai ai ona e fiafia atili i le meaai? O le tele o lou taulai atu i le vaa ma le faifaiva, o le tele foi lena o lou popole. Ua e fesiligia lau faaiuga e te oso i luga o le vaa i le taimi muamua. Ua amata ona faatupulaia lou atuatuvale. Ua i’u ai ina e faatonuina le faifaiva e taofi le vaa ae toe tuu oe i lalo i le sami. E ui o loo silia lava ma le 20 kilomita, pe 12 maila lou mamao mai le matafaga, ae ua le mafai lava ona e onosaia lou i ai i luga o le vaa. Faatasi ai ma si faanoanoa itiiti, ua toe fesoasoani le faifaiva e tuu ifo oe i le vasa.

Sister Renlund: I le faataoto lea, o le vaa e faatusa i le Ekalesia ma o le faifaiva e faatusa ia i latou o e galulue auauna i le Ekalesia.² O le faamoemoega atoa lava o le Ekalesia a Iesu Keriso o le Au Paia o Aso e Gata Ai o le fesoasoani lea i le Tama Faalelagi ma Iesu Keriso i le La galuega o le aumaia o le ola e faavavau o fanau a le Tama Faalelagi.³ O le a le mea o aoao mai e le vaa ma le faifaiva ia i tatou e uiga i le Ekalesia? Pe o suia i le maomoomo ma vali mafoefoe o le Ekalesia le gafatia e aumaia sauniga faaola ua faatagaina ma le faaeaga e fesoasoani tatou te avea ai e pei o lo tatou Tama o i le Lagi? Afai e tatau ona pipii limalua le faifaiva i le foeuli e faatautaia ai i lona alavaa, pe o le a aveesea ai ea la lona tomai ma le gafatia e le vaa ona ave saogalemu ma faatuatuaina i tatou i le mea tatou te mananao e o i ai? E le tau avea oe o se tagatavaai ua faauuina e pei o lo’u toalua e iloa ai o le toe faase’e ifo i le sami nai lo le nofo ai i luga o le vaa e lamatia.

E manaomia e tagata uma o le Ekalesia lana lava molimau i le moni o Le Ekalesia a Iesu Keriso o le Au Paia o Aso e Gata Ai. A aunoa ma lena liua, e aofia ai se suiga tele o le loto, e ono amata ona taulai atu tagata i masi malo faafaatusa ma vali ua manutinuti.

Elder Renlund: O le amataga o la’u molimau na tupu a o ou nofo i Göteborg, Suetena. Sa 11 o’u tausaga. Sa tuuina mai e le peresitene o le misiona se valaaulia i tupulaga talavou uma e faitau le Tusi a Mamona. O lo’u uso matua, o le sa ou faamemelo i ai ma faaaloalogia i taimi uma, sa ia talia le lu’i. Sa ou manao ia faapei o ia, o lea sa amata ai ona ou faitauina foi le Tusi a Mamona. I le gasologa, atonu pe sa ou i ai i le tusi a Alema pe a, sa fai mai ai se tasi o fesoasoani o le peresitene o le misiona, e tatau ona matou tatalo e uiga i mea sa matou faitauina. Ou te manatua le afiafi sa ou faatinoina lelei ai lava le valaaulia. Ou te manatuaina le faletotogi sa matou nonofo ai ma le potu sa ma momoe ai ma lo’u uso. Ina ua moe lo’u uso, sa ou oso ese mai le moega ma tootuli i autafa ma sa amata ona ou faia se tatalo faigofie lava ia ou iloaina pe moni le Tusi a Mamona.

Ou te le’i faalogoina se leo, ae sa pei o la sa ta’u mai e le Atua ia te a’u, “Ua leva ona ou ta’uina atu ia te oe e moni.” Na suia a’u e lena aafiaga. Na suia ai lo’u olaga. Na amata ai se faasologa o le talitonuga, se faasologa o le i ai i luga o le ala o feagaiga ma taumafai ai e faia atili ma taumafai e fai ia sili atu. O Göteborg sa ou aoao ai i le ala e salamo ai. O Göteborg na amata ai ona ou vaavaai a’e i luga i tagata sa faalauteleina o latou valaauga ma e sa galulue malosi e atia’e le malo o le Atua. O iina sa amata ai ona ou faamemelo i le Au Paia faamaoni a le Atua i soo se mea latou te nonofo ai. O Göteborg ma le fale na matou lolotu ai i Viktoriagatan na avea ma nofoaga faapitoa mo a’u.

E faatatau i le au uluai liliu mai a Alema, tatou te faitau ai: “Ma o lenei sa oo o nei mea uma sa faia i Mamona, ioe, i tafatafa o vai o Mamona, i totonu o le vao sa lata ane i vai o Mamona; ioe, o le nofoaga o Mamona, o vai o Mamona, o le vao o Mamona, sa matua matagofie i latou i le vaai a i latou o e na o atu i le malamalama o lo latou Togiola iina; ioe, ma amuia lava i latou, ona o le a latou pepese i lona viiga e faavavau.”⁴

O Göteborg sa ou maua ai le malamalama e uiga i lo’u Togiola. O Götebor ma Viktoriagatan na avea ma o’u “Vai o Mamona.”

