O Le Fuafuaga o le Olataga ma le Tupulaga Faia’e

Elder Kim B. Clark

O Le Fitugafulu

Faasalalauga mo le Aoaoga Faaletausaga a Seminare ma Inisitituti o Mataupu Faalelotu • 12 Iuni, 2018 • Fale Faafiafia o le Maota Autu mo Konafesi

Ou te faafetai e talanoa atu ia te outou i le asō. Ou te faamamaluina outou uma mo le galuega tele o loo outou faia. Ua outou i ai i le feau a le Alii e fesoasoani i tupulaga faia’e ia loloto le aoaoina o le talalelei a Iesu Keriso. I le mafaufau ai i lena fe’au, ua ou filifili ai e talanoa atu ia te outou i le asō e uiga i le aoaoina atu o le fuafuaga o le faaolataga i na tupulaga talavou ofoofogia.

Na valaauina i tatou uma e Peresitene Nelson ia tutula’i a’e i avanoa silisili e le laumaua ua tuuina mai e le Atua ia i tatou.¹ O se tiute lena mo i tatou faapea foi i le tupulaga faia’e. Ou te iloa e tatau ona tatou faia nisi mea e tele e fesoaoani ai i nei tupulaga talavou faapelepele ia loloto le aoaoina o le fuafuaga a le Tama Faalelagi. E tatau ona latou iloa ma malamalama i ai i o latou mafaufau ma i o latou loto; e tatau ona latou fiafia i ai ma ola ai; ma e tatau ona avea ma tagata na muai faauuina i latou e le Tama ia avea ai. I le malosiaga o le Alii ma faatasi ai ma le mana o le Agaga Paia, e mafai ai ona tatou faia lenei galuega tele. Ou te iloa e moni lena mea.

E tele tausaga ua mavae, sa ou faamisiona ai i Siamani. O aso na, sa matou faaaogaina laupapa ie mamoe, ma ni nai li’o lapotopoto e ‘oti’oti e aoao atu ai le fuafuaga o le faaolataga. O li’o e faatusa i le lalolagi o le muai olaga, olaga faitino, ma le lalolagi o agaga, ma tikeri e tolu o le mamalu. Afai e sa’o lo’u manatua, o le veli o le galo o mea, o se laina faagalugalu, ma o le Aso o le Faamasinoga o se tafafā umi. E le o toe faaaogaina nei e faifeautalai ia ni laupapa ie mamoe, ae talitonu mai, o loo ola foi nai tama’i li’o lapotopoto.

O se faataitaiga lenei mai le lesona seminare a le Tusi a Mamona i le fuafuaga o le faaolataga.²

ata o le faaolataga

I le taimi nei, ou te iloa e fesoasoani tele le ata tusi i tamaiti a’oga, ma o le lesona o se aotelega matagofie o vaega autu o le fuafuaga a le Tama.

Peitai, ou te popole e uiga i li’o lapotopoto, ma ua i ai ni valaaulia se lua mo outou a o outou aoaoina atu le fuafuaga o le faaolataga.

Muamua, faamolemole ia puipuia tamaiti mai le mafaufau faapea o le ata tusi o le fuafuaga lea. E le o le fuafuaga lena, ae e faigofie tele i tagata aoga ona mafaufau faapea afai e sa’o le mea e tuu ai li’o, ua mafai ona latou malamalama i le fuafuaga.

Lona lua, faamolemole fesoasoani i le fuafuaga ina ia ola ma tino i o latou mafaufau ma loto. Fesoasoani ia latou iloa ma fiafia i le fuafuaga a le Tama. Ia, ou te talitonu o le auala e fai ai lena mea o le avatu o i latou i le lualoto o le fuafuaga.

I lena agaga, ua ou filifili ai e faamamafa atu ni mataupu faavae se tolu i le fuafuaga a le Tama ia ua ou talitonu o le a fesoasoani i le tupulaga faia’e e iloa ai, fiafia ma ola ai i lena fuafuaga mamalu.

