Auauna Atu i le Mana ma le Pule a le Atua
O le a tatou auauna atu i Lona suafa, i Lona mana ma le pule, ma i Lona agalelei alofa.
Ou uso pele, faafetai atu mo lo outou tuuto i le Alii ma Lana galuega paia. O se fiafiaga le faatasi ai ma outou. I le avea ai ma se Au Peresitene Sili fou, matou te faafetai atu mo a outou tatalo ma mo a outou taumafaiga lagolagosua. Matou te faafetai atu mo o outou olaga ma mo la outou auaunaga i le Alii. O lo outou tuuto atu i tiute ma auaunaga le manatu faapito ua matua taua i o outou valaauga e pei o i matou foi ma o matou valaauga. E ala i auaunaga i le olaga atoa i lenei Ekalesia, ua ou iloa ai e le afaina lava poo fea e auauna ai se tasi. O le mea e sili ona taua i le Alii o le auala e auauna atu ai se tasi.
Ou te faailoa atu le lotofaafetai loloto mo Peresitene Thomas S. Monson, o le sa avea ma se faataitaiga ia te a’u mo le silia ma le 50 tausaga. Ma mo ona fesoasoani, Peresitene Henry B. Eyring ma Peresitene Dieter F. Uchtdorf, ou te faailoa atu le faamemelo loloto. Ou te faamalo atu ia i la’ua mo le la auaunaga i le Alii ma Ana perofeta. O nei auauna tuuto uma e toalua ua mauaina ni tofiga fou. O loo faaauau pea ona la auauna atu ma le malosi ma le tuuto. Ou te faamamalu ma alofa ia i laua uma.
O se faamanuiaga ofoofogia le auauna ai i le Ekalesia moni ma le ola a le Alii faatasi ma Lana pule ma le mana. O le toefuataiga o le perisitua a le Atua, e aofia ai ki o le perisitua, ua matala atu ai i tagata agavaa o le Au Paia o Aso e Gata Ai ia faamanuiaga faaleagaga aupito silisili o faamanuiaga uma. Ua tatou vaai i na faamanuiaga o loo tafe atu i tamaitai, alii, ma fanau i le lalolagi atoa.
Ua tatou vaai i tamaitai faatuatua o e malamalama i le mana o loo i ai i o latou valaauga ma i faaeega paia ma isi sauniga o le malumalu. Ua iloa e nei tamaitai le auala e valaau atu ai i mana o le lagi e puipui ma faamalolosia a latou tane, fanau, ma isi latou te alolofa i ai. O tamaitai malolosi faaleagaga nei o loo taitai, aoao atu, ma auauna atu ma le le fefefe i o latou valaauga faatasi ma le mana ma le pule a le Atua! Ou te faafetai mo i latou!
E faapena foi, ua tatou vaai i alii o loo ola e tusa ma o latou avanoa i le avea ai ma e umiaina le perisitua. Latou te taitai ma auauna atu e ala i osigataulaga i le ala a le Alii ma le alofa, agalelei, ma le onosai. Latou te faamanuia, taiala, puipui, ma faamalosia isi e ala i le mana o le perisitua latou te umiaina. Latou te aumaia vavega ia i latou o e latou te auauna i ai a o latou tausia ma le saogalemu a latou lava faaipoipoga ma aiga. Latou te teenaina le tiapolo ma o ni toeaiina malolosi i Isaraelu. Ou te faafetai tele mo i latou!
Ia, e mafai ona ou faaleoina atu se popolega? O le mea lenei: E toatele o tatou uso ma tuafafine e le o malamalama atoatoa i le mataupu o le mana ma le pule o le perisitua. Latou te galulue e peisea’i e sili ia i latou le faamalieina o o latou lava manaoga faaloloto ma tuinanau nai lo le faaaogaina o le mana o le Atua e faamanuia ai Ana fanau.
Ou te popole ua toatele o tatou uso ma tuafafine e le o malamalama i avanoa sa ono avea ma a latou. O nisi o o tatou uso, mo se faataitaiga, e galulue e pei latou te le malamalama i le mea e ta’ua o le perisitua ma mea na te faatagaina i latou e fai. Sei ou tuuina atu nisi o faataitaiga patino.
E lei leva atu, sa ou auai ai i se sauniga faamanatuga lea sa ao ona avatu ai se igoa i se pepe fou ma se faamanuiaga faaletama. Sa sapai e le tama talavou lana pepe teine faapelepele i ona lima, tuu atu i ai se igoa, ona fai lea o se tatalo matagofie. Ae na te lei tuu atua i lena pepe se faamanuiaga. Sa maua e lena pepe teine aulelei se igoa ae leai se faamanuiaga! O lena toeaina pele sa ia le iloaina le eseesega i le va o se tatalo ma se faamanuiaga faaleperisitua. I lana pule ma le mana o le perisitua, semanu na te faamanuiaina ai lana pepe, ae sa lei faia e ia. Sa ou mafaufau, “Oka se avanoa ua misia!”
