O Le Korama a Toeaina
O le i ai o se korama e tasi a le Perisitua Mekisateko i se uarota e tuufaatasia e umia le perisitua e faataunuuina ai vaega uma o le galuega o le faaolataga.
E lei leva talu ona faatulaga le Ekalesia i lenei tisipenisione mulimuli, sa ta’ua e le Alii i se faaaliga, “Ma o le tatalo o lo outou faatuatua o le a outou maua ai la’u tulafono, ina ia outou iloa le ala e pulea ai la’u ekalesia ma ina ia sa’o mea uma i o’u luma.” O lenei mataupu faavae na mulimulita’ia i le Ekalesia—ma sa faamamaluina lena folafolaga e le Alii—talu mai lena taimi. Sa faaalia mai ia mamanu o le faalapotopotoga o le perisitua ma le auaunaga mai lea taimi i lea taimi, e amata mai i le Perofeta o Iosefa Samita ina ua faatoa faavae ia tofi ma korama o le perisitua. Sa faaalia mai suiga iloga na toefaaleleia ma sa faatinoina i taimi o nofoaiga a Peresitene Polika Iaga, Ioane Teila, Spencer W.Kimball, ma Ezra Taft Benson e tusa ai ma le Korama a le Toasefululua, o Fitugafulu, faitaulaga sili, ma isi tofi ma korama i le Perisitua Mekisateko ma le Perisitua Arona. O le aso, i se malelega faaletalafaasolopito i ni nai minute talu ai, na fofogaina mai ai e Peresitene Russell M. Nelson se isi fetuunaiga taua.
Pe mafai a na se’i ou toe fai atua lenei malelega: “O le po nei, matou te faasilasila atu ai se toefaatulagaga iloga o a tatou korama o le Perisitua Mekisateko ia atili ai ona mataalia le faataunuuina o le galuega a le Alii. I uarota taitasi, o faitaulaga sili ma toeaina o le a tuufaatasia nei i le korama e tasi a le au toeaina … [ma] o le faatulagaga o le korama a [faitaulaga sili i le siteki] o le a faavae i valaauga faaleperisitua o i ai nei.”
Na faaopoopo mai Peresitene Nelson:
“O nei suiga sa faia ai suesuega mo le tele o masina. Ua matou lagonaina se manaoga tele e faaleleia le ala tatou te tausia ai o tatou tagata. … Ina ia faia lelei lena mea, e manaomia ona tatou faamalolosia a tatou korama o perisitua e avatu ai le taitaiga sili atu i le auaunaga o le alofa ma le lagolago ua faamoemoeina e le Alii mo Lana Au Paia.
“O nei fetuunaiga ua musuia e le Alii. A o tatou faatinoina ai, o le a atili ai ona tatou mataalia nai lo le mea sa tatou i ai muamua.”
I le taitaiga a le Au Peresitene Sili, o le a ma faaopoopoina ai ma Elder Rasband ni nai auiliiliga ua ma talitonu o le a tali atu ai i fesili atonu o loo ia te outou.
Korama a Toeaina ma Faitaulaga Sili
Muamua, ina ia toefaaupu atu, o a fetuunaiga mo vaega a faitaulaga sili ma korama a toeaina? I uarota, o uso o korama a toeaina ma vaega a faitaulaga sili o le a tuufaatasia nei i le korama a le au Perisitua Mekisateko e tasi faatasi ai ma le au peresitene e tasi. O lenei korama, e faateleina le aofai ma le lotogatasi, o le a faaigoa o le “korama a toeaina.” Ua faamutaina nei vaega a faitaulaga sili. O le korama a toeaina e aofia ai toeaina uma ma toeaina faaolioli i le uarota faapea ai ma faitaulaga sili o e e le o auauna atu i le au epikopo i le taimi nei, i le au peresitene o le siteki, i fautua maualuga, po o peteriaka o loo galulue. O le korama a faitaulaga sili o le siteki o le a aofia ai i latou o faitaulaga sili o e o loo auauna atu i le au peresitene o le siteki, i au epikopo, i fautua maualuga, ma peteriaka o loo galulue.
O Le Au Peresitene o le Korama a Toeaina
E faapefea ona faatulaga le au peresitene o le korama a le au toeaina? O le a faamalolo e le au peresitene o le siteki le au taitai vaega o faitaulaga sili ma le au peresitene o le korama a toeaina o i ai nei, ma o le a valaauina se peresitene fou o le korama a toeaina ma fesoasoani i uarota po o paranesi taitasi. O le au peresitene fou o le korama a toeaina e mafai ona aofia ai toeaina ma faitaulaga sili, e eseese le matutua ma le poto masani, e auauna faatasi i le au peresitene e tasi o le korama. A le o se toeaina po o se faitaulaga sili e mafai ona avea ma peresitene o le korama po o se fesoasoani i le au peresitene. O lenei suiga e le o se “puleaina” ai e le aufaitaulaga sili o korama a toeaina. Ua matou faamoemoeina toeaina ma faitaulaga sili e galuue faatasi i soo se tuufaatasiga i le au peresitene o le korama ma i le auaunaga faalekorama. O nei fetuunaiga o korama e tatau ona faatinoina i le vave ma le talafeagai e mafai ai.