Mataupu Faavae #1: O Iesu Keriso o le Ala, o le Upumoni ma le Ola

Ia, o le mataupu faavae numera tasi: o Iesu Keriso o le ala, o le upumoni ma le ola.³ O le Alii ma le Faaola o Iesu Keriso o loo i ai i le totonugalemu o le fuafuaga o le faaolataga. O Lana taulaga togiola ua mafai ai mea uma i le fuafuaga a le Tama. Faafofoga i upu a Alema a o Ia faamatalatalaina le mea na faia e le Faaola mo i tatou: “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; …

“Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma … o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, … e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga. …

“E mafatia le Alo o le Atua e tusa ai ma la le tino, ina ia mafai ona ia ave i ona luga agasala a ona tagata, ina ia mafai ona ia soloi ese a latou solitulafono e tusa ai ma le mana o lana laveaiga.”⁴

Ou te fiafia lava i nei fuaiupu. O i, i se gagana matagofie, ua faataoto mai ai e Alema le matafaioi totonugalemu o le Togiola a Iesu Keriso i le fuafuaga o le olataga. O le Toetutu lea, ua saunia mo tagata uma. O le faamagaloga lea ma le laveaiga mai agasala mo i latou e salamo. O le alofa lea o Iesu Keriso a o Ia faamaloloina si’i a’e ma faamalolosia i tatou i la tatou malaga i le olaga nei. O le mana lea o Iesu Keriso e laveai ai i tatou mai le oti ma le agasala, ma talaia ai mo i tatou faamanuiaga o le faaeaga ma le ola faavavau.

Ou te manao i o tatou tagata aoga ia iloa ma malamalama i le totonugalemu a’ia’i o Iesu Keriso i le fuafuaga a le Tama ma i o latou olaga. Ona o Lana taulaga togiola, ua suluia uma ai foafoaga a le Atua i Lona malamalama.⁵ E moni lava, ua i ai o Ia “i mea uma ma ala mai i mea uma, o le malamalama o le upu moni.”⁶ E tuuina mai e lena malamalama le ola i mea uma ma tauaveina “le tulafono e pulea ai mea uma.”⁷ Mafaufau i lena mea! O mea uma i le atulaulau a le Atua, o aniva aupito tetele o loo i ai le fiasealu o piliona o fetu, o patikale aupito iti o se mea, o o tatou tino faitino, o o tatou agaga ola pea, ma lo tatou alualu i luma e faavavau e pulea uma e se tulafono faalelagi e ala i le alofa o lo tatou Tama Faalelagi ma le Togiola ofoofogia a le Alii o Iesu Keriso.

O le Togiola a Iesu Keriso e laugatasia ai le atulaulau i ona aafiaga maotua, ae e matuai patino lava. E moni lava, o le alofa, ma le alofamutimutivale, ma le mana o lo tatou Faaola e faamanuiaina ai taitoatasi o tatou tamaiti a’oga. Ua aoao mai i tatou e tusitusiga paia e faapea sa puapuagatia Iesu i tiga uma, o faanoanoaga, ma mafatiaga e feagai ma o tatou tagata aoga i o latou olaga faitino.⁸ Na Ia tauaveina i Ona lava luga ia agasala a tagata uma ina ia mafai ona latou salamo.⁹ E silafia lelei ma le atoatoa e Iesu o tatou tagata aoga. Na te silafia o latou ala aua ua uma ona Ia savalia na ala.

E mafai ona latou liliu atu ia te Ia, faatuatua ia te Ia, salamo ia latou agasala, ma mulimuli ia te Ia ma le mautinoa ma talitonu ua Ia silafia le ala. Ua na o Ia moni lava le ala i mea e sili ona taua ia i latou.¹⁰ O Ia o le ala i le faamagaloga ma le faamalologa ofoofogia. O Ia o le ala i le olioli tumau. O Ia o le ala i le mafutaga ma le Agaga Paia, ma i le malosiaga faalelagi, faamafanafanaga, faaaliga, malamalama, ma le mana i o latou olaga. O Ia o le ala i le lototele ma le onosai, ma uiga paia uma faaleatua. O Ia o le ala i le alofa mama ma le atoatoa, ma i le filemu e leai se tasi e malamalama i ai. O Ia o le ala i sootaga o le alofa ma le auaunaga lea e aumaia ai se lagona loloto patino ua ausia, e taua, ma le faamoemoega i o latou olaga i le taimi nei ma le faavavau. O Ia o le ala i le faaeaga ma le ola e faavavau faatasi ma le Tama Faalelagi ma o latou aiga. “Ou uso e ma tuafafine pele, faamolemole ia aoao atu o tatou tagata aoga e faapea “o mea lelei uma [e mai ia Iesu] Keriso.¹¹ O Ia o mea uma ia te i latou.

