Seia Fitugafulu ni Fitu

Saunia e Elder Lynn G. Robbins

O Le Au Peresitene o Fitugafulu

I le lotolotoi o se olaga e tumu i maa tū’ia ma le le atoatoa, tatou te faafetai uma lava mo avanoa faalua.

O mea sese o se mea moni o le olaga. O le aoao ia atamai i le taina o le piano e matua le mafai lava e aunoa ma le faia o le faitau afe o mea sese—atonu e oo i le miliona. Ina ia aoaoina se gagana ese, e tatau i se tasi ona feagai ma le maasiasi o le faia o le faitau afe o mea sese—atonu e oo i le miliona. E oo lava i tagata afeleti maoae o le lalolagi e le tuua lava le faia o mea sese.

“O le manuia,” e pei ona faamatalaina ai, “e le o le le leai o se toilalo, ae o le sau mai le toilalo i le toilalo e aunoa ma le ma’umauina o le naunautaiga.”

I lana fatufatua’iga o le matāuila, sa fai mai ai Thomas Edison, “Ou te le’i toilalo i taimi e 1,000. O le matāuila o se fatufatua’iga o laasaga e 1,000.” Sa ta’ua e C. S. Lewis ia toilalo o “faasinoala i luga o le auala i le ausiaina o mea.” E faamoemoe o mea sese taitasi tatou te faia e avea ma se lesona i le poto, liuaina o maa tū’ia i ni maa e laa ai i luga.

O le faatuatua e le femoumoua’i o Nifae sa fesoasoani ia te ia e sau ai mai le toilalo i le toilalo seia i’u lava ina ia maua ia papatusi apamemea. E 10 taumafaiga na fai e Mose a o lei i’u ina faamanuiaina o ia e sosola ese mai Aikupito ma tagata Isaraelu.

Atonu tatou te tuufesili—afai sa i ai uma Nifae ma Mose i le feau a le Alii, aisea na le faasalavei mai ai le Alii ma fesoasoani ia i la’ua ia ausia le tulaga manuia i a la taumafaiga muamua? Aisea na Ia faatagaina ai i la’ua—ma pe aisea foi Na te faatagaina ai i tatou—e oo i le tele o faigata ma toilalo i a tatou taumafaiga ina ia manuia? Faatasi ai ma le tele o tali taua i lena fesili, o nisi nei o nai tali:

Muamua, ua silafia e le Alii o “nei mea uma [tatou] te maua ai le poto masani, ma o le a avea mo [o tatou] lelei.”
Lua, ia faataga ai i tatou e “tofo i le oona, ina ia [tatou] iloa ai ona faataua le lelei.”
Tolu, ia faamaonia ai “o loo ia Ieova le taua,” ma ua na o Lona alofatunoa lava e mafai ai ona tatou faataunuuina Lana galuega ma avea ai e faapei o Ia.
Fa, ina ia fesoasoani ia i tatou e atiae ma maua le tele o uiga FaaKeriso ia e le mafai ona faaleleia vagana ai e ala i mea faafeagai ma “i le ogaumu o i ai le puapuaga.”

O lea la, i le lotolotoi o se olaga e tumu i maa tū’ia ma le le atoatoa, tatou te faafetai uma lava mo avanoa faalua.

I le 1970, a o avea ma se tamaitiiti aoga fou i le BYU, sa ou lesitala i se kosi amata i mea taua o le fisiki na aoaoina e Jae Ballif, o se polofesa maoae. A maea iunite taitasi o le kosi, na te faatautaia ai lava se suega. A maua e se tamaitiiti aoga se C ma manao i se togi lelei atu, e faataga e Polofesa Ballif le tamaitiiti aoga e sue se isi suega ua toefetuunai e aofia ai anomea lava e tasi. A maua e se tamaitiiti aoga se B i le taumafaiga lona lua ma e le faamalieina lava, na te toe sueina lava le suega i le taimi lona tolu ma le lona fa, ma faapena ai lava. E ala i le faatagaina o a’u i le tele o avanoa faalua, sa ia fesoasoani ai ia te a’u e siitia ma i’u ai lava ina maua se A i le vasega.

O ia o se polofesa agaalofa sa tulagaese le atamai sa musuiaina ma faamalosiauina ana tamaiti aoga ia taumafai pea—ia manatu i le toilalo o se faiaoga, ae le o se faalavelave, ma ia le fefe i le toilalo ae ia aoao mai ai.

