O LE TALALELEI E AOFIA AI UPUMONI UMA

Saunia e Peresitene Dieter F. Uchtdorf

Fesoasoani Lua i le Au Peresitene Sili

Mai le “Seeing Beyond the Leaf,” Brigham Young University Church History Symposium i le Aai o Sate Leki, Iuta, ISA, i le aso 7 o Mati, 2014.

O le laulaau o loo i o tatou luma ua na o se ata itiiti lava—se vaega o se togavao tele e le iu o le matagofie o le malamalama.

E taua le talafaasolopito. Ma o le faatumauina o i tatou lava i lesona e aoaoina mai le talafaasolopito o le a mafai ai ona tatou mulimuli i le mea sili e ta’ua o le tagata.

O le tusitala fatu ua maliu o Michael Crichton na lipotia mai na saunoa e faapea, “Afai e te le iloaina le talafaasolopito, e te le iloaina la se mea. O oe o se laulaau lena e le iloaina o ia o se vaega o se laau.“ Ua aoaoina i tatou e le talafaasolopito e le gata e uiga i laulaau o loo i ai; ae ua ia aoaoina foi e uiga i lala ninii, lala lapopoa, ogalaau, ma aa o le olaga. Ma o nei lesona e taua.

O se tasi o vaivaiga o i tatou o ni tagata soifua o le faapea lea o la tatou “laulaau” ua na o le pau a lena—e faapea o le upumoni ua tatou maua ua atoatoa ma ua i ai mea uma lava. O se faaupuga ua leva faaIutaia e [faapea], “I se anufe i totonu o se lakisi, o le lalolagi le lakisi.” Ou te fia faamamafaina atu e faapea o upumoni ua taliaina e Le Ekalesia a Iesu Keriso o le Au Paia o Aso e Gata Ai e oo i tua atu o laulaau ma e mautinoa lava i tua atu o le lakisi. E oo i tua atu o tapulaa o le taimi ma le lalolagi ma e aofia ai upumoni uma lava.

O le talalelei a Iesu Keriso e aofia ai e le gata o le upumoni o mea na i ai ma mea o i ai nei ae faapena foi upumoni o mea e mafai ona i ai ma o le a oo mai. O le mea lea ua sili ona sao i upumoni uma. Ua ia aoaoina le ala o le soo—o se ala lena e mafai ona aveina tagata masani, e le atoatoa ma suia i latou i ni tagata mamalu, faavavau, ma leai se iuga o e e i ai le malosiaga mamana e i tua atu o lo tatou mafaufau faatauvaa ma itiiti.

O lea la, o le upumoni sao lava lena. E le mafai ona tatou mafaufauina lona tau. O le upumoni i le tulaga aupito maualuga. O le sailia, mauaina, ma le faaaogaina o le upumoni o mea ia ua tatou i ai i lenei lalolagi ina ia mauaina. O le talalelei a Iesu Keriso e aofia ai upumoni uma lava, ma e taulai atu foi i le malamalama lena o le a sili atu le taua ia i tatou i lenei olaga ma i le faavavau atoa e oo mai.

Pe le o se lagona maoae ea le auai i se Ekalesia lena e taliaina le upumoni —po o le a lava le punaoa —ma ua aoao mai e faapea o loo i ai le tele o isi upumoni e oo mai, e faapea o le Atua o le a “faaali mai le tele o mea silisili ma le taua tau i le Malo o le Atua i le lumanai” [Mataupu Faavae o le Faatuatua 1:9]. O se taunuuga la, ua tatou lotomaualalalo ai e uiga i le upumoni ua tatou maua. Ua tatou iloaina o lo tatou malamalama o se galuega o loo faagasolo, o le laulaau o loo i o tatou luma ua na o se ata itiiti lava—se vaega o se togavao tele e le iu o le matagofie o le malamalama.