Mataupu Faavae #2: O Atalii ma Afafine o le Atua e I Ai o Latou Faasinomaga ma Faamoemoega e Faavavau

O tagata aoga taitoatasi e i ai sona faasinomaga ma se faamoemoega e faavavau. O i latou taitoatasi “o se atalii po o se afafine agaga faapelepele o ni matua faalelagi, ma, o lea ua tofu ai ma se natura paia ma se taunuuga.”¹²

O le fuafuaga a le Tama Faalelagi ua mamanuina e fesoasoani ai i o tatou tagata aoga uma e faataunuu lo latou faasinomaga ma le faamoemoega e faavavau e ala i le alofa mutimutivale ma le alofa tunoa o le Alii o Iesu Keriso. Ou te fia manao e faamamafa atu le tafatolu o lo latou faasinomaga e faavavau lea ua ou lagona e taua tele mo i latou ona malamalama ai.

Ou te amata atu i le mea moni faapea o o tatou tagata aoga o ni fanau agaga a le Atua. Faamolemole fesoasoani ia i latou ia iloa ma lagonaina o Ia moni lava o lo latou Tama oi le Lagi. E ala i Lona Alo Pele, ua faamanuiaina ai e le Tama Faalelagi o tatou tagata aoga i le avanoa ma le gafatia e aoao loloto ai i Lana fuafuaga e faavavau---ia faatupula’ia i le poto ma le malamalama, ia maua le gafatia mo faatinoga mataalia amiotonu, ma ia avea ai e faapei o Ia. O le faamoemoega taualuga lea o lenei itu aupito taua o lo latou faasinomaga e faavavau.¹³

O se vaega taua lona lua o le faasinomaga e faavavau o o tatou tagata aoga o le avea ai o se tina, po o se tama, se tane po o se ava, i se aiga e faavavau.¹⁴ O le faaipoipoga i le va o se alii ma se tamaitai ua faauuina e le Atua aua o le natura lena o le ola e faavavau.¹⁵ I le vaaiga e faavavau a lo tatou Tama o i le Lagi, o o tatou tagata aoao o ni tina ma ni tama i Lona Malo. O lo latou faasinomaga e faavavau lena, ma o Lana fuafuaga foi lena. O le mea lea, o lo latou faamoemoega e faavavau, o le fatufatuina o se faaipoipoga faaselesitila ma se aiga e faavavau.

Ma le mea mulimuli, e manaomia e o tatou tagata aoga ona iloa o i latou o fanau a Aperaamo, o le nuu o le feagaiga a le Alii. Sa folafola atu e le Atua ia Aperaamo e faapea o ana fanau o le a aveina atu le talalelei a Iesu Keriso ma le perisitua paia (e aofia ai sauniga o le olataga) i atunuu uma e manuia ai aiga o le lalolagi i itu uma e lua o le veli.¹⁶ O le faapotopotoina lenei o Isaraelu na faataapeapeina ma o se vaega taua o le fuafuaga a le Tama.¹⁷ O o tatou tagata aoga o fanau a Aperaamo, ma o lo latou faamoemoega e faavavau o le faia lea o le galuega a le Atua o ni Ana auauna faatuatuaina. E i ai so latou nofoaga taua, o se matafaioi taua, i le fuafuaga a le Tama.

