O Mea e Ao ia i Latou Uma e Umia le Perisitua Arona ona Malamalama Ai

Saunia e Douglas D. Holmes

Fesoasoani Muamua i le Au Peresitene Aoao o Alii Talavou

O lou faauuina i le Perisitua Arona e totonugalemu i le fesoasoani i fanau a le Atua ia maua le mana togiola o Keriso.

Uso e, o se avanoa le faatasi ai ma outou i lenei konafesi iloga. A o avea au o se peresitene fou o le misiona, sa ou sagisagi fiafia e talia le matou uluai vaega o faifeautalai fou. Sa tapenapena ni nai faifeautalai ua i ai le poto masani mo se fonotaga puupuu ma i latou. Sa ou matauina sa latou faatulagaina ni nofoa o tamaiti laiti i se afa li’o.

“O le a le mea ua faaaoga ai na tama’i nofoa?” Sa ou fesili atu ai.

Sa foliga matamumuli ia faifeautalai, ma faapea mai, “E mo faifeautalai fou.”

Ou te talitonu o le ala tatou te vaai atu ai i isi e matua aafia tele ai lava la latou vaaiga ia i latou lava, ma le mea e mafai ona avea ai i latou. Sa nonofo a matou faifeautalai fou i nofoa mo tagata matutua i le aso lena.

O nisi taimi, ou te fefe, tatou te avatu faafaatusa i o tatou alii talavou o le Perisitua Arona nofoa o tamaiti laiti e nonofo ai, nai lo le fesoasoani atu ia i latou ia vaai ua tuuina atu e le Atua ia i latou se faatuatuaga paia ma se galuega taua e fai.

Sa fautuaina i tatou e Peresitene Thomas S. Monson e faapea e manaomia e alii talavou ona malamalama “i le uiga … o le avea ma ni e tauaveina le perisitua a le Atua. E manaomia ona taiala i latou i se silafia faaleagaga o le paia o lo latou valaauga faauuina.”

O le aso, ou te tatalo ia taiala e le Agaga Paia i tatou taitoatasi i se malamalama sili atu o le mana ma le paia o le Perisitua Arona ma musuia i tatou e taulai atu ma le filiga atili i o tatou tiute o le perisitua. O lau savali e mo e uma e umia le Perisitua Arona, e aofia ai ma i latou o e umia le Perisitua Mekisateko

Na aoao mai e Elder Dale G. Renlund e faapea o le faamoemoega o le perisitua o le mafai ai lea ona fesootai atu fanau a le Atua i le mana togiola a Iesu Keriso. Ina ia mauaina le mana togiola a Keriso i o tatou olaga, e tatau ona tatou talitonu ia te Ia, salamo ia tatou agasala, osia ma tausia feagaiga e ala i sauniga, ma maua le Agaga Paia. E le o ni mataupu faavae nei tatou te auai na o le ta’itasi i le faatinoina; ae, e galulue faatasi, e fefaamalosia’i ma atina’e le tasi i luga o le isi i se faiga faifai pea o le agaigai i luma e “o mai ia Keriso, ma faatoatoaina ia te ia.”

O le mea lea, o le a le matafaioi a le Perisitua Arona i lenei tulaga? E faapefea ona fesoasoani tatou te maua ai le ala e fesootai ai i le mana togiola a Keriso? Ou te talitonu o le tali o loo taoto i ki o loo umia e le Perisitua Arona—o ki o le auaunaga a agelu ma le talalelei sauniuni.

O Le Auaunaga a Agelu

Ia tatou amata i le vaega e tasi o auaunaga a agelu. A o lei mafai ona i ai se faatuatua o fanau a le Atua ia Iesu Keriso, latou te manaomia ona iloa e uiga ia te Ia ma aoaoina i Lana talalelei. Pei ona fai mai le Aposetolo o Paulo:

“Pe faapefea ona latou faatuatua i le ua latou le faalogo atu i ai? pe faapefea foi ona latou faalogo atu pe a leai se tala’i atu?

“Pe faapefea foi ona latou tala’i atu, pe afai ua le aauina atu i latou? …

O lenei, e tupu le faatuatua i le taulogologo atu, o le taulogologo atu foi o i le afioga a le Atua lea.”