Talu ai nei sa ou telefoni atu ai i lenei tamalii maoae i le mavae ai o le 47 tausaga talu ona ou aveina lana kosi o le fisiki. Sa ou fesili i ai pe aisea sa ia naunau ai e faataga tamaiti aoga i taumafaiga e le faatapulaaina ina ia faaleleia a latou togi. O lana tali: “Sa ou mana’o ia ou i ai i le itu lava e tasi ma tamaiti aoga.”

A o tatou ootia ai ma le lotofaafetai mo avanoa faalua e sosoo ma mea sese, po o toilalo o le mafaufau, tatou te tutu ma ofo uma i le alofa tunoa o le Faaola i le tuuina mai ia i tatou o avanoa lona lua e faatoilalo ai le agasala, po o toilalo o le loto.

E leai se tasi e sili ona ‘au ma i tatou nai lo le Faaola. O loo Ia faatagaina i tatou ia sue ma saga sue pea Ana suega. Ina ia avea e faapei o Ia o le a manaomia ai ni avanoa faalua lemafaitaulia i o tatou tauiviga ma le tagata natura i lea aso ma lea aso, e pei o le puleaina o le tausami, aoaoina o le onosai ma le lotofaamagalo, faatoilaloina o le paie, aloese mai agasala o le le faia o mea e tatau ona fai, na o ni nai mea ua ta’ua. Afai o le natura faaletagata o le fai o mea sese, e fia la ni toilalo tatou te manaomia seia oo ina le toe avea lo tatou natura ma se [natura] faaletagata ae [o se natura] paia? E faa-afe? Pei a e faa-miliona.

I le iloaina o le ala sao ma le vaapiapi o le a salalau solo ai tofotofoga ma o toilalo o se mea e tupu pea i aso uma mo i tatou, na totogi e le Faaola se tau e le mafuatia e aumaia ai ia i tatou le tele o avanoa e faapena ona manaomia e manuia ai le suega o la tatou olaga faataitai. O mea faafeagai lea na Ia faatagaina e mafai ona foliga e lemafaatoilaloina i le tele o taimi ma toetoe lava a le mafai ona onosaia, ae Na te le tuua lava i tatou e aunoa ma se faamoemoe.

Ina ia faatumauina le toe malosi o lo tatou faamoemoe a o tatou feagai ai ma luitau o le olaga, o le alofatunoa o le Faaola ua saunia i taimi uma ma e i ai i taimi uma. O Lona alofa tunoa, “o se auala paia o fesoasoaniga po o le malosiaga, … o se mana malosi lea e mafai ai e alii ma tamaitai ona maua le ola e faavavau ma le faaeaga pe a uma ona latou faia a latou taumafaiga silisili.” O Lona alofa tunoa ma Ona fofoga alofa ua i luga o i tatou i la tatou faigamalaga atoa a o Ia musuia i tatou, faamamaina avega, faamalosia, laveai, puipuia, faamalolo, ma i se isi tulaga “fesoasoani i lona nuu,” e tusa lava pe latou te tautevateva i luga o le ala lauitiiti ma vaapiapi.

O le salamo o le meaalofa maua gofie a le Atua e faatagaina ma tatou mafai ai ona o mai mai lea toilalo i lea toilalo e aunoa ma le ma’umauina o le naunautaiga. O le salamo e le o Sana fuafuaga faaleoleo lea pe a te’i ua tatou toilalo. O le salamo o Lana fuafuaga lea, ma le silafiaina o le a tatou toilalo lava. O le talalelei lenei o le salamo, ma e pei ona matauina e Peresitene Russell M. Nelson, “o le a avea ma se mataupu aoaoina i le olaga atoa.”

I lenei mataupu aoaoina o le salamo i le olaga atoa, o le faamanatuga o le auala mamanuina lea a le Alii e maua ai le avanoa faifai pea i Lana faamagaloga. Afai tatou te aai ma feinu ma se loto momomo ma se agaga salamo, ua Ia ofo maia ia i tatou i vaiaso taitasi le faamagaloga pe a tatou alualu i luma mai lea toilalo i lea toilalo i luga o le ala o feagaiga. Aua “e ui ia latou agasala, ua tumu lo’u loto i le agaalofa ia te i latou.”

Ae o le a faafia ea ona Ia faamagaloina i tatou? O le a le umi e loa-ona-talitiga ai o Ia? I se tasi taimi sa fesili ai Peteru i le Faaola, “Le Alii e, e agaleaga mai faafia ea lo’u uso ia te au, ma ou faamagalo ia te ia? Seia atu fitu ea?”

