Agamalu ma Maualalo i le Loto
O le agamalu o se uiga manino lea o le Togiola ma e iloagofie i le tali atu ma le amiotonu, gauai atu ma le loto i ai, ma le malosi o le amio pulea.
Ou te olioli i le avanoa paia e lagolago ai o tatou taitai o le Ekalesia, ma ou te faafeiloai atu ma lou loto atoa ia Elder Gong ma Elder Soares i le Korama a Aposetolo e Toasefululua. O auaunaga a nei tamalii faamaoni o le a faamanuiaina ai tagata taitoatasi ma aiga i le lalolagi atoa, ma ou te naunau e auauna ma aoao mai ia i laua.
Ou te tatalo o le a aoaoina ma faamalamalamaina e le Agaga Paia i tatou a o tatou aoao faatasi e uiga i se vaega taua o le natura paia o le Faaola lea e tatau ia i tatou taitoatasi ona tauivi e mulimuli i ai.
O le a ou tuuina atu ni nai faataitaiga e faamamafa ai lenei uiga auau mama FaaKeriso ae lei faailoaina le uiga paia patino i se taimi o mulimuli mai i la’u savali. Faamolemole ia faafofoga toto’a i faataitaiga taitasi ma mafaufau faatasi ma a’u i ni tali talafeagai i fesili o le a ou tuuina atu.
Faataitaiga #1. O Le Alii Talavou Mauoa ma Amuleka
I le Feagaiga Fou, ua tatou aoao ai e uiga i le alii talavou mauoa lea sa fesili atu ia Iesu, “Le Matai Lelei e, o a ni mea lelei e tatau ona ou faia, ina ia ou maua ai le ola e faavavau?” Sa muamua lava ona apoapoai atu le Faaola ia te ia e tausi i poloaiga. Na sosoo ai ma le tuuina atu e le Matai i le alii talavou o se mea faaopoopo e manaomiaina ua maoti i ona manaoga ma tulaga patino.
“Ua tali atu Iesu ia te ia, Afai e te manao ina ia atoatoa ona lelei o lau amio, ia e alu ma e faatau atu au mea, i le e avatu ai i e matitiva, ona ia te oe lea o le faula’igaoloa i le lagi, i le e sau ma mulimuli mai ia te au.
“Ua faalogo le taulealea i lea upu, ona alu ese ai lea o ia ma le tiga, aua e tele lava ana mea.”
Faatusatusa le tali a le alii talavou mauoa ma le aafiaga o Amuleka, e pei ona faamatalaina i le Tusi a Mamona. O Amuleka o se tagata galue malosi ma tamaoaiga sa tele ona aiga ma uo. Sa ia faamatalaina o ia lava o se tagata sa valaauina i le tele o taimi ae sa le faalogo; o se tagata na iloaina mea a le Atua ae na te lei iloaina. O se alii lelei masani, sa faalavelaveina Amuleka i popolega faalelalolagi e pei foi o le alii talavou mauoa o loo faamatalaina i le Feagaiga Fou.
E ui sa ia faamaaaina muamua lona loto, ae sa usitai Amuleka i le siufofoga o se agelu, sa talia le perofeta o Alema i lona fale, ma tuuina atu se taumafataga ia te ia. Sa fagua faaleagaga o ia i le taimi o le asiasiga a Alema ma sa valaauina ai e talai atu le talalelei. Ona lafoai ese lea e Amuleka o “ana auro uma, ma ario, ma ana mea taua uma … mo le afioga a le Atua, [ma sa] teena o ia e i latou o e sa avea ma ana uo ma lona tamā foi ma ona aiga.”
O le a sou manatu i le mafuaaga o le eseesega o tali a le alii talavou mauoa ma Amuleka?
Faataitaiga #2. Pa’orana
I se vaitau matautia o taua o loo faamatalaina i le Tusi a Mamona, sa faia ai se fetusia’iga i le va o Moronae, le taitaiau o le autau a sa Nifae, ma Pa’orana, le faamasino sili ma le kovana o le laueleele. O Moronae, o le ana le autau sa mafatia ona o le le lava o le lagolago mai le malo, sa tusi atu ia Pa’orana, “e ala i le tausalaina” ma tuua’ia o ia ma ona uso a taitai i le le magafagafa, faapalapala, faatamala, ma oo lava i le faalata.
