O Mea Uma Lava e mo Tagata
O le Ekalesia o mea uma lava e mo outou, o soo o le Alii---o i latou o e alolofa ma mulimuli ia te Ia ma o e ua tauaveina Lona suafa i o latou luga e ala i feagaiga.
A o tapenapena mo le fauga o le Malumalu matagofie o Pale i Farani, sa i ai so’u aafiaga o le a le galo lava ia te au. I le 2010, ina ua maua se fanua mo le malumalu, sa talosaga mai le pulenuu o le aai matou te feiloai ina ia iloa atili ai e uiga i la tatou Ekalesia. O lea fonotaga o se laasaga taua tele mo le mauaina o se pemita e fau ai. Sa matou tapenaina ma le matua faaeteete lava se tolaulauga sa aofia ai le mau ata mananaia o malumalu o Aso e Gata Ai. O lo’u faamoemoega aupito faananau sa i ai ia lava le matagofie o o latou atatosi faavae e faaosofia ai le pulenuu e lagolago la matou galuega faatino.
Na faateia au, ona sa faailoa mai e le pulenuu e faapea nai lo le matamata i la matou tolaulauga, sa sili ia te ia ma lana ‘au le faia o sa latou lava sailiiliga e iloa tonu ai pe o le a le ituaiga lotu e i ai i matou. O le masina na sosoo ai, sa toe valaaulia i matou e faalogologo i se lipoti na tuuina mai e se konesula o le aai, o ia foi o se polofesa o talafaasolopito faalelotu. Sa ia faapea mai, “E ese mai i lo isi mea uma lava, sa matou fia malamalama pe o ai tagata o la outou ekalesia. Muamua, sa matou auai atu i se tasi o a outou sauniga faamanatuga. Sa matou nonofo i tua o le falesa ma matauina ma le toto’a ia tagata i le potopotoga ma a latou mea sa fai. Ona matou feiloai lea ma o outou tuaoi—o i latou e nonofo latalata i lo outou faleautu o le siteki—ma sa matou fesili i ai pe o a ituaiga o tagata e i ai outou o Mamona.”
“O a la ni a outou faaiuga?” Sa ou fesili atu ai, ua lagonaina si tau popole. Sa ia tali mai, “Sa matou maua ai o Le Ekalesia a Iesu Keriso o le Au Paia o Aso e Gata Ai e aupito sili ona latalata i le uluai Ekalesia a Iesu Keriso nai lo se isi lava lotu ua matou iloa.” Sa toeitiiti lava a ou tetee i le fai atu, “E le o atoatoa le sa’o o lena mea! E le o le ekalesia e sili ona latalata; o le Ekalesia a Iesu Keriso—o le Ekalesia lava e tasi, le Ekalesia moni!” Ae sa ou taofiofi a’u lava ia ma nai lo lena, sa tuuina atu se tatalo le leoa o le agaga faafetai. Ona fautuaina lea o i matou e le pulenuu, e faavae i luga o mea na latou mauaina, e leai se mea e tetee ai o ia ma lana ‘au i le fauga o se malumalu i lo latou nuu.
O le taimi nei, pe a ou mafaufau i lena aafiaga faavavega, ou te lagona lava le agaga faafetai mo le poto o le pulenuu ma le agaga o le iloatino. Sa ia iloaina o le ki i le malamalama i le Ekalesia e le o le vaai i ai e ala i se foliga i fafo o ona fale, po o se faapotopotoga faatulagaina lelei, ae ala i le fiamiliona o tagata faamaoni o le ekalesia, o e taumafai i aso taitasi e mulimuli i faataitaiga a Iesu Keriso.
O le faauigaga o le Ekalesia atonu e mafua mai i se fuaitau i le Tusi a Mamona o loo faapea mai: “Ma o i latou [o lona uiga o soo o le Alii] na papatisoina i le suafa o Iesu sa taua o le ekalesia a Keriso.”
I se isi faaupuga, o le Ekalesia o mea uma lava e mo tagata. O mea uma e mo outou, o soo o le Alii---o i latou o e alolofa ma mulimuli ia te Ia ma o e ua tauaveina Lona suafa i o latou luga e ala i feagaiga.