Ia, tuu au mea na e fai mo sina minute ae mafaufau e uiga i faamanuiaga maoae, moni ma le ofoofogia e finagalo le Tama Faalelagi e aumai i o tatou tagata aoga. Ae, atonu o loo taumanatunatu nisi o o tatou tagata aoga pe i ai se faasinomaga ma se faamoemoega faapea o le Atua mo i latou. Atonu e manatu nisi o le avea ai e faapei o le Tama Faalelagi, galue o Sana auauna faatuatuaina, pe o le faamauina i se soa faavavau ma pele ma fai ni fanau atonu e le taitai ona oo i ai. Pe a latou vaavaai atu i le faaata, atonu latou te le iloa atu le mea lea ua ou faamalamalama atu i le aso. Afai o lagona na o nisi o a outou tagata aoga, faamolemole fautuaina i tatou e toe tilotilo i ai. Ta’u atu ia i latou e tilotilo i le faaata i mata o le faatuatua ma latou vaai atu e le gata i o latou lava foliga ae faapea foi fofoga o le Alii o Iesu Keriso i o latou autafa faatasi ai ma le mana ma le mamalu ma le alofa atoatoa e le uma. E le’i afio mai o Ia ia le faitaulia i latou i Ana faamanuiaga.¹⁸

Mataupu Faavae #3: O Mea Uma Ua Tuu i ai e Iesu Keriso Lona Suafa o Vaega ia o le Fuafuaga

O Iesu Keriso ua le gata o le totonugalemu o le fuafuaga a le Tama, ae o Lona suafa foi, Lona Mana, Lana galuega, ma Ona uiga ua matauina i le fuafuaga atoa. Ou te fia manao i o tatou tagata aoga ia iloa ma malamalama o mea uma ua tuu i ai e le Alii o Iesu Keriso Lona suafa o vaega na o le fuafuaga a le Tama.

Ia, mafaufau mo sina minute po o a na mea. O fea ua tuu i ai e le Faaola Lona Suafa? O se lisi lea o na mea o loo tauaveina le suafa o Iesu Keriso lea ua ou talitonu e sili ona taua mo o tatou tagata aoga ia iloa ma malamalama i ai:

• O Le Ekalesia a Iesu Keriso o le Au Paia o Aso e Gata Ai: O le igoa o le Ekalesia o se molimau lea sa faia ma o loo taitaia e le Alii o Iesu Keriso; o Lana Ekalesia lava lea.¹⁹ O le Ekalesia o le malo o le Atua i le lalolagi. E ala mai i le Ekalesia, o loo lagolagoina ai e le Alii ma le Faaola ia tagata taitoatasi ma aiga i la latou sa’iliga mo le ola e faavavau ma sauniuni ai le lalolagi mo Lona Afio Mai Faalua. O le Ekalesia—o le ekalesia moni ma ola a le Alii—o se vaega taua o le fuafuaga a le Tama mo le olataga o Ana fanau.

• O le Perisitua Paia, e tusa ma le Faatulagaga a le Alo o le Atua: O le perisitua paia o le mana ma le pule a le Atua. Ua tuuina mai i le tagata ina ia mafai ai e le Au Paia o Aso e Gata Ai ona faia le galuega a le Alii i Lana pule ma i Lona mana. E ala mai i lena mana ma le pule tatou te maua ai ia sauniga o le olataga ma maua ai faamanuiaga sili o le fuafuaga mamalu a le Tama.²⁰

• O le Maota o le Alii: Ua tatou ola i se taimi o le fausiaina o le tele o malumalu i le salafa o le lalolagi. Ua tatou olioli aua ua faia e le Alii ia mafai e le anoanoai o Ana fanau faamaoni ona maua o latou faamanuiaga o le malumalu, e aofia ai le faamauina o aiga e faavavau, i itu uma e lua o le veli. O sauniga o le Maota o le Alii e fesootai atu ai i tatou i mana faaleatua; e tatau mo le fuafuaga o le fiafia a le Tama mo Ana fanau.²¹

• O le perofeta a le Alii: I le ta’ua ai o Lana perofeta, sa fetalai ai le Alii: “O lana upu o le a outou talia, e pei lava o loo alu atu mai ia te a’u.”²² O le perofeta a le Alii o se tagatavaai ma se talifaaaliga. “O ana upu o afioga ia a le Alii mo i tatou, e mo o tatou faamanuiaga i lenei olaga, ma lo tatou faaeaga ma le ola e faavavau i le olaga a sau. O le perofeta a le Alii o se vaega ofoofogia o le fuafuaga a le Tama.

