Pe Faapefea ONA OU FAALELEIA LO MA VA ma le Atua

Saunia e Elder Massimo De Feo

O Le Fitugafulu

Ina ua 12 ou tausaga, na amata ona ou mafaufau moni lava e uiga i le ala e mafai ai ona ou aafia i le talalelei.

Sa ou nofo i lau taulaga o Taranto, Italia. Ua na o ni nai tausaga talu ona ma feiloai ma lou uso i faifeautalai ma avea ma tagata o le Ekalesia, ae ua amata ona ou lagonaina le naunau e auai atili. Na amata ona ou lagonaina se naunautaiga e tufa le faamanatuga. Ou te manatuaina le savali atu i le lotu i aso Sa taitasi faatasi ma se tatalo i lou loto e faapea o le a valaaulia au e tufa le faamanatuga.

I se tasi o taeao o le aso Sa, na valaau mai ai le peresitene o le paranesi ia te au i lona ofisa. Na ia fai mai, “Massimo, e finagalo le Atua ia te oe ia mauaina le perisitua ma faauuina o se tiakono.”

Ina ua ou faalogo i na upu—“e finagalo le Atua ia te oe”—na taia au e se mea. Na ou lagonaina e faapea e le o se tagata ua fai mai ou te faia se mea, ae o le Atua moni lava ua tuuina mai se tiutetauave. Ina ua vaai mai le peresitene o le paranesi ia te au, na ou lagonaina ua aapa mai le Alii ia te au.

Ao ou amata ona tufa atu le faamanatuga i aso Sa taitasi, na mafai ona ou lagonaina le mana o le faaleatua i lou olaga. Na ou lagonaina le faatuatuaina, na ou lagonaina le auai, ma na ou iloaina e faapea sa ou faia le galuega a le Alii. Sa ou lagona le sili atu o le latalata ia te Ia e ala i le auauna atu ia te Ia.

O lenei aafiaga o le lagonaina o le aao o le Alii e ala mai i ou taitai e faapea foi i au tiutetauave na fesoasoani ia te au e atiae ai se sootaga patino loloto ma Ia. Na ou manao ia sili atu le aafia i le talalelei; ao ou ola i lena auala, na ou lagonaina le faatasi mai o le Atua i lou olaga. O le atiina ae o lenei ituaiga o sootaga ma Ia o se tasi o mea e sili ona taua e mafai ona e faia i lou talavou.

Vaaia o le Alii i Ou Taitai

Ao ou feiloai atu i lau peresitene o le paranesi, na maua ai se uunaiga loloto faaleagaga ia te au ina ua ou lagonaina e faapea o le Atua lena, ae le na o lau peresitene o le paranesi, ua tuuina mai ia te au se tiutetauave. E ala i le iloaina o le Alii i lou taitai, na ou lagonaina le latalata atili atu ia te Ia, ma na faaleleia ai lo ma va ma Ia.

Afai e te malamalama o se talavou e faapea a e maua ni valaauga e tuuina atu ia te oe pe o loo e saofai i au vasega i le lotu, o loo e faalogoina upu a le Tama Faalelagi ma Iesu Keriso, ona e mafai ai lea ona vaai i le lotu i se auala ese—o se auala faaleagaga. O le a e manao ia auai i le galuega a le Alii. O le a e mafai ona maua ni aafiaga faaleagaga sili ma o le a lagonaina le latalata atili atu ia te Ia i aso Sa taitasi.

O le vaaia o le Alii i Sauniga

E mafai foi ona tatou atiina ae se sootaga patino ma le Alii e ala i le iloaina o Lona faatasi mai ao tatou auai i sauniga o le talalelei. Pe a tatou auai i sauniga—e pei o le faamanatuga—tatou te iloa ai e “faaalia ai le mana o le faaleatua” (MF&F 84:20). Ina ua ou tufaina atu le faamanatuga, e oo lava i le 12 po o le 13 o tausaga, na ou lagonaina moni lava e faapea sa avea au o se meafaigaluega i Ona aao. Na ou lagonaina le faatasi mai o le mana o le Atua i na sauniga ma na i ai le mana o le faaleatua i lou olaga. O le mauaina o lena aafiaga paia i vaiaso taitasi e ala i le iloaina o le Alii i lenei sauniga na fesoasoani ia te au e faaloloto ai lou sootaga patino ma le ma le Alii.

E le faatapulaaina lenei mea i le na o le tufaina o le faamanatuga. E mafai foi ona tatou lagonaina le mana o le faaleatua e ala i le tagofia o le faamanatuga i aso Sa taitasi. Pe a tatou tagofia le faamanatuga, e le tatau ona tatou faia o se mea mama pe faia mai lea taimi i lea taimi pe faaleano i ai. E tatau ona tatou mananao, filifili, ma saunia e tagofia le faamanatuga, o na mea uma o le a mafai ai ona tatou lagonaina le mana o le faaleatua i o tatou olaga. E tatau ona tatou faaaogaina le faamanatuga o se meafaigaluega mamana faaleagaga e faaleleia ai lo tatou va ma le Atua ma ia saunia ai i tatou lava mo luitau o le olaga i aso taitasi.

O Se Sootaga Patino Loloto

Filifili nei e atiina ae se sootaga patino loloto ma le Alii. O le latalata atili o lou lagona ia te Ia, o le faigofie foi lea ona auauna atu ia te Ia.

E aapa atu le Alii ia i tatou uma patino taitoatasi. Pe a tatou auai i le lotu, tatou te faalogoina Ana upu. Pe a tatou tagofia le faamanatuga, ua tatou faataunuuina Ana sauniga paia. Tatou te manaomia le iloaina o le faatasi mai o le mana o le Atua i o tatou taitai ma i sauniga ina ia mafai ai ona faalelei lo tatou sootaga patino ma Ia.