Sister Renlund: O fea na e maua ai se malamalama i lou Togiola? O a ni ou lagona na i ai? Afai ua galo ia te oe, ma te uunaia oe ia manatua ma uunaia i latou o loo e faiaoga ai ia manatua pe o a ni lagona. O lenei malamalama ma nei lagona o le amataga lea o le faatuatua.

O le faatuatua o se filifiliga e tatau i tagata taitasi ona faia. O le faatuatua e le na o se manao faivavale i se mea e moni ma faatalitonu faavalevalea ai oe lava e moni. O le faatuatua o le mautinoa lea o mea o i ai tatou te lei vaai i ai i le tino. O se mataupu faavae foi o le faatinoga. Atonu e mafai ona faapea o le faatuatua o se manatuaga faaleagaga o lo tatou ola ai i le muai olaga.

“O le faatuatua e tatau ona taulai atu ia Iesu Keriso ina ia mafai ai ona taitaiina atu se tagata i le faaolataga. … O le faatuatua e faamumu e ala i le faalogo i le talalelei o aoao atu e taitai ua faatagaina [e pei o outou] e auina mai e le Atua. “O vavega e le tupu mai ai le faatuatua, ae e atinaeina le faatuatua malosi i le usiusitai i le talalelei a Iesu Keriso. I se isi faaupuga, o le faatuatua e sau mai le amiotonu.”⁵ E le sau le faatuatua i le tauanauina o faailoga mai le Atua ae e ala i le usitai ma mulimuli i Ana poloaiga.

Elder Renlund: E finagalo le Atua ia tatou faatuatua. E finagalo o Ia ia tatou faatuatua ina ia mafai ai e Ia ona faamanuiaina i tatou. Sa ta’u atu e Alema i tagata sa Soramā matitiva: “Ma o lenei, faauta, ou te fai atu ia te outou, ma ou te manao ia outou manatua, e alofa mutimutivale le Atua i tagata uma o e e talitonu i lona suafa; o lea ua ia finagalo ai, i le tulaga muamua lava, ia outou talitonu, ioe, i lana afioga lava.”⁶

O le faatuatua o le ki lea e tatala ai le alofa mutimutivale o le Atua. Ona aoao mai lea o Alema e faapea e manaomia e se tagata ona filifili pe manao o ia e faatuatua ona galue lea i le faatuatua a o lei mafai ona tupu. Na faaauau le aoaoga a Alema: “Ae faauta, afai tou te ala mai ma fafagu o outou mafaufau, e oo i le tofotofo i au upu, ma faaaoga sina vaega itiiti o le faatuatua, ioe, e tusa pe ua le mafai ona e faia o se isi lava mea nai lo le fia talitonu, ia tuu lea manao e galue i totonu ia te oe, seia oo lava ina ia e talitonu ai i se ala e mafai ai ona e tuu ane o se avanoa mo se vaega o aʼu upu.”⁷

Ina ia tupu le faatuatua, e tatau i le tagata ona filifili ia maua le faatuatua. E tatau i le tagata ona manao ia maua le faatuatua. E tatau i le tagata ona galue i le faatuatua.

Sister Renlund: Atonu o le a faapupulaina lenei mea i se faataitaiga. Ua i ai iinei se laupapa ma se fao ua tutu’i i ai. O loo i ai foi nisi fao se 12. O lea, la’u pele, e i ai la’u galuega lea mo oe. E mafai ona e faapalenia isi fao e 12 i luga o le fao lea e tasi ua tutu’i i le laupapa?

Elder Renlund: E a ea?

Sister Renlund: Mata e mafai? Ia, o lea ua i ai le tasi. E manaomia le isi 11. A o tau faavasega le paso lea, atonu e taumafai nisi e tuu le fao e tasi i le pito i luga ona musu loa lea.

Elder Renlund: E i ai sau pulukamu?

Sister Renlund: Atonu e manatu se tasi o le isi sitepu lea e le mafai. E toatele tagata e fiu, ma manatu, “E le mafai ona fai.”

Ae afai e te loto e faapea, “Mata e mafai?” atonu e te loto lava e toe fai se isi auala. Taumafai i le ala lea. Faataatia le fao e tasi i ou luma. Ia tuu la’ia o se tasi fao faalava i le fao muamua, ae faaū atu ia oe le pito ma’ai. Faataatia le isi fao faalava i le fao muamua ae faaū ese le pito ma’ai mai ia te oe. Faaauau ai pea ona tuu uma ae o le fao mulimuli faalava i le fao muamua i le mamanu feua’i lea.