Mai lava i le amataga o taimi, sa “auina mai ai [e le Atua] agelu e auauna mai i le fanauga a tagata, e faaali mai e uiga i le afio mai o Keriso.” O agelu o tagata faalelagi e molimoli maia savali a le Atua. I le faaEperu ma le faaEleni, o le faapogai o le upu agelu o le “avefeau”

E faapei lava foi o agelu o avefeau ua faatagaina e auina mai e le Atua e folafola Lana afioga ma fausia le faatuatua, o i tatou o loo umia le Perisitua Arona ua faauuina e “aoao atu, ma valaaulia tagata uma e o mai ia Keriso.” O le tala’i atu o le talalelei o se tiute faaleperisitua. Ma o le mana e o faatasi ma lenei tiute ua le mo na o perofeta pe mo na o faifeautalai. E mo outou!

E faapefea la ona tatou maua o lea mana? E faapefea e se tiakono 12-tausaga-le-matua—po o soo se isi o i tatou—ona aumaia le faatuatua ia Keriso i loto o fanau a le Atua Tatou te amata i le teu o Lana afioga i o tatou loto. Ua Ia folafola mai afai tatou te faia, o le a tatou maua “le mana o le Atua i le faatalitonuina o tagata.” E mafai ona avea o se avanoa e aoao atu ai i se fonotaga a le korama pe asiasi foi i le fale o se tagata o le au paia. E mafai ona avea o se mea e le aloa’ia tele, e pei o se talatalanoaga ma se uo po o se tagata o le aiga. I soo se faatulagaga, afai tatou te saunia, e mafai ona tatou aoao atu le talalelei i le ala e faia ai e agelu: e ala i le mana o le Agaga Paia.

Sa ou faalogo talu ai ia Iakopo, o se e umia le Perisitua Arona i Papua Niu Kini, o molimau mai e uiga i le Tusi a Mamona ma le ala na fesoasoani ai ia te ia e tetee atu i le tiapolo ae mulimuli i le Agaga. O ana upu na faateleina ai lo’u faatuatua faapea le faatuatua o isi. Ua tuputupu ae foi lo’u faatuatua a o ou faalogo i e umia le Perisitua Arona o aoao atu ma molimau i a latou fonotaga faalekorama.

Alii talavou, o outou o avefeau ua faatagaina. E ala i a outou upu ma amioga, e mafai ona outou aumaia le faatuatua ia Keriso i loto o fanau a le Atua. E pei ona saunoa mai Peresitene Russell M. Nelson, “O le a avea oe ia i latou ma agelu auauna.”

O Le Talalelei Sauniuni

O le faatuatua ua faateleina ia Keriso e taitai atu ai e le aunoa i se manao e sui pe salamo. O le mea lea e talafeauga le faapea o le ki o le auaunaga a agelu e o faatasi ma le ki o le talalelei sauniuni, “o le talalelei o le salamo ma le papatisoga, ma le faamagaloga o agasala.”

A o e suesueina ou tiute o le Perisitua Arona, o le a e iloa ai le poloaiga manino e valaaulia isi e salamo ma faaleleia. E le faapea o le a tatou tutu i tulimanu o se auala ma tau’alaga, “Ia outou salamo!” E tele taimi, o lona uiga ia tatou salamo, ia tatou faamagalo atu, ma a o tatou auauna atu i isi, tatou te ofoina atu le faamoemoe ma le filemu lea e aumaia e le salamo—aua ua tatou oo foi i ai i tatou lava.

Ua ou mafuta ma le au Perisitua Arona pe a latou asiasi i uso o a latou korama. Ua ou molimauina la latou vaavaaiga ua faamaluluina ai loto ma fesoasoani ai i o latou uso ia lagonaina le alofa o le Atua. Sa ou faalogo i se tasi alii talavou o molimau atu i ana paaga e uiga i le mana o le salamo. A o ia faia, sa faamaluluina loto, sa faia tautinoga, ma sa lagonaina le mana faamalolo o Keriso.

Na aoao mai Peresitene Hinckley: “O le tasi mea o le salamo.O le isi o le faamagalo o a tatou agasala. O le mana e tupu ai lea mea o loo maua i le Perisitua Arona.” O sauniga o le Perisitua Arona o le papatisoga ma le faamanatuga e molimauina ai ma atoa ai lo tatou salamo mo le faamagaloina o agasala. Sa faamalamalama mai e Peresitene Dallin H. Oaks e faapea: “Ua poloaiina i tatou ia salamo ia tatou agasala ma o mai i le Alii ma se loto momomo ma se loto salamo ma aai ma feinu i le faamanatuga. … A tatou faafouina a tatou feagaiga o le papatisoga i le auala lenei, e faafouina foi e le Alii ia aafiaga o le faamamaina o lo tatou papatisoga.”

