Au Paia: O Le Tala o le Ekalesia a Iesu Keriso o le Au Paia o Aso e Gata Ai

Saunia e Elder Steven E. Snow

Pulega Aoao o Fitugafulu ma le Tausi Talafaasolopito ma le Tusitalafaamaumau a le Ekalesia

I le 1861, na uunaia ai e Peresitene Polika Iaga (1801-77) tausi talafaasolopito o le Ekalesia ina ia suia la latou ala. “Tusi i se auala faamatala,” na ia fautua atu ai ma “tusi na o le tasi vae sefulu lava,”¹

O le tala i itulau e sosoo ai ua mulimuli i lena fautuaga. Ou te fiafia lava e faailoa atu se faagasologa fou e fa voluma ua taua o le Au Paia: O Le Tala o le Ekalesia a Iesu Keriso o le Au Paia o Aso e Gata Ai. Ua aofia ai le Mataupu 1 i lenei lomiga, ma o mataupu e sosoo ai o le a lolomiina i lenei mekasini i isi nai masina e sosoo ai. O le a maua lenei tusi i se taimi mulimuli ane o lenei tausaga, ma o isi voluma o le a mulimuli mai.

Nauvoo — O lenei ata o Navu o le a faaalia i le faavaa o le *Au Paia* voluma 1.

Na saunia le Au Paia e tali atu i le poloaiga a le Alii ia “tausia e lē aunoa le talafaamaumau ma le talafaasolopito o le ekalesia” (MF&F 47:3). E le pei o talafaasolopito o le Ekalesia talu ai, o se talafaasolopito e faamatalaina pei se tala ua tusia i se ala e manaia lena o le a mauaina e le autalavou ma tagata matutua foi.

E ui i lea, o le Au Paia, , e le o se talafatu faasolopito. O se tala moni e faalagolago i faamaumauga o tagata mai le taimi ua tuanai. O faamatalaga ma laina uma o talanoaga e lagolagoina e punaoa o le talafaasolopito. O faamatalaga i le faaiuga o mataupu taitasi e faatatau i faamaumauga ma punaoa faaopoopo. O i latou e mananao e faitau i faamaumauga moni lava, malamalama atili i autu fesootai, ma iloaina nisi lava tala o le a mauaina fesootaiga i tua o tusi ma luga o le initoneti i le aupaia.lds.org.

O Le Ielino Mauoa O Le Toefuataiga

O nei tusi e le o ni tusitusiga paia, ae e pei lava o tusitusiga paia, e aofia ai upumoni mamana ma tala o tagata e le atoatoa o loo taumafai ia avea ma ni Au Paia e ala i le Togiola a Iesu Keriso (tagai i le Mosaea 3:19). I tuufaatasia, e tau mai e voluma e fa le tala e uiga i le Ekalesia a le Alii o loo taumafai e faataunuu lona faamoemoega o le faaatoatoaina lea o le Au Paia (tagai i le Efeso 4:11-13).

E matuai ese lava se mamanu, sitaili, ma le au faitau faamoemoeina e i ai i Au Paia nai lo talafaasolopito o voluma eseese e lua na lolomiina e le Ekalesia i le taimi ua tuanai. O le talafaasolopito muamua na amata e Iosefa Samita i le 1830 ma lolomiina i le amataga o le 1842.² O le [tusi] lona lua na lolomiina i le 1930 e le fesoasoani tausi talafaasolopito o le Ekalesia o B.H. Roberts.³ O le oo atu o le talalelei toefuataiina i le lalolagi talu mai lena taimi ma le poloaiga a le Alii ia tausia pea le talafaasolopito “mo le lelei o le ekalesia, ma mo tupulaga fai aʼe” (MF&F 69:8).

Ua faamatalaina e le Au Paia tala o alii ma tamaitai masani mai aso o le popofou o le Ekalesia seia oo mai nei. Ua ia saunia foi se faamatalaga ma se vaaiga fou i ni tagata e sili atu le iloaina ma mea na tutupu mai le talafaasolopito o le Ekalesia. O le a fesoasoani tala taitasi ia te oe e malamalama ai ma faafetaia le Au Paia o e na muamua atu ia te oe ma faia le Ekalesia e pei ona i ai i le aso. E faapei lava o oe, na i ai o latou luitau ma mea na faamanuiaina ai, ma na latou ositaulaga ia faatuina Siona. A lalagaina faatasi, o a latou tala—ma au tala—e fatuina se lipine matagofie o le Toefuataiga.

O Lo Tatou Tuanai Paia

Ua faamaumauina e le Tusi a Mamona na tausia e tusitala ni papatusi tetele ma laiti. I papatusi tetele na latou faamaumauina ai le talafaasolopito faalemalo ma taua. Na latou faaaogaina papatusi laiti mo “mea a le Atua” ia na “sili ona pele,” e aofia ai “talaiga ua paia, po o se faaaliga sa taua tele, po o se valoaga,” (1 Nifae 6:3; Iakopo 1:2, 4). Na faamaumauina papatusi laiti “mo Keriso, ma mo le manuia o o matou tagata” (Iakopo1:4). Ua faamoemoeina le Au Paia ia avea o se talafaasolopito o “papatusi laiti”, lea e taulai atu i lo tatou tuanai paia. O lea e aofia ai na o se faataitaiga laitiiti o tala uma lava ia e mafai ona faamatalaina e faaalia ai pe faapefea ona galue le Alii i olaga o le Au Paia o Aso e Gata ai.

O le Au Paia e le na ona faatatau i ni tagata le atoatoa i le tuanai ia na avea ma tagata sili atu i le fesoasoani a le Alii. E faatatau foi mo tagata e le atoatoa i le taimi nei o e mananao ia manatua pea o Ia. O le a ia fesoasoani ia te oe e manatua ai le alofa mutimutivale tele o le Faaola i Ona tagata, le ala na Ia faia ai tagata vaivai ia malolosi, ma le ala ua faatasia ai le Au Paia i le salafa o le lalolagi ia faalauteleina le galuega a le Alii.

O A Mea O Le A Maua i Voluma Taitasi?

Voluma 1—e maua i se taimi mulimuli ane o lenei tausaga—ua faamatalaina le tala o le Toefuataiga, mai i le taimi o tamaitiiti Iosefa Samita i le mauaina e le Au Paia o sauniga i le Malumalu o Navu i le 1846.
Voluma 2 o le a aofia ai luitau o le Au Paia i le faapotopotoina i le itu i sisifo o le Iunaite Setete ma o le a faaiu i le faapaiaga o le Malumalu o Sate Leki i le 1893.
Voluma 3 o le a faamatalaina ai le tuputupu ae i le lalolagi o le Ekalesia, ma faaiu i le faapaiaga o le Malumalu o Bern, Suitiselani, i le 1955.
Voluma 4 o le a aumaia le tagata faitau i le tuanai talu ai nei lava, ina ua faateleina malumalu i le lalolagi.

O le faaopoopoga i anomea auiliili i autu filifilia o le a lolomiina i le initoneti e lagolago ai voluma taitasi.