O Tamaitai Talavou i le Galuega
O tamaitai talavou uma i le Ekalesia e ao ona lagona le faatauaina, e i ai avanoa e auauna atu ai, ma lagonaina o loo ia te ia se mea e aoga ona saofaga atu ai i lenei galuega.
I se tausaga ua mavae atu, i le sauniga perisitua o le konafesi, sa saunoa ai Epikopo Gérald Caussé i alii o le Ekalesia ma faamatala atu ai le ala ua avea ai e umia le Perisitua Arona ma le Mekisateko ma paaga e le mavavaeeseina i le faataunuuina o le galuega o le faaolataga. O lena savali na avea o se faamanuiaga tele e fesoasoani ai i alii talavou o le Perisitua Arona e vaai ai i le vaega latou te faia i le fausiaina o le malo o le Atua i lenei lalolagi. O la latou auaunaga soofaatasi ua faamalosia ai le Ekalesia ma aumaia ai le liua loloto ma tautinoga i loto o o tatou alii talavou a o latou vaai atu i le taua o lo latou sao ma le matagofie tele o lenei galuega.
O le asō ou te manao e faaopoopo atu la’u tautalaga i lena savali a o ou talanoa atu e uiga i tamaitai talavou o le Ekalesia, o e o loo tutusa lava le manaomia ma le taua i le faataunuuina o le galuega a le Alii i o latou aiga ma i Lana Ekalesia.
E faapei o Epikipo Caussé, sa ou ola a’e i se paranesi laitiiti o le Ekalesia i se vaega tele o o’u tausaga talavou, ma sa tele taimi sa talosagaina ai a’u e faataunuu ia tofiga ma valaauga ia sa masani ona faia e tagata matutua. Mo se faataitaiga, o i tatou i le polokalama a le autalavou e tele ina taulamua i le fesoasoani e fuafua ma faatamoe a tatou gaoioiga ma mea faapitoa e fai. Sa matou tusia tala, faatulaga se vaega pepese e faafiafia i gaoioiga a le paranesi, ma sa auai atoatoa i sauniga uma. Sa valaauina a’u e avea ma taitai pese a le paranesi ma sa taitaia musika i sauniga faamanatuga i vaiaso taitasi. O se aafiaga maoae mo se 16-tausaga-le matua e tu atu ai i luma o tagata uma o le paranesi i Aso Sa taitasi ma taitai i latou i le usuina o viiga. Sa ou lagonaina le manaomia o a’u ma sa i ai se mea ou te saofaga atu ai. Sa faalagolago tagata ia te a’u ia ou i ai iina, ma sa ou fiafia i le iloa ai ou te aoga. Sa fesoasoani lena aafiaga e fausia ai la’u molimau ia Iesu Keriso, ma e pei lava ona sa faia ai mo Epikopo Caussé, na saunia ai foi se faavae o lo’u olaga i le auaunaga faaletalalelei.
E tatau ona iloa e tagata taitoatasi le tele o le manaomiaina o ia. E tofu le tagata ma se mea taua e saofaga atu ai ma e i ai taleni ma tomai tulaga ese e fesoasoani e agai i luma lenei galuega taua. O o tatou alii talavou ua i ai tiute o le Perisitua Arona o loo faamatala mai i le Mataupu Faavae ma Feagaiga ia e tele ina iloagofie. Atonu e le iloagofie i tamaitai talavou o le Ekalesia, o o latou matua, ma o latou taitai e faapea, mai lava i le taimi e papatiso ai i latou, ua i ai i tamaitai talavou ia tiutetauave faalefeagaiga e “faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma mai mea uma, ma i nofoaga uma atonu tou te i ai, seia oo lava i le oti.” Ua i ai i tamaitai talavou ia avanoa e faataunuu ai nei tiutetauave pe a latou galulue i au peresitene o vasega, i aufono a le autalavou, ma i isi valaauga. O tamaitai talavou uma i le Ekalesia e ao ona lagona le faatauaina, e i ai avanoa e auauna atu ai, ma lagonaina o loo ia te ia se mea e aoga ona saofaga atu ai i lenei galuega.
I le Tusitaulima 2 tatou te aoao ai e faapea o le galuega o le faaolataga i totonu o a tatou uarota e aofia ai “galuega faamisiona a tagata o le au paia, faatumauina o tagata liliu mai, faatoagaina mai o tagata ua le malolosi mai, galuega o le malumalu ma talafaasolopito o aiga, ma le aoaoina atu o le talalelei.” O lea galuega e taitaia e epikopo faamaoni, o e umia ki o le perisitua mo a latou uarota. Mo le tele o tausaga i le taimi nei e fai ai lava e lo tatou au peresitene le fesili, “O le fea o nei eria o loo ta’ua e le tatau ona aofia ai tamaitai talavou?” O le tali e faapea e i ai lava se mea latou te saofaga atu ai i vaega uma o lenei galuega.