A o e faia, o le a e iloa ai e i ai se auala. Ua amata ona e mafaufau, “Atonu e mafai lenei mea.” Ua faateleina lou faamoemoe. Mulimuli ane, toeitiiti a e oo i ai!

Elder Renlund: Ua faateleina moni lava lo’u faamoemoe.

Sister Renlund: Faataatia le fao mulimuli i luga ma ia tutusa ma le fao muamua, faalava i isi fao. Ua sa’o! Faapea. Ia, ma le faaeteete, na o le fao pito i lalo lava e te tago i ai, sii a’e uma i luga ma tuu le fao pito i lalo i luga o le fao o loo pipii i le laupapa.

O nisi taimi e le sao ai le taumafaiga muamua. O lea, i le tele o faataitaiga, e ao lava ona e toe taumafai faalua. Mulimuli i le faataitaiga lava lea e tasi. Faataatia faalava le fao mulimuli i le pito i luga ma ia faaeteete lava, matua faaeteete ā—

Elder Renlund: E te le’i ta’u maia lena mea muamua.

Si’i uma i luga fao ma faapaleni. Manaia! A e iloa loa fai, ona foliga mai loa lea ua iloagofie le tali.

Elder Renlund: Aua e te manava!

Sister Renlund: E faapena foi ona moni i le mauaina o se molimau. A e iloa loa pe faapefea ona maua se tali mai le Atua, ona foliga mautinoa loa lea o le taunuuga. O loo ta’ua lea mea i le folafolaga a le Tusi a Mamona lea sa mulimuli ai lo’u toalua a o 11 tausaga lona matua ma e pei ona tatou mulimuli ai uma a o tatou mauaina a tatou molimau. “Ma pe a outou maua nei mea, ou te apoapoai atu ia te outou ia outou ole atu i le Atua, le Tamā Faavavau, i le suafa o Iesu Keriso, pe ua le moni ea nei mea; ma afai tou ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia.”⁸

A e amata i le fesili, “Mata e le moni nei mea?”, e taitai atu ai i le faatuatua. Afai e te amata i le fesili, “Mata e mafai ona sese lenei mea,?” e tau atu i le masalosalo. Ma o le masalosalo e le mafai lava ona tau atu i le faatuatua.

Elder Renlund: Sa i ai se taimi a o asiasi atu i se konafesi a se siteki, sa fesili mai le peresitene o le siteki ia te au ma te talanoa ma se alii o le a ou faaigoa ia Setefano. O Setefano sa o se tagata faamaoni o le Ekalesia. Ua foi mai se misiona ma sa faaipoipo i le malumalu. Sa galue auauna o ia ma le faamaoni mo le tele o tausaga ae sa amata ona masalosalo e uiga i le Ekalesia. A o ma talatalanoa ma Setefano, sa ia fai mai sa i ai ni ona faafitauli i le mea moni faapea na tusia e Iosefa Samita pe sa faalauina ni lomiga se fa o le Uluai Faaaliga. Sa ia mafaufau o lona uiga o lea mea o se talafatu a Iosefa.

Sa ou tuuina Setefano e fesootai ma se alii sa faigaluega i le Matagaluega o le Talafaasolopito o le Ekalesia o le sa suesueina nei lomiga e fa i le fiasefulu tausaga ua mavae. Sa talanoa Setefano ma le tagata suesue. O le isi taimi na ma talanoa ai ma Setefano sa ou fai atu “Ia, o le a la sou lagona i le Uluai Faaaliga?”

Sa ia fai mai, “Ia, o lea ua lelei o’u lagona aua ua tali a’u fesili. E le i toe faalavelaveina ai a’u. Ae o le taimi nei ua ou matua atugalu lava e uiga i autaunonofo ia sa faia i Navu ma tua mai o le Manifeso i le 1890. Ua matua faapopoleina ai lava a’u i lena mea.”

Sa ou fai ia Setefano e talanoa ma se isi tagata i le Matagaluega o Talafaasolopito o le Ekalesia. Ina ua uma lena talanoaga, sa ou faafesootaia Setefano ma fesili pe ua a mai o ia.

Sa ia fai mai, “Oi, ua le o toe faalavelaveina ai a’u i lena mea. Ua ou malamalama i le mea na tupu, ma ua foia foi o’u atugaluga. Ae ua ou matua popole nei la i le mea na taofia ai le perisitua mai tagata na tupuga mai Aferika.”

Sister Renlund: Sa pei lava Setefano o le toatele o tagata. Sa ia filifili e avea o se tagata masalosalo pea lava pea. A o gasolo pea aso, a uma ona foia le tasi popolega, ona maua foi lea o se isi popolega. Po o le a lava le taumafai o se tasi e tali atu i nei fesili, na te maua lava se isi autu e faaalia ai le masalosalo. O le mea sa faia e Setefano o se faiga faalelotu o se taaloga anamua o le samala-o se-imoa meataalo. Tou te silafia, o le taaloga a tamaiti lea e oso ae ai i luga se imoa mai se laupapa ma o le taimi lava e te taina ai, e oso ae ai se isi mai se isi foi nofoaga.

