E Le Mafai ona e Faasaina le Mea o i Lou Loto
E alala le tusitala i Kalefonia, ISA.
Ata na tusia e Toby Newsome
Ina ua faatoa oo mai le Ekalesia i Kana i le 1978, e lei malamalama moni lava le malo i ai ma ona faatinoga. O lena mea na taitai atu ai i le tele o tala feaveai. Ao tuputupu ae le Ekalesia i le isi 10 tausaga, na faapena foi tala feaveai. Ou te manatuaina le faalogo atu o faapea tagata ua auina mai e le Iunaite Setete tagata e vaavaai faalilolilo lo matou malo. O lena mea, faatasi ma tusitusiga uma na faasalalau e faasagatau i Mamona, na mafua ai ona masalosalo tele le malo.
O le Sa
I le aso 14 o Iuni, 1989, na tapunia ai e le malo fale o le Ekalesia, auina atu faifeautalai i le fale, ma faasaina gaoioiga uma lava aloaia o le Ekalesia. Matou te tauina lenei taimi “o le sa.” Ae peitai i le avea ai ma se teine e 18-tausaga le matua, pau le mea na ou iloaina e faapea i se tasi aso na faasilasila mai ai faapea e le toe mafai ona matou o i le lotu. Na oo lava na i ai fitafita e puipuia falelotu ina ia mautinoa na matou le toe o mai.
Talu ai na le toe mafai ona matou feiloai i o matou falelotu, na maua mai le faatagaga mai taitai o le Ekalesia ina ia faia sauniga faamanatuga i o matou aiga. Afai e lei i ai se tasi e umia le perisitua i lou aiga, e uunaia oe e alu i se aiga na i ai se tasi e umia le perisitua. Sa o se taimi fenumiai lea taimi ae o se taimi e matuai faapitoa foi. Na matou fefaasoaai a matou molimau, ma na sili atu ai ona matou vavalalata.
E Faapefea Ona e Taua Oe Lava o se Mamona?
I se tasi vaitaimi i le taimi o le sa, na tatau ai ona ou tuua lou aiga ae alu i se aoga nofotumau. Ina ua ou taunuu iina, na faalogo se tasi o faiaoga e faapea o au o se Au Paia o Aso e Gata Ai. Na ia talanoa sao mai lava ia te au i tala le lelei e uiga i le Ekalesia. Na tele naua ana upu malolosi na fai. Na masani ona ou mafaufau, “Aisea e te talanoa sao mai ai ia te au ma fai mai nei mea? Ou te talitonu i aoaoga o le talalelei, ae peitai o loo tumau pea le avea o au o se tagata.”
I se tasi aso na ia fesili mai ai ia te au pe mafai faapefea ona ou taua pea au lava ia o se Mamona. Pe ou te lei iloaina le sa? Ia, i la matou aganuu, matou te le tali atu i tagata matutua. Ma o le mea moni e faapea o ia o se faiaoga o lona uiga e le mafai ona ou luiina o ia. Ae peitai i lena taimi, na ou iloaina ai na i ai moni lava sau molimau. Ou te le iloaina pe na faapefea ona o mai nei upu mai lou gutu, ae peitai na oo mai le Agaga ia te au, ma na ou tu i luga ma faapea atu, “O le Ekalesia o loo i totonu o lou loto. Ma e le mafai e se tasi ona faasa le mea o i lou loto.“
Ina ua uma lena mea na ia le toe faalavelave mai ia te au.
Ia Novema i le 1990 na faaiu ai e le malo le sa ma faapea mai ua saoloto tagata o le Ekalesia e toe tapuai. E lei i ai ni a matou leitio po o televise i le lotoa o le aoga, o lea na faatoa ou iloaina lava aua o lena faiaoga na faalogo i ai ma vave lava on auina mai se tasi e auina atu au. Ina ua ia vaai mai ia te au, na faapea mai lou faiaoga, “O le sa i la outou Ekalesia ua aveesea! E mafai ona e toe alu i le lotu.
Na fiafia o ia mo au.
E le Mafai Ona Latou Faasaina le Mea o i Lou Loto
O i latou na tumau i le Ekalesia ma tapuai faatasi i le taimi o le sa na fatuina ni sootaga na sili atu le malolosi. Na avea i matou o ni tuagane ma ni uso moni lava. E oo lava i le taimi nei, ina ua matou taufai malaga i ala eseese, afai e tupu se mea i se tasi, matou te faalogo uma lava i ai. Matou te lagonaina e pei i matou o ni paionia.
Ou te fiafia e tau atu i tagata e faapea afai e te iloaina e moni ou talitonuga ma e i ai sau molimau i na mea, e mafai ona i ai ou tofotofoga ae e le tatau ona maluelue ai lou faatuatua. Afai e te iloaina e moni se mea ma e te talitonu i ai, e le mafai e se tasi ona aveesea lena mea mai ia te oe. E le mafai ona latou faasaina le mea o i lou loto.