Fesili & Tali
E mafai faapefea ona ou fai atu i a’u uo e aua le talanoa ma le le alofa po o le le talafeagai e uiga i isi?
O le faitala, upu le alofa, upu masoa—atonu na e faalogo i nei mea uma lava ao e savali i ala savali i le aoga. O nisi taimi o au uo o i latou na e faia lena mea, ma e te ono lagonaina le le mautonu ma le iloa pe faapefea ona tali atu, ae e mafai ona e faia se eseesega e ala i le avea ma se faataitaiga lelei.
E ui lava e le o se mea malie le tetee atu i isi, ia manatua “O le palauvale, upu masoa, po o gagana ma taga e le tusa ai ma le vafealoai, faapea foi ma tala tausua i mea valea po o mea leaga, e faatiga ai le finagalo o le Alii faapea foi ma isi.“1 E tusa lava pe a fai faamalie, o upu le alofa e tiga pea.
Afai e fai e au uo ni mea le talafeagai pe le alofa e uiga i isi, “ia fautuaina lelei ma le alofa i latou e filifili nisi upu e faaaoga. Afai e faaauau pea ona latou faia, ia e savali ese ma le faaaloalo pe sui foi le mataupu e talanoaina.”2 Faamatala atu e faapea e te talitonu o tagata uma lava o fanau a le Atua ma e tatau ai ona faaaloalogia. Filifili ia avea ma se uo e lagolago atu i tagata uma nai lo le avea ma se fili e faitioina ma tuua isi i lalo. O lau faataitaiga malosi o le a avea ma se faataitaiga aoga mo au uo.
Ua aoao mai le Mo le Malosi o le Au Talavou e faapea “o se gagana mama ma atamai o se faamaoniga lea o se mafaufau atamai ma le lelei.“3 Ia atagia mai ia outou upu a outou talitonuga, ma o le a mafuta le Agaga ma outou e tuuina mai le taitaiga i nei tulaga faigata.
Ma ia tu atu ma le mautinoa—o uo moni o le a faaaloalogia oe ma lau filifiliga e faaaoga gagana mama, ma lelei na e faaalia ai uiga lelei o isi.
Fesoasoani i Isi ia Tumau le Mafaufau Lelei
Na matou maua ma au uo ni taulima, ma o taimi uma lava e fai ai e se tasi o i matou se mea le lelei e uiga i se tasi, o le a matou fikiina le taulima a lena tagata. O se faamanatu faifai pea lelei lea e faatumauina ai o matou manatu ma upu ia lelei.
Caroline J., 18 tausaga, Iuta, ISA
Ole atu mo le Fesoasoani a le Atua
O le tatalo o le a fesoasoani ia te oe e maua ai le malosi mai le Atua ina ia iloa ai le ala e talanoa atu ai i isi. Muamua, ole atu i le Atua ina ia iloa le tala e fai atu i au uo. Ia ole atu foi ia te Ia e fesoasoani i au uo ina ia malamalama i le taua o le vaai atu i tagata uma o ni fanau pele a le Tama Faalelagi. Faamamafa atu le taua o le vaai atu i mea e sili ona lelei i tagata ae le o le fai atu o mea leaga e uiga ia i latou.
Victória Kércia M., age 19, Piauí, Pasila
Taliaina Eseesega ma le Alofa
E tatau ona iloa e au uo, ona e eseese uma lava o matou malosiaga, e mafai ona matou faamanuiaina le tasi ma le isi. E ui lava i le le atoatoa o tagata, e tatau ona i ai pea lo tatou alofa sili atu mo i latou, ma e tatau foi ona tatou talitonu i le mana e sui ai lena mea o loo maua i le taulaga togiola a le Faaola.
Esther M., 19 tausaga, Mbujimayi, Temokalasi Ripapelika o Congo
Ia Tautala Sao
E mafai ona e tau sao atu lava i au uo ma le agalelei, “E, tuu lena mea. Ou te le fiafia i ai,“ po o le “Faamolemole aua le tautala faapena. E le faaaloalo.” I mea uma lava, o le tasi o poloaiga sili e lua o le “e te alofa atu i le lua te tuaoi ia pei o oe lava ia te oe” Mataio 22:39).
Clayton P., 9 tausaga, Arisona, ISA
Sui La Latou Vaai
E mafai lava ona e tali faigofie atu ia i latou e faapea o le mea o loo latou faia e le sao ma e tatau ona latou taumafai ia faafiafia se isi nai lo le faanoanoa. E mafai foi ona e fesili atu ia i latou pe o le a so latou lagona pa afai o latou o loo taliaina upu le agalelei mai isi tagata. Fesoasoani ia i latou ia vaai i le tulaga mai se isi vaaiga. E ala i le fesoasoani i isi tagata ina ia lelei atili, o le a mafai ona e lagonaina e le aunoa le Agaga, ma o le a faamanuiaina oe e le Alii mo au faatinoga amiotonu.
Darren O., 15 tausaga, Iuta, ISA
Ia Maua le Lototele
E pei lava o Eseta, o Iosefa Samita, Iosefa o Aikupito, ma le tele lava o isi tagata o tusitusiga paia, e mafai ona e maua le lototoa e taofia ai au uo mai le tautatala le lelei e uiga i isi. Na ou i ai foi i lena tulaga lava e tasi, ma na ou maua le lototoa e talanoa ai i au uo i se auala agaalofa ma le malamalama. I le iuga, na latou taliaina ma malamalama i le taua tele o le faaaogaina o le gagana mama ma lelei! E ese mai le faitauina o tusitusiga paia ma le tatalo, e fesoasoani tele le anapogi i na tulaga. Tatalo ma ole atu i le faatuatua e faapea o le a tuuina mai e le Tama Faalelagi ia te oe le lototoa e tautala atu ai ma pai atu i loto o au uo.
Paola H.,17 tausaga, San Salvador, El Salvador
Avea ma se Faataitaiga
O le ala sili e fai ai lenei mea o le avea lea ma se faataitaiga lelei. Ia avea ma tagata muamua e fai atu tala lelei ma manaia e uiga i soo se tasi o loo talanoaina. O le a e ofo i le vave tele ona mafai ona suia le talanoaga.
Elder Eads, 24 tausaga, Misiona o Korea Seoul i Saute
Faamatala taunuuga o Manatu le Lelei
Tau atu i au uo le tele o aafiaga ma fegalegaleaiga lelei ma isi tagata o loo latou misia. Faamatala atu o le faia o upu palauvale e le lelei aua e te taumamao ai mai isi tagata ma palapala ai lou mafaufau. Ma le isi foi, e alofia oe e tagata lelei pe afai e te faaaogaina gagana leaga.
Elisa Ferreira S.,16 tausaga, Minas Gerais, Pasila