Saolotoga o Tapuaiga: Maatulimanu o le Filemu

Saunia e Elder D. Todd Christofferson

O Le Korama a Aposetolo e Toasefululua

Mo le anotusi atoa o lenei saunoaga alu i le .

Na tuuina atu nei saunoaga i le taimi o se konafesi a ekalesia soofaatasi na faia i São Paulo, Pasila,i le aso 29 o April, 2015.

E mafai ona tatou saili atu i le filemu e ala i le galulue faatasi e faasao ma puipui le saolotoga o tagata uma e faia ma faaalia se mataupu faalelotu po o se talitonuga o la latou filifiliga.

Ata na tusia e Joshua Dennis

Ou te matuai talisapaia lava le valaaulia ia faatasi ai ma outou i lenei afiafi i lenei faatasiga soofatasi a ekalesia, lea e tutu soosootauau ai Masalemi, Iutaia, Evagelia, Mamona, faifeau faaleagaga o le atunuu, tagata e leai ni lotu, ma le toatele o isi faatasi ma taitai o le malo ma pisinisi, ua faatasia e talanoaina ma faamamaluina le saolotoga o tapuaiga. E moni lava, o le faatinoina lava o la tatou fonotaga faatasi i lenei faatulagaga faapitoa o se faailoga maoae i lona lava tulaga.

E faapitoa lava lou fiafia i le i ai iinei i Pasila, o se atunuu e tumu i aganuu ma tagata eseese. E ala i le taliaina o lona tulaga eseese, e aofia ai le tele o lotu, ua faamanuiaina ai Pasila ma o le a faaauau pea ona faamanuiaina. Na faailoaina talu ai nei Pasila o se atunuu e sili ona maualalo tapulaa a le malo i lotu.¹ Ou te faamalo atu ia Pasila mo lenei tulaga tulagaese maoae. Ou te faamalo atu ia Pasila mo lenei tulaga taua. Ua i ai nei ia Pasila se tiutetauave e taitai le uunaiga faalelalolagi ia faalauiloa lenei saolotoga. E pei ona fetalai Iesu Keriso i le Feagaiga Fou:

“O outou o le malamalama o le lalolagi outou. E le mafai ona lilo le aai [pe i lenei tulaga, o se atunuu] ua tu i luga o le mauga. …

“Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.” (Mataio 5:14–16).

Uo faamamaluina, ua manaomia e le lalolagi le malamalama o Pasila ia faasusulu umi ma pupula. O le po nei tatou te faamanatuina ai le mea e tatau ona tatou i ai i lena vaaiga.

Tulaga ma Mataupu Faavae Autu

O le saolotoga o tapuaiga o le maatulimanu o le filemu i se lalolagi o le tele o manatu eseese. Ua ia tuuina mai ia i tatou le avanoa e filifili ai mo i tatou lava mea tatou te mafaufau ma talitonu i ai—ia mulimuli i le upumoni e faapea e talanoa mai le Atua i o tatou loto. Na te faatagaina talitonuga eseese ia galulue faatasi, puipuia e vaivai, ma fesoasoani ia i tatou ia faaleleia o tatou feeseeseaiga. O lea la, e pei ona faaiuina ma le atamai e le Faamasinoga a Europa o le Aia Tatau a Tagata i le tele o tulaga, o le saolotoga o tapuaiga e taua i tagata e faatuatua ma “o se aseta pele mo e le talitonu i se atua, masalosalo, le mautonu ma e le popole.” E faapea ona. ”o vaega o tagata e eseese talitonu e le mafai ona tuueseese mai se lalolagi faalemalo, lea ua matagofie lava le faamanuiaina i ni seneturi, e faalagolago i ai.”²

O se saolotoga faamanuiaina e le na o se mea ua taua e tagata faaupufai o malo o le saolotoga “le lelei” e tatau ona faagaloina, e tusa lava po o le a le taua o i ai. Nai lo lena, o se saolotoga “lelei” e sili atu le faamanuiaina—o le saolotoga e ola ai se tasi i lana lotu po o le talitonuga i se siosiomaga aloaia, faalemalo, ma faalauaitele lena e taliaina, faaaloalogia, ma e tuufaatasia ai talitonuga eseese.

Tatou te faaaogaina la tatou saolotoga o tapuaiga ma talitonuga e faatulaga ai o tatou naunautaiga autu, ia e le mafai ona i ai se uiga o isi aia tatau faaletagata uma lava pe a leai. E faapefea ona tatou finauina le saolotoga o le tautala atu e aunoa ma le mafai ona tau atu o mea tatou te talitonu i ai? E faapefea ona tatou finauina le saolotoga o le faapotopotoga sei vagana ua tatou faapotopoto faatasi ma isi o e tutusa o tatou manatu? E faapefea ona tatou finauina le saolotoga o faasalalauga sei vagana ua tatou lolomiina faalauaitele pe faasalalau atu po o ai moni lava i tatou?