• O Le Tusi a Mamona: O Se Tasi Molimau ia Iesu Keriso: O Le Tusi a Mamona o se molimau faapea o le Alii o Iesu Keriso o le Faaola ma le Togiola, o Iosefa Samita o le perofeta o le Toefuataiga, ma ua faatuina e le Alii Lana Ekalesia i nei aso e gata ai. O loo i ai foi aoaoga matagofie e uiga i le fuafuaga a le Tama, lea o loo tuuina mai ai se molimau mamana.²³ O nei mafuaaga uma ua avea ai le Tusi a Mamona o se vaega taua o le fuafuaga sili o le olataga.

• O fanau a le Tama Faalelagi: Ua tuu e Iesu Keriso Lona suafa i fanau a le Tama Faalelagi o e osia ma tausia feagaiga paia. Ua ia tuuina Lona suafa i ou luga o le faiaoga, a’o e auai i le malumalu.²⁴ Ua Ia faamoemoe e tuu Lona suafa i luga o au tagata aoga, ma luga o molimau o le a latou tuuina atu i le lalolagi a o latou auai ai i le faapotopotoina o Isaraelu.²⁵ O le fuafuaga lenei a le Tama.

Ia, o mea uma ua matou ta’ua ii---ma le tele o isi e mafai ona tatou faaigoaina, e pei o maota tapuai uma i le lalolagi ma a tatou tatalo i le Tama Faalelagi---o mea ia ua tuu i ai e Iesu Keriso Lona suafa. O vaega ia o le fuafuaga ma le faataunuuga o le valoaga. E pei ona saunoa le Aposetolo o Paulo i aso ua leva: “I le tisipenisione o le atoaga o taimi o le a faapotopotoina [e le Tama] ia tasi mea uma ia Keriso o i latou uma lava o i le lagi, atoa ma i latou o i le lalolagi; ia te ia lava.”²⁶

Uso e ma tuafafine, faamolemole fesoasoani i o tatou tagata aoga ia iloa o nei mea ua latou masani lelei ai—le Ekalesia, le perisitua, le malumalu, le perofeta, le Tusi a Mamona, o i latou lava---ua latou tauaveina uma le suafa o le Faaola aua ua i ai na mea uma iinei ina ia aumaia ai i tatou ia Iesu Keriso o le ala i le filemu i lenei olaga ma le faaeaga ma le ola e faavavau i le lalolagi a sau.

Ia, o le a ou faaiu atu i le aso i se mafaufauga e uiga i le matafaioi o le fuafuaga a le Tama i olaga i aso faisoo o o tatou tagata aoao. O le mafaufauga e aumai i le saunoaga a le Tupu o Peniamina i lona nuu. I le amataga lava o ana upu, na ia faapea ai, “Ia outou faalogo mai ia te au, ma tatala mai o outou taliga ina ia mafai ona outou lagona mai, ma o outou loto ina ia mafai ona outou malamalama, ma o outou mafaufau ina ia mafai ona tatalaina o mealilo a le Atua i la outou vaai.”²⁷

Ou te fiafia i le fasifuaitau “ina ia mafai ona tatalaina o mealilo a le Atua i la outou vaai,” ma ou te manao e faaaoga i o tatou tagata aoga. Ia, ua faamanino mai e le Tupu o Peniamina e faapea o “mealilo a le ‘Atua” ua ia faamoemoe e tatala mai i le vaai a lona nuu o elemene e tatau ai o le fuafuaga sili o le olataga a le Tama. Mo o tatou faamoemoega, o le saunoaga a le Tupu o Peniamina e lua ona faauigaga. Muamua, o lona uiga afai e tatala ia loto ma mafaufau o o tatou tagata aoga, ma tatou te aoao atu i le Agaga, o le a vaai ma malamalama o tatou tagata aoga i le fuafuaga. Ae e i ai se isi uiga. Afai latou te malamalama i le fuafuaga i o latou loto, o le a avea le fuafuaga ma ala latou te vaai ai ia i latou lava ma le lalolagi o loo siomia ai i latou. O le a avea le fuafuaga ma a latou vaaiga. O le a vaai o tatou tagata aoga i le fuafuaga, ma o le a fesoasoani le fuafuaga ia i latou e vaai ai.