Sei ou ta’ua nisi faataitaiga. Ua matou iloa ni uso latou te vaetofiaina ni tuafafine e avea ma taitai ma faiaoga o le Peraimeri, Tamaitai Talavou, po o le Aualofa ae sa le faamanuiaina i latou i le mana e faataunuu ai o latou valaauga. E na o apoapoaiga lava ma faatonuga latou te tuuina atu. Ua matou vaai i se tamā agavaa na te le tuu atua i lona toalua ma lana fanau ia faamanuiaga faaleperisitua ae o le mea tonu lena o loo latou manaomiaina. Ua toefuatai mai le mana o le perisitua i lenei lalolagi, ae e anoanoai tele uso ma tuafafine e feagai ma tofotofoga matuia i le olaga e aunoa ma le mauaina o se faamanuiaga moni faaleperisitua. Oka se faalavelave ina matautia! O se faalavelave matautia e mafai ona tatou tafiesea.
Uso e, ua tatou umia le perisitua a le Atua! Ua ia i tatou Lana pule e faamanuia ai Lona nuu. Tau ina mafaufau i le faamautinoaga ofoofogia na tuu mai e le Alii ia i tatou ina ua Ia fetalai mai, “O soo se tasi e te faamanuiaina o le a Ou faamanuiaina foi.” O lo tatou avanoa lenei e galulue ai i le suafa o Iesu Keriso e faamanuia fanau a le Atua e tusa ma Lona finagalo mo i latou. Peresitene o siteki ma epikopo, faamolemole ia mautinoa ua malamalama uso uma o korama i totonu o lau taitaiga pe faapefea ona tuu atu se faamanuiaga faaleperisitua—e aofia ai le agavaa o le tagata lava ia ma sauniuniga faaleagaga e manaomia e valaau atoa atu ai i le mana o le Atua.
I uso uma o loo umiaina le perisitua, ou te valaaulia outou ia uunaia tagata o le ekalesia e tausi a latou feagaiga, anapopogi ma tatalo, suesue i tusitusiga paia, tapuai i le malumalu, ma auauna atu i le faatuatua o ni alii ma tamaitai o le Atua. E mafai ona tatou fesoasoani i tagata uma ia vaai i le mata o le faatuatua e faapea, o le usiusitai ma le amiotonu o le a latou latalata atili atu ai ia Iesu Keriso, ma faatagaina ai i latou e olioli i le mafutaga a le Agaga Paia, ma lagonaina le olioli i le olaga!
O se faailoga o le Ekalesia moni ma le ola a le Alii o le a avea pea ma se taumafaiga faatulagaina ma faatonutonuina e auauna atu i fanau taitoatasi a le Atua ma o latou aiga. Ona o Lana Ekalesia lenei, o i tatou o Ana auauna o le a auauna atu i le tasi, e pei lava ona sa Ia faia. O le a tatou auauna atu i Lona suafa, i Lona mana ma le pule, ma i Lona agalelei alofa.
O so’u aafiaga i le silia ma le 60 tausaga talu ai i Boston sa aoaoina ai a’u i le mamana tele o le avanoa e mafai ona oo i ai le auauna atu taitoatasi-i-le-tasi. O le taimi lena o a’u o se fomai tipitipi sa a’oga i le Falemai Lautele i Massachusetts—sa tiute i aso uma, ma po sa fesuisuiai, ma faaiuga o vaiaso sa fesuisuiai. Sa utiuti se taimi mo lo’u toalua, le ma fanau e toafa, ma gaoioiga a le Ekalesia. Ae ui i lea, sa tofia a’u e lo matou peresitene o le paranesi e asiasi i le aiga o Wilbur ma Leonora Cox ma le faamoemoe e ono toe foi mai Uso Cox ma toe malosi i le Lotu. Sa faamauina i la’ua ma Leonora i le malumalu. Ae, sa le toe auai Wilbur mo le tele o tausaga.
Sa ma o atu ma la’u soa i lo la fale. A o ma ulufale atu, sa faafeiloai ma le agalelei i maua e Tuafafine Cox, ae sa vave ona savali ese atu Uso Cox i le isi potu ma tapuni mai le faitotoa.
Sa ou alu atu i le faitotoa na tapuni mai ma tu’itu’i i ai. Ina ua mavae sina taimi, sa ou faalogo atu i se leo tau le lagona “Sau i totonu.” Sa ou tatalaina le faitotoa ma vaaia ai Uso Cox o saofai i talaane o se faaputuga o masini leitio tuai. I lena tamai potu, sa ia tutuina se sika. Sa manino lava, sa lei talileleia la’u asiasiga.