O le tala fiafia e faapea ua i ai se alualu i luma maoae i le salalau atu o le saolotoga o tapuaiga. Ua ou vaai i lenei alualu i luma i lou lava taimi o le olaga. O se faataitaiga se tasi, i le 1948, ina ua faatoa tolu ou tausaga, na taliaina ai e le Faalapotopotoga Aoao a Malo Aufaatasi le Folafolaga Faalauaitele o Aia Tatau a Tagata, lea na valaau atu ai mo “tagata uma [ia i ai] le aia tatau i le saolotoga o manatu, mafaufauga ma tapuaiga.“³

Ina ua 21 ou tausaga, na talanoaina ai se aiaiga ia faatumauina le folafolaga a le Malo Aufaatasi. O lena aiaiga—ua lauiloa o le Feagaiga Faavaomalo i Aia Tatau a Tagata Lautele ma le Malo—na faamalosia le manatu e faapea o tagata uma e tatau ona maua “le saolotoga e maua ai pe taliaina ai se tapuaiga po o se talitonuga o lana lava filifiliga, ma le saolotoga pe na o ia lava pe faatasi ma isi ma i nofoaga lautele pe faalilolilo, e faaleo atu ai lana tapuaiga po o talitonu i tapuaiga, faamamaluina, faatinoga ma i le aoaoina atu.”⁴ Na faamalosia le aiaiga i le 10 tausaga mulimuli ane, i le 1976.

E oo mai i le 2017, ua 169 atunuu ua au faatasi i le aiaiga—ua toeitiiti lava o atunuu atiina ae uma lava i le lalolagi.⁵ O le American Convention on Human Rights (le Pact of San José, Costa Rica), lea na taliaina i le 1969 ma na faamalosia talu mai le 1978, e puipuia le saolotoga o tapuaiga i gagana e toeitiiti lava tutusa.⁶

Na lagolagoina e mafuaaga malolosi le alualu i luma na faia ma e tatau ona uunaia i tatou ia faia ia sili atu i lo lena. O le saolotoga o tapuaiga ua malosi lava le fesootaiga ma se vaega tele o le lelei o tulaga tautupe, soifua maloloina lautele, ma le manuia o tagata lautele.⁷ I le tulaga lautele, o tagata o tapuaiga ua sili atu ona lelei olaga faaleaiga, sili atu le malolosi faaipoipoga, faaitiitia tulaga o le sauaina ma solitulafono, ua sili atu le maualuga o tulaga o aoaoga, sili atu le naunau e ofofua atu ma saofaga i galuega alofa, sili atu ona lelei uiga faaalia i galuega, ola umi, sili atu le soifua maloloina, tele atu totogi, ma sili atu le maualuga o tulaga manuia ma le fiafia.⁸ E manino lava, o le saolotoga o tapuaiga ma le faatinoina o tapuaiga ua faamalosia ai nuu.

O le Manaomia mo le Galulue Faatasi

Ae paga lea, o puipuiga ua ofoina mai i le saolotoga o tapuaiga ma talitonuga e masani ona vaivai, le amanaia, ma osofaia. E taumafai uunaiga malolosi e taofia le saolotoga o tapuaiga e tusa lava pe o loo tuputupu ae—e aofia ai atunuu na sili ona puipuia muamua i le talafaasolopito. O nei uunaiga ua sili atu le malolosi ma ua faamanuiaina i le tele o atunuu. O vaega tetele o le lalolagi o le a le mafai ona mafaufauina le ituaiga o faamamaluga ua tatou olioli ai iinei i Pasila.

E ofoofogia lava, i le 2013, e latalata i le 5.5 piliona o tagata—77 pasene o le faitau aofai o le lalolagi—na nonofo i atunuu e maualuluga ai pe ua matuai faasaina ai lava le saolotoga o tapuaiga, mai le 68 pasene i le na o le ono tausaga mulimuli ane.⁹

E toeitiiti lava o atunuu temokarasi uma i Sisifo ua tautino mai e talitonu i mataupu faavae o le saolotoga o tapuaiga. O le faaaogaina o le mataupu faavae lea e mafai ona maua ai le feteenai. O mea faalavefau i le solotoga o tapuaiga e masani ona tulai mai pe a ta’u atu pe faia e tagata lotu ma faalapotopotoga se mea—pe mumusu e tau atu pe fai se mea—na e feteenai i manatu po o sini a i latou e maualuluga, e aofia ai le tele o tagata faalemalo. E masani lava ona feteenai tapuaiga ma le aganuu ma o lea e le lauiloa ai. Mo lenei mafuaaga, o le saolotoga o tapuaiga, e tusa lava pe masani ona lagolagoina i mataupu faavae, e masani lava ona teenaina malosi i le faatinoga.