E mafai faapefea e o tatou tagata aoga ona vaai moni i le fuafuaga? O a tatou vasega o se vaega taua o lena faagasologa, ma ua tele mea ua faia e le Tama Faalelagi e tatala mai ai Lana fuafuaga i la latou vaaiga. Faamolemole aoao atu o tatou tagata aoga ina ia mafai ona latou iloa atu le fuafuaga.

• I le fanau mai o se pepe, ma o taimi uma e oti ai se tasi.²⁸

• I le malumalu, i sauniga mo e ua maliliu.²⁹

• I le sauniga o le faamanatuga i le aso Sapati.³⁰

• I le salamo, a o latou tatalo atu i le Tama Faalelagi mo se faamagaloga i le suafa o Iesu Keriso.³¹

• I le Tusi a Mamona, lena molimau mamana ia Iesu Keriso.³²

• I le vaaia, faalogologo i, ma le mulimuli i le Perofeta a le Atua.³³

• I faamanuiaga faaleperisitua.³⁴

• I le seminare ma le inisitituti lea latou te lagonaina ai le alofa o Keriso, Lona malamalama ma Lona mana.³⁵

• O taimi taitasi latou te tatalo ai i le Tama i le suafa o Iesu Keriso.³⁶

Faamolemole fesoasoani i o tatou tagata aoga ia iloa ma lagonaina lenei upumoni matagofie, pe a latou vaai i nei mea, ua latou vaai i le fuafuaga a le Tama i lona faatinoga. Afai e tatala o latou loto, o le a molimau atu le Agaga Paia ia i latou e moni le fuafuaga o le olataga ma e mo i latou.³⁷ A o tuputupu ae lo latou faatuatua ia Iesu Keriso ma lo latou malamalama, o le a avea le fuafuaga ma a latou vaaiga i le olaga ma i latou lava. O le a latou vaai ia i latou lava i le fuafuaga, ma o le a amata ona latou vaai atu i le lalolagi o loo siomia ai i latou e faapei ona silasila i ai le Alii.

O le a avea le fuafuaga ma auivi latou te faaaogaina e malamalama ai i faaletonu ma faafitauli ma luitau latou te fetaiai. O le mea moni, o le mea tonu lava lea tatou te aoao atu i le Pepa Autu o le Atamai i Aoaoga Faavae. Ou te sii maia se upusii: “Ina ia iloiloina manatu faaleaoaoga faavae, fesili, ma tulaga faaagafesootai ma se vaaiga e faavavau, tatou te mafaufau i ai o ni tusiga o le fuafuaga o le faaolataga ma aoaoga a le Faaola. … O lenei mea e faatagaina ai i tatou e toe faatulaga le fesili … ma vaai i manatu e tusa ai ma le tulaga faatonuina o le upumoni a le Alii nai lo le taliaina o manatu ma masalosaloga a le lalolagi.”³⁸

Afai e mulimuli o tatou tagata aoga i lenei mamanu, o le a avea le fuafuaga o le olataga ma ala latou te malamalama ai ia i latou lava ma o latou tiutetauave ma avanoa ma faamanuiaga. O le ala lea o le a latou iloa ai faauigaga ma faamoemoega i o latou olaga. Faatasi ai ma le Agaga Paia e taialaina ma aoaoina i latou, o le a latou maua le mea e pei ona ta’ua e Paulo “o le mafaufau o Keriso.”³⁹

O’u uso e ma tuafafine pele, ou te tatalo o le a i ai i o outou loto le fuafuaga a le Tama, o le a outou vaai ia te outou lava i le fuafuaga, ma o le a avea le fuafuaga ma auala tou te vaai atu ai i le lalolagi.⁴⁰ Ou te tuuina atu la’u molimau e moni le fuafuaga a le Tama. O loo soifua le Atua lo tatou Tama. O Iesu o le Keriso, o lo tatou Faaola ma le Togiola. Ou te iloa o loo soifua o Ia. O Lana Ekalesia lenei. Ua outou i ai i Lana feau, e aoao atu le fuafuaga a le Tama i le tupulaga faia’e e ala i le mana o le Agaga Paia. Ou te molimau atu ai i le suafa o Iesu Keriso, amene.