Sa ono faigofie ia Pa’orana ona tetee ia Moronae ma ana tuua’iga le sa’o, ae sa ia lei faia. Sa ia tali atu ma le agaalofa ma faamatala atu i ai se fouvalega faasaga i le malo lea sa lei iloa e Moronae. Ona tautino atu lea o Pa’orana:
“Faauta, ou te fai atu ia te oe, Moronae, ou te le olioli i o outou puapuaga tele, ioe, ua faanoanoa tele ai lou agagal. …
“… Ua e tausalaina au i lau tusi, ae ua le afaina lea; ou te le o ita, a ua ou olioli i le tele o lou loto.”
O le a sou manatu i le mafuaaga o le tali onosai a Pa’orana i tuua’iga a Moronae?
Faataitaiga #3. Peresitene Russell M. Nelson ma Peresitene Henry B. Eyring
I le konafesi aoao i le ono masina talu ai, sa faamatala ai e Peresitene Russell M. Nelson lana tali atu i le valaaulia a Peresitene Thomas S. Monson e suesue, mafaufau loloto, ma faaaoga upumoni o loo i ai i le Tusi a Mamona. Fai mai a ia: “Ua ou taumafai e mulimuli i lana fautuaga. Faatasi ai ma isi mea, ua ou faia ni lisi o mea e uiga i le Tusi a Mamona, o mea na te faamautuina, o mea na te faamaoniaina le sese, o mea na te faataunuuina, o mea na te faamaninoina, ma mea na te faaalia mai. O le suesueina o le Tusi a Mamona i lena auala ua avea ma se faatinoga malamalama ma musuia! Ou te fautuaina atu ia te outou taitoatasi.”
Sa faapena foi ona faamamafaina e Peresitene Henry B. Eyring le taua i lona olaga o le talosaga a Peresitene Monson. Sa ia matauina:
“Ua ou faitauina ai lava le Tusi a Mamona i aso uma mo le silia ma le 50 tausaga.E masalo la e tonu lava lo’u manatu o upu a Peresitene Monson e faatatau i se isi tagata. Ae, e pei o le toatele o outou, sa ou lagonaina le faamalosiauga a le perofeta ma o lana folafolaga ua valaaulia ai a’u e fai se taumafaiga sili atu. …
“O le taunuuga fiafia mo a’u, ma mo le toatele o outou, o le mea lea na folafola mai e le perofeta.”
O le a sou manatu i le mafuaaga o le vave tali atu ma le loto faamaoni o nei taitai e toalua o le Ekalesia a le Alii i le valaaulia a Peresitene Monson?
Ou te le o fautuaina atu o tali faaleagaga malolosi a Amuleka, Paorana, Peresitene Nelson ma Peresitene Eyring o loo faamatalaina e le uiga auau mama e tasi FaaKeriso. Ae mautinoa lava, o le tele o uiga ma aafiaga fesootai faatasi na taitai atu i le matua faaleagaga lea na atagia mai i olaga o nei auauna malualii e toafa. Ae ua faamamafa mai e le Faaola ma Ana perofeta se uiga auau mama taua lea e manaomia e i tatou uma ona malamalama atoatoa atili i ai ma tauvi ia atiaeina i o tatou olaga.
Agamalu
Faamolemole ia matau le uiga na faaaoga e le Alii e faamatala ai o Ia lavai le mau lenei: “Ia outou amoina la’u amo, ma ia outou faaa’oa’o ia te a’u, aua o a’u le agamalu ma le loto maulalo: ona maua lea e outou o le malologa mo outou agaga.”
O se aoaoga ia i tatou le filifilia e le Faaola e faamamafa le agamalu mai isi uma uiga paia ma amioga mama sa ono mafai lava ona Ia filifilia.
O se mamanu talitutusa ua manino mai i se faaaliga na maua e le Perofeta o Iosefa Samita i le 1829. Na tautino mai le Alii, “Aoao mai ia te aʼu, ma faalogo mai i aʼu upu; savali i le agamalu o lo’u Agaga, ma o le a e maua ai le filemu ia te aʼu.”
O le agamalu o se uiga manino lea o le Togiola ma e iloa gofie i le tali atu ma le amiotonu, gauai atu ma le loto i ai, ma le malosi o le amio pulea. O lenei uiga auau mama ua fesoasoani lea ia i tatou ia malamalama atoatoa atili ai i tali patino a Amuleka, Paorana, Peresitene Nelson, ma Peresitene Eyring.
