Toe Tasi Lava le Aso
Ua tofu uma i tatou ma se “asō” e ola ai, ma o le ki i le manuia o lo tatou aso o le naunau lea e ositaulaga.
O ni nai tausaga ua mavae, sa maua ai e a’u uo se pepe aulelei e igoa ia Polika. Ina ua mavae lona fanau mai, sa maua Polika i se tulaga e seasea tupu na ta’ua o le Hunter syndrome, ma le faanoanoa o lona uiga e puupuu se taimi e ola ai Polika. I se tasi aso a’o asiasi atu Polika ma lona aiga i lotoa o le malumalu, sa faia e Polika se faaupuga faapitoa; e faalua ona ia fai atu, “Toe tasi lava le aso.” O le aso lava na sosoo ai, na maliu ai Polika.
Na ou asiasi i le tuugamau o Polika i ni nai taimi, ma o taimi uma ou te faia ai, ou te mafaufau ai lava i le faaupuga “toe tasi lava le aso.” Ou te mafaufau po o le a lona uiga, po o le a se aafiaga i lo’u olaga i le iloaina e toe tasi lava le aso ou te ola ai. Pe faapeī lo’u taulimaina o lo’u toalua, la’u fanau, ma isi? Pe faapeī lo’u onosai ma le faaaloalo? Pe faapeī lo’u tausiaina o lo’u tino? Pe faapeī le malosi o le a ou tatalo ai ma suesue ai i tusitusiga paia? Ou te manatu, i le tasi itu po o le isi itu, i nisi lava taimi tatou te iloaina uma ai e “toe tasi lava le aso”—o se iloaina e tatau ona tatou faaaogaina ai ma le atamai le taimi ua tatou mauaina.
I le Feagaiga Tuai ua tatou faitau ai i le tala ia Esekia, le tupu o Iuta. Na faailoa atu e le perofeta o Isaia ia Esekia o le a faamutaina lona soifua. Ina ua ia faalogo i upu a le perofeta, sa amata ona tatalo, aioi, ma tagi lotulotu Esekia. O lena mea na tupu, sa faaopoopo ai e le Atua tausaga e 15 i le soifuaga o Esekia. (Tagai Isaia 38:1–5.)
Afai ua ta’u mai ia i tatou e puupuu se taimi tatou te ola ai, atonu o le a tatou ole atu foi mo nisi aso e ola ai ona o mea sa tatau ona tatou faia pe na ese ona faia.
Tusa lava po o le a le taimi a le Alii, i Lona atamai, e fuafuaina e tuuina mai ia i tatou taitoatasi, le mea e tasi e mafai ona tatou mautinoaina: ua tofu i tatou uma ma le “asō” e ola ai, ma o le ki i le faamanuiaina o lo tatou aso o le naunau lea e ositaulaga.
Na fetalai mai le Alii, “Faauta, ua ta’ua nei o le asō seia oo i le afio mai o le Atalii o le Tagata, ma e moni o se aso o le taulaga” (MF&F 64:23; faaopoopo le faamamafa).
O le upu taulaga e sau mai upu Latini o le sacer, o lona uiga o le “paia,” ma le facere, o lona uiga “ia faia,” i nisi upu o le faia o mea ia paia, o le aumaia lea o le mamalu ia i latou.
“O le taulaga [e] maua ai manuia” (“Viia Le na Fetaiai ma Ieova,” Viiga, nu. 15).
O a ni auala o le a anoa ai ma faamanuiaina ai e ositaulaga o tatou aso?
Muamua, o le taulaga patino e faamalosia ai i tatou ma aumaia ai le taua i mea tatou te ositaulaga ai.
I nai tausaga ua mavae i le Aso Sa anapogi, na sau ai se tamaitai faatagamatua i le pulelaa e faasoa atu lana molimau. Sa nofo o ia i le aai e ta’ua o Iquitos, o le Amasone o Peru. Sa ia tau mai ia i matou e faapea, mai le taimi o lona papatisoga, sa ia te ia e le aunoa le sini o le mauaina o sauniga o le malumalu i Lima, Peru. Sa ia totogiina faamaoni se sefuluai atoa ma sefe ana tupe itiiti mo le tele o tausaga.