© 2018 Puletaofia e le Intellectual Reserve, Inc. Ua taofia aia tatau uma. Faamaonia le faaperetania: 3/18 Faamaonia le faaliliuga: 3/18 Faaliliuga o le “The Plan of Salvation and the Rising Generation.” Samoan. PD60006246 890

Faamatalaga

1. Tagai i le Russell M. Nelson, “Auauna Atu i le Mana ma le Pule a le Atua,” Liahona, Me 2018, 68–75.

2. Tusi a Mamona Tusi Lesona a le Faiaoga o le Seminare [Church Educational System manual, 2017], 17.

3. Tagai Ioane 14:6.

4. Alema 7:11–13.

5. Tagai Mataupu Faavae ma Feagaiga 88:7–13.

6. Mataupu Faavae ma Feagaiga 88:6.

7. Mataupu Faavae ma Feagaiga 88:13.

8. Tagai Isaia 53:4; 2 Nifae 9:21; Mosaea 3:7; Alema 7:11–13; Mataupu Faavae ma Feagaiga 18:11.

9. Tagai 2 Nifae 2:7, 9; Alema 34:15–16; Mataupu Faavae ma Feagaiga 19:16.

10. Tagai Ioane 14:6; Mosaea 3:17; Alema 38:9; Helamana 5:9.

11. Tagai Moronae 7:24.

12. “O Le Aiga: O Se Folafolaga i le Lalolagi,”Liahona, Me 2017, 145.

13. O o latou aafiaga i le olaga faitino o se avanoa e tuputupu ae ai ma aoaoina. O se tofotofoga o lo latou faatuatua ia Iesu Keriso, “e vaai pe latou te faia mea uma o soo se mea e poloaiina ai i latou e le Alii lo latou Atua” (Aperaamo 3:25) i le lotolotoi o faaosoosoga, tofotofoga, ma luitau o le olaga faitino. E ala i le mana togiola ma le faamalosiau o Iesu Keriso, e mafai ai ona latou faatoilaloina le tagata natura, tuputupu ae i le poto ma le malamalama, auauna atu ma usiusitai, maua le olioli ma le fiafia, ma avea atili ai e faapei o le Tama ma le Alo.

14. Tagai “O Le Aiga: O Se Folafolaga i le Lalolagi,” 145.

15. “O Le Aiga: O Se Folafolaga i le Lalolagi” ua ta’ua manino ai e faapea o tagata soifua taitoatasi o se “atalii po o se afafine agaga a ni matua faalelagi.” O le ola e faavavau o le soifuaga lea o loo soifua ai le Tama Faalelagi, ma o se soifuaga e faaipoipo.

16. Tagai Kenese 17:9; Aperaamo 2:8–11.

17. E pei ona sa aoao atu le Alii ia Aperaamo, o se vaega taua lenei o le fuafuaga o le olataga: “O le a avea oe ma se faamanuiaga i au fanau e mulimuli mai pe a mavae atu oe, ina ia latou tauaveina i latou lima lenei auaunaga ma le Perisitua i atunuu uma; … ma i au fanau … o le a manuia ai aiga uma o le lalolagi, i faamanuiaga lava o le Talalelei, o faamanuiaga ia o le olataga, o le ola faavavau lava” (Aperaamo 2:9, 11). Na faasalalauina e le Alii le fanau a Aperaamo “i luga o le lalolagi atoa, ma i totonu foi o atunuu uma” (1 Nifae 22:3), ma sa Ia folafola atu e faapea “o tagata uma o e o le aiga o Isaraelu o le a Ou faapotopoto mai … mai i itu e fa o le lalolagi” (1 Nifae 19:16). O le faataunuuga taualuga o le feagaiga faa-Aperaamo ma le faapotopotoina o Isaraelu sa faataapeapeina o se galuega i aso nei e gata ai. O o tatou taimi ia “le toe vaega o le aiga o Isaraelu, o le a … o mai ai i le malamalama o le Mesia moni, lo latou Alii ma lo latou Togiola” (1 Nifae 10:14).