O se tulaga ese tele lea mo se tamaitai sa matou feiloai i Lupumapasi i le Temokalasi Ripapelika o Congo. O lona igoa o Anelika. O ia o se faifeautalai faamaoni ua foi mai. Sa ia te ia se molimau malosi o le Perofeta o Iosefa Samita. Sa fiafia tele o ia i le Tusi a Mamona. Sa fiafia o ia i mea uma e uiga i le Ekalesia.

Ina ua matou feiloai ma ia, sa ia faitauina se tusi na tusia i se taimi ua leva e se tasi o taitai o le Ekalesia a o lei avea ma Peresitene o le Ekalesia. Na tusia le tusi a o lei oo mai le faaaliga e uiga i le perisitua i le 1978 ma sa ta’ua ai faapea, ona o ni nai mea na faia i le muai olaga, o lea o le a le faaeaina ai i latou e tupuga mai Aferika. Sa fesili Anelika mo sina fesoasoani ia malamalama ai pe aisea o le a tupu ai lea mea. Sa ta’u atu ia te ia e se uso o le Korama a le Toasefulu i le taimi nei e faapea o lea taitai talu ai o le Ekalesia sa sese, sa manino ma faigofie, ma sa na ona ia ta’ua o ona manatu, o se manatu sa le’i sa’o. Sa faamalieina Anelika i lea faamalamalamaga. Sa ia faatino i le faatuatua e ala i le tumau ai i luga o le ala o le feagaiga ma faalagolago i le Atua.

Elder Renlund: O le masalosalo e le o se teuteuala o le faatuatua. E le faalagolago le malamalama i le pogisa mo lona foafoaga. Sa le’i ta’uina atu ia Peteru, a o ia magoto ifo i le sami ina ua mavae ona ia taumafai e savali ai i luga, “Oi Peteru e, maimau pe ana e masalosalo atili.” E leai, sa ta’u atu ia te ia, “O oe na le faatuatua itiiti, se a le mea ua e masalosalovale ai?”⁹

I le Lectures on Faith, o eseesega i le va o le faatuatua ma le masalosalo ua faamalamalamaina: “O le mea foi e i ai le masalosalo ma le le mautinoa, e le o i ai le faatuatua, ma e le mafai lava. Aua o le masalosalo ma le faatuatua e le i ai i le tagata e tasi i le taimi e tasi; o le mea lea o tagata e i ai le masalosalo ma le fefefe i o latou mafaufau e le mafai ona i ai le talitonu mautinoa e le maluelue; ma o le mea foi e le i ai le talitonu mautinoa e vaivai foi le faatuatua; ma o le mea e vaivai ai le faatuatua o le a le mafai foi e le tagata ona finau faasaga i mea faafeagai uma, o faigata ma mafatiaga ia e tatau ona latou fetaiai ina ia avea ai ma suli o le Atua; ma suli faatasi ma Keriso Iesu; ma o le a oo ina latou vaivai i o latou mafaufau ma o le a pulea e le fili i latou ma faaumatia ai.⁹

O le mea tonu lava lea na tupu ia Setefano. Sa ia faatagaina le masalosalo ma le le mautonu e faatumulia ai lona mafaufau. A o gasolo aso, na te lei maua le malosi e faafetaia’ia ai luitau e feagai ma se tagata o le Ekalesia. Sa oo ina vaivai lona mafaufau, ma ua mou atu lona faatuatua.

Sister Renlund: O le i ai o se fesili e uiga i le Ekalesia ma ona aoaoga faavae e le o se faafitauli lena mea. O le filifili e avea o se tagata masalosalo pea lava pea o le faafitauli lena. Sa malamalama Iosefa Samita ina ua ia faitau, “A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe ta’uta’ua, ona foaiina mai ai lea ia te ia.”¹¹

Ae o loo faaauau le fuaitau, “A ia ole atu ma le faatuatua, aua lava nei masalosalo.”¹²

I se isi faaupuga, ole atu i le Atua, aua le masalosalo e mafai e Ia ona avatu ia te oe se tali. O loo faaauau le fuaitau, “Aua o lē masalosalo [pe faalotolotolua] e tusa ia ma le peau o le sami ua sousou i le matagi ma felafolafoaiina. Aua lava ne’i manatu lea tagata na te maua se mea e tasi mai le Alii. O le tagata faalotolotolua e faaletumau ia i ona ala uma.”¹³

Ina ia maua le ituaiga o tali sa sailia e Iosefa Samita, ina ia maua le ituaiga o tali tatou te le o maua; e manaomia ona tatou faalatalata atu i le Atua ma se loto talitonu ma se mafaufau e manao i mea a le Atua o le a faailoa mai ia i tatou.