O lona fiafia i le alu i le malumalu ma mauaina o sauniga paia i totonu na faaalia i upu nei: “O le asō ua mafai ai ona ou fai atu ua iu lava ina ou lagona le saunia e ulu atu i le veli. O a’u o se tamaitai sili ona fiafia i le lalolagi; na ou sefea se tupe, tou te lei iloaina po o le a le umi, e asiasi ai i le malumalu, ma i le mavae ai o aso e fitu i luga o le vaitafe ma le 18 itula i le pasi, ua iu lava ina ou i ai i le maota o le Alii. I le tuua ai o lena nofoaga paia, sa ou fai ifo ia te a’u lava, i le mavae ai o osigataulaga uma na manaomia mo a’u e sau ai i le malumalu, o le a ou le tuuina atu i soo se mea e aumaia ai ia te a’u le manatu mama i sauniga ia na ou faia; o le a maimau lava. O se tautinoga taua tele lenei mea!”
Sa ou iloaina mai lenei tamaitai lelei o le ositaulaga patino o se uunaiga taua tele lea e musuia ai a tatou filifiliga ma naunautaiga. O le ositaulaga patino e musuia ai a tatou faatinoga, a tatou tautinoga ma feagaiga ma faia ai mea paia ia anoa.
Lua, o ositaulaga tatou te faia mo isi, ma o loo faia e isi mo i tatou, e aumaia ai faamanuiaga i tagata uma.
A o ou aoga i le aoga fa’inifo, sa foliga le lelei le lumanai tautupe o lo matou tamaoaiga i le lotoifale. O le pau maualalo o le tau o oloa na matua faaitiitia ai le taua o tupe mai le tasi aso i le isi.
Ou te manatua le tausaga sa tatau ai ona ou lesitala i vaega o foma’i tipitipi;sa manaomia lo’u mauaina o masini tipitipi uma talafeagai ae ou te lei lesitala i lena semesa. Na sefe e o’u matua tupe na manaomia. Ae i se tasi po sa tupu ai se mea matautia. Sa matou o e faatau ia masini, ae iloaina ai o tupe ia na ia i matou na pau le mea na lava e faatau ai e na o le pea o faaū [po o palaea]—ma e leai ma se isi mea. Sa matou toe foi i le fale e aunoa ma se mea na faatauina ma le faanoanoa i le mafaufau ai o le a le mafai ona ou auai atu i se semesa o le kolisi.Peitai, na faafuasei lava ona fai mai lo’u tina, “Teila, sau ta o; ta o i le taulaga.”
Sa ma o i le taulaga i le mea lea e tele nofoaga e faatau mai ai ma faatau atu ai asoa ma teuga faapena. Ina ua ma taunuu i se tasi faleoloa, sa ave i fafo e lo’u tina mai lana ato se tamai taga veloveta lanumoana o loo i ai se taulima auro aulelei o loo i ai se fuaitau e faitauina faapea, “Mo lo’u afafine pele mai lou tama.” O se taulima sa tuuina atu ia te ia e lo’u tama matua i se tasi o ona aso fanau. O iina lava, i luma o o’u mata, sa ia faatauina atu ai.
Ina ua ia mauaina le tupe, sa ia fai mai ia te a’u, “Afai e i ai se mea e tasi ou te mautinoaina, o le a avea oe ma se foma’i nifo. Alu ma faatau uma masini e te manaomia.” Mata e mafai ona e mafaufau po o le a le ituaiga tagata aoga sa ou avea ai mai lena lava taimi? Sa ou manao ia avea ma tagata aoga sili ma faamaea vave a’u suesuega ona sa ou iloa le maualuga o le tau o le ositaulaga sa ia faia.
Sa ou aoao o le ositaulaga e faia e e pele mo i tatou e faafouina ai i tatou e pei o se vai malu i le ogatotonu o le toafa. O sea ituaiga ositaulaga e aumai ai le faamoemoe ma le uunaiga.
Tolu, soo se osigataulaga tatou te faia e itiiti lava pe a faatusalia i le taulaga a le Alo o le Atua.