Uso e, o se avanoa paia le faatautaia o sauniga lea e aumaia se faamagaloga o agasala i loto ua salamo e ala i le mana togiola o le Faaola.

Sa ta’u mai talu ai nei ia te au e uiga i se ositaulaga, sa faigata ia te ia ona tautala, ae sa faamanuiaina le faamanatuga mo le uluai taimi. A o ia faia, sa oo ifo ia te ia ma le potopotoga se agaga mamana tele. Mulimuli ane i le sauniga, sa ia tuuina atu se molimau faigofie ae manino i le mana o le Atua na ia lagonaina i le taimi o le sauniga.

I Sini, i Ausetalia, e toafa uso o se korama a ositaulaga na papatisoina tagata o le aiga o Mbuelongo. Sa faamatala mai e le tina o se tasi o nei ositaulaga ia te au le auala na aafia ai lana tama i lenei aafiaga mamana. Sa malamalama nei ositaulaga i le uiga ina ia “tofia a’u e Iesu Keriso.”

E pei ona outou silafia, ua mafai nei e ositaulaga ona ta’ita’i i le faatinoga o papatisoga sui i le malumalu. Sa papatiso talu ai nei e lo’u atalii e 17-tausaga-le-matua ia a’u mo nisi o o’u augatama. Sa ma taufai lagonaina le lotofaafetai loloto mo le Perisitua Arona ma le avanoa paia e galulue ai mo le faaolataga o fanau a le Atua.

Alii talavou, a o outou punoua’i ma le filiga i a outou tiute faaleperisitua, ua outou auai ma le Atua i Lana galuega “ia aumaia le tino ola pea ma le ola faavavau o le tagata.” O aafiaga faapenei e faateleina ai la outou manao ma saunia ai outou e aoao atu le salamo ma papatiso tagata liliu mai e pei o faifeautalai. Latou te saunia foi outou mo auaunaga o le olaga atoa i le Perisitua Mekisateko.

Ioane le Papatiso, o La Tatou Faataitaiga

O e umia le Perisitua Arona, ua tatou maua le avanoa ma le tiute ina ia avea ma auauna faatasi ai ma Ioane le Papatiso. Sa auina atu Ioane o se avefeau ua faatagaina e molimau atu ia Keriso ma valaaulia tagata uma e salamo ma ia papatisoina—o lona uiga, sa ia faaaogaina ki o le Perisitua Arona o loo tatou talanoaina. Fai mai Ioane, “O a’u nei ou te papatiso atu ia te outou i le vai ina ia salamo: a e peitai o le mulimuli mai e silisili o ia ia te au … : o ia lea na te papatisoina atu ia te outou i le Agaga Paia ma le afi.”

E faapea le Perisitua Arona, faatasi ai ma ki o auaunaga a agelu ma le talalelei sauniuni, e tapena le ala mo fanau a le Atua e maua ai, e ala i le Perisitua Mekisateko, le meaalofa o le Agaga Paia, o le meaalofa silisili e mafai ona tatou maua i lenei olaga.

O se tiutetauave ina a maoae ua tuuina mai e le Atua i e umia le Perisitua Arona!

O Se Valaaulia ma se Folafolaga

Matua ma taitai o le perisitua, pe ua mafai ona outou lagonaina le taua o le fautuaga a Peresitene Monson e fesoasoani i alii talavou ia malamalma “i le uiga … o le avea ai ma e umia le perisitua a le Atua”? O le malamalama ma le faalauteleina o le Perisitua Arona o le tapenaga sili lea e mafai ona tatou tuu atu ia i latou ia avea ai ma e e faamaoni e umia le Perisitua Mekisateko, faifeautalai e faatumulia i le mana, ma tane ma tama amiotonu. E ala i la latou auaunaga, o le a latou malamalama ma lagonaina le moni o le mana o le perisitua, le mana e galulue ai i le suafa o Keriso mo le faaolataga o fanau a le Atua.

Alii talavou, ua i ai i le Atua se galuega mo outou e fai. O lou faauuina i le Perisitua Arona e totonugalemu i le fesoasoani i fanau a le Atua ia maua le mana togiola o Keriso. Ou te folafola atu a e tuuina nei tiute paia i le totonugalemu o lou olaga, o le a e lagonaina le mana o le Atua e sili atu nai lo le taimi muamua. O le a e malamalama i lou faasinomaga o se atalii o le Atua, ua tofia i se valaauga paia e fai Lana galuega. Ma, e pei o Ioane le Papatiso, o le a e fesoasoani e saunia le ala mo le toe afio mai o Lona Alo. O nei upumoni ou te molimau atu ai i le suafa o Iesu Keriso, amene.