Elder Renlund: Ma te fiafia lava i se saunoaga a Elder John A. Widtsoe, o se uluai Aposetolo i le tisipenisione lenei mai Nouei. O le a ou toe faaupuina atu le mea sa matagofie lona faaleoina: “O le masalosalo, sei vagana ua toe suia i se faafesili [mai punavai sa’o] e leai se taua po o se aoga i le lalolagi. … Ina ia mitamita i le avea ai o se tagata masalosalo … o le tagata masalosalo ua le toe gaoioi, ua fiafia lava o ia ia te ia lava, ua leai se naunau e faia se taumafaiga [talafeagai], e totogi le tau o le sailia o mea paia, e le maalofia lava le tau i le le talitonu ma le pogisa mataga. E tupu pea ona masalosaloga e faapei o ni pulouaitu oona i ata lafoia pogisa o ona afeafe faalemafaufau ma faaleagaga. Ma iu ai ina tauaso e faapei o le imoa i lona lua, na te suia pea lava le tauemu mo se mafuaaga, ma le paie mo le galue. O se upumoni aupito faigofie e tusa ia ma le aofaiga atoa o na masalosaloga. … E le sese le masalosalo sei vagana ua avea ma ona lava ia mutaaga. E tulai mai i se mamalu maualuga pe a avea o se sailiga [faalelagi] ‘anoa mo, ma faaa’oa’o o le upumoni. … O lena masalosalo lea e fafagaina ai ma tuputupu ae ia te ia lava, ma, faatasi ai ma le faatamala lotomaaa, e fanafanau atili ai le masalosalo, o se mea leaga lea.”¹⁴

O loo moni pea upu a Elder Widstoe. O le masalosalo ua le gaoioi e le tau atu i le iloaina o le moni o le Faaola, o Iesu Keriso; e le tau atu ai i le iloaina moni faapea o loo i ai so tatou Tama Faalelagi agalelei ma le alofa. E mafai ona tatou iloa le moni o lenei galuega i aso e gata ai, ae e manaomia ai ia tatou filifili le faatuatua, ae le o le masalosalo vale, ma ia tatou o i punavai tonu mo a tatou tali. E manaomia ai ia tatou iloa o le filifiliga o la tatou lea. E le o se malosiaga mai fafo o loo uuna’ia i tatou pe tatou te talia le Togiola a Iesu Keriso ma sauniga faaola i o tatou olaga. Tatou te filifili e faalagolago i le Atua.

Sister Renlund: O nisi taimi tatou te feagai ai ma le tau fuafuaina pe moni se mea pe leai. Ua tuuina mai e Mamona ia i tatou se mamanu e mulimuli ai: “O le mea lea, o mea uma ua lelei e mai le Atua ma o le mea ua leaga e mai le tiapolo; … Ae faauta, o le mea ua mai le Atua, e valaau ma faatosina mai ia faia mea lelei e le aunoa; o le mea lea, o mea uma e valaau mai ma faatosina mai ia faia mea lelei, ma alofa i le Atua, ma auauna atu ia te ia, ua musuia e le Atua. … Aua faauta, ou uso e, ua tuu mai ia te outou ia outou faamasino, ina ia outou iloa le lelei mai le leaga; ma o le ala e faamasino ai ua manino, ina ia mafai ona outou iloa ma se malamalama atoatoa, e pei o le malamalama o le ao mai le pouliuli o le po. Aua faauta, ua tuuina mai i tagata taitoatasi le Agaga o Keriso, ina ia mafai ona iloa e ia le lelei mai le leaga; o le mea lea, ou te faaali atu ai ia te outou le ala e faamasino ai; ona o mea uma e valaau mai ia fai le lelei, ma faatauanau mai ia talitonu ia Keriso, ua auina mai i le mana ma le meaalofa a Keriso; o le mea lea e mafai ai ona outou iloa ma le malamalama atoatoa ua mai le Atua. Ae o soo se mea e faatauanauina tagata ia latou faia le leaga, ma ia le talitonu ia Keriso, ma faafiti o ia, ma ia le auauna i le Atua, ona outou iloa lea ma le malamalama atoatoa ua mai le tiapolo.”¹⁵

O lea la, e faigofie lava. Afai e taitai oe e se filifiliga e fai le mea lelei ma talitonu ai ia Keriso, e mai le Atua. Afai e tosina oe e se filifiliga e fai le mea leaga ma faafitia Keriso, e mai le tiapolo. A e alu i luga o le ala o le feagaiga, e mafai ona e iloa o mea na e faalavefauina oe mai lena ala, na e tauanauina oe e aua e te talitonu ia Keriso, e sese. O mea na e tauanauina oe e talitonu i le Atua, e alofa ai ia te Ia, ma tausi Ana poloaiga e mai le Atua.

