Tu Atu mo le Ekalesia
E alala tusitala i Baden-Württember, Siamani, ma Iuta, ISA.
“Ekalesia a Iesu Keriso, ua ou auai.” Ua ou iloa ai o le Atua. Ma Lana fuafuaga“ (Tusipese a Tamaiti, 48).
Ua faatoa uma lava le sauniga muamua a Easton i Siamani. Na ia manatu o le a matuai ese lava, ae na faapei lava o le lotu i le mea na ia nofo ai muamua i le Iunaite Setete. Ae pau le mea o iinei e tatau ona ia faia ni meafaalogo e faalogo ai i lauga ao faaliliuina i le Igilisi.
Na amata ona talanoa atu Tina ma Tama i le aiga o loo nonofo i tua o i latou. Na foliga mai na i ai se la atalii la te tausaga faatasi!
“O le au Finotto ia,” na tau atu ai e Tina ia Easton. “O le a i ai GianMarco i lau vasega i le aoga,”
“Manaia!” Sa ataata atu Easton ia GianMarco. O lonaigoa na faaleoina e pei o le “John” ma “Mark” ua tuufaatasi—faatasi ma se —“o” i le faaiuga. “O fea la tou te o mai ai?“
Sa ataata atu GianMarco. “Matou te o mai mai Italia. Ae faatoa matou siitia mai iinei mai Saina.”
“Auola!” na fai atu ai Easton. “Ou te lei alu muamua lava i Saina.”
O le aso na sosoo ai na alu ai Easton i lana aoga fou. Sa fai si ona popole laitiiti. Ae ona ia vaaia lea o GianMarco o talotalo atu ia te ia mai le isi itu o le potuaoga. O le mea sili o lea ua i ai sau uo. Na i ai i lana vasega tamaiti mai itu uma lava o le lalolagi. Atonu o le a ia fiafia i lana aoga.
“Talofa lava!” Na ataata atu le faiaoga i tamaiti uma lava. “O au o Ms. Albano. I le amataga, pe mafai ona tau mai ia te au e se tasi le uiga o le faasinomaga ?”
Na sii le lima o se teine. “O lona uiga po o ai oe. O le a le mea e sili ona taua ia te oe.”
“Sao lelei!” na fai atu ai Ms. Albano. “Sei tatou faamasani la le tasi i le isi. O a nisi mea na e avea ma vaega o lou faasinomaga? O a ni mea ua avea ai oe ma oe?”
“Ou te fiafia i taaloga vitio!” na fai mai ai se teine i le laina i luma. Na ataata Ms. Albano ma tusi le mea e fiafia i ai i luga o le laupapa. “O le a ma le isi?”
Na sii le lima o GianMarco. “Ou te sau mai Italia.” Na luelue le ulu o Ms. Albano ma tusi i lalo atunuu.
Na tau mafaufau Easton i se mea fai atu. “Ou te alu i le lotu,” na fai mai ai se tama i le laina i tua.
“O se mea lelei lena!” Na mafaufau Easton. “Sa tatau ona ou fai atu lena mea.”
Na ata leotele se tasi. Ona talie lea o tamaiti e toatele. Na tilotilo atu Easton ia GianMarco, ua le mautonu. Na foliga le mautonu foi GianMarco. Aisea e latou te talie ai?
Ina ua ia oo atu i le fale, na tau atu e Easton ia Tina le mea na tupu.
Sa faanonou mata o Tina. “O nisi tagata e le malamalama pe aisea e taua ai le lotu. Latou te manatu e faavalevalea.”
“Oi,” na fai atu ai Easton. E lei mafaufau muamua lava o ia e faavalevalea le lotu.
I ni nai vaiaso mulimuli ane, na fai atu ai Ms. Albano i tamaiti aoga e fai se lesona faatasi ma se matua e uiga i le faasinomaga o lo latou aiga.
“O le a la le ta galuega faatino o le a fai?” Na fesili atu ai Tina a o la faatulagaina le laulau mo le aiga o le afiafi.
Na mafaufau Easton i le ala na talie ai le vasega. “Ou te manatu e tatau ona ta faia e uiga i le Ekalesia,” o le tala lea a Easton.
Na ataata Tina. “O se manatu lelei lena.”
“Ma pe mafai ona tatou faia faatasi ma GianMarco ma Sister Finotto?”
“Manaia le manatu. O le a ou valaau ia i laua pe a maea le aiga o le afiafi.”
O le aso na sosoo ai na o mai ai GianMarco ma Sister Finotto. Na latou talanoa uma lava muamua i mea na sili ona taua e uiga i le Ekalesia. Na tusi i lalo e Tina o latou manatu uma lava i se api e tusi ai faamatalaga. Ona latou aumaia lea o ni pepa lautele mo savali ma mauaina ata o Iesu ma perofeta ma malumalu e faapipii i ai.
Na iu loa ina oo mai le taimi mo le aoaoga. Na tutu Easton ma GianMarco ma o la tina i luma o le vasega. Sa manava loloa o ia.
“O i matou o tagata o Le Ekalesia a Iesu Keriso o le Au Paia o Aso e Gata Ai,” na ia amata ai. Na latou feauauai e faamatala atu mea e uiga i le Ekalesia. Na talanoa GianMarco e uiga i tusitusiga paia. Na talanoa Tina e uiga i perofeta. Na talanoa Sister Finotto e uiga i afiafi faaleaiga. Na talanoa Easton e uiga i le papatisoga. Sa matuai manaia lava!
Na maua e Easton se lagona lelei tele ina ua uma la latou aoaoga. E leai se tasi na ata leotele—na foliga moni lava na fiafia i ai tamaiti! Na fiafia o ia na mafai ona ia faasoa atu se mea e matuai taua lava i lana vasega. Sa ataata o ia. Aua sa ia iloa lona faasinomaga. O ia o se atalii o le Atua!