Avea le Agaga Paia ma Ou Taiala
E maeu lea meaalofa lemafaatusalia e oo mai ia i latou o e tuu lo latou faatuatua ia Iesu Keriso. O lena meaalofa o le Agaga Paia lea.
I lenei Aso Sa o le Eseta, e liliu atu o tatou mafaufauga i le Toetu o le Alii o Iesu Keriso ma i le tuugamau avanoa lea e tuu atu i tagata talitonu uma le faamoemoe i le manumalo ai o Keriso i le mea semanu o le toilalo moni. Ou te talitonu, faatasi ai ma le Aposetolo o Paulo, e pei lava ona “faatu mai [e le Atua] ia Iesu nai e ua oti, [e faapena foi] e faaola[ola] mai foi [e Ia] o [tatou] tino auga vale e lona Agaga i totonu ia te [i tatou].”
O le faaolaolaina o lona uiga ina ia ola. E pei ona toe faaolaina mai e Keriso o tatou tino pe a mavae le oti faaletino e ala i le mana o Lona Toetu, e faapena foi ona Ia faaolaolaina i tatou, pe faaolaina i tatou, mai le oti faaleagagag. I le tusi a Mose, tatou te faitau ai e uiga ia Atamu o loo i ai i lenei ituaiga o faaolaolaina: “sa papatisoina [Atamu], ma sa afio ifo le Agaga o le Atua i luga o ia, ma sa faapea ona fanauina o ia i le Agaga, ma faaolaolaina i totonu o lona tagata.”
E maeu lea meaalofa lemafaatusalia e oo mai ia i latou o e tuu lo latou faatuatua ia Iesu Keriso. O lena meaalofa o le Agaga Paia e tuuina mai le mea ua ta’ua e le Feagaiga Fou “ola ua ia Keriso.” Ae o tatou faaleamanaina lea ituaiga meaalofa i nisi taimi?
Uso e ma tuafafine, o se avanoa ofoofogia le “avea …[o] le Agaga Paia ma o [tatou] taiala,” e pei ona faaalia i le tala lenei.
I le vaitaimi o le Taua i Korea, sa auauna atu ai Ensign Frank Blair i se vaa e fela’ua’i ai fitafita na faamautu i Iapani. Sa le lava le telē o le vaa e maua ai se faifeau aloaia, o lea sa talosaga ai le kapeteni ia Uso Blair ina ia avea ma faifeau le aloaia o le vaa, i le matauina ai o le alii talavou o se tagata o le faatuatua ma mataupu faavae, e matuai faaaloalogia e le au vaa atoa.
Sa tusia e Ensign Blair: “Sa maua la matou vaa e se afa fulifaō tele. O galu sa tusa ma le 45 futu [14 m] le maualuluga. Sa ou tiute … i lea taimi na le toe ola ai se tasi o a matou afi e tolu ma sa lipotia mai se ta’e i le ogatotonu o le vaa. Sa lua ni a matou afi na totoe, o le tasi sa na o se afa malosiaga na ola ai. Sa matou i ai i se faafitauli matautia.”
Na maea le tiute a Ensign Blair ma sa saunia e moe ae tu’itu’i atu le kapeteni i lona faitotoa. Sa ia talosaga mai, “E mafai ona e tatalo faamolemole mo lenei vaa?” Ioe, sa malie Ensign Blair e faia.
I lena taimi, sa mafai lava e Ensign Blair ona tau ina tatalo atu, “Tama Faalelagi, faamolemole faamanuia la matou vaa ma tausi i matou ia saogalemu,” ona moe ai lea. Nai lo lena, sa ia tatalo ia iloa le mea e mafai ona ia faia e fesoasoani ai ia faamautinoa le saogalemu o le vaa. I se tali mai i le tatalo a Uso Blair, sa musuia o ia e le Agaga Paia e alu i le potu o faatonuga e talanoa ma le kapeteni, ma aoao atili. Sa ia iloaina sa taumafai le kapeteni e fuafua po o le a le saoasaoa e faataavale ai afi o loo totoe o le vaa. Sa toe foi atu Ensign Blair i lona potu ma toe tatalo ai.
Sa ia tatalo, “O le a se mea e mafai ona ou faia e fesoasoani ai e foia le faafitauli o afi?”
I se tali, sa musumusu mai le Agaga Paia e manaomia ona ia savali solo i le vaa ma matau ina ia mafai ona ao mai nisi faamatalaga. Sa ia toe foi atu i le kapeteni ma talosaga mo se faatagaga e savali solo ai i luga o le vaa. Ona nonoa lea o se maea faaola i lona puimanava, ma ia alu atu ai loa i fafo i le afā.