Elder Renlund: E mata’ina le ala e tali atu ai se tasi i uunaiga faaleagaga e faalagolago pe filifili se tasi e talitonu pe masalosalo. Tou te manatua i le Galuega mataupu e 2 ina o le a o ia Aposetolo e tala’i. Sa latou faalogoina se taalili mai o le lagi e peiseai o le matagi ua agi tele mai. “Ma sa faatumuina i latou i le Agaga Paia, ma afua ai ona latou tautala i gagana eseese, pei ona foaiina mai e le Agaga o gagana ia te i latou. … Ina ua lagona lenei taalili, ona faapotopoto mai lea o le motu o tagata, ua fememeai aua ua taitasi ma faalogo atu ia i latou o tautala mai i lana lava gagana. Ma sa segia o latou mauli ma ua ofo ai, ua latou fetautalatalaa’i, Faauta e le o Kalilaia ea i latou uma o e tautala mai nei? E faapefea foi ona tatou taitasi ma faalogo atu i lana lava gagana na tupu mai ma ia?”¹⁶

O nei mea ofoofogia na tutupu na afua ai ona toatele e na liua mai. Ae o isi, sa ese se tali. Tatou te faitau ai, “O isi ua tauemu i latou ma faapea mai, Ua ona nei tagata i le uaina suamalie.”¹⁷

O le Agaga lava e tasi; o le Agaga Paia lea na liligi ifo i luga o na Aposetolo Kalilaia o e sa talai atu e uiga ia Iesu Keriso. I le aso o le Penetekoso, sa matuai liligi ifo tele ai le Agaga, ae sa tauemu atu foi nisi o i latou i e sa liua ma taufaavasega le aafiaga. O le taunuuga, sa latou misia lea liligi faaua mai o le Agaga Paia. O le a se mea na faia ai le eseesega? O la latou filifiliga. Oi latou e filifili le faatuatua ma le talitonu nai lo le masalosalo sa maoae ni aafiaga faaleagaga na oo atu ai ina ua liua.

Sister Renlund: Na talanoa foi Alema i le mea lenei. Na fai mai a ia, “Ma o lea, o ia o lē e faamaaa lona loto, o ia lava lea na te maua le vaega itiiti o le afioga; ae o ia o lē e lē faamaaaina lona loto, o ia lea e tuuina mai i ai le vaega tele o le afioga, seia oo ina tuuina mai ia te ia, ia ona iloa mealilo a le Atua, seia oo ina ia iloaina atoatoa. Ma o i latou o e e faamaaa o latou loto, e tuu mai ia i latou le vaega itiiti o le afioga, seia oo ina latou lē iloaina se mea e uiga i ana mealilo; ma ona ave ai lea o i latou faatagataotaua e le tiapolo, ma taitai atu e lona loto i lalo i le faafanoga.”¹⁸

Tatou toe foi i le tatou faataoto, o i latou na filifili e nonofo i luga o le vaa ua afu lana tautua, ma maomoomo ma ona vali ua mafoefoe o i latou na e lei faamaaaina o latou loto. Ua latou o atu i luga o le ala o feagaiga, ma tumau ai i le ala o feagaiga. Ona, a o latou tumau e oo i le iuga, ua tuuina atu i ai le folafolaga o le ola e faavavau. O le meaalofa aupito sili lea e mafai e le Atua ona aumai. O le faagasologa lea tatou te iloa ai Iesu Keriso, e iloa ai le moni o Lona soifua, ma iloa ai Lona alofa ma Lona agalelei. O lea meaalofa faaleagaga ua tuuina atu ia i latou uma o e agavaa ai.

Ua fai mai le Mataupu Faavae ma Feagaiga, “I ni isi ua tuuina mai i ai e le Agaga Paia ia latou iloa o Iesu Keriso o le Alo o le Atua, ma sa faasatauroina o ia mo agasala a le lalolagi. I ni isi ua tuuina mai i ai ia talitonu ia latou upu, ina ia mafai foi ona latou maua o le ola e faavavau pe afai latou te faamaoni pea.”¹⁹

Elder Renlund: Ia Aperila 2009, sa lagolagoina ai a’u o se Pulega Aoao i le Ekalesia. Ia Oketoopa 2009, sa faatonuina ai a’u ou te lauga i le konafesi aoao. O se vaega lenei o le “polokalama fou faasoloatoa a le Au Pulega Aoao.” Sa ou naunau ia mafai ona faalogologo lo’u tama i le konafesi. Sa galue malosi o ia o se kamuta ma se faufale i lona olaga atoa, ma i le 92 o ona tausaga sa feagai o ia ma ni faigata matuia o lona tua. Sa le mafai ona sau o ia i le Maota Autu mo Konafesi. O lea, sa faamautinoa ai e se tasi o o’ tuafafine ua mafai ona ia matamata i le sauniga i le TV i lona fale i le Aai o Sate Leki.