O Tofi o le Perisitua i le Korama a Toeaina
Pe o lenei fetuunaiga i le faatulagaga o le korama o le a suia ai le tofi o le perisitua o loo umia e uso o le korama? E leai, o lenei faatinoga e le faaleaogaina ai soo se tofi o le perisitua atonu na faauuina ai soo se tagata o le korama i le taimi ua tuanai. E pei ona outou silafia, atonu e faauuina se alii i tofi eseese o le perisitua i le gasologa o lona soifua, ma e na te le ma’umauina pe faaleaogaina soo se faauuga na muamua fai pe a ia maua se tofi fou. E ui i nisi tulaga e ono galue ai se e umia le perisitua i ni tofi e sili atu i le tasi i se taimi, e pei o se faitaulaga sili e auauna atu o se peteriaka po o se epikopo, e masani lava na te le mafai ona galue i ona tofi uma o le perisitua i le taimi e tasi. O Epikopo ma Fitugafulu, mo se faataitaiga, e le auauna tonu i na tofi pe a oo ina faamalolo i latou pe malolo foi ma le mamalu. O lea, po o le a lava le tofi po o isi tofi o le perisitua e ono umia e se alii, a o avea o ia o se tasi o le korama a toeaina, e auauna atu lava o ia o se toeaina.
I tausaga ua mavae, sa matauina ai e Peresitene Boyd K. Packer faapea “o le perisitua e sili atu nai lo se isi lava o ona tofi. … O le perisitua e le mavavaeeseina. E tutusa lava le perisitua e umia e se toeaina ma se Aposetolo. (Tagai MF&F 20:38.) Pe a [faaee atu le perisitua i luga] o se alii, na te mauaina atoa le [perisitua]. Peitai, e i ai tofi i totonu o le perisitua—o vaega o le pule ma le tiutetauave. …O nisi taimi e ta’ua ai se tasi tofi e ‘maualuga atu nai lo’ pe ‘maualalo ifo nai lo’ se isi tofi. Nai lo le ‘maualuga atu’ po o le ‘maualalo ifo,’ o tofi i le Perisitua Mekisateko e fai ma sui o vaega eseese o le auaunaga.” Ou te faamoemoe lava ma le lotofaamaoni, o le a tatou le toe talanoa i ni faaupuga o le “siitia atu” i se isi tofi i le Perisitua Mekisateko.
O le a faaauau pea ona faauuina ia toeaina e avea ma faitaulaga sili pe a tofia i latou i le au peresitene o le siteki, fautua maualuga, po o le au epikopo—mo isi taimi e fuafuaina ai e le peresitene o le siteki e ala i iloiloga ma le agaga tatalo ma musumusuga.A oo ina ua mae’a o latou taimi o auaunaga i se au peresitene o le siteki, fautua maualuga, po o le au epikopo, ona toe auai lea o faitaulaga sili i le korama a toeaina i a latou uarota.
Faatonuga mo le Peresitene o le Korama a Toeaina
O ai e taitaia le galuega a le peresitene o le korama a toeaina? O le peresitene o le siteki e pulefaamalumalu i le Perisitua Mekisateko i le siteki. O le mea lea, o le peresitene o le korama a toeaina e tali sa’o i le peresitene o le siteki, o le e tuuina atu aoaoga ma le taitaiga mai le au peresitene o le siteki ma ala mai i fautua maualuga. O le epikopo, i le avea ai ma faitaulaga sili pulefaamalumalu i le uarota, e fono foi e le aunoa ma le peresitene o le korama a toeaina. E fefautuaai le epikopo ma ia ma tuuina atu le taitaiga talafeagai e tusa ai ma le ala sili e auauna atu ai ma faamanuia ia tagata o le uarota, e galulue felagolagoma’i ma faalapotopotoga uma a le uarota.
O Le Faamoemoega o Nei Suiga
O a faamoemoega o fetuunaiga i korama o le Perisitua Mekisateko? O le i ai o se korama se tasi o le Perisitua Mekisateko i se uarota e tuufaatasia ai i latou e umia le perisitua e faataunuu vaega uma o le galuega o le faaolataga, e aofia ai ma galuega o le malumalu ma talafaasolopito o aiga ia na faamaopoopoina talu ai e vaega o faitaulaga sili. Na te faatagaina ai tagata o le korama o vaitausaga uma ma talaaga ona manuia mai le vaaiga ma aafiaga o le tasi ma le isi faapea ai ma i latou i tulaga eseese o le olaga. E maua ai foi avanoa faaopoopo mo e umia le perisitua ua i ai le poto masani e faufautua ai i isi, e aofia ai ma toeaina faaolioli, o uso fou, talavou matutua, ma i latou ua toe toaaga mai i le Lotu. E le lava upu e mafai ona ou faamatalaina ai lo’u fiafia i lo’u mafaufau atu i lematafaioi ua faateleina le taua lea o le a faatinoina e korama a toeaina i le lumanai. O le poto, aafiaga, gafatia, ma le malosiaga o le a maua i nei korama ua faailo mai ai se amataga fou ma se faatulagaga fou o le auaunaga faaleperisitua i le Ekalesia atoa.