Mo se faataitaiga, sa tali vave atu ma le amiotonu Peresitene Nelson ma Peresitene Eyring i le uunaiga a Peresitene Monson e faitau ma suesue le Tusi a Mamona. E ui sa auauna atu uma tamalii nei i tofiga taua ma lauiloa o le Ekalesia ma sa umi ona suesueina tusitusiga paia mo le tele o tausaga, ae sa la’ua faaalia lava i a la tali le le faatuai [e tali atu] po o se lagona faasausili o le tagata i lona lava ia taua.
Sa gauai atu ma le naunautai Amuleka i le finagalo o le Atua, ma taliaina se valaauga e talai atu le talalelei, ma lafoai ai i tua ona tulaga mafanafana ma mafutaga faaleaiga. Ma sa faamanuiaina Pa’orana i le vaaiga ma le malosi o le amio pulea e faatino ai nai lo le tali faasa’eā e pei ona ia faamalamalama atu ia Moronae ia luitau na tulai mai se fouvalega faasaga i le malo.
O le uiga auau mama FaaKeriso o le agamalu e tele ina malamalama sese i ai lo tatou lalolagi i nei aso. O le agamalu e malosi, e le vaivai; e mataalia, e mataala; lototele, e le popolevale; e loto pulea, e le soona fai; e tauagafau, e le faasausili; ma agaalofa, ae le amio pa’a’a. O se tagata agamalu e le faaitagofie, e le faafoliga, pe faafefeteina ma e vave ona faamamalu i ausiaga a isi tagata.
E ui o le lotomaualalo na te faamatalaina lautele le faalagolago atu i le Atua ma le manaoga faifai pea mo Lana taitaiga ma le lagolago, ae o se uiga tulaga ese o le agamalu o le taliaina gofie patino ma faaleagaga o aoaoga mai le Agaga Paia ma tagata o e atonu e foliga mai e itiiti se gafatia, potomasani, po o le a’otauina, o e atonu e le o umiaina ni tofiga taua, po o e foi e le o foliga mai e tele se mea e saofaga ai. Toe manatu i le auala na faatoilalo ai e Naamanu, le taitaiau o le autau a le tupu o Suria, lona faamaualuga ma taliaina ai ma le agamalu le fautuaga a ana auauna ia usitai i le perofeta o Elisaia. O le agamalu o le puipuiga autu lea mai le faatauasoina e le faamaualuga lea e tele ina alia’e mai tulaga lauiloa, tofiga, pule, oa, ma viiga a tagata.
Agamalu—o se Uiga FaaKeriso ma se Meaalofa Faaleagaga
O le agamalu o se uiga e atiaeina e ala i le manao, faaaogaaga ma le amiotonu o le faitalia, ma le tauivi pea e faatumauina se faamagaloga o a tatou agasala. O se meaalofa foi faaleagaga lea tatou te mafai ona sailia ma le tatau. Peitai, e tatau ona tatou manatuaina, o faamoemoega ia e maua ai se faamanuiaga faapea, e faamanuiaina ai ma auauna atu ai i fanau a le Atua.
A tatou o mai ma mulimuli i le Faaola, tatou te faateleina i sina mea itiiti mai lea taimi i lea taimi o le a mafai ai ona tatou avea atili e faapei o Ia. Ua faamanaina i tatou e le Agaga i le puleaina ma le faautauta o le tagata lava ia ma se amio toafimalie ma le mausali. O lea, o le agamalu o le mea lea e avea ai i tatou ma ni soo o le Matai ae le na o se mea tatou te faia.
“O Mose sa aoaoina i le poto uma lava o Aikupito; ua malosi i ana upu ma ana mea na faia.” Ae, o ia, “sa matua agamalu lava e sili lava i tagata uma o i le lalolagi.” O lona poto ma tomai sa ono mafai ona faatupuina ai lona faamaualuga. Ae, o le uiga ma le meaalofa faaleagaga o le agamalu lea sa faamanuiaina ai o ia sa faaitiitia ai le faamaualuga i lona olaga ma faalauteleina ai Mose e fai ma tufugaaao e faataunuu ai faamoemoega o le Atua.
O le Matai e fai ma Faataitaiga o le Agamalu
O faataitaiga aupito sili ona mamalu ma anoa o le agamalu o loo maua i le soifuaga o le Faaola Lava Ia.
O le Togiola Sili, o le na “afio ifo o ia i lalo o mea uma” ma puapuagatia, maligitoto, ma maliu “ia faamama mai ia i tatou ia amioletonu uma lava,” ma mulumulu i vae pefupefua o Ona soo. O lea agamalu o se uiga tulaga ese lea o le Alii i le avea ai o se auauna ma taitai.