Ina ua uma le konafesi, sa ou alu i lona fale e vaai po o le a sona manatu i la’u lauga. O ia o se tagata e laitiiti lava ni upu ma e le soona tele foi ni ana faamatalaga faamalo.

Sa ou fai atu, “Papa, na e matamata i le konafesi?”

Sa ia fai mai “Ja.”

Sa ou fai atu, “Papa, na e faalogo i la’u lauga?”

Sa ia fai mai “Ja.”

Sa ou fai atu, “Papa, o le a sou manatu?”

Sa ia fai mai, “Oi, o la na lelei. Toeitiiti lava a ou mitamita ai.” Ma o le mea aupito sili lena e tusa ai ma ni tala faamalo mai ia te ia.

Ae o iina na ou iloa ai sa fai si ona le fiafia i lena aoauli, aua sa manao o ia e faamatala mai ia te a’u sana miti na fai i le po i luma mai. E le o ia o se faimiti. E leai lava ni ona mafaufauga faivavale. Ou te lei iloaina lava o ia o fai se talapepelo. Sa matuai faamaoni a’ia’i ma le ‘ina’ina ma le faautauta i taimi uma. Sa ia fai mai, “Sa ou miti faapea ua ou oti ma sa ou vaai i le Faaola, o Iesu Keriso. Na Ia aveina a’u i Ona aao ma fetalai mai ua faamagaloina a’u agasala. Ma o lea Dale, o se lagona ina a manaia.” Na pau lava lena o lana tala, ma sa ou le toe faia se isi fesili. Sa maliu o ia i le lua masina mulimuli ane a o ma i ai ma Ruta i Madagascar.

O lo’u tama, ina ua uma ona auai i le Ekalesia i Larsmo, i Finelani, i le 24 o ona tausaga, sa ia ola e tusa ai ma le malamalama ma le poto sa ia maua. Sa ia faia mea uma lava na poloaiina o ia e fai. Sa avea o ia o se tasi ua agavaa mo lena meaalofa o le Agaga e iloa ai o Iesu o le Keriso ma sa faasatauroina mo agasala a le lalolagi, ma mo ana agasala. O le agavaa ai mo lea meaalofa e le o se mea e faalagolago i se itupa ma e le faalagolago foi i se tofi o le perisitua. E faalagolago i luga o le agavaa mo lena meaalofa e ala i le filifilia o le faatuatua, e ala i le filifilia o le ala o feagaiga.

Sister Renlund: Uso e ma tuagane, a o outou fesoasoani i tagata taitoatasi e faatoilalo le masalosalo vale ae faaaoga le faatuatua, ua outou faataunuuina le mea ua uunaia i tatou e Peresitene Russell M. Nelson tatou te faia o se Ekalesia. Na ia saunoa mai e faapea “e faigofie lava ma faamaoni la tatou savali i le lalolagi: tatou te valaauliaina fanau uma a le Atua i itu uma e lua o le veli ia o mai i lo latou Faaola, maua faamanuiaga o le malumalu paia, maua le olioli tumau, ma agavaa mo le ola e faavavau.”²⁰ O le taliaina o lenei valaaulia o se faatinoga o le faatuatua.

A o e aoao atu, ua e fesoasoani foi ia i latou o e ua tuua le ala o feagaiga. E te aoao atu mo latou, mo a latou fanau, fanau a a latou fanau, ma e masalo o fanau a fanau a a latou fanau. Ua apoapoai mai le Faaola, “Aua o tagata faapena ia outou galulue pea i ai; ona tou te le iloa pe o le a latou toe foi mai ma salamo, ma o mai ia te au ma le faamoemoe atoa o le loto, ma o le a ou faamaloloina ai i latou; ma o le a avea outou ma ala e aumai ai le olataga ia te i latou.”²¹

O se taimi lenei mo le faamoemoega tele i le Ekalesia. O upumoni sa natia mo seneturi ua faaalia mai. Ua tumu le lalolagi i malumalu paia. O loo folafola atu e faifeautalai se savali o le olioli tele e toetoe o atunuu uma. I le avea ai o se tino o le Au Paia ma soo o le Alii o Iesu Keriso, ua tatou tutu faatasi i le galuega faaleauaunaga i se “ala e sili atu ona paia, e pei ona fautua mai ai Peresitene Nelson, ma ua faanatinati e le Alii Lana “galuega i lona taimi.”²² O le a tatou galulue faatasi ma le Alii o le tovine.²³ O le savali tou te aoao atu o se savali o le olioli tele ma le fiafia lea ua avea o se faamanuiaga mo e faamaoni.²⁴

Elder Renlund: O lo’u tiutetauave muamua lava o se uso o le Korama a le Toasefululua o le alu lea ma ta’u atu i le Matagaluega o Talafaasolopito o le Ekalesia o le a ou suitulaga ia Elder Jeffrey R. Holland o se faufautua i la latou matagaluega. E pei ona outou mafaufauina, sa i ai le “taufaitagi, ma le tagiaue, ma le lilivau o nifo”²⁵ ina ua latou iloa o le a suia le latou faufautua pele. Sa le’i lava ni pepa solo.