I le tu ai i le pito i tua o le vaa, sa ia matauina ai pe’ape’a tetele a o ō a’e mai le vai pe a oo atu le vaa i tumutumu o se galu. Sa na o le tasi [le pe’ape’a] sa ola atoatoa, ma sa saoasaoa tele lona taavili. Ina ua uma ia matauga, sa toe tatalo foi Ensign Blair. O le tali manino na ia maua e faapea o le afi lelei na totoe sa saoasaoa tele ma e manaomia ona faalemu. O lea sa ia toe foi ai i le kapeteni ma fai atu lena fautuaga. Sa faate’ia le kapeteni, ma ta’u atu ia te ia o lea faato’a uma ona fautua mai e le enisinia o le vaa le faafeagai—e faapea ia latou faateleina le saoasaoa o le afi lelei ina ia mafai ai ona o ese mai le afa. E ui i lea, sa filifili le kapeteni e mulimuli i le fautuaga a Ensign Blair ma faalemu loa le afi. E tafa a’e ata ua saogalemu le vaa i le sami malū.
I le na o le lua itula mulimuli ane, na le toe ola atoa ai le afi lelei. Faatasi ai ma le afa malosiaga na i ai i le afi na totoe, sa mafai ai e le vaa ona to’uto’u atu i le uafu.
Sa fai atu le kapeteni ia Ensign Blair, “Pe ana tatou le faalemuina lena afi i le taimi na tatou faia ai, semanu tatou te ma’umauina i le malosi o le afa.”
A na le seanoa lena afi, semanu e leai se auala e uli ai [le vaa]. Semanu e fuli le vaa ma goto. Sa faafetai atu le kapeteni i le alii ofisa talavou o le Ekalesia ma fai atu i ai sa ia talitonu o le mulimuli i uunaiga faaleagaga a Ensign Blair sa faasaoina ai le vaa ma ola o le au vaa.
Ia o lenei tala e fai si lamatia. Ma e ui e ono mafai ona tatou fetaiai ma ia tulaga lamatia, o loo i ai i lenei tala ni taiala taua e uiga i le auala tatou temafai ai ona maua soo atili le taitaiga a le Agaga.
Muamua, pe a oo mai i faaaliga, e tatau ona tatou ola agavaa e maua musumusuga faalelagi. Sa ola Ensign Blair i se olaga mama ma faatuatua. Ana faapea e le usitai o ia, semanu na te le maua le talitonuga maumaututu faaleagaga na manaomia e tatalo ai e pei ona sa ia faia mo le saogalemu o lana vaa ma maua ai sea taitaiga faapitoa. E tatau ona taitoatasi i tatou ma faia le taumafaiga e faaogatusa o tatou olaga ma poloaiga a le Atua ina ia mafai ai ona Ia taitaiina [i tatou].
O nisi taimi tatou te le lagona ai faailo a le lagi ona tatou ua tatou le agavaa. O le salamo ma le usiusitai o auala ia e mafai ai ona toe maua fesootaiga manino. O le upu o le Feagaiga Tuai mo le salamo o lona uiga “ia liliu” po o le “liliu ese atoa.” A e lagona le mamao mai le Atua, e na o lou manaomia lava e faia le faaiuga e liliu ese mai le agasala ma faasaga atu i le Faaola, lea o le a e maua o Ia o faatali mai mo oe, ma Aao o loo faaloaloa mai. O loo naunau o Ia e taitai oe, ma e na o le tasi le tatalo o loo e mamao ai mai le toe mauaina o lena taitaiga.
Lua, sa lei na ona ōle atu Ensign Blair i le Alii e foia lona faafitauli. Sa ia fesili po o le a le mea e mafai ona ia faia ia avea ai ma se vaega o le vaifofo. Atonu e faapena foi ona tatou fesili atu, “Le Alii e, o le a se mea e manaomia ona ou faia ia avea ai ma se vaega o le vaifofo?” Nai lo le na o le lisiina atu o a tatou faafitauli i le tatalo ma ole atu i le Alii e foia i latou, e ao ona tatou saili atili ni auala aoga mo le mauaina o le fesoasoani a le Alii ma ia tuuto atu e faatino e tusa ai ma le taitaiga a le Agaga.