E mautinoa lava, sa manatu Peteru, o le fitu o se numera maualuga tele lea e faamamafa ai le faavalevalea o le faamagalo faafia atu ma o le agalelei atu e tatau ona i ai ni ona tapulaa. I se tali atu, sa fetalai tonu atu ai le Faaola ia Peteru e aua ne’i faitauina—ia aua ne’i faatuina ni tapulaa i le faamagalo atu.

“Ua fetalai atu Iesu ia te ia, Ou te le fai atu ia te oe, seia atu fitu, a ia fitugafulu ni fitu.”

Sa manino lava, sa le’i faatuina e le Faaola se tapulaa maualuga o le 490. O le a talitutusa lena mea ma le faapea atu o le taumafa i le faamanatuga e tapulaa i le 490, ma a oo loa i le 491 taimi, ona faamautu mai lea e se suetusi faalelagi ma faapea mai, “Ou te faamalulu atu, ae ua uma nei le aoga o lau kata o le salamo—mai lenei taimi e agai i luma, ua e alu nei na o oe.”

Sa faaaoga e le Alii le matematika o le faafitugafulu e fai ma faatusa o Lana Togiola e le i’u, o Lona alofa e le faatuaoia, ma Lona alofa tunoa e le faatapulaaina.“Ioe, ma o le tele o taimi e salamo ai loʼu nuu Ou te faamagalo ai i latou ia latou solitulafono faasaga mai ia te aʼu.”

E le faapea la o le faamanatuga o le a avea ma se laisene e agasala ai. O le tasi mafuaaga lena sa faaaofia ai e le Alii lenei fasifuaitau i le Tusi a Mamona: “Ae o soo se taimi sa latou salamo ai ma saili le faamagaloga, ma le faamoemoe faamaoni, sa faamagaloina i latou.”

O le faamoemoe moni e faailoa ai foi ma le taumafaiga moni ma le suiga moni. O le “suiga” o se upu autu o loo faaaogaina e le Taiala i Tusitusiga Paia e faauiga ai le salamo: “O se suiga o le mafaufau ma le loto lea na te aumaia se uiga fou agai i le Atua, i le tagata lava ia, ma le lautele o le olaga.” O lena ituaiga o suiga e tupu mai ai le tuputupu a’efaaleagaga. O lo tatou tulaga manuia la, e le o le alu atu mai le toilalo i le toilalo, ae o le tuputupu a’e mai lea toilalo i lea toilalo e aunoa ma le ma’umauina o le naunautaiga.

E faatatau i le suiga, mafaufau i lenei malamalamaaga: “O mea e le suia e tumau pea i le mea e tasi.” O lena faamatalaga o le upumoni a’ia’i e le o faamoemoe e faatiga i lou atamai ae o le poto loloto o Peresitene Boyd K. Packer, o le na faaopoopo mai, “Ma a le toe mafai ona tatou sui—ua uma foi ma tatou.”

Ona tatou te le mananao ina ia uma i tatou seia tatou avea e pei o le Faaola, e tatau ona tatou faaauau pea ona tutu i luga i taimi taitasi tatou te pauu ai, ma se naunauga e tuputupu a’e pea ma agai i luma e ui i a tatou vaivaiga. I o tatou vaivaiga, ua Ia faamautinoa mai ia i tatou, “O lo’u nei alofa tunoa e lava lea e fesoasoani ia te oe, aua o le vaivai e faaatoatoaina ai lo’u mana.”

E na o le matauina o se vaitau umi i le taimi e tasi po o siata o le tuputupu a’e e mafai ai ona tatou iloatino la tatou tuputupu a’e faaletino. E faapena foi, o lo tatou tuputupu a’e faaleagaga e masani lava ona le matauina vagana ai lo tatou toe tepa i tua i le tuanai. O se tulaga atamai lo tatou mafaufau soo mo i tatou lava e uiga i le tuanai i lena auala ia iloa lo tatou alualu luma ma musuia ai i tatou e “fetaomi atu i luma ma le tumau ia Keriso, ma se susulu atoatoa o le faamoemoe.”

Ou te faafetai mo le agalelei, agaalofa, onosai, ma le loa ona talitiga o Matua Faalelagi ma le Faaola, o e ua faatagaina i tatou i avanoa faalua lemafaitaulia i la tatou malaga e toe foi atu i lo Latou afioaga. I le suafa, o Iesu Keriso, amene.