O se vaega o lo’u tofiga o se faufautua i le Matagaluega o Talafaasolopito o le Ekalesia, ua ou faitauina voluma uma o le The Joseph Smith Papers. Ua ou faitauina foi le voluma muamua o le talafaasolopito faamatala o le Ekalesia, ua faaigoaina o le Au Paia. ²⁶ O le faitauina o mea uma sa tusiaina e Iosefa Samita pe na lipotia sa tautalagiaina ua faamalosia gofie ai la’u molimau e uiga i lana matafaioi o se perofeta, na filifilia e le Atua e toefuatai Lana galuega i le lalolagi.

Sa le’i amio lava Iosefa o se tagata faafoliga sa taumafai faalilolilo e taufaasese. Sa talitonu manino lava Iosefa na ia vaai i mea na ia fai mai sa ia vaai i ai, o lo tatou Tama Faalelagi ma Iesu Keriso; Moronae; Ioane le Papatiso; Peteru, Iakopo, ma Ioane; Mose; Elaia; ma Elia. Sa ia amioa’i ma le manino o se tasi sa umia ia papatusi auro ma sa faaliliuina na anotusi anamua e ala i le meaalofa ma le mana o le Atua. Sa ia amioa’i ma le manino o se na mauaina faaaliga mai ia Iesu Keriso Lava Ia. Sa ia amioa’i ma le manino o se na mauaina le perisitua ma ki o le tofi paia Faa-Aposetolo.

Ua ou iloa i ni auala e sili atu ona mamana ma faatuatuaina nai lo le mea e mafai ona iloa ma faamatala atu e o’u sane e lima e faapea na vaai Iosefa Samita i mea na ia fai mai na ia vaai i ai, sa faaliliuina le Tusi a Mamona e ala i le meaalofa ma le mana o le Atua, ma sa mauaina le perisitua faatasi ai ma ona ki mo le faaolataga o tagata. Ou te iloa e moni lea mea. Ua ou iloa o loo i ai nei na ki i le lalolagi ma o Peresitene Nelson o le sui moni o Iosefa Samita i le lalolagi.

O mea ua tatou mafaufau i ai o maomoomo ma vali mafo’efo’e i luga o le vaa ua lava lana tautua e mafai ona faapaiaina faalelagi ma taitaia faalelagi mai se vaaiga o le faavavau. Atonu na i ai le aao o le Alii i na maomoomo ma vali mafo’efo’e pe na Ia faaaogaina foi mo Ona lava faamoemoega. Ua ou iloa e a’u lava ia o le Alii, o Iesu Keriso o loo ta’ita’ia Lana galuega i le lalolagi i le taimi nei. E silafia lelei o Ia e Ana auauna. Ou te iloaina o Ia.

Sister Renlund: Ou te faafetai lava e faaopoopo atu la’u molimau ou te iloa o Iesu Keriso o lo tatou Faaola. A tatou faaaoga le faatuatua, ae le o le masalosalo, i Lana taulaga togiola atoa ai ma fua o lena Togiola, o le a faamanuiaina e faavavau o tatou olaga. Ou te faafetai na Ia toefuatai maia Lana Ekalesia i nei aso faatasi ma faamanuiaga atoatoa ua avanoa mo fanau a le Atua i le lalolagi.

Elder Renlund: O le savali ua ia i tatou o le “aua le masalosalo, ae ia talitonu.”²⁷ Elder Renlund: Ua ou i ai iinei i la’u matafaioi o se Aposetolo a le Alii, o Iesu Keriso. Ua ou i ai iinei e tuuina atu se molimau faapitoa o le suafa o Iesu Keriso, o loo soifua o Ia ma o le Faaola o le lalolagi. Ou te tuuina atu la’u molimau i Lona agalelei, alofa ofoofogia ma lona manatu popole mo fanau uma a le Atua. Ou te tuuina atu la’u molimau i Lana taulaga togiola le mafaatusalia mo oe ma au. Ina ua ou iloa le Faaola, ua ou aoaoina Lona finagalo sili e faaleleia mea, e fesoasoani ia faamalolo manu’a, ma fonofono loto nutimomoia. O nisi nei o mea o loo i ai faatasi ma Ona uiga faaleatua ofoofogia.

Ou te tatalo faamaoni ia i ai faamanuiaga silisili a le Atua i o outou luga, i luga o o outou aiga, i luga o o outou tagata aoga, ina ia outou fesoasoani i na tagata aoga ia atiae le faatuatua ia Iesu Keriso ina ia “aua le masalosalo, ae ia talitonu,” i le suafa o Iesu Keriso, amene.