E i ai se lesona taua lona tolu i le tala a Ensign Blair. Mata na mafai ea ona ia tatalo ma se faamautinoaga toafilemu pe ana le maua e ia le taitaiga mai le Agaga i mea na tutupu muamua? O le taunuu ai o se afā fulifaō e le o se taimi lea e faato’a saili ai le meaalofa o le Agaga Paia ae sa le’i ano lava iai, ma mafaufau pe faapefea ona faaaoga. O lenei alii talavou sa manino le mulimuli ai i se mamanu sa ia faaaoga muamua i le tele o taimi, e aofia ai a o avea ma se faifeautalai faamisiona. Tatou te manaomia le Agaga Paia ma a tatou taiala i taimi e malū ai le sami, ina ia tatou iloagofie Lona siufofoga i le lotolotoi o se afā sili ona malosi.
O nisi atonu latou te manatu e le tatau ona tatou faamoemoe i le taitaiga mai le Agaga i aso uma ona “e le tatau ona … poloai [mai le Atua] i mea uma,” ina ne’i avea i tatou ma auauna paie. Peitai, o lenei mau sa tuuina atu i nisi o faifeautalai anamua o e na talosaga atu ia Iosefa Samita ia maua se faaaliga e tatau ona latou mauaina mo i latou lava. I se mau na muamua atu, sa fetalai atu ai le Alii ia i latou e o mai i le galuega talai “e pei ona latou taupulepule ai i le va o i latou lava ma a’u.”
Sa mananao nei faifeautalai mo se faaaliga patino lava e uiga ia latou fuafuaga o femalagaaiga. Latou te lei aoaoina lava e saili mo lo latou lava taitaiga i tulaga faaletagata lava ia. Ma na ta’ua e le Alii lenei uiga faaalia i le mea o i ai: o le paie. Atonu sa fiafia lava uluai tagata o le Ekalesia sa latou maua se perofeta moni ma sa latou oo ai i tulaga lamatia o le le iloaina pe faapefea ona maua faaaliga mo i latou lava. O le ola tutoatasi faaleagaga o le mafai lea ona faalogo i le siufofoga o le Alii e ala i Lona Agaga mo le olaga o le tagata lava ia.
Sa fautuaina e Alema lona atalii ina ia “filifili faatasi ma le Alii i au mea uma e fai.” I le ola ai i lenei auala—o le mea tatou te masani ona fasino i ai o le “ola ai i le Agaga”—o se avanoa maualuga. Na te aumaia faatasi se lagona o le toafimalie ma le mautinoa faapena foi ma fua o le Agaga, o fua e pei o le alofa, olioli ma le filemu.
O le tomai o Ensign Blair e maua faaaliga na faasaoina ai o ia ma ana uo auvaa mai se matagi maemaea. O isi ituaiga o afā o loo pesi mai i le asō. O le faataoto o le Tusi a Mamona e uiga i le laau o le ola ua tuuina mai ai se ata mamana o le auala e ausia ai le saogalemu faaleagaga i sea ituaiga lalolagi. Ua faamatalaina i lenei miti puāo o le pogisa na faafuasei ona aliae e aumaia le faafanoga faaleagaga i tagata o le Ekalesia o loo savavali atu i luga o le ala e toe foi atu i le Atua.
A mafaufau ai i lenei ata, ou te vaai faalemafaufau i le anoanoai o tagata o loo malaga i lena ala, o nisi ma o latou lima o loo pipii mau i le āi u’amea, ae o isi na o le mulimuli lava i tulaga vae o tagata o i luma atu o i latou. O lenei uiga taumulimuli e itiiti lava ni mafaufauga po o se taumafaiga e alu ai. E mafai ona tau na e faia ma mafaufau po o a mea o faia ma mafaufau i ai isi tagata. E lelei lava lenei mea i taimi la. Ae e aliae afā o le taufaasese ma puāo o mea sese e aunoa ma se lapataiga. I nei tulaga, o le masani i le siufofoga o le Agaga Paia o se mataupu lea o le ola ma le oti faaleagaga.
O le folafolaga mamana a Nifae e faapea “ai se faalogo i le afioga a le Atua, ma …pipii mau i ai, e le fano lava i latou; pe mafai foi e faaosoosoga ma ufanafana mu a le fili ona faatoilaloina i latou i le faatauasoina, e taitai ese atu ai i latou i le faafanoga.”
O le taumulimuli i tulaga vae o tagata i luma atu o oe i luga o le ala e le lava lea. E le mafai le na o le tatou fai ma mafaufau i mea o faia ma mafaufau i ai isi; e tatau ona tatou ola i se olaga taialaina. E tatau ona tofu i tatou ma o tatou lava lima i luga o le ai uamea. Ona mafai lea ona tatou o atu i le Alii ma le talitonuga maumaututu faamaulalo, i le iloaina e Na te “taitai [i tatou] i le lima, ma tuu mai ia te i [tatou] tali i a [tatou] tatalo.” I le suafa, o Iesu Keriso, amene.