Mo se faataitaiga, sa ou feiloai talu ai nei i ni tamaitai talavou i le eria o Las Vegas o e sa tofia e fai ma faufautua o le malumlau ma talafaasolopito o aiga i le uarota. Sa susulu matua fiafia i latou i le mafai ona latou aoao atu ma fesoasoani i tagata o la latou uarota e sue o latou augatuaa. Sa i ai o latou tomai aoga i le komepiuta, sa aoao i le faaaogaina o le FamilySearch, ma sa fiafia lava e faasoa atu i isi mea ua latou iloa. Sa manino sa i ai a latou molimau ma se malamalama i le taua o le sailia o igoa o o tatou tuaa ua maliliu ina ia mafai ai ona faatino ia sauniga faaola e tatau ai mo i latou i le malumalu.
I ni nai masina talu ai, sa ou maua ai le avanoa e tofotofo ai se ‘aitia i tamaitai talavou e toalua e tai 14-tausaga-le matutua. Sa ou aumaia ni kopi moni se lua o mataupu o fonotaga a ni uarota se lua ma avatu ia Ema ma Maggie e tofu i la’ua ma le kopi. Sa fai atu ia i la’ua e faitau i le lisi o mataupu o fonotaga ma vaai pe sa i ai ni mea e faatino mai aufono a uarota e ono mafai ona la galulue ai. Sa vaai Ema e i ai se aiga fou sa siitia atu i le uarota, ma sa ia fai mai e mafai ona fesoasoani ia i latou e o mai ma talai ma tala’u a latou uta. Sa ia manatu e mafai ona ia faauo i tamaiti o le aiga ma faamatamata i latou i la latou aoga fou. Sa ia vaai e i ai se tausamiga a le uarota ua lata mai, ma sa ia lagonaina e tele ni auala eseese e mafai ona ia ofo atu ai lana auaunaga.
Sa vaai Maggie sa i ai ni toeaiina ma ni olomatutua o le uarota e manaomia ona asia ma faaaumea. Sa ia fai mai o le a fiafia o ia e asia ma fesoasoani i nei tagata matutua o le au paia. Sa ia lagonaina foi e mafai ona ia faiaoga i tagata o le uarota i le setiina ma faaaoga ia saite faasalalau faaagafesootai. O le mea moni e leai se mea se tasi o mea na i le lisi o mataupu o le fonotaga sa lei mafai e na tamaitai talavou ona fesoasoani ai!
O silafia e i latou o i le saofaiga a aufono o uarota, pe umia se valaauga i le uarota, ia tamaitai talavou o ni punaoa aoga e fesoasoani e faataunuu le tele o manaoga i totonu o a tatou uarota?E masani lava ona i ai se lisi umi o tulaga e manaomia ai se tasi e galue, ma e tele taimi tatou te mafaufau ai na o tagata matutua i le uarota e taulimaina na manaoga. E faapei ona sa valaaulia i latou e umia le Perisitua Arona e galulue ma o latou tama ma isi tane o le Peristua Mekisatko, e mafai foi e o tatou tamaitai talavou ona tofia e tuuina atu le auaunaga ma galulue i manaoga o tagata o le uarota faatasi ma o latou tina po o isi tamaitai o faataitaiga. Latou te gafatia, e naunau, ma mananao e faia le anoanoai o mea nai lo le na ona o mai i le lotu i Aso Sa!
Pe a tatou mafaufau i matafaioi o le a faamoemoe e taulima e tamaitai talavou i le lumanai, atonu tatou te fesili ifo ia i tatou lava pe o a ituaiga o poto masani e mafai ona tatou saunia mo i latou i le taimi nei o le a fesoasoani ai ia latou tapenaga e avea o ni faifeautalai, sikola o le talalelei, taitai o ausilali i le Ekalesia, faigaluega o le malumalu, ava, tina, faiaoga, ma ni uo. E mafai ona latou amata i le taimi nei e faataunuu le tele o na matafaioi. E tele ina talosaga mai le autalavou e fesoasoani atu e faiaoga i lesona o Aso Sa ia latou vasega. Ua maua nei avanoa mo o tatou tamaitai talavou e faatino ai auaunaga na faatino talu ai e le aufaigaluega i sauniga po o volenitia pe a latou o i le malumalu ma a latou vaega o autalavou e faatino ia papatisoga mo e ua maliliu. O o tatou teineiti o vaitausaga o le Peraimeri ua valaaulia nei e auai i fonotaga mo Sauniuniga i le Malumalu ma le Perisitua, lea o le a fesoasoani latou te malamalama ai o i latou foi o tagata auai taua i le galuega e taitaia--faaleperisitua. O le a latou aoao ai o alii, tamaitai, talavou, ma tamaiti e maua uma lava faamanuiaga o le perisitua ma e mafai e tagata uma ona tauaveina se matafaioi ola i le tuleia i luma o le galuega e taitaia--faaleperisitua.