Na faatusa e Peresitene Russell M. Nelson i se tasi taimi le Ekalesia i se taavale manaia. Tatou te fiafia uma lava pe a mama ma iila la tatou taavale. Ae o le faamoemoega o le taavale e le o le tulagaese mai o se masini manaia; ae e mo le feaveaiina o tagata o i totonu o le taavale. I se tulaga lava foi e tasi, o i tatou, o tagata o le Ekalesia, e talisapaia le i ai o nofoaga matagofie e tapuai ai e mama ma lelei ona tausi, ma e tatou te fiafia foi i le i ai o polokalama e lelei ona faatino. Peitai o nei mea ua na o ni faiga e lagolago ai. O lo tatou faamoemoega tupito o le valaaulia lea o atalii ma afafine taitasi o le Atua e o mai ia Keriso ma ia taialaina o ia i luga o le ala o le feagaiga. E leai se mea e sili atu ona taua. O la tatou galuega ua na o tagata lava ma feagaiga.
Pe ua le ofoofogia ea o le igoa na tuuina mai e ala i faaaliga i le Ekalesia toefuataiina ua fusia faatasi ai elemene aupito taua e lua i feagaiga taitasi o le talalelei? Muamua o le suafa o Iesu Keriso. O le Ekalesia lenei o Lana lava, ma o Lana Togiola faapaiaina ma feagaiga ua na o le pau lea o le ala i le faaolataga ma le faaeaga. O le igoa lona lua e faasino ia i tatou: o le Au Paia, pe i se isi faaupuga, o Ana molimau ma Ona so’o.
Sa ou aoaoina le taua o le taulai atu i tagata ina ua avea au o se peresitene o le siteki i Farani. I le amataga o la’u auaunaga, sa ou mafaufau i ni nai sini e le faigofie ona ausia mo le siteki: o le fatuina o ni uarota fou, o le fauina o ni faletapuai fou, e oo lava i le fausiaina o se malumalu i lo matou eria. Ina ua faamalolo a’u i le ono tausaga mulimuli ane, e leai ma se tasi o nei faamoemoega na ausia. Sa mafai ona faapea o se toilalo atoatoa, sei vagana ai i le gasologa o na tausaga e ono, sa fai si ese o o’u faamoemoega.
A o ou nofo i luga o le tulaga i le aso na faamalolo ai au, sa lofituina au i se lagona maoae o le agaga faafetai ma i mea ua ausia. Sa ou vaai i foliga o le faitau selau o tagata na auai. Sa mafai ona ou toe manatua aafiaga e o faatasi ma le taitoatasi o i latou.
Sa i ai na uso ma tuafafine sa ulu ifo i le vai o le papatisoga, o i latou sa ou sainia a latou pepa faataga muamua o le malumalu ina ia mafai ona latou maua sauniga paia o le malumalu, ma na talavou ma ulugalii sa ou vaetofiaina pe faamalolo mai le avea ai ma faifeautalai faamisiona. Sa tele isi sa ou galue ai a o feagai ma tofotofoga ma puapuaga i o latou olaga. Sa ou lagonaina le alofa o’oo’o faaleuso mo i latou taitoatasi. Sa ou maua le olioli mama i le tautuaina o i latou ma olioli i lo latou lotonuu faateleina ma le faatuatua i le Faaola.
Na aoao mai Peresitene M. Russell Ballard, “O le mea aupito taua i o tatou tiutetauave faale-Ekalesia e le o fuainumera ia o loo lipotia po o fonotaga o loo faia ae pe ua siitia ma faamalosiauina ma suia a’ia’i---le auaunaga i tagata taitasi i le taimi----e faapei ona sa faia ai e le Faaola.”
O’u uso e ma tuafafine pele, pe o tatou malolosi ea i le talalelei, pe ua na ona tatou pisi lava i galuega a le Ekalesia? O le ki o le mulimuli lea i le faataitaiga a le Faaola i mea uma. Afai tatou te faia lena mea, o le a tatou taulai atu lava faalenatura i le laveaiina o tagata taitasi nai lo le faatinoina o galuega ma faatino ia polokalama.
Pe ua e fesili ifo ea ia te oe lava pe mata e faapefea pe afai e asiasi atu le Faaola i lau uarota po o le paranesi i le aso Sa a sau? O le a se mea Na te faia? Pe o le a popole ea o Ia ia iloa pe o lelei fesoasoaniga vaaia pe o faatutu lelei nofoa i le potuaoga? Pe o le a Ia sailia se tasi e mafai ona Ia alofa i ai, aoao, ma faamanuia? Atonu o le a Ia sailia se tagata auai fou po o se uo e faafeiloai, se uso ma’i po o se tuafafine e manaomia se faamafanafanaga, po o se talavou o fetotoa’i o loo manaomia ona siitia ma faamalosiauina.
