Faamalosi ia i le Galuega Nei
O lou naunautaiga e usiusitai o le a faaleleia pe a e manatuaina ma manatunatu i mea ua e lagonaina i nei aso e lua ua alu.
Ou uso e ma tuafafine pele, a o tatou oo mai ai i le tapuniga o lenei konafesi faasolopito, ou te auai faatasi ma outou e faafetai i le Alii mo Lana taitaiga ma le faatosinaga musuia. O musika sa matagofie ma siitiaina. E le gata sa faagaeetiaina ia savali, ae ua latou suia ai foi olaga!
I le faapotopotoga paia na tatou lagolagoina ai se Au Peresitene Sili fou. E toalua tamalii maoae ua nofoia le Korama a Aposetolo e Toasefululua. Ma ua valaauina Fitugafulu fou e toavalu o le Pulega Aoao.
O lenei ua aoteleina e se viiga e fiafia i ai lo tatou naunautaiga ua faafouina, lo tatou luitau, ma lo tatou tiute ia agai i luma:
Faamalosia ia i le galuega nei,
E te maua ai se taui a i’u le ola nei;
Tago i le pelu ma tau mo le lelei,
Pelu malosi o mea tonu.
Ou te apoapoai atu ia te outou ia suesue e le aunoa i savali o lenei konafesi—pe faisoo foi—i le isi ono masina o sosoo ai nei. Ia tagai ma le toto’a i ni auala e faaaofia ai nei savali i a outou afiafi faaleaiga, o au aoaoga o le talalelei, o a outou talanoaga ma aiga ma uo, e oo lava i a outou talanoaga ma i latou e le o nisi o la tatou faatuatuaga. E toatele tagata lelei o le a tali mai i upumoni ua aoaoina i lenei konafesi pe a ofoina atu i le alofa. Ma o le a faaleleia lou naunautaiga e usiusitai pe a e manatuaina ma manatunatu i mea ua e lagonaina i nei aso e lua ua alu.
O lenei konafesi aoao ua faailogaina ai le amataga o se vaitau fou o auaunaga. Ua faia e le Alii ni fetuunaiga taua i le auala tatou te tausia ai le tasi ma le isi. O tuafafine ma uso—tagata matutua ma talavou—o le a auauna atu le tasi i le isi i se auala fou ma paia atu. O le a faamalosia korama a toeaina ina ia manuia ai olaga o alii, tamaitai, ma fanau i le lalolagi atoa. O le a faaauau pea e tuafafine o le Aualofa ona auauna atu i a latou auala tulagaese ma agaalofa.
E faigofie lava ma faamaoni la tatou savali i le lalolagi: tatou te valaauliaina fanau uma a le Atua i itu uma e lua o le veli ia o mai i lo latou Faaola, maua faamanuiaga o le malumalu paia, maua le olioli tumau, ma agavaa mo le ola e faavavau.
O le faaeaga o loo mulimuli mai e manaomia ai lo tatou faamaoni a’ia’i i le taimi nei i feagaiga tatou te osia ma sauniga tatou te mauaina i totonu o le maota o le Alii. I lenei taimi, e 159 a tatou malumalu o loo faaaogaina, ma isi o loo fausiaina. Matou te mananao ina ia avatu malumalu ia latalata atu i le mea o loo i ai tagata o le Ekalesia ua faatoateleina. O lea ua matou fiafia nei e faasilasila atu ia fuafuaga e fausia ai nisi malumalu se fitu. O nei malumalu o le a fausiaina i nofoaga nei: Salta, Atenitina; Bengaluru, Initia; Managua Nicargua; Cagayan de Oro, Filipaina, Layton, Iuta; Richmond, Virginia; ma se aai tele e lei faamautuina mai i Rusia.
Ou uso e ma tuafafine pele, o le fauina o nei malumalu atonu e le suia ai lou olaga, ae o lou taimi i totonu o le malumalu o le a mautinoa [lava le suia ai o lou olaga]. I lena lava agaga, ou te faamanuia atu ia te outou ia iloa mea na e mafai ona outou lafoaiesea ina ia mafai ai ona outou faaaluina atili se taimi i le malumalu. Ou te faamanuia ia te outou i se fealofani ma se alofa sili atu i totonu o o outou aiga ma se manao loloto atu e tausia a outou mafutaga faaleaiga e faavavau. Ou te faamanuia ia te outou i se faatuatua faateleina i le Alii o Iesu Keriso ma se tomai sili atu ia mulimuli ia te Ia o ni Ona soo moni.
Ou te faamanuia ia te outou ia sii a’e o outou leo o le molimau, e pei ona ou faia i le taimi nei, o loo tatou punouai i le galuega a le Atua Silisili ese. O Iesu o le Keriso. O Lana Ekalesia Lenei, lea o loo Ia taitaia e ala mai i Ana auauna faauuina. Ou te molimau atu ai, faatasi ma le faailoaga o le alofa mo outou taitoatasi, i le suafa paia o Iesu Keriso, amene.