I le Pulelaa

Na Faaali Mai e Le Atua ia te Au

Saunia e Rachel H. Leatham

O lenei faagasologa fou ua faasusulu mai ai olaga o tamaitai naunautai ma a latou savali, na sii mai le tusi I le Pulelaa: 185 Tausaga o Aoaoga na saunia e Tamaitai o le Au Paia o Aso e Gata Ai (2017). O mataupu filifilia e maua i le churchhistorianspress.org/at-the-pulpit.

Ata pue o Rachel Leatham i faaaloaloga a le Faletusi o le Talafaasolopito o le Ekalesia; faavaa mai le Getty Images

E FAATATAU IA TUAFAFINE LEATHAM

O Rachel Hannah Leatham (1884–1979) na avea ma tamaitai lona lua na faaaofia i le lipoti aloaia o le konafesi o le Ekalesia ina ua ia talanoa atu i se sauniga faaopoopo i fafo o le konafesi aoao i le aso 5 o Aperila, 1908.

O ia o se tasi o le tupulaga muamua o tamaitai e lei faaipoipo na auauna atu faafaifeautalai i se misiona mo le Ekalesia. Ina ua 22 ona tausaga, na tofia o ia e auauna atu i le Misiona a Colorado ia Setema i le 1906.

I lona toe foi atu i le Aai o Sate Leki i le 1908, na ofo atu ai Sister Leatham e galue fua o se tagata taiala i le Fale mo faamatalaga i le Lotoa o le Malumalu. Na tatala le ofisa i le 1902 faatasi ai ma se faamoemoega e saunia faamatalaga sao ma tufaina atu tusi o le Ekalesia ia i latou o e asiasi atu i le Lotoa o le Malumalu.

I lena vaitau, na faia le konafesi aoao i le Tapeneko i le Lotoa o le Malumalu. A tumu le Tapeneko, e faasino atu tagata e auai mai i sauniga i fafo i le Fale Tele e latalata ane. A tumu le Fale Tele, e faapotopoto tagata i le lotoa i talaane o le Fale mo Faamatalaga, lea e fai ai lotu mo sauniga i fafo o le konafesi.

O lenei savali o se tusiga o le saunoaga na tuuina atu e Sister Leatham i le konafesi aoao i le sauniga i fafo i le aso 5 o Aperila, 1908. Ua faalaugatasia faailoga ma mataitusi tetele.

Ou te manatu o au o se tasi o teine e sili ona fiafia i le lalolagi atoa, ma o le talalelei ua mafai ai ona ou maua lenei lagona, aua ou te iloaina e moni le talalelei. Ou te iloaina o le Atua lo tatou Tama, ma Lona Alo, o Iesu Keriso, na afifio mai i lalo ma aumai le talalelei ma faatuina ma talanoa atu i le Perofeta o Iosefa Samita. …

Ou te lagonaina e faapea afai e mafai ona ou ola pea i le faavavau, e le taitai lava ona lava lau faafetai i lou Tama Faalelagi mo faamanuiaga na sa oo mai i lou olaga, mo le faamanuiaga o le alu atu i le lalolagi ma tuuina atu lenei molimau, ma tau atu ia i latou le talalelei ua toefuataiina, le pule na tuuina mai e Keriso i Ana auauna, ma faamanuiaga ua teuina mo i latou o e faalogo ma usiusitai i upu o le upumoni, le olaga, ma le faaolataga. …

O nisi taimi ou te mafaufau ai e faapea o i tatou o tagata talavou i le fale e le iloaina atoatoa tiutetauave o loo i o tatou luga. Tatou te le manatua i taimi uma e faapea o i latou o loo taitaia i tatou ua matutua, ma afai e maliliu o tatou matua, o le a pau mai i o tatou luga le faaauauina o la latou galuega; o i tatou o tagata faatuatuaina o le lumanai o Siona. Pe o tatou faia ea la tatou vaega, ma pe o tatou saunia i tatou lava ina ia mafai ona tatou faia le galuega na faia e o tatou matua?

… Pe mafai ona tatou tau atu i isi folafolaga na tuuina mai e le Atua ia i tatou, pe afai o le a tatou tausia Ana poloaiga? Pe ua tatou masani i le talafaamaumau o tagata anamua o lenei konitineta, le Tusi a Mamona? Ma pe o tatou masani i upumoni sili o loo aoaoina i totonu ma i na tusi na e aoaoina i tatou i le matagofie o le galuega o loo tatou galulue ai nei? Ou te fefe ona e le o lava lo tatou masani lelei i mataupu faavae o le talalelei ma tatou te le o filiga e pei ona tatau ona tatou faia.¹

O le ua tuuina atu i ai mea e tele, e sueina atu i ai mea e tele; ma tou te iloaina, outou uma taitoatasi, o le a le tele ua tuuina mai ia i tatou, ma o le a le tele o le a sueina mai i o tatou lima [tagai i le Luka 12:48; MF&F 82:3]. Pe ua tatou saunia i tatou lava ina ia tatou le toilalo i le faataunuuina o o tatou tiutetauave? Tau ina ia tatou ola i upu uma e tulei mai i le fofoga o le Atua [tagai i le Teuteronome 8:3; Mataio 4:4; MF&F 84:44]. Tau ina tatou ola ina ia mafai ona Ia naunau pea lava pea ia faia i tatou ma Ana fanau, ma faamanuia mai i tatou, ma alofa ia i tatou.

… Ou te toe fia fai atu e faapea ou te iloaina e moni le talalelei. E le faapea ona e iloa e lou tama, e le faapea ona na aoaoina ai pea au e lou tina, ae ou te iloaina e moni le talalelei aua na faaalia mai e le Atua ia te au. Na molimau mai Lona Agaga i lou agaga [tagai i le Roma 8:16], ma o lena molimau o le meaalofa sili lea ona pele a le Atua mo au.

Tau ina ia faamanuia mai le Atua ia i tatou uma lava, ou te ole atu ai i le suafa o Iesu, amene.

Tusiga mai ia Jennifer Reeder ma Kate Holbrook, eds., At the Pulpit: 185 Years of Discourses by Latter-day Saint Women (2017), 133–35.Faamatalaga

1. O tusi a Sister Leatham i masina taitasi i lana peresitene o le misiona na faaalia ai lona filiga. I le aso 25 o Fepuari, 1907, na ia tusi ai, “Na ou taumafai e faia lou tiute ma ua mauaina le faamalieina sili i au galuega“ (Colorado Denver South Mission General Minutes, 166).