Tuuina Atu o Ou Popolega i le Atua
E alala le tusitala i Maule, Chile.
Ina ua ou iloaina na i ai ni tauiviga ogaoga a lau uo, sa ou taumafai e saili le filemu.
Ata na faaalia e se tagata e faataitaia
Ina ua le alu atu lau uo o Fernanda (e le o lona igoa moni) i le vasega i se tasi aso Faraile, na ou mafaufau po o le a le mea ua tupu. “Pe ua mai Fer? Pe o manuia o ia?” Na ou fesili ai ao ou tamoe atu i nisi o uo i le faaiuga o le aso. “E le o mai o ia,” na tali mai ai se isi uo, “e na ona alu lava o ia i se fomai o le mafaufau,” Ina ua ou fesili atu pe aisea, na ia tau mai ia te au e faapea na afaina Fernanda i le faavauvau ma na faatamaia o ia lava. E lei umi lava ona ou iloaina, ae tuuina atu loa Fernanda i le falemai mo togafitiga, ma na matou le vaaia o ia mo ni nai vaiaso.
E ui lava o i maua o ni uo, na te lei faasoaina mai lena vaega o lona olaga ia te au. Na ia nanaina lena mea mai tagata uma aua na maasiasi o ia. Na ia tau mai ia te au mulimuli ane e faapea na ia le manao e faanoanoa nisi ia te ia ma lona tulaga. Ae ou te lei faanoanoa ia te ia—na ona ou lagonaina le agaalofa.
O lena aso muamua, na ou taoto ai i lou moega ina ua tuua le aoga, ma sulu lou ulu i le aluga. Na ou lelava lava faalelagona ae na popole tele na le mafai ai ona moe. Na pogisa lou lalolagi. Na ou lagonaina e pei sa ou i ai i le totonugalemu o se afa, ma na tele ni mafaufauga ma lagona na featofai i le matagi. Na ou lagonaina le fenumiai, tuuatoatasi, ma, o le mea sili, o le matuai leai o se mana e fesoasoani atu ai.
E Faapefea Ona Ou Fesoasoani?
O le a le mea e mafai ona ou faia pe fai atu e fesoasoani ai ia te ia? E faapefea e i matou o uo ona tuufaatasi ma tuuina atu la matou lagolago? Na ou le mafai ona maua se ituaiga o fofo e faamafanafana ai au uo po o au lava ia. Na ou tatalo mo le uunaiga ae na ou lagonaina e pei o au tatalo e lei taliina mai.
Ae o le vaiaso na sosoo ai na ou maua ai se uunaiga. Na ou nofo i totonu o lau vasega o le seminare i le taeao ina ua faamanatu mai e lou faiaoga ia i matou le Uluai Faaaliga ma le ala na fesili sao atu ai Iosefa Samita i le Tama Faalelagi mo le fesoasoani i ona faigata ma popolega. Ona fai mai lea o lou faiaoga, “Afai tatou te saili atu i le Tama ma fesili atu ia te Ia, o le a Ia tali mai ia i tatou. O le a le tuua lava na o i tatou.”
Na ou iloaina i lou faanoanoa, na ou tapunia ai lou loto mai lou Tama Faalelagi. E ui lava na ou taumafai soo e tatalo, ae na le lava—na tele naua lou fefe e maua ai le filemu. Na ou iloaina e faapea na Ia malamalama lelei lava i ou lagona ma e mafai ona Ia fesoasoani ia te au. Ae na ou manaomia ona tatala atu au lava ia te Ia ma talitonu moni lava e mafai ona Ia faia—na ou manaomia le faatinoina o le faatuatua.
O lea sa ou faia ai. Ina ua mavae se taimi, ao ou faaauau ona tatalo ma faitau au tusitusiga paia, ma tauivi e tuu atu i le Faaola e tauave au avega, na oo ina ou malamalama e faapea e iu lava ina uma le atuatuvale o lau uo. E ui lava o le mea moni na faaauau pea le fenumiai faaletino, na ou lagonaina le toa, paleni lelei, i le filemu. Na faaauau ona faamalosiau mai lou tina ia te au ia saili atu i le filemu, ma faapea mai, “O le a manuia lau uo ma e faapena foi oe. Tumau le malosi i le talalelei, ma o le a lelei mea uma.“
Lagolagoina o Lau Uo
Ina ua iu lava ina toe sau Fernanda i le aoga, na mafai ona ou saunia e lagolago malosi o ia, ae pau le mea na mafai ai ona sa ou saili atu ma mauaina e au lava ia le filemu e ala mai ia Iesu Keriso. Na ou taumafai i le mea sili ia avea ma se tagata e faalogo lelei, ia talanoa fiafia, ma faasoa atu le talalelei. Na ou lagonaina le toa pe a ou faamatalaina atu le fuafuaga o le fiafia ma ina ua ou tau atu ia te ia e finagalo lo tatou Tama ia tatou maua le olioli, e ui lava i o tatou luitau. Atonu e alu ai se taimi, ae e mafai lava mo tagata uma o Ana fanau.
Na tele lava ni tulaga i lou olaga na ou lagonaina ai le ita ma le faanoanoa, ae ona o le talalelei ou te manatuaina lava le mea na ou sau ai. Ou te iloaina o au o se afafine o le Atua ma e i ai Sana fuafuaga mo au—ma mo Fernanda. Tatou te savavali uma lava i ni auala eseese, ae o auala taitasi e mo lo tatou lelei aua e alofa o Ia ia i tatou. O auala taitasi, o faigata taitasi, o loo i ai se faamoemoe. Ma afai tatou te mafai ona mauaina le filemu i na faigata, e mafai ona tatou faasoa atu le filemu tatou te mauaina i isi.