Sa ou fetilofai solo i le potu ma le maofa ma fai atu, “Uso Cox, sa ou manao i taimi uma e aoao atili e uiga i galuega o leitio tuai. E mafai ona e aoaoina a’u? Faamalie atu e le mafai ona ou nofo umi i lenei po, ae e mafai ona ou toe sau i se isi taimi?”
Sa tau faalotolotolua mo sina taimi, ona fai mai lea ioe. O le amataga lena o le mea na avea ma se faigauo matagofie. Sa ou toe foi atu ma sa ia aoaoina a’u. Sa amata ona ou alofa ma faaaloalo ia te ia. E ala i le soloa’iga o asiasiga, sa alia’e ai le maoae o lenei tamalii. Sa avea i ma’ua ma ni uo lelei tele, sa faapena foi a ma’ua soa e faavavau. I le aluga o taimi, sa masii ese ai lo ma aiga. Sa faaauau pea e taitai i le lotoifale ona faafailele i le aiga o Cox.
Pe tusa ma le valu tausaga talu ona mavae lena asiasiga muamua, sa faatuina ai le Siteki o Boston. E te matea la o ai lona uluai peresitene o le siteki? Ioe! O Uso Cox! I le soloa’iga o na tausaga, sa ia auauna atu foi o se peresitene o se misiona ma se peresitene o se malumalu.
I ni tausaga mulimuli ane, i le avea ai ma se uso o le Korama a le Toasefululua, sa tofia ai a’u e faatu se siteki fou i le itumalo o Sanpete, Iuta. I le taimi o faatalanoaga masani, sa faateia lava a’u ma le fiafia i le toe fetaui ai ma la’u uo pele o Uso Cox. Sa musuia a’u e valaau o ia e avea ma peteriaka fou o le siteki. Ina ua uma ona ou faauuina o ia, sa ma fusi atu i le tasi ma le isi ma fetagisi. Sa tomanatu tagata i totonu o le potu pe aisea na fetagisi ai nei toeaiina e toalua. Ae sa ma iloaina. Ma sa iloa foi e Tuafafine Cox. O o matou loimata o loimata o le olioli! Sa matou manatuaina ma le leleoa le faigamalaga maoae o le alofa ma le salamo lea na amata i le silia ma le 30 tausaga talu ai, i le tasi po i lo la fale.
Sa le’i gata ai iina le tala. Sa tuputupu a’e le aiga o Uso ma Tuafafine Cox ma aofia ai ni fanau e toa 3, fanau a fanau e 20, ma le 54 fanau a fanau a fanau. Faaopoopo atu i lena, o lo la aafiaga i le faitau selau o faifeautalai, le isi faitau afe i totonu o le malumalu, ma le isi faitau selau na mauaina faamanuiaga faapeteriaka i aao o Wilbur Cox.O lana faatosinaga ma le faatosinaga a Leonora o le a faaauau pea ona faatosinaina ai le tele o augatupulaga i le lalolagi atoa.
O aafiaga faapenei e pei o lenei aafiaga ma Wilbur ma Leonora Cox o loo tupu i vaiaso uma—faamoemoe, o aso uma—i totonu o lenei Ekalesia. O loo tauaveina e auauna tuuto a le Alii o Iesu Keriso Lana galuega, i Lona mana ma le pule.
Uso e, o loo i ai faitotoa e mafai ona tatou tatalaina, o faamanuiaga faaleperisitua e mafai ona tatou tuuina atu, o loto e mafai ona tatou faamaloloina, o avega e mafai ona tatou aveesea, o molimau e mafai ona tatou faamalolosia, o olaga e mafai ona tatou laveaia, ma le olioli e mafai ona tatou aumaia i totonu o aiga o le Au Paia o Aso e Gata Ai—ua mafua uma ona ua tatou umia le perisitua a le Atua. O i tatou o alii ua “valaauina ma sauniaina talu mai le faavaega o le lalolagi e tusa ma le muai silafia o le Atua, ona o lo [tatou] faatuatua tele,” e fai lenei galuega.
O le po nei ou te valaaulia moni outou ia tutulai a’e faatasi ma a’u i la tatou usoga tele e faavavau. A ou ta’u atua le igoa o lou tofi o le perisitua, faamolemole ia tutulai mai ma tutu ai pea. Tiakono, faamolemole tula’i mai! Aoao, tula’i mai! Ositaulaga! Epikopo! Toeaina! Faitaulaga sili! Peteriaka! Fitugafulu! Aposetolo!
O lenei, uso e, e mafai ona outou tutu pea ma auai faatasi ma le tatou aufaipese i le usuina o fuaiupu uma e tolu o le “Rise Up, O Men of God”? A o outou pepese ai, mafaufau i lou tiute o le autau malosi a le Atua e fesoasoani e saunia le lalolagi mo le Afio Faalua Mai o le Alii. O lo tatou tiute lenei. O lo tatou avanoa lenei. Ou te molimau atu ai i le suafa o Iesu Keriso, amene.