O A Ni Mea e Mafai Ona Ou Faia Ina ia Aoao Atu Atili e Pei o le Faaola?

Saunia e Tad R. Callister

Peresitene Aoao o le Aoga Sa

Ao ou auauna atu o se peresitene o le misiona i Toronto, Kanata, na sau se tasi o ou fesoasoani ia te au ma fesili mai, “Peresitene, e faapefea ona avea au ma se faifeautalai e sili atu?” O lau tali muamua lava o le, “O loo seki lava oe.” Ma o le mea moni lava, na lelei o ia. Ae na ia fesili mai pea, o lea na ou mafaufau ai mo sina taimi ona ofoina atu lea o se fautuaga. Faatasi ma le ataata, na ia tali fiafia mai.

Na ou faasoa atu lenei aafiaga faigofie i isi o au faifeautalai. Na vave lava ona o mai isi alii ma tamaitai faifeautalai ia latou faatalanoaga ma fesili mai, “Peresitene, e faapefea ona avea au o se faifeautalai sili atu?” O lena fesili faigofie mai se tasi o faifeautalai na aumaia ai se agaga o le faaleleia atili i la matou misiona atoa lava.

I lena lava ala, o le a maua ai e faiaoga ni fautuaga aoga pe afai o le a latou fesili atu ma le faamaoni lenei fesili faigofie i le Alii ma o latou taitai: “O le a se mea e mafai ona ou faia ina ia aoao atili atu ai e pei o le Faaola?” Na folafola mai le Alii, “Ia e loto maualalo; ma o le a taitai ai oe e le Alii lou Atua i le lima, ma tuu mai ia te oe tali i au tatalo” (MF&F 112:10).

Manatunatu Loloto

Na fesiligia i se taimi J.B. Priestley, o se tusitala Igilisi, pe na faapefea ona avea o ia ma se tusitala faamanuiaina ona e leai se tasi o ana uo talenia na faapea le faaeaina. Na ia tali mai, “O le eseesega i lo matou va e le o le mafaia, ae o le mea moni e faapea ao … latou … na ona taaalo lava i manatu ofoofogia o le [tusitusi], na ou manatunatu loloto!”¹

I le avea ai ma ni faiaoga, e mafai ona tatou fesili, “Pe o faamalieina ea i tatou i o tatou tomai faafaiaoga o i ai nei, pe o tatou manatunatu loloto ea e uiga i le aoao atu e pei o le Faaola?” Afai o lea, pe ua tatou naunau ea e tuuese le faamaualuga uma ma ia le gata i le faatali mo faatonuga ae ia faapea foi ona saili atu i ai ma le filiga?

O Le Lotomaualalo o le Ki Lea

O loo tele a tatou faiaoga e silisili ona lelei i lenei Ekalesia, ae o le mea moni, po o le a lava le tele o tausaga o le poto masani ia i tatou, pe fia foi faailoga ua tatou umia, pe o le a le lelei ona alofagia o i tatou e tagata o le vasega, e mafai ona tatou faaleleia uma lava ma avea atili e faapei o le Matai Faiaoga, pe afai tatou te lotomaualalo. Atonu o le faamatalaga lelei o se faiaoga e pei o Keriso o le mafaia lea ona aoaoina. O le lotomaualalo o se uiga lena e valaaulia ai le Agaga ma faafaileleina lo tatou manao ia faaleleia atili.

I nisi taimi, ou te feiloai ai i peresitene o Aoga Sa ua le fiafia ona o se tasi po o le sili atu o faiaoga i la latou uarota po o le paranesi e lagonaina le matuai lelei tele po o le faamanuiaina ua latou le manaomia ai nisi faatonuga pe auai i le aufono a faiaoga. O lenei mea ou te faanoanoa ai aua o faiaoga uma lava na ou feiloai i ai e mafai ona faaleleia atili.

Ou te iloaina afai e oo lava i le faiaoga e sili ona lelei o le a sau i le aufono a faiaoga faatasi ma se loto maualalo ma se manao loloto ia aoao, o lea ituaiga o faiaoga o le a mauaina manatu ma uunaiga paia i le ala e mafai ai ona ia faaleleia atili. Ua ou auai i le tele o aufono a faiaoga ma ou te tuua lava ma ni manatu fou po o se manao ia faaleleia atili i se tomai po o se uiga lena e manaomia le faaleleia ma le faaatoatoaina.

O le Manaomia ia Atiina Ae Tomai Faafaiaoga

O nisi atonu e masani ona manatu i tomai po o auala faafaiaoga na o ni meafaigaluega e maua vave pe faalelalolagi. E ui i lea, pe a atiina ae, o nei tomai e faatagaina le Agaga e filifili mai avanoa eseese lena e sili ona taliaina manaoga o tagata aoao taitoatasi. O ai e sili ona faamanuiaina, o le tagata e taumafai e tipi i lalo se laau i lana naifi faamoe, po o le tagata lava lea e tasi e faaaogaina se ili afi? I tulaga uma ia e lua, o le tagata lava lea e i ai le malosi ma le uiga e tasi, ao le lona lua e matuai sili atu le faamanuiaina aua e i ai sana meafaigaluega e sili atu le aoga na te faaaogaina. O tomai faafaiaoga e avea ma meafaigaluega mamana i aao o le Agaga.