I le luasefulu tausaga talu ai i se konafesi aoao, sa ou faamatalaina ai se tala na muai ta’ua e Elder Vaughn J. Featherstone o le Fitugafulu ou te talitonu e aoga le toe faamatalaina iinei.
I le 1918, o Uso Siaosi Goates o se faifaatoaga sa totoina le suka piti (sugar beets) i Liae, i Iuta. Na vave oo mai le taumalulu i lena tausaga ma sa liu’aisa ai le tele o ana laau o le piti (beet) i le palapala. Mo Siaosi ma si ona atalii laitiiti o Falanisisi, sa tuai le seleselega ma sa faigata. O le taimi lea na pesi mai ai le fūlū ma sa sasao lava. O lea faama’i oti na maliu ai le atalii o Siaosi o Salesa, ma le fanau laiti e toatolu a Salesa—e toalua teineiti ma se tamaitiiti. I totonu o aso e ono, sa faia ai e Siaosi Goates lotofaavauvau ni malaga eseese se tolu i Ogden, Iuta, e aumai tino i le fale mo le tanuga. I le faaiuga o lenei faasalavei matautia, sa faau ai e Siaosi ma Falanisisi a la taavale solofanua ma agai atu i le togā piti (beet).
“[A o malaga atu] sa la pasia lea taavale toso ma lea taavale toso ma uta o piti (beets) o tosoina agai i le fale gaosi mea, o loo aveina e faifaatoaga o le pitonuu. A o latou fepasia’i, e talotalo mai lava avetaavale taitasi ma se valaau: ‘Malo lava, Uncle George,’ ‘Faamalie atu, Siaosi,’ ‘Leaga tele lena mea Siaosi,’ ‘O le toatele ia o au uo, Siaosi.’
“I le taavale toso mulimuli sa i ai … le mata taelagoa o Jasper Rolfe. Sa ia talotalo mai ma faamalo ma valaau mai: ‘O mea uma ia, Uncle George.’
“Na liliu atu [Uso Goates] ia Falanisisi ma fai i ai: ‘Maimau pe a na o ta mea uma la.’
“Ina ua la taunuu i le faitotoa o le faatoaga, sa oso i lalo Falanisisi mai le taavale toso tele lanu mumu o piti, ma tatala le faitotoa a o tietie atu [lona tama] i le fanua. Sa faalemu e [Siaosi], taofi solofanua, … ma vaavaai atu i le fanua. … Sa leai se suka piti (sugar beet) i le fanua atoa. Ona oo ifo lea ia te ia le uiga o le valaau mai a Jasper Rolfe: ‘O mea uma ia, Uncle George!’
“Sa oso ifo [Siaosi i lalo mai le taavaletoso, piki i luga se lu’uga palapala enaena lafulemu sa ia fiafia tele i ai, ona … tago lea i se tumutumu o se piti, ma sa ia tilotilo i ai mo sina minute i nei faatusa o ana galuega, e peisea’i na te le o talitonuina le mea ua vaai i ai ona mata.
“Ona [ia] saofai ifo lea i luga o se faaputuga o tumutumu piti—o lenei tamaloa sa aumaia ana fanau pele e toafa e tatanu i totonu o aso e ono; sa ia faia pusa maliu, ‘eli tuugamau, ma sa fesoasoani foi e fai ofu e tatanu ai—lenei tamaloa ofoofogia e lei faatali, pe solomuli, pe faalotolotolua i lenei tofotofoga tiga—sa nofo ifo i luga o se faaputuga o tumutumu piti ma tagi masusu ai e pei o se tamaitiiti.
“Ona ia tu lea i luga, soloi ona mata, … tilotilo a’e i le lagi, ma fai mai: ‘Faafetai, Tama, mo toeaina o la matou uarota.’”
Ioe, faafetai i le Atua mo alii o le perisitua ma mo le auaunaga o le a latou tuuina atu e auauna atu ai i tagata taitoatasi ma aiga ma i le faatuina o Siona.
Ua fuafuaina e le Au Peresitene Sili, le Korama a Aposetolo e Toasefululua, ma le Au Peresitene o Fitugafulu nei fetuunaiga i se vaitau faaumiumi. Faatasi ai ma le tele o tatalo, suesuega toto’a o faavae faaletusi paia o korama o le perisitua, ma le faamautuuga o le finagalo lea o le Alii, ua tatou agai atu ai nei i luma ma le finagalo autasi i le mea ua moni, o se tasi lea laasaga i le tupuolaola o le Toefuataiga. Ua faaalia le taitaiga a le Alii, ma ua ou olioli ai, a o ou molimau atu e uiga ia te Ia, o Lana perisitua, ma o outou faauuga i lena perisitua, i le suafa o Iesu Keriso, amene.