I Europa ma Amerika i Matu, na tulai mai ai ni feteenaiga i ni mataupu e pei o le pe tatau i lotu ona mafai ona filifili po o ai e faafaigaluega (pe le faafaigaluegaina) o ni o latou faifeau, pe mafai e tagata ona laei ofu lotu po o faatusa i le galuega po o le aoga, pe tatau i pule o le galuega ona totogi mo aiga fuafuaina o tagata faigaluega ma le faapauuina o pepe, pe e tatau ona faamalosia tagata taitoatasi e faia galuega na e le talafeagai ma o latou talitonuga, pe mafai ona teenaina pe faaleaogaina se tusi faamaonia faalegaluega pe faaleiunivesite ona o tulaga faatonuina po o talitonuga ma pe tatau ona manaomia ona taliaina e faalapotopotoga o tamaiti aoga faalelotu tamaiti aoga e ese talitonuga.

O Pasila, ma lona tele o tapuaiga, o loo tauivi foi ma tulaga faapena, e pei o pisinisi e tapunia i aso Sa, le faia o ofu faalelotu, ma puipuiga ua ofoina atu i aga faaPasila-Aferika. Matou te faafetai o le tele o nei mataupu ua foia ma manuia ai le tulaga o le saolotoga o tapuaiga. O le fofo vave ma sao o nei mataupu e aofia ai le faatinoina saoloto o talitonuga o tapuaiga o le a taua tele i le faaaloalogia faifai pea o Pasila ma le tele o ona lotu. E ala i le faatagaina o tagata lotu ma faalapotopotoga e ola i o latou faatuatuaga i le tulaga lautele e aunoa ma se faitioina, o le a faaauau ai pea e Pasila ona avea ma se faataitaiga susulu ma faamoemoeina o le saolotoga o tapuaiga i le lalolagi.

Ou te uunaia outou ia pipii mau i saolotoga ua outou atiina ae i aiga ma ia taitai ma le lototoa i le siitiaina o le saolotoga o tapuaiga i le tulaga o le lalolagi. O le manaomia ona puipuia ma faasaoina le saolotoga o tapuaiga—i se tulaga lelei ma paleni lena e puipuia ai foi aia tatau autu a isi —e taua tele.

O le Ekalesia a Iesu Keriso o le Au Paia o Aso e Gata Ai ua fiafia lava e tutu faatasi ma outou ma isi tagata i lenei taumafaiga taua tele. E ui lava matou te vaai i le itu lelei e faapea o a tatou taumafaiga o le a faia se eseesega, e tatau ona tatou faia nei taumafaiga faatasi, talu ai e leai se tasi o i tatou e mafai ona manumalo toatasi i lenei taua. Ou te toe faaleoina le mea na saunoa ai lau uo o Elder Dallin H. Oaks o le Korama e Toasefululua talu ai nei lava i se faatasiga e tai tutusa lava ma lenei:

“E taua tele ia i tatou na e talitonu i le Atua ma le moni o le sao ma le sese ona sili atu ona lelei le tutu faatasi e puipuia lo tatou saolotoga o tapuaiga e talai atu ai ma faatino lo tatou faatuatua i le Atua ma mataupu faavae o le sao ma le sese ua Ia faatuina. … Pau le mea e manaomia mo le lotogatasi ma se faigapaaga lautele i mea o loo ou fautuaina atu o se talitonuga masani e faapea e i ai se sao ma se sese i le amio a le tagata lea na faatuina e se Tagata Paia. O i latou uma e talitonu i lena [mataupu faavae] autu e tatau ona sili atu ona lelei le tuufaatasia e faasaoina ma faamalosia le saolotoga e lagolagoina ma faatino ai o tatou talitonuga faalelotu, po o le a lava. E tatau ona tatou savavali faatasi mo se ala i le auala lava e tasi ina ia mafai ai ona faasaogalemuina lo tatou saolotoga ia saili ai o tatou ala eseese pe a manaomia e tusa ai ma o tatou lava talitonuga.”¹⁰

O le a faigata la tatou galuega ma e manaomia ai le mataala faifai pea, ae o le mea e sili lea ona taua.

Ou te faaiu i se fuaitau mai le Mataupu Faavae ma Feagaiga. Na faaali mai lenei fuaitau i le 1835, i se taimi ao, e ui lava i puipuiga o folafolaga aloaia, na tuliesea ai ou tama na muamua atu mai o latou aiga mo le taliaina o mea na foliga mai i isi o ni talitonuga e fou ma e ese. O lea la o se faamanatu faanoanoa mo lo tatou taimi, ae maise lava pe afai o le tele o tapulaa i le saolotoga o tapuaiga i le aso e oo mai foi i atunuu ia na lagolagoina le mataupu faavae ae o nisi taimi e le faaaogaina ai i le faatinoga.

