O Le Filemu i le Lalolagi ma le Filemu ia Keriso

Saunia e Sarah Hanson

E mafai e Iesu Keriso ona tuuina mai ia i tatou le filemu e faavavau, e oo lava i taimi faigata ma puapuaga.

Peace in the world versus Peace in Christ

I se lalolagi o agafesootai, faaupufai, ma fesouaiga faalelotu, o le a le mea e te manaomia ina ia maua ai le filemu? O uo lelei? O se aiga agaalofa? Saogalemu ma le Puipuiga? O nisi taimi tatou te mafaufau ai o o tatou olaga e tatau ona maua ni mea faapenei ina ia mafai ai ona tatou lagona moni lava le filemu. Ae peitai o le olaga o le a le mafai lava ona 100 pasene le atoatoa ma faigofie. E faapefea la ona tatou taulimaina faigata ma lagonaina le filemu i le taimi lava e tasi?

Ua tau mai e le lalolagi ia i tatou e faapea o le filemu e faatoa mafai ona lagonaina pe a leai se feteenaiga. Ae e le moni lena mea! E ala mai i Lana talalelei, e tuuina mai e Iesu Keriso ia i tatou se filemu i le loto lena e sili atu i le filemu ua ofoina mai e le lalolagi. Afai tatou te vaai atu ia te Ia ma le faatuatua, e mafai ona tatou lagonaina le filemu i soo se tulaga lava.

Na aoao mai le Faaola, “Ou te tuuina atu ia te outou le manuia, o lou manuia ou te avatu ai ia te outou: ou te le avatu ia te outou, faapei ona avatu e le lalolagi” (Ioane 14:27; faaopoopo le faamamafa). O nisi nei o auala e ese ai le filemu a le lalolagi mai le filemu a Iesu Keriso.

O Le Filemu i le Lalolagi

E tatau ona oo vave mai le filemu—e le tatau ona tatou faatalitali i ai!
E le mafai ona e maua le filemu i taimi o faigata.
O le filemu o le leai o se taua.
E oo mai le filemu e ala mai i le ola i soo se auala e te manao e ola ai.
O le ioeina o ou sese ma vaivaiga e le aumaia ai le filemu.
E oo mai le filemu i le na o le taulai atu lava i ou manaoga.
E oo mai le filemu i le sailia o le faamaoniga a isi.
E tatau ona tatou taumafai e saunia lo tatou lava filemu.

Filemu ia Keriso

O nisi taimi e tatau ona tatou faatali mo le filemu—ae “aua le fiu. … Ia talitonu i le Atua ma talitonu i mea lelei o le a oo mai.”¹
E mafai ona oo mai le filemu i le totonugalemu o tofotofoga.
E mafai ona maua le filemu i soo se tulaga lava.
E oo mai le filemu i le ola ai i le talalelei ma usiusitai i poloaiga.
O le salamo faamaoni e aumaia ai le filemu. “O le matagofie o le upu salamo o le folafolaga lea o le sola ese mai faafitauli tuai ma amioga tuai ma faanoanoaga tuai ma agasala tuai. O se tasi o faamoemoega sili ma faamalosiau—ioe, o upu e sili atu ona filemu—i le talalelei.”²
E oo mai le filemu i le auauna atu ma avea ma se tasi e tausia le filemu mo isi.
E oo mai le filemu ao tatou saili ia avea ma soo e sili atu o Iesu Keriso.
“Le ituaiga o filemu … o le taui folafolaina o le amiotonu … o se meaalofa folafolaina o le misiona ma le taulaga togiola a le Faaola.”³

Afai tatou te faia Iesu Keriso ma taulaiga o o tatou olaga, o le a tatou lagonaina moni lava o Ia ua “fetalai mai le filemu i o matou agaga” (Alema 58:11). O le a tatou oo i ni taimi faigata i lenei lalolagi, ae ua faamanuiaina i tatou i le iloaina o loo i ai se tasi e mafai ona tatou liliu atu i ai i soo se tulaga faigata lava. Na fetalai le Faaola, “Ua ou fai atu nei mea ia te outou, ina ia outou maua le manuia ia te au. E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33). Ona o le Togiola a le Faaola, ua maua ai le filemu i le aso ma le faavavau.