Epikopo, matou te iloa e tele ina lofituina o outou tiute, ae pei lava ona sili ona maualuga le faamuamua o se tasi o outou tiute e pulefaamalumalu i korama a le Perisitua Arona, o loo ta’ua mai i le Tiusitaulima 2 e faapea “o le epikopo ma ona fesoasoani e tuuina atu le taitaiga faaleperisitua mo le faalapotopotoga a Tamaitai Talavou.Latou te vaavaaia ma faamalolosia tamaitai talavou taitoatasi, galulue vavalalata ma matua ma taitai o Tamaitai Talavou i lenei taumafaiga.” O loo faapea mai ai foi, “O le epikopo ma ona fesoasoani e auai e le aunoa i sauniga, auaunaga, ma gaoioiga a Tamaitai Talavou.” Matou te faafetai lava mo epikopo o e faaavanoa se taimi e asiasi ai i vasega a Tamaitai Talavou ma e e tuuina atu avanoa mo tamaitai talavou ia latou uarota e faatino ai le galuega i lo le na ona matamata. Faafetai lava mo le faamautinoaina o avea a outou tamaitai talavou ma tagata auai taua e taulimaina manaoga o tagata o le uarota! O nei avanoa e galulue ai i ni auala ‘anoa e saga faamanuiaina ai i latou nai gaoioiga e na ona faafiafiaina ai i latou.
Ia te outou, o tamaitai talavou o le Ekalesia, o tausaga o lo outou talavou e mafai ona pisi ma o le tele foi o taimi e faigata. Ua matou matauina e toatele atu outou o loo tauivi ma faafitauli o lou lava ta’uaogaina, atuatuvale, maualuga tulaga o le oi, ma atonu ua leai se faamoemoe. O lou mafaufau mo isi, nai lo le nopia’i ai i au lava faafitauli, atonu e le foia uma ai nei faafitauli uma, ae o le auauna atu e tele ina faamamaina ai au avega ma avea ai ina foliga ua le faigata ou luitau. O se tasi o auala sili e faateleina ai lagona o lou lava ta’uaogaina o le faaali atu, e ala i lo tatou popole ma auaunaga i isi, e tele lo tatou aoga e ofoina atu. Ou te valaaulia outou e sii i luga o outou luma e volenitia ma faagalulue na lima pe a outou vaaia mea e manaomia o siomia ai outou. A o outou faataunuuina o outou tiutetauave faalefeagaiga ma auai i le fausiaina o le malo o le Atua, o le a tafe mai faamanuiaga i o outou olaga ma o le a outou maua le olioli loloto ma le tumau o le avea ai ma soo.
Uso e ma tuafafine, e ofoofogia o tatou tamaitai talavou. Ua ia i latou ia taleni, o le naunautaiga e leai se tuaoi, malosi, ma e agalelei ma agaalofa. Latou te mananao e tautua. E manaomia ona latou iloa e faatauaina i latou ma e taua i le galuega o le faaolataga. E pei lava foi o le Perisitua Arona o loo tapenapena mo le galuega tele atu a o siitia atu alii talavou i le Perisitua Mekisateko, o loo tapenapena foi o tatou tamaitai talavou e avea ma sui o le faalapotopotoga aupito silisili o tamaitai o i le lalolagi---le Aualofa. Faatasi ai, o nei tamaitai talavou ma alii talavou matagofie, malolosi ma faamaoni o loo tapenapena e avea o ni ava ma tane, ma tina ma tama o e o le a tausia ni aiga agavaa o le malo selesitila o le Atua.
Ou te molimau atu o le galuega a lo tatou Tama Faalelagi o le saunia lea o le tino ola pea ma le ola e faavavau mo Ana fanau. Ua i ai i o tatou tamaitai talavou pele se matafaioi taua e faia e fesoasoani ai i le faataunuuina o lenei galuega tele. I le suafa, o Iesu Keriso, amene.