Ua faapea mai la tatou mau, “E leai se malo e mafai ona ola i le filemu, vagana ua faia ma faamalosia ituaiga tulafono e mautinoa ai le maua e tagata taitoatasi o le faaaogaina o le saoloto o le mafaufau fuatiaifo.” E mafai e malo “ona taofi le solitulafono, ae lē pulea le mafaufau fuatiaifo; e tatau ona [latou] faasala le tausalaina, ae lē taofia le saolotoga o le agaga“ (MF&F 134:2,4).

Tau ina ia tatou saili atu i le filemu e ala i le galulue faatasi e faasao ma puipuia le saolotoga o tagata uma e faia ma faaalia se mataupu faalelotu po o se talitonuga o la latou filifiliga, pe taitoatasi pe faalenuu ma isi, i le fale po o fafo atu, i nofoaga faitele pe le faalauaiteleina, i le tapuaiga, tausia, faataitaia, ma le aoao atu.

Faamatalaga

1. Tagai i le “Brazil Has Lowest Government Restrictions on Religion among 25 Most Populous Countries,” Iulai 22, 2013, theweeklynumber.com/weekly-number-blog; “Restrictions and Hostilities in the Most Populous Countries,” Fep. 26, 2015, pewforum.org.

2. Kokkinakis m. Greece, 3/1992/348/421 (May 25, 1993), para. 31; Nolan ma K. v. Russia, 2512/04 (Fep. 12, 2009), para. 61; tagai foi i le Serif v. Greece, 38178/97 (Tes. 14, 1999), para. 49; European Convention on Human Rights, Article 9.

3. Malo Aufaatasi, Folafolaga Faavaomalo o Aia Tatau, Tusiga 18, aso 10 Tesema, 1948, un.org/en/documents/udhr.

4. International Covenant on Civil and Political Rights, Article 18, Dec. 16, 1966, ohchr.org/EN/ProfessionalInterest/Pages/CCPR.aspx.

5. Tagai i le International Covenant on Civil and Political Rights; tagai foi i le W. Cole Durham Jr., Matthew K. Richards, ma Donlu D. Thayer, “The Status of and Threats to International Law on Freedom of Religion or Belief,” i le Allen D. Hertzke, lo., The Future of Religious Freedom: Global Challenges (2013), 31–66.

6. Tagai i le American Convention on Human Rights “Pact of San José, Costa Rica,” Nov. 22, 1969 (Inter-American Specialized Conference on Human Rights), oas.org; tagai foi i le Juan G. Navarro Floria ma Octavio Lo Prete, “Proselitismo y Libertad Religiosa: Una Visión desde América Latina,” i le Anuario de Derecho Eclesiástico del Estado, nu. 27 (2011), 59–96.

7. Tagai i le Brian J. Grim, Greg Clark, ma Robert Edward Snyder, “Is Religious Freedom Good for Business?: A Conceptual and Empirical Analysis,” Interdisciplinary Journal of Research on Religion, vol. 10 (2014), 4–6; Paul A. Marshall, “The Range of Religious Freedom,” i le Paul A. Marshall, ed., Religious Freedom in the World (2008), 1–11.

8. Tagai i le Patrick F. Fagan, “Why Religion Matters Even More: The Impact of Religious Practice on Social Stability,” Backgrounder, nu. 1992 (Tes. 18, 2006), 1–19; Robert D. Putnam and David E. Campbell, American Grace: How Religion Divides and Unites Us (2010), 443–92.

9. Tagai i le “Suiga Aupito Lata Mai i le Faatapulaaina o Tapuaiga ma Tulaga Faatupu Faalavelave,” 26 Fep., 2015, pewforum.org.

10. Dallin H. Oaks, “Preserving Religious Freedom” (aoaoga i le Chapman University School of Law, Fep. 4, 2011), .

Manatu mo Afiafi Faaleaiga

Talanoaina le taua o le saolotoga o tapuaiga faatasi ma lou aiga, e aofia ai pe na faapefea e tagatanuu o lou atunuu ona muamua maua le saolotoga e tapuai ai. O a mea na tutupu na taitai atu ai i le saolotoga o tapuaiga i lou atunuu? Atonu e aofia ai le malo, faatuiese, e oo lava i taua. E mafai ona e fatuina ni fesili auiliili e fai atu i lou aiga e fesoasoani ia i latou e aoao ai e uiga i lenei autu i se ala e sili atu le manaia. Ma le isi, mafaufau e talanoaina fesili nei: E faapefea ona avea le saolotoga o tapuaiga o se faamanuiaga i o tatou olaga? O le a ese faapefea o tatou olaga pe ana faapea tatou te le saoloto e faatino la tatou tapuaiga? E mafai faapefea ona tatou fesoasoani e siitia le saolotoga o tapuaiga mo i tatou lava ma isi?