Faamatalaga

1. O le mea lea na tupu ia Mose. Ina ua maea le la fetaiaiga ofoofogia ma le Atua, sa amata ona ese lana vaai ia te ia lava—o se atalii o le Atua. Na fesoasoani lea vaaiga ia te ia e teena ia Satani, o le sa faaigoaina o ia o le “atalii o le tagata” (tagai Mose 1:1–20) Tagai foi Thomas S. Monson, “Vaai Atu i Isi i Tagata e Mafai ona Avea ai i Latou,” Liahona, Nov. 2012, 68–71; Dale G. Renlund, “E Ala i Fofoga o le Atua,” Liahona, Nov. 2015, 93–94.

2. Thomas S. Monson, general conference leadership meeting, Mar. 2011.

3. Tagai Dale G. Renlund, “O Le Perisitua ma le Mana Togiola o le Faaola,” Liahona, Nov. 2017, 64–67.

4. Tagai 2 Nifae31–32; 3 Nifae 11:30–41; 27:13–21; Eteru 4:18–19; Mose 6:52–68; 8:24.

5. Moronae 10:32; tagai foi Preach My Gospel: A Guide to Missionary Service (2004), 6.

6. Tagai Mataupu Faavae ma Feagaiga 13:1; 84:26–27; 107:20.

7. Roma 10:14–15, 17 Na aoao mai e Iosefa Samita lea lava upumoni: “E maua le faatuatua i le faalogoi le afioga a le Atua, e ala i molimau a auauna a le Atua; o lena molimau e faafeao mai lava e le aunoa e le Agaga o valoaga ma faaaliga” (Aoaoga a Peresitene o le Ekalesia: Iosefa Samita [2007], 385).

8. Moronae 7:22; tagai Alema 12:28–30; 13:21–24; 32:22–23; 39:17–19; Helamana 5:11; Moronae 7:21–25, 29–32; Mataupu Faavae ma Feagaiga 20:35; 29:41–42; Mose 5:58; tagai foi Mataio 28:19; Roma 10:13–17.

9. [Tagai George Q. Cannon, Gospel Truth, sel. Jerreld L. Newquist (1987), 54.–52.

10. Tagai James Strong, The New Strong’s Exhaustive Concordance of the Bible (1984), Hebrew and Chaldee dictionary section, 66, Greek dictionary section, 7.

11. Mataupu Faavae ma Feagaiga 20:59.

12. Tagai Henry B. Eyring, “Ina Ia Faamalosia Foi o Ia,” Liahona, Nov. 2016, 75–78; Alema 17:3; Helamana 5:18; 6:4–5; Mataupu Faavae ma Feagaiga 28:3.

13. Tagai 1 Ioane 2:14; Alema 17:2; 26:13; 32:42 Faataunuuina o Lo’u Tiute i le Atua: Mo e Umia le Perisitua Arona o se meafaigaluega taua e fesoasoani e faataunuu ai.

14. Mataupu Faavae ma Feagaiga 11:21; tagai foi Mataupu Faavae ma Feagaiga 84:85.

15. Tagai 2 Nifae 32:3; Mataupu Faavae ma Feagaiga 42:14; 50:17--22.

16. Tagai i le Moronae 7:25.

17. Russell M. Nelson, “Honoring the Priesthood,” Ensign, May 1993, 40; tagai foi i le Alema 27:4.

18. Tagai Alema 34:17; Helamana 14:13.

19. Mataupu Faavae ma Feagaiga 84:27.

20. Tagai Mataupu Faavae ma Feagaiga 20:46, 51–59, 73–79. Faataunuuina o Lo’u Tiute i le Atua: Mo e Umia le Perisitua Arona o se meafaigaluega taua e fesoasoani e faataunuu ai.