O le a le tau e oo lava i se taulima auro pele pe a faatusalia i le taulaga a le Alo moni o le Atua? E faapefea ona tatou faamamaluina lena taulaga e le gata? Ia manatuaina i aso taitasi e i ai lava se aso e tasi e mafai ona tatou ola ai ma ia faamaoni ai. Na aoao mai Amoleka: “Ioe, ou te manao ia outou o mai ma aua le toe faamaaaina o outou loto; aua faauta, o le taimi ma le aso lenei o lo outou olataga; ma o lea, afai tou te salamo ma le faamaaaina o outou loto, o le taimi nei lava o le a faataunuu ai le fuafuaga tele o le togiolaina ia te outou.” (Alema 34:31). I nisi upu, afai o le a tatou ofo atu i le Alii le taulaga o le loto momomo ma le agaga salamo, o le a faafuasei lava ona faaali mai i o tatou olaga faamanuiaga o le fuafuaga sili o le fiafia.
Ua mafai e le fuafuaga o le togiolaina e faafetai ai i le taulaga a Iesu Keriso. E pei ona faamatalaina e Ia Lava, o le taulaga, “na oo ai ia te a’u lava, o le Atua lava lea, o lē ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga—ma manao ai ia Ou lē inuina le ipu oona, ma maʼeʼeʼe” (MF&F 19:18).
Ma ona o lenei taulaga, i le mavae ai o le mulimuli i le faagasologa o le salamo faamaoni, e mafai ai ona tatou lagona le siitia o le mamafa o a tatou mea sese ma agasala. O le mea moni, o le tausalaina, maasiasi, tiga, faanoanoa, ma le vaai maualalo ia i tatou lava ua suitulaga i le manino o le mafaufau, fiafia, olioli, ma le faamoemoe.
I lena lava taimi, a o tatou faamamaluina ma faafetai ai mo Lana taulaga, e mafai ona tatou maua i se fuataga sili le naunautaiga malosi ia avea ma fanau sili ona lelei a le Atua, ia aloese mai le agasala, ma ia tausia feagaiga e pei e le’i faia muamua.
Ona, faapei lea o Enosa ina ua mavae le mauaina o le faamagaloga o ana agasala, o le a tatou lagona le manao ia ositaulaga atu i tatou lava ma ia saili le soifua lau lelei o o tatou uso ma tuafafine (tagai Enosa 1:9). Ma o le a sili atu ona tatou naunau i le “toe tasi lava se aso” e mulimuli ai i le valaaulia a Peresitene Howard W. Hunter ua tuuina mai ia i tatou ina ua ia saunoa mai: “Fonofono se feupuaiga. Sailia se uo ua galo atu. Faaseloa ai le masalosalo ae suia i le faatuatuaina. … Tuu atu se tali filemu. Faamalosiau i le autalavou. Faailoa atu lou lotonuu i upu ma galuega. Tausi se folafolaga. Faaseloa se mea e te le fiafia ai. Faamagalo se fili. Faatoese. Taumafai ia malamalama. Vailiili mea e te manao ai mai isi. Mafaufau muamua i se isi tagata. Ia agalelei. Ia agamalu. Ia faatele laitiiti le ata. Faaali atu lou lotofaafetai. Faafeiloai atu i se tagata ese. Faafiafia se loto o se tamaitiiti.Ta’u atu lou alofa ma toe ta’u atu” (Aoaoga a Peresitene o le Ekalesia: Howard W. Hunter [2015], 33; faatusatusa i le “What We Think Christmas Is,” McCall’s, Dec. 1959, 82–83).
Tau ina ia tatou faatumuina o tatou aso i lena naunautaiga ma le malosi tatou te mauaina mai le ositaulaga patino ma le taulaga tatou te faia pe mauaina mai i isi. Ma i se auala faapitoa, tau ina ia tatou fiafia i le filemu ma le olioli lea e ofoina mai ia i tatou e le taulaga a le Toatasi na Fanaua; ioe, lena filemu lea na ta’ua pe a tatou faitau na pau Atamu ina ia i ai tagata, ma ua i ai tagata—o outou—ina ia tou maua le olioli (tagai 2 Nifae2:25). O lena olioli o se olioli moni lea e na o le taulaga ma le Togiola a le Faaola o Iesu Keriso e mafai ona maua ai.
O la’u tatalo ia tatou mulimuli ia te Ia, ia tatou talitonu ia te Ia, ia tatou alolofa ia te Ia, ma ia tatou lagona le alofa ua faatinoina e ala i Lana taulaga i taimi uma tatou te maua ai le avanoa ia ola ai i le toe tasi lava le aso. I le suafa o Iesu Keriso, amene.