O Iesu Keriso: O La Tatou Punavai o le Filemu

Saunia e Elder M. Russell Ballard

O Le Korama a Aposetolo e Toasefululua

Mai se saunoaga i le konafesi aoao ia Aperila 2002.

O le filemu mo o tatou loto mafatia e faatoa oo mai ao tatou mulimuli i le Malamalama o Keriso.

I le faaiuga o se aso atoa o le aoao atu ma faatonuga, na fautuaina ai e le Alii Ona soo ina ia latou sopo atu i le isi itu o le Sami o Kalilaia.

Ao latou malaga atu i lena po, “na to mai lea o le afa, o le matagi tele lava, ona fati mai ai lea o peau i totonu o le vaa, ua tumu ai.

“Ao ia sa i le taumuli, ua tofa ai i le aluga: ona latou fafagu lea ia te ia, ma fai mai ia te ia, Le Aoao e, e te le manatu mai ea ia te i matou a fano?

“Ona tulai lea o ia, ua na vavao atu i le matagi, ua fetalai atu foi i le vai, Faalologo ia, ina malu ia. Ona mate lea o le matagi, i le ua matua malu” (Mareko 4:37–39).

Pe mafai ona e vaai faalemafaufau i mafaufauga o Aposetolo ao latou vaai atu i elemene uma—le matagi, le timu, ma le sami—ua usiusitai i le poloaiga filemu a le Matai? E ui lava faatoa uma ona valaaulia talu ai i latou i le tofi aposetolo paia, na latou iloaina o Ia ma na latou alolofa ia te Ia ma talitonu ia te Ia. Na latou tuua la latou galuega ma o latou aiga ina ia mulimuli ia te Ia. I se taimi puupuu lava, na latou faalogo ai ia te Ia o aoao mai ni mea faigata, ma na latou vaai ia te Ia o faia ni vavega ofoofogia. Ae o lenei mea na sili atu i lo latou malamalama, ma atonu na faaalia i o latou foliga vaaia.

“Ona fetalai atu lea o Ia ia te i latou, Se a le mea tou te fefefe ai faapea? Se a le mea tou te le faatuatua mai ai?

“Ona matua matatau lava lea o i latou, ma fetautalatalaai i latou, Po o ai lava lenei, ina ua faalogo lava le matagi ma le vai ia te ia?“ (Mareko 4:40–41).

I taimi o le le mautonu ma o nisi taimi e taufaafefe, o le folafolaga a le Faaola i le filemu e le iu ma e faavavau e mafai ai e i tatou ona mauaina le mana faapitoa, e pei lava o Lona mafaia ona faafilemuina peau malolosi atonu na matuai aafia ai lava i latou na faatasi ma Ia i le Sami o Kalilaia i lena po afa ua leva.

Mauaina o le Filemu i le Loto

E pei o i latou na soifua i le taimi o Lana galuega talai i le lalolagi, e i ai nisi o faatasi ma i tatou o e vaai mo le filemu ma le manuia faaletino o ni faailoga o le mana faavavega o le Faaola. O nisi taimi tatou te le malamalama ai e faapea o le filemu e faavavau ua folafola mai e Iesu o se filemu o le loto, e fanau mai i le faatuatua, e faatumauina e le molimau, e faafaileleina i le alofa, ma faaalia e ala mai i le usiusitai ma le salamo faaauau pea. O se filemu o le agaga lea e atagia mai i le loto ma le agaga. Afai e iloaina moni lava e se tasi ma lagonaina lenei filemu i le loto, e leai se fefe mai le lalolagi le mautonu pe fefinauai. E iloaina e se tasi i totonu lava o le loto o le a lelei mea uma e tusa ai ma mea e taua moni lava.

E leai se filemu i le agasala. Atonu e i ai le lagona lelei, tautaua, lauiloa, ma e oo lava i le mauoa, ae e leai se filemu. “E lei avea lava le amioleaga ma fiafia” (Alema 41:10). E le mafai e se tasi ona maua le filemu pe afai o loo ola i se olaga e le ogatusa ma upumoni faaalia. E leai se filemu i le agaleaga po o le fefinauai. E leai se filemu i le le mafaufau, ola le mama, po o le taliaina o amioga le talafeagai. E leai se filemu i le mausa o fualaau faasaina, meainu malolosi, po o ponokalafi. E leai se filemu i le faasaua i isi i soo se auala, pe faalelagona, faaletino, pe faalefeusuaiga, aua o i latou e sauaina o le a tumau i le faaletonu i le mafaufau ma le agaga seia latou o mai ia Keriso i le lotomaualalo uma ma saili le faamagaloga e ala i le salamo atoatoa.

I se tasi taimi po o se isi foi ou te talitonu o tagata uma lava e faananau atu mo “le manuia foi mai le Atua, o loo silisili lava i mea uma e manatu i ai” (Filipi 4:7). O lena filemu mo o tatou loto mafatia faatoa oo mai ia i tatou ao tatou mulimuli i le Malamalama o Keriso, lea e “tuuina mai i tagata taitoatasi, ina ia mafai ona iloa e ia le lelei mai le leaga;” (Moronae 7:16), ao ia taitaiina i tatou ia salamo i agasala ma saili le faamagaloga.

“Ou Te Tuuina Atu Ia Te Outou Le Manuia“

Toe lava o ni nai itula ao lei amataina e Ia lena faagasologa mamalu ae e mataga o le Togiola, na faia ai e le Alii o Iesu Keriso lenei folafolaga matagofie i Ona Aposetolo: “Ou te tuuina atu ia te outou le manuia, o lou manuia ou te avatu ai ia te outou” (Ioane 14:27).

Pe na Ia folafola atu i Ona soo pele le ituaiga filemu e masani ai le lalolagi—o le saogalemu, puipuiga, e aunoa ma le feteenai po o le fefinauai? E mautinoa lava o faamaumauga o le talafaasolopito o le a fautuaina se isi vaega. O na uluai Aposetolo na iloaina le tele o le faigata ma le sauaina i le taimi o totoe o o latou olaga, atonu o le ala lea na faaopoopo atu ai e le Alii lenei vaaiga i Lana folafolaga: “Ou te le avatu ia te outou, faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).

“Ua Ou fai atu nei mea ia te outou, ina ia outou maua le manuia ia te au; na Ia faaauau ai. “E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33); faaopoopo le faamamafa).

O le filemu—filemu moni, le agaga atoa i le totonugalemu o lou tagata—e faatoa oo mai e ala mai i le faatuatua i le Alii o Iesu Keriso. Pe a mauaina lena upumoni pele ma malamalama i mataupu faavae o le talalelei ma faaaogaina, e mafai ona faamamaina le filemu sili i totonu o loto ma agaga o fanau a lo tatou lo tatou Tama Faalelagi. Na fetalai mai le Faaola e ala mai ia Iosefa Samita, “Aoao mai ia te a’u, ma faalogo mai i a’u upu; savali i le agamalu o lo’u Agaga, ma o le a e maua ai le filemu ia te a’u” (MF&F 19:23).

Ou te faafetai ua mafai ona ou molimau atu ia te outou e faapea o Iesu o le Keriso, le Alo o le Atua. E ala i le mulimuli ia te Ia, i le faatuatua ma le talitonuina, e mafai ai e tagata uma ona maua le filemu matagofie i le loto ua ofoina mai e le talalelei ia i tatou.