Auaunaga i le Ekalesia
O Se Faamalologa o se Amataga Lea, E LE O SE IUGA
Tatou te le laa i luga po o lalo i le Ekalesia. Tatou te agai i luma faatasi.
Faamatalaga mai le Seeking the One, saunia e Liz Lemon Swindle, e le mafai ona kopiina
Na faamaloloina talu ai nei sau uo o se epikopo o lana uarota. I ni nai aso mulimuli ane, i le iloaina na ou auauna atu foi o se epikopo, na ia fai mai ai e fia talanoa ia te au.
“Pe o se lagona masani le mea o loo ou lagonaina?” na ia fesili mai ai.
“O le a le mea o loo e lagonaina?”
“Tuua toatasi, ou te matea. Sa ou aafia i le tele o olaga o tagata, ao lenei ua faafuasei lava, ua uma. Pe o le a ou toe lagonaina ea le aafia faapea?”
O lana fesili na ou toe mafaufau ai i tua i le taimi o lou lava faamalologa. Ou te manatuaina le mauaina o na lava lagona. Na ou misia le matuai aafia lava i le fesoasoani atu i tagata ia faalatalata atili atu i le Faaola ma lo latou Tama o i le Lagi. Na ou misia le uunaia o i latou e saili ma mulimuli i le uunaiga a le Agaga Paia. O le auauna atu o se epikopo na avea o se faamanuiaga matagofie, ao lenei ua uma.
Ae pe moni ea? Ao alu pea sina taimi itiiti, na ou iloaina o le faamanuiaga o le tuuina atu o le auaunaga e le mou ese lava. O se avanoa e tumau. I le avea ai ma soo o Iesu Keriso, pe tatou te le manatua pea o Ia? (Tagai i le MF&F 20:77, 79). Pe tatou te le fesoasoani atu pea i isi e faalatalata atili i le Faaola ma lo latou Tama o i le Lagi? Pe tatou te le fesoasoani atu pea i isi, ae maise lava o tatou taitoalua ma aiga, e saili ma mulimuli i uunaiga a le Agaga Paia?
Na ou manatua upu nei mai ia Elder Dallin H. Oaks o le Korama a Aposetolo e Toasefululua: ”tatou te le manatu ai ua ‘itiiti lo tatou taua’ pe a faamaloloina i tatou, ma tatou te le manatu foi ua ‘sili lo tatou taua’ pe a valaauina i tatou. E leai se “valaauga tele pe itiiti” i le galuega a le Alii. E na o le “agai i luma po o le solo i tua,” ma o lena eseesega e faalagolago lea i le auala tatou te taliaina ai ma faatinoina ai lo tatou faamalologa ma o tatou valaauga. Sa i ai se taimi na ou pulefaamalumalu ai i le faamalologa o se peresitene talavou o se siteki sa auauna atu ma le lelei tele mo le iva tausaga ma o loo olioli nei i lona faamalologa i le valaauga fou ua faato’a la maua ma lona faletua. Sa valaauina i laua e avea ma taitai o le vasega pepe i le latou uarota. Ua na o le Ekalesia lenei e vaaia ai lena mea o se faamamaluga tutusa!”1
Ao ma talanoa ma lau uo, na ma iloaina uma o le auaunaga e le muta pe a faamalolo mai se valaauga, po o le a lava lena valaauga. Mo soo o Keriso, e le muta lava le auaunaga. E vave lava ona tatou mauaina se valaauga fou, ma tatou toe amata ai ao tatou agai faatasi i luma.