O le aoaoina ma le faataitai, faatinoina, suesue, ma le matauina e mafai ona fesoasoani i se faiaoga o soo se maualuga o le tomai e atiina ae tomai na e mafai ona tuuina mai e le Agaga—ma fesoasoani ia i tatou ia aoao atu atili e pei o le Matai. O le tele o nei tomai e mafai ona atiina ae i aufono a faiaoga.

E Mafai e le Alii ona Foafoaina ma Mamanuina i Tatou

Atonu e lagona e nisi latou te le mafaia lava ona aoao atu e pei o le Faaola—o lena taumafaiga e sili atu i le mea latou te mafaia. Atonu na manatu Peteru o ia ua na o se fai faiva; o Mataio, ua na o se ao lafoga. Ae peitai faatasi ai ma le fesoasoani a le Faaola, na avea i laua taitoatasi o se taitai ma se faiaoga mamana o le talalelei.

O lenei tomai o le Alii e mamanu ma siepi i tatou e le pei o le aafiaga na maua e Michelangelo i le vaneina o le faatagata ua mafaufauina e le toatele o se galuega sili ona mataina na mamanuina e lima o se tagata—Tavita.

A’o lei amataina e Michelangelo le galuega, e toalua isi tagata vane faatagata, o Agostino di Duccio ma Antonio Rossellino, na talosagaina e faamaea ia faatagata. Na tutusa lava faafitauli na la oo i ai: o le maa e na sa’o le maualuga ma le lautele, ae sa matua taetaei lava le maamora. Sa taumafai uma Agostino di Duccio ma Antonio Rossellino, i o la tomai faatufugaga i lenei maa, ae na le faamanuiaina. Sa matua tele ni faaletonu.² Ma sa iu ina fiu i laua. Na vaaia foi e Michelangelo nei lava le atoatoa, ae na ia vaai foi i tua atu o na taetaei. Na ia vaai atu i se faatusa o David o loo ola, o loo manava, ma malualii lena e mafua ai ona masani ona fetoi le manava a tagata e vaai i ai i le ofo i le vaaiga muamua lava i ai.

I se tulaga faapena, na folafola mai ai e le Atua o le atoatoaga o Lana talalelei o le a ”folafola atu …e e vaivai ma e faatauvaa i tuluiga o le lalolagi” (MF&F 1:23). E silasila le Atua i o tatou le atoatoa ma vaivaiga, ae na silasila foi o Ia i tua atu o na le atoatoa. O loo ia te Ia le gafatia e le gata e fesoasoani ai ia i tatou ia manumalo i o tatou vaivaiga ae ia liliuina foi na vaivaiga i ni malosiaga (tagai i le Eteru 12:26–27). E mafai ona Ia fesoasoani e faaleleia ma faaatoatoa o tatou tomai faafaiaoga ma uiga ina ia mafai ona tatou aoao atu atili e pei o le Faaola.

O Auala e Mafai ai Ona Tatou Aoao Atu Atili e Pei o le Faaola

O nisi nei o vaega autu atonu o loo tatou tauivi uma ai lava ina ia aoao atu atili e pei o le Faaola:

Aoao atu i le Agaga, i le iloaina e faapea o le Agaga lea e tuuina atu le ola ma le autu i a tatou lesona (tagai i le MF&F 43:15).
Taulai atu i le aoaoga faavae, i le iloaina e faapea o le aoaoga faavae e pei ona aoaoina i tusitusiga paia ma perofeta soifua o loo i ai le mana i totonu e suia ai olaga (tagai i le Alema 31:5).
Avea ma se tagata aoao naunautai, i le iloaina e faapea o le faiaoga lelei o se tagata aoao lelei foi (tagai i le MF&F 88:118).
Saili faaaliga, i le iloaina e faapea, faatasi ai ma valaauga uma e aoao atu e oo mai ai foi le aia tatau e maua ai faaaliga ia faalautele ai le valaauga o se tasi (tagai i le MF&F 42:61).
Faaali atu le alofa e ala i le iloaina o igoa o tagata uma o le vasega, tatalo mo i latou taitoatasi, ma ia i ai se fiafia patino ia i latou taitoatasi (ae maise lava i latou e i ai manaoga faapitoa), ma aapa atu i se auala anoa ia i latou e le auai mai (tagai i le Moronae 7:47-48).

O Se Iloiloga Patino

Na tuuina mai e le Aposetolo o Paulo lenei fautuaga: “Ina tofotofo ia outou ia te outou, po ua outou i le faatuatua” (2 Korinito 13:5). E mafai ona toe faaupuina lenei vaega mo faiaoga e faapea, “Iloilo outou ia te outou lava, pe ua outou aoao atu i le ala a le Faaola po o lau lava ala.” O le amataga o le tausaga o se taimi talafeagai lea e faia ai lea ituaiga o suesuega. E faapea lava, ua valaaulia outou e tali i fesili o le iloiloga patino o loo auina atu faatasi ma lenei tusiga. Ao e faia, o le a fesoasoani atu le Agaga ia te oe ia iloa le mea e tatau ona e taulai atu i ai ina ia avea o se faiaoga e sili atu le faapei o Keriso, ma le ala e mafai ai ona e mauaina ma atiina ae uiga ma tomai e manaomia e faia ai.