18. Tusa lava pe foliga mai e mamao nei faamanuiaga o le faasinomaga ma le faamoemoega i nisi o au tagata aoga, ae e le faaitiitia le moni. Mo se faataitaiga, i le fuafuaga o le faavavau a le Atua, o le tofu i latou uma taitoatasi ma se soa e faavavau, pe afai latou te faamaoni. Ma o le a tofu foi i latou uma taitoatasi ma fanau o le a faamanuiaina ai o latou olaga, pe o iinei i le olaga faitino po o le lalolagi a sau. O o tatou tagata aoga uma lava o ni tane ma ni ava, o ni tina ma ni tama i le fuafuaga e faavavau a le Atua. O o latou tagata moni lava na.

19. Tagai Mataupu Faavae ma Feagaiga 1:30; 115:4.

20. Tagai Mataupu Faavae ma Feagaiga 84:19-22.

21. Tagai Mataupu Faavae ma Feagaiga 84:21.

22. Mataupu Faavae ma Feagaiga 21:5.

23. 2 Nifae 9:6–22 o se faataitaiga matagofie lea o se faamatalaga o le fuafuaga ma se molimau o lona moni. Tagai foi Alema 41 ma le 42.

24. Tagai Mosaea 1:11; 5:7–12; Mataupu Faavae ma Feagaiga 109:26.

25. Tagai Mataupu Faavae ma Feagaiga 1:20–23. Manatua ua uma ona osifeagaiga au tagata aoga ua loto e tauave i o latou lava luga le suafa o Iesu Keriso.

26. Efeso 1:10.

27. Mosaea 2:9.

28. Tagai Mose 6:57–62.

29. Tagai Mataupu Faavae ma Feagaiga 128, aemaise o fuaiupu 11–18.

30. Tagai Mataupu Faavae ma Feagaiga 20:75–79; tagai foi Mataupu Faavae ma Feagaiga 59, aemaise o fuaiupu 2, 8–9, 21–24.

31. Tagai Mataupu Faavae ma Feagaiga 20:17–29.

32. Tagai Tusi a Mamona, itulau faaulutala; 2 Nifae 25:18; 3 Nifae 9; 11; Mataupu Faavae ma Feagaiga 1:29; 20:8–9.

33. Tagai Efeso 4:11–15; Mataupu Faavae ma Feagaiga 21:1–6; 84:36–38.

34. Tagai Mataupu Faavae ma Feagaiga 42:44–46.

35. Tagai 1 Korinito 2; Alema 5:7; 3 Nifae 18:24–25.

36. Tagai 3 Nifae 18:18–21; Mataupu Faavae ma Feagaiga 45:1–5.

37. O se tasi lenei o tofiga e sili ona taua a le Agaga Paia: O Ia o se molimau i le Tama ma le Alo, ma faapea ai foi ma le fuafuaga sili o le olataga. Tagai 3 Nifae 11:32; 28:11; Mose 1:24.

38. Doctrinal Mastery Core Document [Church Educational System manual, 2018], 4.

39. 1 Korinito 2:16.

40. I le 1993 sa saunoa ai Peresitene Boyd K. Packer i faiaoga Seminare ma le Inisitituti o Mataupu Faalelotu. I lena saunoaga, sa ia ta’ua ai, “E i ai sa’u tofiga mo outou. Sa outou faamoemoeina lena mea, a ea? Ua tofia outou e saunia se aotelega puupuu po o se vaaiga aoao o le fuafuaga o le fiafia---le ata o le faaolataga. Ia mamanuina o se auivi e mafai e au tagata aoga ona faatulagaina ia upumoni o le a e faasoa atu ia i latou. Muamua atonu tou te manatu o se galuega faigofie. Ou te faamautinoa atu ia te outou, e leai. O le faapupuuina ma le faafaigofieina e matua faigata lava ona ausia. O le taimi muamua o le a faaosoosoina oe e soona faaaofia ai le mau mea. O le fuafuaga i lona atoatoaga e aofia ai upumoni um o le talalelei. … Atonu o le mea aupito faigata lea, ma e mautinoa lava o se tofitofiga po o se galuega aupito tauia o lau matata faafaiaoga” (Boyd K. Packer, “The Great Plan of Happiness” [address given at the Church Educational System Symposium, Aug. 10, 1993], 3).