Ua saunia e Iesu le faataitaiga silisili o le tali atu ma le amiotonu ma le gauai atu ma le loto i ai a o Ia puapuagatia ai i tiga matuitui i Ketesemane.
Ua oo atu o ia i lea mea, ona fetalai atu lea o ia [i Ona soo], Ia outou tatalo nei oo mai le faaosoosoga ia te outou.
“Ona … tootuli ai lea o ia, ua tatalo,
“Ua faapea atu, Lo’u Tama e, a e finagalo i ai, ia e ave ese lenei ipu ia te au; a e aua le faia lo’u loto, a o lou finagalo.”
O le agamalu o le Faaola i lenei aafiaga taua e faavavau ma tiga matuitui ua faaalia ai mo i tatou taitoatasi le taua o le faamuamuaina o le poto o le Atua i luga atu o lo tatou lava poto.
O le gauai atu faifai pea ma le loto i ai o le Alii ma le malosi o le lotopulea e faagaeetiaina uma ma aoga mo i tatou uma.Ina ua taunuu atu se vaega faaauupegaina o leoleo o le malumalu ma fitafita Roma i Ketesemane e taofia ma moliaina Iesu, sa se’i e Peteru lana pelu ma tipi ese ai le taliga taumatau o le auauna a le faitaulaga sili. Ona pa’i atu lea o le Faaola i le taliga o le auauna ma faamalolo ia te ia. Faamolemole ia matau sa Ia aapa atu ma faamanuia i lē o le a pueina o Ia e faaaoga ai le mana faalelagi lava e tasi lea semanu na mafai ona taofia ai o Ia mai le pu’eina ma faasatauroina.
Mafaufau foi i le auala na tuua’ia ai ma ta’usalaina le Matai i luma o Pilato ina ia faasatauroina. Sa tautino atu e Iesu i le taimi o Lona faalataina “Fa te oe ea ou te le mafaia ona aioi atu nei i lo’u Tama, ona aauina mai ai lea e ia ia te au o agelu e sili ona toatele i lekeona e sefulu ma le lua?” Ae, o le “Faamasino e Faavavau o e ola ma e oti” sa faamasinoina i se tulaga sa feteenai ma faiga masani i luma o se tagata sa tofia lē tumau i se tulaga faaupufai. “A ua le tali atu [Iesu] ia te ia i se upu e tasi; ona matuā ofo ai lea o le alii [kovana].” O le agamalu o le Faaola sa manino lava i Lana tali faautauta, malosi o le loto pulea, ma le le loto e faaaoga Lona mana lemafuatia mo lona lava ia manuia.
Folafolaga ma le Molimau
Ua faailoa e Mamona le agamalu o le faavae lea e fotu a’e ai gafatia ma meaalofa uma faaleagaga.
“O le mea lea, afai ua i ai i se tagata le faatuatua e tatau ona i ai ia te ia le faamoemoe; ona a aunoa ma le faatuatua e le mafai ona i ai se faamoemoe.
O lenei foi, faauta ou te fai atu ia te outou e le mafai ona i ai ia te ia le faatuatua ma le faamoemoe, vagana ai ua agamalu, ma maualalo o ia i le loto.
“Afai e faapea, ua le aoga lona faatuatua ma le faamoemoe, ona e leai se tasi e ono talia i luma o le Atua, vagana ai i latou o e ua agamalu ma maualalalo i le loto; ma afai e agamalu ma maualalo se tagata i le loto, ma tautino atu i le mana o le Agaga Paia o Iesu o le Keriso, e ao ina i ai ia te ia le alofa mama; aua afai e le i ai ia te ia le alofa mama, o se mea noa o ia; o le mea lea e ao ai ina i ai ia te ia le alofa mama.”
Sa tautino mai le Faaola, “Amuia e e agamalu: aua o le a fai mo o latou tofi le lalolagi.” O le agamalu o se vaega taua o le natura paia ma e mafai ona mauaina ma atiaeina i o tatou olaga ona o le [Togiola] ma e ala mai i le Togiola a le Faaola.
Ou te molimau atu o Iesu Keriso o lo tatou Togiola toetu ma soifua. Ma ou te folafola atu o le a Ia taiala, puipui ma faamalosia i tatou pe a tatou savavali i le agamalu o Lona Agaga. Ou te tautino atu la’u molimau mautinoa e uiga i nei upumoni ma folafolaga i le suafa paia o le Alii o Iesu Keriso, amene.