O a vasega o le a asiasi i ai Iesu? O le a ou le ofo pe afai e asiasi muamua o Ia i tamaiti o le Peraimeri. Atonu o le a tootuli o Ia i lalo ma talanoa atu a o silasila sa’o atu i o latou mata. O le a Ia faaali atu Lona alofa ia i latou, faamatala atu ni tala, faamalo atu ia i latou ia latou tusigaata, ma molimau atu i Lona Tama o i le Lagi. O le a faigofie Ona uiga faaalia, faamaoni a’ia’i, ma e aunoa ma se fialelei. Pe mafai ona tatou faia faapena?
Ou te folafola atu pe a outou taumafai e fai le mea ua finagalo le Alii tou te fai, e leai se mea o le a sili atu ona taua nai lo le sailia o i latou e mafai ona e fesoasoani i ai ma faamanuia. I le lotu o le a outou taulai atu i le aoaoina o tagata taitoatasi ma pa’i atu i o latou loto. O lo outou popolega o le a atia’e ai se aafiaga faaleagaga nai lo le faatulagaina o se gaoioiga atoatoa, e galulue ai mo o outou uso a tagata nai lo le sailia o se viiga mo le aofaiga o asiasiga na e faia. O le a le faatatau ia te oe ae faatatau ia i latou o e ua tatou faaigoaina o o tatou uso ma o tatou tuafafine.
O nisi taimi tatou te talanoa ai e uiga i le o i le lotu. Ae o le Lotu ua le na o se fale po o se nofoaga patino. E tutusa lava le moni ma le ola i nofoaga aupito faatauvaa i vaega aupito mamao o le lalolagi e faapei foi ona i ai iinei i le laumua o le Ekalesia i le Aai o Sate Leki. O le Alii lava Ia na fetalai, “Aua o le mea ua faapotopoto ai se toalua po o se toatolu i lo’u igoa, ou te i ai faatasi ma i latou.”
Tatou te tauaveina le Ekalesia ma i tatou i soo se mea tatou te o i ai: i le galuega, i le a’oga, i tafaoga, aemaise ai lava i o tatou fale. O lo tatou i ai ma tosinaga e mafai ona lava e faia ai po o fea lava tatou te i ai, o se nofoaga paia.
Ou te manatua se ma talatalanoaga ma se uo e le o se tasi o lo tatou faatuatuaga. Sa faateia o ia i le iloa ai e soo se alii agavaa lava i la tatou Ekalesia e mafai ona maua le perisitua. Sa ia fesili, “Ae toafia i latou e umia le perisitua i lau uarota?”
Sa ou tali atu, “E i le va o le 30 ma le 40.”
Ma le fenumiai, sa ia toe fai mai, “I la’u aulotu, e na o le tasi le matou faitaulaga. Aisea tou te manaomia ai ni ositaulaga se toatele i le taeao o le Aso Sa?”
Ona o le tosina atu i lana fesili, sa musuia ai au e tali atu, “Ou te ioe atu. Ou te le manatu e manaomia se toatele o e umia le perisitua i le lotu i le Aso Sa. Ae tatou te manaomia se e umia le perisitua i aiga taitasi. Ma a leai se umia le perisitua i se aiga, e valaauina isi e i ai le perisitua e vaavaaia ma auauna atu i lena aiga.”
O la tatou ekalesia ua le na o se ekalesia mo le Aso Sa. O a tatou tapuaiga e faaauau i aso taitasi o le vaiaso, pe o fea lava tatou te i ai ma pe o a foi mea tatou te fai. O o tatou fale i se tulaga patino o: nofoaga autu ia e faatino ai lo tatou faatuatua.” O le tele o taimi i o tatou fale tatou te tatalo ai, tatou te faamanuia, tatou te suesue, tatou te aoao atu le afioga a le Atua, ma tatou feauaunaa’i ai i le alofa mama a’ia’i. E mafai ona ou molimau atu mai lo’u aafiaga patino o o tatou fale o nofoaga paia ia e mafai ona tele le Agaga e maua ai—e faapei, ma o nisi taimi e sili atu nai lo, i o tatou nofoaga aloaia o tapuaiga.
Ou te molimau atu o lenei Ekalesia o le Ekalesia a Iesu Keriso. O lona mana ma le malosiaga e maua mai faatinoga i aso taitasi a le faitau miliona o Ona soo o e o loo taumafai i aso taitasi e mulimuli i Lana faataitaiga maoae e ala i le tausia o isi. O loo soifua Keriso, ma o loo Ia taitaia lenei Ekalesia. O Peresitene Russell M. Nelson o le perofeta ua Ia filifilia e taitai ma taiala i tatou i o tatou taimi. Ou te molimau atu ai i nei mea, i le suafa o Iesu Keriso, amene.