O Fea Lau Oa?

Ashlee Cornell

Okalahoma, ISA

Ina ua uma ona auina atu lau fanau i le aoga, na amata ona ou mafaufau e uiga i le aso o totoe. Na tele au mea e fai, ae na tatau ona ou faigaluega i le sifi po i le falemai, o lea na le lava ai sou taimi. E mafai ona ou galue i le fanua, galue i se ie soosoo mo le aso fanau o lou tei tama, pe faamalosi tino foi. Ona ou manatuaina lea o se upusii mai ia Peresitene Ezra Taft Benson (1899-1994):

“Pe a tatou faamuamua le Atua, o isi mea uma lava o le a oo atu i o latou tulaga tatau po o le aveese foi mai o tatou olaga” (“O Le Poloaiga Sili—Alofa i le Alii,” Liahona, Iulai 1988, 4).

“Tusitusiga paia le tali!” Sa ou mafaufau ai. Na ou saofai i lau kesi ma faaauau lau suesuega o tusitusiga paia mai le aso talu ai:

“Aua tou te toloai oa mo outou i le lalolagi, o i ai le mogamoga ma le ele e faaumatia ai, o i ai foi tagata gaoi e eli atu ma gaoi ai:

“‘A ia outou tolo’a’i oa mo outou i le lagi.

“Aua o le mea ua i ai lo outou oa, e i ai atoa foi ma o outou loto.” Mataio 6:19-21

“O fea lau oa?” Sa ou mafaufau ai. I talaane o au tusitusiga paia na i ai ni igoa se fa mai le aiga o lou toalua na ou aveina talu ai nei i le malumalu. O matua o lou toalua o tagata muamua ia o o latou aiga na auai i le Ekalesia. Na ou faaaluina le lua tausaga talu ai e galue ai i le laina a le tama o lou toalua ua maliu. Na ou filifili e alu i le FamilySearch e vaai pe ua faamaumauina sauniga e faapea ua uma ona fai.

Na vaai atu i faailoga o le malumalu i lana laina. I lou ofo tele, o ni nai igoa na ou saunia mo sauniga o le faamauga e lei faamaumauina faapea ua uma ona fai. Atonu na sese le mea na ou tuua ai kata, ma e lei faia lava faamauga! O le taimi lava na ou lolomiina ai igoa, na oo mai se manatu manino lava i lou mafaufau,“Ua mafai nei loa ona e faataunuu au fuafuaga o le aso.”

Na ou lagonaina le filemu i le iloaina na ou faamuamuaina le Alii. Na Ia fesoasoani ia te au e faamuamua mea e sili ona taua. O le olioli faatasi ma lou aiga i le faavavau e mautinoa lava o lau oa sili lea. Ou te iloaina afai ou te tuuina faamuamua le Atua, o le a lelei isi mea uma lava mo lou manuia faaleagaga ma mo le manuia o isi.