21. Tagai Gordon B. Hinckley, “O Le Perisitua Arona—o se Meaalofa mai le Atua,” Liahona, Iulai 1988, 47

22. Sa faamalamalama mai e Elder D. Todd Christofferson: “O le Papatisoga i le vai o le laasaga mulimuli po o le taualuga lea o le faagasologa o le salamo. O le lafoaia o le agasala, faatasi ai ma a tatou feagaiga o le usiusitai, e faaatoatoaina ai latou salamo; e moni lava, e le maea le salamo e aunoa ma lena feagaiga” (“Fausiaina o le Faatuatua ia Keriso,” Liahona, Sete. 2012). Tagai foi D. Todd Christofferson, “O Le Meaalofa Paia o le Salamo,” Liahona, Nov. 2011, 38–41; Joseph Smith Translation, Mataio 26:24 (i le faaopoopo o le Tusi Paia).

    Sa aoao mai Dallin H. Oaks e tuuina mai e le sauniga o le faamanatuga “se avanoa i vaiaso taitasi e toe faafou ai feagaiga paia lea e faataga ai i tatou e aai ma feinu i le togiola alofa a le Faaola faatasi ai ma le aafiaga faamama faaleagaga lava lea e tasi o le papatisoga ma le faamauga” (“Malamalama i a Tatou Feagaiga ma le Atua,” Liahona, Iulai 2012, 21). Tagai foi Dallin H. Oaks, “Ia Maua Pea Lona Agaga,” Liahona, Ian. 1997, 68–71.

23. Tagai Dallin H. Oaks, ”O Le Perisitua Arona ma le Faamanatuga,” Liahona, Ian. 1999, 44-45.

24. Na faamalamalama mai e Elder David A. Bednar: “O sauniga o le faaolataga ma le faaeaga o loo faatautaia i le Ekalesia toefuataiina a le Alii e matua sili atu lava i lo sauniga po o faatinoga faafaatusa. Ae, latou te faia ni auala faatagaina ia e mafai ai e faamanuiaga ma mana o le lagi ona tafe mai i o tatou olaga taitoatasi” (“[Faatumauina] Pea le Faamagaloina o a Outou Agasala,” Liahona, Me 2016, 60).

25. Mataupu Faavae ma Feagaiga 20:73.

26. Mose 1:39.

27. Mataio 3:11.

28. E toatele taitai o le Ekalesia ua faailoa maia le Agaga Paia o le meaalofa aupito silisili o le olaga nei.

    Ua saunoa Peresitene Dallin H. Oaks, “O le i ai o le mafutaga faifai pea ma le Agaga Paia o le ‘oa aupito taua lea e mafai ona tatou maua i le olaga nei” (“O Le Perisitua Arona ma le Faamanatuga,” Liahona, Ian. 1999).

    Na aoao mai e Elder Bruce R. McConkie: “I le talanoa ai mai se vaaiga o le faavavau, o le ola e faavavau o le meaalofa aupito silisili i lo meaalofa uma a le Atua. Ae a tuu mai le vaaiga i le na o le olaga nei, o le meaalofa o le Agaga Paia o le meaalofa aupito silisili e mafai ona olioli ai i le olaga nei” (“O Le A le Uiga ‘O Le Agaga Paia’?” Instructor, Feb. 1965, 57).

    Na molimau mai Peresitene Uilifoti Uitilafi: “Afai ua ia te oe le Agaga Paia—ma e ao ona i a i tagata uma—e mafai ona ou fai atu ia te oe e leai se isi meaalofa e sili atu, e leai se isi faamanuiaga e sili atu, e leai se molimau e sili atu ua tuuina mai i soo se tagata i le lalolagi. Atonu o ia te outou le auaunaga a agelu: atonu ua e vaai i le tele o vavega; atonu ua e vaai i mea ofoofogia i le lalolagi, ae ou te fai atu o le meaalofa o le Agaga Paia o le meaalofa aupito silisili ua mafai ona faaee i luga o le tagata” (Aoaoga a Peresitene o le Ekalesia: Uilifoti Uitilafi [2004], 49).

    Ma na faaopoopo mai Elder David A. Bednar: “O poloaiga mai le Atua tatou te usita’ia a o fautuaga musuia mai taitai o le Ekalesia tatou te mulimulita’ia ma le faamoemoe maualuga tatou te taulai atu i le mauaina o le mafutaga a le Agaga Paia. O le mea taua lava, o aoaoga uma ma gaoioiga a le talalelei e faaautu i le o mai ia Keriso ma le taliaina o le Agaga Paia i o tatou olaga” (“Ia Maua le Agaga Paia,” Ensign,” Liahona, Nov. 2010, 95, 97).

29. Thomas S. Monson, general conference leadership meeting, Mar. 2011.

30. Tagai Mose 1:6.